Mi Zawng Zawng Ṭhatna Hmuh Tum Rawh
“Aw ka Pathian, a ṭha lamin min hre reng ang che.”—NEHEMIA 13:31.
1. Engtin nge Jehova’n mi zawng zawng chungah thil ṭha a tih?
NI TAM tak chhûng khua a dur a, chhûm a zîn hnua ni êng lo chhuak chu a duhawm hle a. Mite chu an hlimin, an engthâwl sawt ṭhîn a ni. Chutiang bawkin, hun rei tak chhûng ni a sat a, khua a ro êm êm hnua ruah han sûr seng seng hian—ruahpui vânâwn pawh ni se—hahdamna a thlen ṭhîn. Hmangaihnaa khat min Siamtu Jehova chuan kan lei boruakah hian sik leh sa thilpêk mak tak chu a dah tel a ni. Isua’n: “In hmêlmate chu hmangaih ula, a tiduhdahtu che u chu ṭawngṭaisak rawh u, in Pa vâna mi fate in nih theih nân; ani chuan mi sualte leh mi ṭhate chungah chuan a nî a chhuahtîr ṭhîn a, mi felte leh fel lote chungah pawh ruah a sûrtîr ṭhîn a ni,” tia a zirtîr khân, Pathian thilphalzia a hrilh a ni. (Matthaia 5:43-45) A ni, Jehova chuan mi zawng zawng chungah thil ṭha a ti a. A chhiahhlawhte chuan mi dangte ṭhatna hmuh tumna hmangin amah entawn an tum tûr a ni.
2. (a) Eng ṭanchhanin nge Jehova’n thil ṭha a tih? (b) A ṭhatna kan chhân lêt dânah hian Jehova’n eng nge a en thlâk reng?
2 Eng ṭanchhanin nge Jehova’n thil ṭha a tih? Adama suala a tlûk aṭangin, Jehova chuan mihringte ṭhatna a hmuh ṭhelh ngai lo va. (Sâm 130:3, 4) A thiltum chu thuâwih mihringte Paradis-a awmtîr leh hi a ni. (Ephesi 1:9, 10) A phû loh ngilneihna chuan thutiam Thlah hmanga sualna leh famkim lohna ata chhuah beiseina min pe bawk. (Genesis 3:15; Rom 5:12, 15) Tlanna ruahmanna pawmna chuan a tâwpa ṭhat famkim leh theihna kawng a hawng a ni. Tûnah hian, Jehova chuan thil dang tam takte bâkah, a thilphalna kan chhân lêt dân hmu tûrin min en thla ṭheuh va. (1 Johana 3:16) A ṭhatna kan ngaihhlutzia târ lan nâna kan thiltih apiang a hre vek a ni. Tirhkoh Paula chuan: “In hnathawh leh a hming chunga hmangaihna in lantîr . . . chu theihnghilh tûrin Pathian chu mi fel lo a ni si lo,” tiin a ziak a ni.—Hebrai 6:10.
3. Eng zawhna hian nge kan ngaihtuah phû?
3 A nih leh, mi dangte ṭhatna hmuh tumna kawngah engtin nge Jehova kan entawn theih ang? Kan nun kawng chi liah he zawhna chhânnate lo ngaihtuah ila: (1) Kristian rawngbâwlnaah te, (2) chhûngkuaah te, (3) kohhranah te, leh (4) mi dangte nêna kan inlaichînnaah te hian.
Thuhrilh leh Zirtîr Siamnaah
4. Engtin nge Kristian rawngbâwlnaa tel hi mi dangte ṭhatna hmuh kan tumzia târ lanna a nih?
4 Buh leh buh lem tehkhin thu awmzia a zîrtîrte zawhna a chhânnaah, Isua chuan: “Lo chu khawvêl hi a ni,” a ti a. Tûn laia Krista zirtîrte kan nih angin, thlawhhma rawngbâwlnaa kan tel hian Isua thusawi dikzia chu kan hria a ni. (Matthaia 13:36-38; 28:19, 20) Kan thlawhhma rawngbâwlnaah chuan kan rinna vântlâng hriata târ lanna a tel a. Jehova Thuhretute’n in tin leh kawtthlêra an rawngbâwlna avânga hriat an hlawhna ringawt pawh hian, Lalram thuchah a dawng tlâkte zawn chhuahna kawnga kan taihmâkzia a târ lang a ni. Ni e, Isua chuan: “Khaw lianah emaw, khaw têah emaw in luhna apiangah a thleng tlâk mi tûr che u zawng chhuak . . . ang che u,” tiin a zirtîr a ni.—Matthaia 10:11; Tirhkohte 17:17; 20:20.
5, 6. Engvângin nge mite chu an ina kan tlawhnawn ṭâng ṭâng?
5 Sâwm lohva mite ina kan lên luh hian, kan thuchah ken an chhân lêt dân kan hmu a. A châng chuan chhûngkuaa mi pakhatin min ngaihthlâk duh laiin, mi dangin in chhûng aṭanga, “Kan ngaithla peih lo,” an lo tih avânga kîr leh a ngaih châng a awm thei a. Chutianga mi pakhatin a dodâl emaw, a duh loh emaw avânga mi dang min chhân lêt dân a nghawng tel chu pawi kan va ti ṭhîn tak êm! Chuti a nih chuan, mi zawng zawngte ṭhatna hmuh kan tum tlat theih nân eng nge kan tih theih?
6 Chu mi hmuna thu kan hrilh leh huna an ina va lên luh lehna chuan, kan tlawh hmasak ṭuma kan thusawi lo pawtchattu ngei biak theihna hun remchâng min pe mai thei a. A hmaa thilthleng chungchâng hriatrengna chuan inrâlring tûrin min ṭanpui thei a ni. Dodâltute chuan tum ṭha tak neia ti pawh a ni thei a, miin Lalram chanchin ngaihthla lo tûra a dan ngai tlat niin a inhre mai thei a. Chutianga a tih chhan chu kan thiltum chungchâng thu dik lo a lo hriat vâng pawh a ni thei a ni. Mahse, chu chuan chu ina Lalram chanchin ṭha kan hrilhna chu a dang chuang lo va, thu hriatsual awmte chu remhre taka hrilhfiah kan tum zâwk a. Pathian hriatna dik nei tûra mi zawng zawng ṭanpui chu kan duh a ni. Chu mi ngei chu Jehova’n a lamah a hîp mai thei asin.—Johana 6:44; 1 Timothea 2:4.
7. Mite hnêna thu kan hrilh huna beiseina nei tûrin engin nge min ṭanpui thei?
7 Isua’n a zirtîrte hnêna kaihhruaina a pêkah chuan chhûngkaw mite hnên aṭanga dodâlna chungchâng pawh a tel a. Ani chuan: “Mi a pa dotîr tûrin fanu a nu dotîr tûrin, mo a pi dotîr tûrin lo kal ka ni asin,” a ti lo vem ni? Heti hian a sawi zawm a: “Mi a hmêlmate chu ama chhûngte zînga mi ngei an ni ang,” tiin. (Matthaia 10:35, 36) Mahse, dinhmun leh rilru put hmangte a inthlâk ṭhîn a. Vawilehkhata natna te, thihnaa chhûngte chânna te, leilung chhiatna tawhna te, rilru lam hrehawmna te, leh thil dang tam tak te chuan kan thuhrilh miin an chhân lêt dân chu a nghawng a ni. A beisei bo zâwnga thil kan thlîr chuan—kan thu hrilh mite chuan an chhâng lêt ngai lo vang tih ngaih dân kan neih chuan—an ṭhatna hmuh tum tak tak kan ni ang em? Engvângin nge phûr taka kan tlawhnawn leh lo vang ni? Chutih hunah chuan, chhân lêtna dang kan hmu mai thei asin. A châng chuan kan thu sawi ni lovin, kan sawi dân zâwk chuan chhân lêt dân ṭha zâwk a phût thei a ni. Thuhrilh kan ṭan hmaa tih tak zeta Jehova hnêna ṭawngṭaina chuan beiseina nei tûr leh mi zawng zawng hmaa Lalram thuchah ṭha taka sawi tûrin min ṭanpui ang.—Kolossa 4:6; 1 Thessalonika 5:17.
8. Kristiante’n an chhûng ring lo mite ṭhatna hmuh an tumin eng nge a rah chhuah theih?
8 Kohhran ṭhenkhatah chuan, chhûngkhat hnaivai mi tam takte’n Jehova rawng an bâwl tlâng a. An chhûngkhatte zînga naupangte ngaihsân leh zah hlawh fotu chu an chhûngkhatte zînga upa tawhte chhelna leh chhûngkua leh nupa inkâra inlaichînna ṭha tak an neih chu a ni a, chu chuan naupangte thinlung thlâkthleng chu a tiawlsam a ni. Tirhkoh Petera fuihna thu zawmna chuan Kristian nupui tam takte chu “thu lova” an pasalte hneh tûrin a ṭanpui a ni.—1 Petera 3:1, 2.
Chhûngkuaah
9, 10. Engtin nge Jakoba leh Josefa’n an chhûngkaw zînga mite ṭhatna hmuh an tum?
9 Chhûngkaw inzawmna hi mi dangte ṭhatna hmuh kan tum theihna hmun dang a ni a. Jakoba’n a fapate a cheibâwl dân aṭanga zir tûr kan neih hi ngaihtuah teh. Genesis bung 37, châng 3 leh 4-ah Bible chuan Jakoba’n Josefa a hmangaih bîkzia a sawi a. Josefa unaute chuan an thîk a, amah tihhlum tumin an phiarru hial a ni. Nimahsela, an nun tâwp lama Jakoba leh Josefa rilru put hmang hi chhinchhiah teh. An pahnih hian an chhûng zînga mite ṭhatna hmuh an tum ve ve a ni.
10 Josefa chu Aigupta rama ṭâm nasa tak a tlâk laia ei tûr enkawltu lû ber a nih lai khân, a unaute chu a lo lâwm a. A nihna tak inhriattîr nghâl mai lo mah se, anni chu ṭha taka ngaihsak an nih leh a pa upa tawh tak tâna ei tûr an hawn ngei theih nân thil engkim a ruahman vek a ni. Ni e, an huatna lo tuar tawh mah se, Josefa chuan an tâna ṭha ber tûr thil a ti a ni. (Genesis 41:53–42:8; 45:23) Chutiang bawkin, Jakoba pawhin thihna khuma a mut laiin, a fate zawng zawng mal a sâwm a. An thil sual tih avânga an chanvo chan tûr hloh an awm laiin, tumah chu ro chan nei lo tûrin a sawi lo. (Genesis 49:3-28) Chuta Jakoba hmangaihna lantîr chu a va ropuiin, a va daih rei tak êm!
11, 12. (a) Eng hrilh lâwkna hmanga entîrnain nge chhûngkaw mite ṭhatna hmuh tum a pawimawhzia sawi uar? (b) Fapa tlân bo chungchâng Isua tehkhin thua pa ber entawn tûr siam aṭangin eng nge kan zir theih?
11 Rinna nei lo Israel hnamte a dâwrnaa Jehova dawhtheihna chuan, a mite ṭhatna hmuh a tum dân min hriatthiamtîr lehzual a. Zâwlnei Hosea chhûngkaw dinhmun hmangin, Jehova chuan a hmangaihna daih rei tak chu a sawifiah a ni. Hosea nupui Gomeri chu a uirê reng a. Chuti chung pawhin Jehova chuan Hosea chu: “Kal leh ta la, hmeichhia, mi dang duh lai, uirenu chu va hmangaih rawh, Israela thlahte chu pathian dang hnên lam hawiin grêp chhang ngaina mah se, LALPAN a hmangaih reng ang bawk hian,” tiin a tîr a ni. (Hosea 3:1) Engati nge chutianga a tirh? Jehova chuan a kawng aṭanga kalpêng hnamte zîngah tute emaw chuan a dawhtheihna chu an rawn chhâng lêt dâwn tih a hria a ni. Hosea chuan heti hian a puang chhuak a: “Chumi hunah chuan Israela thlahte chu an lamlêt ang a, LALPA an Pathian leh an lalber Davida chu an zawng ang a; ni hnuhnûngahte chuan LALPA leh a ṭhatna chu khûr chungin an pan ang,” tiin. (Hosea 3:5) Hei hi chhûngkuaa harsatna kan tawh huna kan hriat reng tûr, entawn tûr ṭha tak a ni. Chhûngkaw zînga mite ṭhatna hmuh i tum chhunzawm zêlna chuan dawhtheihna chungchângah entawn tûr ṭha a siam tal ang.
12 Fapa tlân bo chungchâng Isua tehkhin thu chuan kan chhûngte ṭhatna hmuh kan tum dân tûr chungchângah hriatthiamna thûk lehzual min pe a. Fapa naupang zâwk chu a sum khawhralna nun kawng ṭha lo a bânsan hnuah in lamah a rawn kîr leh a. A pa chuan zahngai takin a lo enkawl a ni. Engtin nge a pa chuan a fapa upa zâwk, in chhuahsan ngai lova sawisêlna chu a chhân lêt? A fapa hnênah chuan: “Ka fapa, ka hnêna awm reng i ni alâwm, ka neih zawng zawng hi i ta a ni e,” tih a puang a ni. Chu chu thinura inhauhna a ni lo, pa hmangaihna nemnghehna mai a ni. Chutah a pa chuan: “Hlim tak leh lâwm taka awm tûr a ni rêng alâwm; he i nau hi a thi a, a lo nung leh ta a; a bo va, kan hmu leh ta a ni si a,” a tih zawm a. Chutiang bawkin, keini pawhin mi dangte ṭhatna hmuh kan tum reng tûr a ni.—Luka 15:11-32.
Kristian Kohhranah
13, 14. Kristian kohhrana hmangaihna lal dân nunpui theih dân kawng khat chu eng nge ni?
13 Kristian kan nih angin, hmangaihna lal dân chu nunpui kan tum tlat a ni. (Jakoba 2:1-9) Kan kohhrana mi keini aia neinung leh nung lote pawh kan pawm vek a ni thei. Mahse, chi te, hnam dân te, a nih loh leh tûn hmaa sakhaw lo vawn te avânga “inthliarna” kan nei em? Kan neih chuan, engtin nge Jakoba zilhna thu hi kan zawm theih ang?
14 Kristian inkhâwmnaa lo tel zawng zawngte lo lawmna hian rilru zau tak kan nihzia a târ lang a. Kingdom Hall-a rawn inkhâwm tharte kan biak hmasak hian, an zahzumna leh an tîmna chu a kiam thei ngei ang. Dik takin, Kristian inkhâwmnaa a vawikhatna atâna rawn tel ṭhenkhatte chuan: “An vaiin an nêlawm a. Min hmêlhriat tawh sa ang mai an ni. Ka inthlahrung lo rêng rêng,” an ti ṭhîn.
15. Engtin nge kohhrana naupangte chu upa zâwkte ngaihsakna lantîr tûra ṭanpui theih an nih?
15 Kohhran ṭhenkhatah chuan, inkhâwm bânah ṭhalai ṭhenkhat chu upa zâwkte zînga awm lovin, Kingdom Hall chhûng emaw, pâwn emawah an awmkhâwm liai liai mai thei. Chutiang pumpelh nân, eng nge tih theih ni ta ang? A rahbi hmasa ber chu, nu leh pate’n an fate in lama zirtîr a, inkhâwm tûra buatsaih hi a ni. (Thufingte 22:6) Inkhâwmnaa an mamawh zawng zawng an neih theih nân, thu leh hla chhuah chi hrang hrangte an lâkkhâwmtîr thei a. Nu leh pate chu Kingdom Hall-a tarte leh dam lote be tûra an fate fuihtu tûr ṭha ber an ni bawk. Chutiang mite hnêna thil ṭha tak sawi tûr neihna chuan naupangte chu lungawina a pe thei a ni.
16, 17. Engtin nge upa zâwkte’n kohhrana naupangte ṭhatna hmuh an tum theih?
16 Unau upa lamte chuan kohhrana naupangte chu an ngaihsak tûr a ni a. (Philippi 2:4) Phûrawm takin naupangte chu an be hmasa thei a ni. Inkhâwm chhûng hian thu ṭha bîk zual engemaw sawi a ni ṭhîn tlângpui a. Naupangte chu inkhâwm nuam an tih leh tih loh te, thusawia duh bîk zual leh nunpui theih tûr an neih leh neih lohte an zâwt thei a ni. Kohhran pêng pawimawh tak an nih angin, naupangte chu ṭha taka an ngaihthlâk avângin lâwmthu hrilh tûr an ni a, inkhâwmnaa chhânna an pêk emaw, inkhâwm chhûnga telna an neih rêng rêng emawin fak ngei tûr an ni. Kohhrana upa zâwkte nêna an inkawm dân te leh in lama in chhûng hna ho têtê an thawh dânte chuan a hnu lama mawhphurhna lian zâwk an neihte an enkawl thei dâwn tih a târ lang ang.—Luka 16:10.
17 Mawhphurhna an pawm avângin, ṭhalai ṭhenkhat chuan an thlarau lam miziain mawhphurhna rit zâwk chelhtîr thei khawpin hma a sâwn a ni. Thil tih tûr an neihna pawhin nungchang âtthlâk takte pumpelh tûrin a ṭanpui thei bawk. (2 Timothea 2:22) Chutiang chanvote chuan kohhranho rawngbâwltu nih tum unaupate chu ‘fiahin a awmtîr’ thei a ni. (1 Timothea 3:10) Inkhâwmnaa an telna leh rawngbâwlnaa an ṭhahnemngaihna te, leh kohhran mi zawng zawng an ngaihsaknate chuan mawhphurhna pêk belh tlâk an nih leh nih loh enfiahnaah upate chu a ṭanpui a ni.
Mi Zawng Zawng Ṭhatna Hmuh Tumin
18. Rorêl chungchângah eng thang nge pumpelh tûr ni a, engvâng nge?
18 Thufingte 24:23 chuan: “Rorêlnaa mi zahzâwng neih [duhsak bîk neih] hi a ṭha lo” a ti a. Chung lam aṭanga finna lo chhuak chuan upate’n kohhrana ro an rêlnaah duhsak bîk nei lo tûrin a phût a ni. Jakoba chuan: “Chung lam aṭanga finna lo chhuak erawh chu atîrin a thianghlim phawt a, chu mi hnuah chuan inrem a duh a, a nunnêm a, a tihnuam a, khawngaihna leh rah ṭhain a khat a, thlei bîk a nei lo va, a vervêk lo a ni,” a ti. (Jakoba 3:17) Chiang takin, mi dangte ṭhatna hmuh kan tum rualin, upate chuan an thu rêl chu mi mal inlaichînna emaw, rilru veizâwng emawin an hliahtîr tûr a ni lo. “Pathian chu Pathian inkhâwmna siamah chuan a ding a; Pathianhote [kawng danga sawi chuan, “pathian ang mite,” mihring rorêltute sawina] zîngah ro a rêl a. Eng chen nge dik lo taka ro in rêl a, mi suaksualte chu in duhsak bîk dâwn?” a tih thu fakna hla phuahtu Asapha chuan a ziak a. (Sâm 82:1, 2) Chutiang zêlin, Kristian upate chuan ṭhiante emaw, chhûngkhatte emaw telna thil rêng rêngah duhsak bîkna lantîr chu an pumpelh tûr a ni. Hetiang kawng hian kohhran inpumkhatna an vênghim a, Jehova thlarau chu zalên takin hna an thawhtîr a ni.—1 Thessalonika 5:23.
19. Eng kawngin nge mi dangte ṭhatna hmuh kan tum theih?
19 Kan unaute ṭhatna hmuh kan tumnaah hian, Paula’n Thessalonika kohhran mite hnêna lehkha a thawn ṭuma a rilru put hmang chu kan lantîr a ni. Ani chuan: “Thu kan pêk apiang che u kha in zâwm ṭhîn a, in la zawm leh zêl pawh Lalpaah chuan kan ring che u a ni,” a ti. (2 Thessalonika 3:4) Mite ṭhatna hmuh kan tum chuan, an tlin lohnate ngaihzamsak chu kan duh lehzual ang. Kan unaute fak theihna tûr kan zawng ang a, anmahni sawisêl kan chîng lo rêng rêng ang. Paula chuan: “Hetah hian enkawltu chu mi rinawm nih a ngai bawk a ni,” tiin a ziak a ni. (1 Korinth 4:2) Kohhrana enkawltute chauh ni lovin, kan Kristian unau zawng zawngte rinawmna chuan anni chu kan tân a tiduhawm zual a. Chuti chuan, an lama hîpin kan awm a, Kristian inṭhianna hrui chu a tichak sauh a ni. Paula’n a hun laia unaute a thlîr dân ang kha kan nei a ni. Anni chu ‘Pathian ram thu lamah chuan kan thawhpuite,’ leh “min thlamuantute” an ni. (Kolossa 4:11) Chutiang chuan, Jehova rilru put hmang chu kan târ lang a ni.
20. Mi zawng zawngte ṭhatna hmuh tumte chungah eng malsâwmna nge lo thleng?
20 “Aw ka Pathian, a ṭha lamin min hre reng ang che,” tih Nehemia ṭawngṭaina ang hian keini pawh kan ṭawngṭai a ni. (Nehemia 13:31) Jehova’n mite ṭhatna hmuh a tum avâng hian kan va lâwm tak êm! (1 Lalte 14:13) Keini pawhin mi dangte kan dâwrnaah chutiang bawk chuan i ti ve ang u. Chutianga tihna aṭangin, chhandamna leh khawvêl thar lo thleng mai tûra chatuana nun beiseina kan neih theih phah si a.—Sâm 130:3-8. (w03 6/15)
Engtin Nge I Chhân Ang?
• Eng ṭanchhanin nge Jehova chu mi zawng zawng chungah a ṭhat?
• Engtin nge mi dangte ṭhatna hmuh kan tum theih?
• kan rawngbâwlnaah
• kan in chhûngkhurah
• kan kohhranah
• mi dangte nêna kan inlaichînna zawng zawngah
[Phêk 26-naa milem]
Tûn hmaa a unaute huat a ni chung pawhin, Josefa chuan an ṭhatna hmuh a tum
[Phêk 27-naa milem]
Dodâlna chuan mi zawng zawng ṭanpui kan tumna a dâl lor
[Phêk 28-naa milem]
Tûn hmaa an sual chung pawhin, Jakoba fapa zawng zawngte’n malsâwmna an dawng ṭheuh
[Phêk 29-naa milem]
Kristian inkhâwmna lo tel zawng zawngte lâwm rawh