Ṭanpuina Dîla Aute Tâna Hnemna Thu

BIBLE chu rilru lam hrisêlna kaihruaina lehkhabu a ni lo. Amaherawhchu, buaina kan tâwk chung pawha nun hlim nei tûrin min ṭanpui a, min hnêm bawk a ni. Bible chuan heti hian a sawi a, a sawi dik hle a ni: “Hmeichhe hrin tawh mihring phawt chu rei lo tê dam, buainaa khat a ni,” tiin. (Joba 14:1) Kan fiahna tawh ṭhenkhat chu kan ṭhat famkim loh vânga lo awm a ni a. Mahse, mihringte hrehawm tawrhnaa mawhphurtu ber hi tunge ni?

Bible chuan ani chu Diabola leh Setana tia koh, thlarau suaksual a ni tiin a hrilhfiah a. Ani chu “khawvêl zawng zawng bumtu” a ni a, mihringte tawh buaina tam tak chu ama thlentîr a ni. Mahse, a hun a tâwp ṭêp tawh tih Bible chuan min hrilh bawk. (Thu Puan 12:​9, 12) Setana thlentîr khawvêla manganna zawng zawng hi Pathianin a titâwp thuai ang. Bible sawi angin, Pathian tiam felna khawvêl thar chuan beisei bona leh manganna zawng zawng chu a rawn titâwp dâwn a ni.​—2 Petera 3:13.

Mihringte hrehawm tawrhna hi rei lo te chhûng atân chauh a ni tih hriat chu a va thlamuanthlâk tak êm! Isua Krista thuneihna hnuaia Pathian vân Lalramah chuan rorêl dik lohna leh hrehawm tawrhna te chu a tâwp tawh dâwn a ni. Bible chuan Pathian Lal ruat chungchâng chu heti hian a sawi: “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. Mi rethei leh pachhiate chu a khawngaih ang a, pachhiate nunna chu a chandam ang. An nunna chu hnehchhiahna leh nunrâwnna lak ata a tlan ang a, an thisen chu ani ngaih chuan hlu tak a ni dâwn si a,” tiin.​—Sâm 72:​12-14.

He hrilh lâwkna lo thlen famkim hun tûr hi a hnai tawh hle a. Dinhmun ṭha tak hnuaia lei paradis-ah chuan chatuanin kan nung thei dâwn a ni. (Luka 23:43; Johana 17:3) Hêng Bible thutiam thlamuanthlâk takte hriatna hian ṭanpui dîla aute chu a hnêmin, beiseina a pe a ni. (w03 7/15)

[Phêk 32-naa Thlalâk Hawhtîrtu]

Hmeichhe lungngai tak: Photo ILO/J. Maillard