Chhiartute Zawhna

Diabol-Setana’n mihringte ngaihtuahna a hre thei em?

Chiang taka sawi theih ni lo mah se, Setana emaw, a ramhuaihote emaw chuan kan ngaihtuahna an hre thei lo niin a lang.

Setana tâna hming pêkte hi lo ngaihtuah ila. Ani chu Setana (Dodâltu), Diabola (Sawichhetu), Rûlpui (Bumhmang nêna awmze thuhmun), Thlêmtu, Dawthei tia koh a ni. (Joba 1:​6, Matthaia 4:3; Johana 8:44; 2 Korinth 11:​3, Thu Puan 12:9) Hêng hmingte zînga a enga mah hian Setana’n kan ngaihtuahna a hre thei tih a kâwk lo.

Nimahsela, chutiang nêna inkalhin, Pathian Jehova chu “thinlung . . . fiah ṭhîn” anga sawi a ni thung. (Thufingte 17:3; 1 Samuela 16:7; 1 Chronicles 29:17) “Thil siam [Jehova] mithmuha lang lo rêng rêng a awm lo; kan chanchin kan thlenna tûra mithmuhah chuan engkim saruak leh inhawng sain a awm zâwk a ni,” tiin Hebrai 4:13 chuan a puang chhuak a ni. Chuti a nih chuan, Jehova’n a Fapa Isua hnênah thinlung fiah theihna a pêk hi a mak lo. Tholeh Isua chuan: “Kei rilru leh thinlung entu ka ni . . . in thiltih ang zêlin ka pe ṭheuh ang che u,” tiin a sawi a ni.​—Thu Puan 2:23.

Bible chuan Setana’n mihringte thinlung leh rilru a en theih thu a sawi lo va. Tirhkoh Paula chuan Kristiante chu “[Setana] ngamthlêmna chu kan hai si lo,” a tih avângin, hei hi a pawimawh hle a ni. (2 Korinth 2:11) Chuvângin, Setana’n kan hriat rêng rêng loh thiltihtheihna engemaw a neih kan hlauh a ngai lo.

Amaherawhchu, kan Hmêlma chuan kan chak lohna lai a hre thei lo tihna a ni lo. Setana chuan mihringte khawsak dân chu hun rei tak chhûng a lo zir tawh a. Kan khawsak dân hre tûr te, intihhlimna kan duhzâwng hre tûr te, a nih loh leh kan thusawi ngaithla tûr te, leh thil dang dang te hre tûrin kan ngaihtuahna a hriat khêr a ngai lo. Kan hmêl lan dân leh kan taksa kenkawh dân pawh hian kan ngaihtuahna emaw, rilru emaw a hriattîr thei a ni.

A tlângpui thuin, Setana chuan Eden huana a hman ang hmanrua bawk​—dâwtthu te, inbumna te, leh thu dik hlel te chu a hmang a. (Genesis 3:​1-5) Kirstiante chuan Setana’n an ngaihtuahna a hriat chu an hlauh loh rualin, an rilru chhûngah eng ang ngaihtuahna nge a dah mai theih tih engto chhan tûr an nei a ni. Ani chuan Kristiante chu “rilru chhe nei leh thutak nei lo mi” nihtîr a duh si a. (1 Timothea 6:5) Setana khawvêla chanchin dik lo thehdarhna leh intihhlimna ṭha lo a pung pawh hi a mak rêng rêng lo. He beihna tuar thei tûrin, Kristiante chuan “chhandamna lukhum” khumna hmangin, an rilru an vêng tûr a ni. (Ephesi 6:17) Chu chu Bible thutaka an rilru tihkhahna leh Setana khawvêla thil ṭha lotea ṭûl lo taka tel lohna hmangin an ti a ni.

Setanna chu hmêlma hlauhawm tak a ni a. Mahse, amah leh a ramhuaihote chu kan râp a ngai lo. Jakoba 4:7 chuan: “Diabola dodâl rawh u, tichuan a tlân bosan ang che u,” tiin min tiam si a. He fuihna hi kan zui chuan, Isua angin, Setana’n keimahniah chan rêng a nei lo tih kan puang chhuak thei dâwn a ni.​—Johana 14:30. (w03 6/15)