Chîn Ṭhan Thil Satliah Nge Thamna?

POLISH college ṭhenkhatah chuan zirlaite chuan an exam-naa an tihṭhat zâwk beiseiin, an zirtîrtute hnêna pêk tûr thil lei nân pawisa an khawn ṭhîn a. Chutiang a nih avâng chuan, Kristian naupang pakhat, Katarzini’n dinhmun harsa a tawng pawh hi a mak lo a ni. “Pawisa ka pe dâwn nge dâwn lo?” tiin a inngaihtuah a. A ṭhiante chuan: “Hêngte chu chîn ṭhan thil satliah alâwm. Hloh tûr engmah a awm lo, i ṭhat phah zâwk ang, engah nge i inngaihtuah buai?” an ti a.

Katarzini chuan: “Kum khatna kan zir lai chuan pawisa ka lo thawh a. A hnuah chauh he mi kawng hian, Bible-in a dem thamna ka pe a ni tih ka inhre chhuak a,” a ti. Jehova’n thamna a duh lohzia târ langtu Bible chângte a hre chhuak uai uai a ni. (Deuteronomy 10:17; 16;19; 2 Chronicles 19:7) Katarzini chuan: “Ṭhiante nêksâwrna hnuaia tlâwm mai a awlzia chu ka hre thiam ta. Chu mi chungchâng chu ka ngaihtuah ṭha leh a; chuta ṭang chuan, he thiltihah hian ka tel tawh ngai lo rêng rêng,” tiin a sawi a ni. Kum thum kalta chhûng zawngin, zirlai dangte nuihsawhna kârah pawh, Bible ṭanchhan a rinna avânga hetiang chi “thilpêk” atâna thawhlâwm a thawh theih loh thu ṭhenkhat hnênah a hrilhfiah thei a ni.

Ṭhenkhatin Katarzini chu mahni hmasial leh vântlâng hmakhaw ngai lo mi niin an puh a. Ani chuan: “Mi ṭhenkhat chuan tûn thlengin min la ṭhian duh lo va; kawng leh lamah chuan, mi tam takin ka thil thlir dân chu min zahsak a, chu chuan min tihlim hle a ni,” a ti. Katarzini chu nî tin nuna Bible thu bulte zâwmtu, Jehova Thuhretute zînga mi pakhat nia hriat a lo ni ta a ni. (w03 6/15)