Pathian Duhzâwng Tih A Ni Tawh Em?

“I duhzâwng vâna an tih angin leia mi’n ti rawh se.”​—Matthaia 6:10.

JULIO-A leh Christina-i te car hûn chu zu rui khalh motor-in a sû a, a alh ta hluah hluah mai a. An nupain an fate pali kânghlum lai chu râp takin an thlîr a. An fa naupang ber kum kaw mi chu mei alh zîng ata chhan chhuah a ni a; mahse, mei chuan a dam chhûng atân a taksa a kâng chhe vek a ni. A pa chuan a tuar hle a. “A chhia emaw, a ṭha emaw engpawh ni se, Pathian duhzâwng a ni a, kan hriat thiam a ngai a ni,” tiin amah leh a chhûngte chu a hnêm a.

Hetiang chi chhiatna râpthlâk tak a thlen hian, mi tam tak chuan chutiang bawkin an chhâng lêt ṭhîn. ‘Pathian chu thil engkimtithei leh min ngaihsaktu a nih chuan, hriatthiam har hle mah se, thilthlengte chu eng kawng emaw tala kan tâna ṭha tûr a ni ang,’ tiin an chhût a ni. Chu chu i pawm em?

A chhia emaw, a ṭha emaw, thil engkim hi Pathian duhzâwng a ni tih ngaih dân chu a chunga kan târ lan tâk Lal Ṭawngṭaina tia koh, Isua ṭawngkam ṭanchhana siam a ni fo va. Pathian duhzâwng chu vânah tih a ni tawh lâwm ni? ‘Leia mi’n a duhzâwng ti’ tûra kan ṭawngṭai hian, he leia thilthleng apiang hi Pathian duhzâwng angin kan pawm a ni lâwm ni?

Mi tam tak chuan he ngaih dân hi an pawm thei chiah lo. An tân chuan Pathian chu a mihring siamte tawrhna ngaihthahtu ang mai a ni. ‘Engtin nge maw Pathian hian sualna nei lote chunga thil râpthlâk tak a thlen chu a duh theih le? Pathianin hêngte aṭanga thil engemaw tak zir tûra min duh a nih chuan, chu chu eng tak ni ang maw?’ an ti ṭhîn. Chu chu i ngaih dân pawh a ni ve mai thei.

He mi chungchângah hian, Isua unaupa, zirtîr Jakoba chuan heti hian a ziak a ni: “Tuman thlêmna an tawh laiin, ‘Pathian thlêm ka ni,’ ti suh se; Pathian chu sual thlêm rual a ni lo, amah pawhin tumah a thlêm ngai lo,” tiin. (Jakoba 1:13) Thil ṭha lote hi Pathian aṭanga lo chhuak a ni lo. Chuvângin, tûn lai khawvêla thilthleng zawng zawng hi Pathian duhzâwng a ni lo tih a chiang hle. Bible chuan tisa duhzâwng te, Jentailte duhzâwng te, leh Diabola duhzâwng te pawh a sawi bawk a ni. (Johana 1:13; 2 Timothea 2:26; 1 Petera 4:3.) Julioa-a leh Christina-i te chhûngkaw chunga thilthleng chu hmangaihna ngah vâna kan Pa duhzâwng a ni thei lo tih i pawm em?

A nih leh, Isua’n: ‘I duhzâwng leia mi’n ti rawh se’ tia ṭawngṭai tûra a zirtîrte a zirtîr khân, eng a tihna chiah nge? Chu chu thil engemaw tân bîka rawn inrawlh tûra Pathian ngenna nge, thil ṭha zâwk leh pawimawh zâwk, mi zawng zawngte beisei theih inthlâk thlengna dîl tûra min zirtîrna zâwk? Bible hrilhfiah dân i chhui belh ang u. (w04 4/15)

[Phêk 3-naa Thlalâk Hawhtîrtu]

Car: Dominique Faget-STF/AFP/Getty Images; naupang: FAO photo/B. Imevbore