Savate’n Min Zirtîr Theih Chu

“CHUNGLENG savate hi en rawh u; buh an tuh lo va, an ât hek lo, buh inah an seng lût hek lo; nimahsela in Pa vâna mi chuan a châwm si a. Nangni chu anni ai chuan nasa takin in hlu zâwk lo vem ni?” (Matthaia 6:26) Isua Krista chuan hêng thute hi Galili Tuipui kianga tlâng chunga a Thusawi hmingthang takah a sawi tel a. A thu ngaithlatute chu a zirtîrte chauh an ni lo. An zîngah chuan hmun hrang hrang aṭanga lo kal a zirtîr lo la ni tûr mipui tam tak pawh an tel a ni. An zînga mi tam zâwk chu Isua tihdam atâna damlote rawn hruaitu, mi rethei takte an ni hlawm.​—Matthaia 4:​23–5:2; Luka 6:​17-20.

Damlo zawng zawng a tihdam hnuah, Isua chuan thil pawimawh zâwk thlarau lam mamawhte chu a ngaihsak a. A thu zirtîr zînga pakhat chu a chunga kan târ lan tâk hi a ni.

Chunglêng savate chu hun rei tak ata lo awm tawh an ni a. A ṭhen chuan rannungte an ei a, a ṭhenin theirah leh thlai chi an ei thung. Pathianin savate mah hnianghnâr taka chaw tam tak a pêk chuan, a chhiahhlawh mihringte chu an nî tin chaw tûr zawng hmu tûrin a ṭanpui thei êm êm ang. An inchawm theih nân hna thawh tûr a hmuhtîr thei a. A nih loh leh, an kut chhuak thlaite chu mal a sâwmsak thei bawk. Mangan thilah phei chuan, Pathianin retheite hnêna an thilneih sem tûrin ṭhenawmte leh ṭhiante thinlung chu a chêttîr thei a ni.

Sava nun bih chianna aṭangin thil tam tak kan zir belh thei a. Pathianin savate chu an notê te an enkawl seilenna tûr bu siam tûra pianpui finna mak tak neiin a siam a. Bu inang lo pahnih hi lo en ta ila. Vei lam panga sava bu lem hi Africa ram lungpui kâra sak vamûr chi khat bu a ni a. Chu chu lungpui pang emaw, in bang emawa sak a ni. Chûng sava bu chungkhuh chu khâma lo lawr chhuak lungpui emaw, a lema târ lan ang hian, in chung dithlifarfêm emaw a ni. A bu chhuat phah chu chirhdiaka siam saihlum tê tê châr zawm hmanga no lem anga siam a ni. A nu leh a pain saihlum tê tê hahthlâk takin an lakhâwm ve ve a, a bu siam zawh nân thla khat chuang a ngai thei a ni. Tichuan, a chhûng lam chu hnim leh a hmulin an khuh a. A notê chu an châwm dûn a ni. A hnuaia lem chuangte hi bu tah chi sava pa bu a ni. He Africa rama sava taima tak hian a bu chu hnim emaw, thlai kâwrte emaw hmangin a sa a. A bu chu nî khatah a sa zo thei a, hun khatah bu 30 aia tam a sa hman a ni.

Eng nge zir tûr? Pathianin savate hnênah bu sak nân chûng themthiamnate leh hmanruate tam tak a pêk si chuan, an mamawh awmna tûr in nei tûrin a chhiahhlawh mihringte chu a ṭanpui thei a ni, tih hi. Nimahsela, Isua chuan kan inchâwm nâna mamawh nei tûra Pathian Jehova ṭanpuina kan duh chuan, thil engemaw aṭûl tih a târ lang. “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tiin Isua’n thu a tiam a ni. (Matthaia 6:33) ‘Pathian Lalram zawn hmasaknaah hian eng nge tel ang le?’ tiin i ngaihtuah mai thei. He magazine sem darhtu, Jehova Thuhretute chuan chu zawhna chu chhânsak che an châk hle a ni. (w03 6/15)