Pathian Duhzâwng Leia Tih A Nih Hunah Chuan

ISUA’N a zirtîrte hnêna, “I duhzâwng vâna an tih angin leia mi’n ti rawh se,” tia ṭawngṭai tûra a zirtîr khân, vânah a Pa hnêna awm tawh a nih avângin, a thiltawn ngei chu a sawi a ni. (Matthaia 6:​10; Johana 1:​18; 3:​13; 8:​42) Ani chuan mihringa a lo chan hmain, lei leh vâna thil thleng rêng rêng hi Pathian duhzâwng nêna a inmil vek lai chu a hria a. Chûng hun chu hun hlimawm leh lungawithlâk tak a ni.​—Thufingte 8:​27-31.

Pathian thil siam hmasa ber chu ‘a vântirhkohte, a thu ngaithlaa, a thu zâwm ṭhîn, chaknaa ropuite’ an ni a. Anni chu “a duhzâwng ti ṭhîn, a rawngbâwltute” an ni reng a ni. (Sâm 103:​20, 21) Vântirhkoh tinte chuan mahni duhzâwng an nei ṭheuh em? Nei ṭheuh ve, leilung siam a nih lai khân, hêng “Pathian fate zawng zawng hi an au” a ni. (Joba 38:7) An auhna chuan Pathian duhzâwng thiltih an lâwmzia a lantîr a, an duhzâwng chu Pathian duhzâwng nên an inremtîr a ni.

Pathianin leilung a siam hnuah mihringte luah atân a buatsaih leh a, chutah mipa leh hmeichhe hmasa ber a siam ta a. (Genesis, bung 1) Chu pawh chuan auh a phu em? Pathian thâwk khum thuziak chuan heti hian a sawi: “Pathianin a thil siam tinrêng chu a en a, ngai teh, ṭha a ti êm êm a,” tiin. Ni e, hmêlhemna a nei lo, a ṭha famkim a ni.​—Genesis 1:31.

Kan nu leh pa hmasa berte leh an fate tâna Pathian duhzâwng chu eng nge ni? Genesis 1:28 sawi angin, chu pawh chu thil ṭha tak a ni: “Pathianin anmahni mal a sâwm a: Pathian vêkin an hnênah, ‘Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,’ a ti a.” Chu hna ropui tak chu hlen chhuak tûr chuan, kan nu leh pa hmasa berte chu an nun reng​—chatuana an nun reng—​a ngai a, an fate pawh an nun reng a ngai a ni. Engmahin chhiatna râpthlâk tak te, hleih neihna te, lungngaihna te, a nih loh leh thihna te a awm ang tih a sih hmuh lo.

Chu chu lei leh vâna Pathian duhzâwng tih hun lai a ni a. A duhzâwng titu apiangte chuan a duhzâwng tih chu nuam an ti êm êm a ni. Mahse, eng thil dik lo nge lo thleng ta?

Beisei loh tak maia Pathian duhzâwng chona a lo chhuak a. Chu chu chhân theih loh thil chu a ni lo. Mahse, chu chuan mihringte tâna Pathian duhzâwng chungchâng hriat thiam tiharsatu hun rei tak chhûng lungngaihna leh lungchhiatna a awmtîr a. Chûng chu kan tuar vek a ni. Chu chona chu eng nge ni?

Hel Hun Chhûnga Pathian Duhzâwng

“Pathian fate” zînga pakhat chuan mihringte tâna Pathian duhzâwng tihchhiat theih dân kawng a hmu ta tlat mai a, hlâwkpui chu a tum a ni. Chu thlarau thil siam chuan a ngaihtuah ngun poh leh a theih lehzual niin a hria a, tih a châk tawlh tawlh mai a ni. (Jakoba 1:​14, 15) Nupa tuak hmasa berte chu Pathian thu aia a thu a âwihtîr theih phawt chuan, Pathian chu amah dotu lalchungnunna awmtîr phal tûra tihluih theih a ni ang tiin a chhût a ni thei ang. Pathian chuan anni chu tihlum se chuan a thiltum a hlawhchham dâwn avângin, a tihlum lo vang a, a thiltum chu thlâkin, A mihring siamte’n a thu an âwih zâwk tâk a thlarau fa thuneihna chu a pawm mai ang tiin a ngaihtuah a ni thei bawk. Chu hel hmang chu a hnuah chuan inhmeh takin Setana tia koh a ni a, chu chu “Dodâltu” tihna a ni.​—Joba 1:6.

A châkzâwng tihpuitlin nân, Setana chuan hmeichhia chu a pan a. Pathian duhzâwng chu ngaihthah a, mahnia dingchang tûrin hetiang hian a fuih a ni: “Thi teh suh e . . . a chhia leh a ṭha hriain Pathian ang in lo ni dâwn,” tiin. (Genesis 3:​1-5) Chu chu hmeichhe tân chuan zalênna a ang ta riau mai a, nun kawng ṭha zâwk ni âwm taka lang chu a pawm ta a. A hnuah a pasal pawh amah zâwm ve tûrin a thlêmthlu bawk a ni.​—Genesis 3:6.

Chu chu Adama leh Evi tâna Pathian duhzâwng a ni lo. Anmahni duhzâwng liau liau a ni. Tin, chu chuan chhiatna râpthlâk tak a rah chhuak ang. Thuawih lohna chuan boralna a thlen dâwn tih Pathian chuan a hriattîr tawh si a. (Genesis 3:3) Pathian tel lova hlawhtling thei tûra siam an ni lo hrim hrim a. (Jeremia 10:23) Chu bâkah, ṭha famkim lo an lo nih phah ang a, an ṭhat famkim lohna leh thihna chu an thlahte chungah hlanchhâwn a ni tawh dâwn a ni. (Rom 5:12) Chûng chu Setana chuan a sût thei lo.

Hêng thilte hian mihring leh lei atâna Pathian thiltum, a nih loh leh duhzâwng chu kumkhua atân a tidanglam em? Tidanglam lo. (Isaia 55:​9-11) Mahse, chinfel ngai thu buai a siam chhuak ngei mai: Setana sawi angin mihringte chu “a chhia leh ṭha hriain Pathian ang” an ni tak tak thei em? tih chu. Thu danga sawi chuan, hun tam tâwk pêk kan nih chuan nun kawng zawng zawngah hian dik leh dik lo te, thil ṭangkai leh mi tina theite chu keimahni’n kan hre hrang thei em? Pathian rorêl dân chu a ṭhat ber avângin a thuawih pum hlûm a phu em? A duhzâwng chuan zawm ṭhak a phu em? Hêngte hi engtin nge i chhân ang?

Thil siam finna nei zawng zawngte hmaah chu thu buai chinfel dân chu kawng khat chauh a awm: An hlawhtlin leh tlin loh hriat nâna chûng Pathian laka inlâk hran duhtute an duh anga kaltîr phal chu. Anmahni tihhlum rîkngawt mai chuan thu buai chu a chingfel dâwn lo va. Hun rei tak chhûng mihringte mahni inrêlbâwltîr phalna chuan a chingfel dâwn a ni​—a rah chhuah chu a lo lan chian dâwn êm avângin. Pathianin hmeichhe hnêna fa a neih tûr thu a hrilh khân, hetiang zâwnga thu buai chinfel a tum thu a târ lang a. Tichuan, mihring chhûngkaw nun chu a inṭan dâwn a ni. Chuvângin, keini pawh hi kan lo pian theih phah ta a nih hi!​—Genesis 3:​16, 20.

Mahse, chu chu Pathianin mihringte leh hel hmang thlarau fa chu an duh apiang an tih a phal dâwn tihna a ni lo. Pathian chuan a lalchungnunna chu a thlahthlam lo va, a thiltum lah a kalsan hek lo. (Sâm 83:18) Chu chu a tâwp a tâwpa helna chawk chhuaktu tihboral a tumzia leh a rah chhuah ṭha lo zawng zawngte tihbo vek a tumzia hrilh lâwkna hmangin a sawi chiang a ni. (Genesis 3:15) Chuvângin, atîr aṭang rêngin mihringte hian hahdamna thutiam an nei a ni.

Chutih chhûng chuan, kan nu leh pa hmasa berte chuan anmahni leh an thlah lo la awm tûrte chu Pathian rorêlna ata an la hrang a. An duh thlannain rah ṭha lo a chhuah zawng zawngte dang tûr chuan Pathian tân a duhzâwng ti tûra an thiltih apiang thunun zêl a ngai dâwn a. Chu chu mahnia nun a phal lo tawp ang a ni dâwn a ni.

Mahse, mi mal tinte chuan Pathian rorêlna chu an thlang thei a. Tûn hun chhûng hian mite tâna Pathian duhzâwng chu an zirin, an theih ang tâwkin chu mi milin an nung thei a ni. (Sâm 143:10) Mahse, mihringte zalen pumhlûmna thu buai chu chinfel a nih hma loh chuan, buaina lakah chuan an fihlîm dâwn lo a ni.

Mi mal duhthlanna rah chhuah chu a lo lang nghâl a. Mihring chhûngkaw zînga nau piang hmasa ber, Kaina chuan “ama thiltihte a sual a, a unau thiltihte a fel avângin” a unaupa Abela chu a that a ni. (1 Johana 3:12) Chu chu Pathian duhzâwng a ni lo, Pathianin Kaina a vaukhân a, a hnua a hrem avângin. (Genesis 4:​3-12) Kaina chuan Setana ro inrêlhranna sawihmuh chu a thlang a; chutiang chuan “mi sual laka mi” a lo ni a. Mi dangte pawhin a kawng chu an zui ve ta a ni.

Mihring siam a nih hnu kum 1,500 chuangah chuan, “lei hi Pathian mithmuhin a chhe zo tawh a, lei hi inpâwngnêknain a khat zo ta bawk a.” (Genesis 6:11) Leilung chu tihchhiat vek a nih loh nân, vênghim tûra hma lâk vat a ngai a ni. Chuvângin, Pathian chuan khawvêl pum huap tuilêt thlentîrin hma a la ta a, mi fel chhûngkaw khat​—Nova, a nupui, a fapate, leh an nupuite chu a humhim a ni. (Genesis 7:1) Kan za hian an thlahte kan ni vek a ni.

Nova hun aṭanga tûn thleng hian, Pathian chuan a duhzâwng ti duh tak takte chu kaihhruaina a pe a. A kaihhruaina zawng apiangte a biak pawh dân ziak tûrin mi rinawmte a thâwk khum a ni. Chûng an inbiaknate chu Bible-ah chhinchhiah a ni. (2 Timothea 3:16) Ani chuan a hmangaihna avângin mi rinawmte chu amah nêna inlaichînna nei a, a ṭhian hial an nih a phal a. (Isaia 41:8) Tin, hêng mahnia ro inrêlna hun kum sâng tam tak chhûnga mihringte fiahna tawh khirh tak takte tuar thei tûra an mamawh chakna chu a pe bawk a ni. (Sâm 46:1; Philippi 4:13) Hêng zawng zawngte avâng hian lâwm tûr kan va ni êm!

‘I Duhzâwng Tih Ni Rawh Se’​—Hmaih Nei Lovin

Mihringte tâna Pathian duhzâwngah chuan tûn thlenga a thiltih tawh zawng zawngte bâk thil tam tak dang a la awm a. Kristian tirhkoh Petera chuan heti hian a ziak a ni: “A thutiam ang chuan vân tharte leh lei thar a chhûnga felna awmte chu kan beisei a ni,” tiin. (2 Petera 3:13) He entîr nei ṭawngkam hian mihringte chunga rorêltu sawrkâr thar leh chu sawrkâr hnuaia awm mihring tharte a kâwk a ni.

Zâwlnei Daniela chuan ṭawngkam tlang tak mai hmangin: “Chûng lalte nîah chuan vân Pathianin ram a rawn din ang a, chu chu a chhe ngai tawh lo vang a, . . . hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a ziak a ni. (Daniela 2:44) He hrilh lâwkna hian he khawvêl khaw lo tak tâwpna leh Pathian Lalram, a nih loh leh sawrkâra thlâk a nih tûr thu a sawi lâwk a ni. Chanchin ṭha a va ni êm! Tharum thawhna leh chu mi avânga leilung tihchhiat a hlauhawmna chu tûn lai khawvêla hluar tak inngeih lohnate leh mahni hma sialnate avânga lo awm a ni a, chûngte chu thil hlui a nih hun a lo thleng dâwn a ni.

Engtikah nge hêng hi a lo thlen ang? Isua zirtîrte chuan: “Chûng chu engtikah nge a lo awm ang? i lo kal lehna leh khawvêl tâwpna chhinchhiahna chu eng nge ni ang?” tiin an zâwt a. A chhânnaah Isua chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih a sawi tel a ni.​—Matthaia 24:​3, 14.

Tûnah chuan chu thu hrilh rawngbâwlna chu khawvêl pum puiah thawh a ni tih chu tlâng hriat a ni a. In vêngah pawh i hmuh ngei a rinawm a ni. Professor Charles S. Braden chuan a lehkhabu These Also Believe tihah chuan heti hian a ziak: “Jehova Thuhretute thuhrilhna hian khawvêl pum pui a tuam chhuak vek tawh a. He khawvêlah hian Lalram chanchin ṭha thehdarhna kawngah Jehova Thuhretute aia tlo leh taima sakhua pakhat tê mah a awm lo,” tiin. Thuhretute chuan he chanchin ṭha hi ram 230 chuangah ṭawng 400 dâwnin taima takin an puang chhuak a ni. He rawngbâwlna hrilh lâwk hi tûn ang rênga khawvêl pum huapa thawh chhuah a la ni ngai lo. Chu chu Lalramin mihring sawrkâr a thlâk hun tûr a hnaih tawhzia lantîrtu tam takte zînga pakhat a ni.

Isua’n a chanchin hrilh tûra a sawi Lalram chu Lal ṭawngṭaina min zirtîrnaa: “I ram lo thleng rawh se. I duhzâwng vâna an tih angin leia mi’n ti rawh se,” a tih ram nên a thuhmun a ni. (Matthaia 6:10) Ni e, chu Lalram chu Pathianin mihringte leh lei atâna a thiltum leh a duhzâwng tihfamkim nâna a hman tûr hmanrua a ni.

Chu chu engtihna nge? Thu Puan 21:​3, 4 hian chhâng rawh se: “Lalṭhutphah aṭangin aw ring takin, ‘Ngai teh, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,’ a tih ka hria,” tiin. Tichuan, Pathian duhzâwng chu leiah leh vânah tih a ni tak zet tawh ang​—hmaih nei lovin.a Chuta tel ve chu i duh em? (w04 4/15)

[Footnote]

[Phêk 5-naa milem]

Pathian laka inlâk hranna chuan chhiatna râpthlâk tak a thlen