Pathian Tilâwmtu Thilpêk

ISUA leh a zirtîrte chuan Bethani khuaah Mari te, Marthi te, leh tûn hnai lawka kaihthawh tâk Lazara te tiamin an ṭhian ṭha engemaw zât nên chawhlui tuihnai tak an kîlho va. Mari’n hriak rimtui to tak bûk zâtve vêl la a, Isua kete a chulh chuan, Juda Iskariota chu thinur takin a rawn ṭawng chhuak a. “He hriak rimtui hi engati nge duli zathuma hralhin mi retheite hnêna an pêk zâwk loh?” a ti a. Mi dangte pawhin an lo zâwm vat a.​—Johana 12:​1-6; Marka 14:​3-5.

Nimahsela, Isua’n heti hian a chhâng a: “Engmah ti suh u; . . . Mi retheite chu kumkhuaa in hnêna awm an ni a, in duh hun apiangin anni chu in khawngaih thei si a; kei erawh chu kumkhuaa in hnêna awm tûr ka ni lo,” tiin. (Marka 14:​6-9) Juda sakhaw hruaitute chuan ṭanpui ngaite ṭanpui nâna thilpêk pêk chu nungchang mawia an ngaih bâkah, chu chuan sual a thawi thei hialah an ngai a ni. Isua erawh chuan retheite hnêna thilpêk pêk hi Pathian tilâwm thei thilpêk awmchhun a ni lo tih a sawifiah chiang hle thung.

Kristian kohhran hmasaa thilpêk pêk dân ennawn lawkna chuan, kan thilpêk hmanga Pathian tilâwm thei mi dangte ngaihsakna lantîr theih dân rawtna kawngro su takte a târ lang ang. Tin, mi dangte ṭhatpui ber tûr thilpêk pêk dân ṭha bîk tak pawh a târ lang bawk ang.

‘Mi Retheite Hnênah Thilpêk Pe Rawh’

Isua chuan a zirtîrte chu vawi tam tak ‘mi retheite hnêna thilpêk pe’ tûrin a fuih a. (Luka 12:33) Mahse, Isua chuan Pathian aia a petu chawimawi zâwk thilpêk pêk dânte laka invêng tûrin min vaukhân a ni. “Mi hnêna englo i pêkin, mi vervêkten mi fak an hlawh theihna tûra, inkhâwmna inahte, kawtthlêrahte an tih ṭhin ang hian, i hmaah tawtawrâwt hamtîr suh,” a ti. (Matthaia 6:​1-4) He fuihna thu hi zâwmin, Kristian hmasate chuan sakhaw hruaitu puithu takte’n mi hmuha an tih dân chu an pumpelh a, ṭanpui ngaite chu mi malin emaw, tuma hriat lova thilpêk pêin emaw an ṭanpui zâwk ṭhîn.

Entîr nân, Luka 8:​1-3 chuan, Mari Magdalini te, Johani te, Susani te, leh mi dangte chuan “mahni neihin” Isua leh a tirhkohte rawng chu inngaitlâwm takin an bâwlsak tih min hrilh a. Isua leh a tirhkohte chu rethei tak ni lo mah se, rawngbâwlna atân liau liauva inhmang tûrin an ei zawnnate chu an kalsan a ni. (Matthaia 4:​18-22; Luka 5:​27, 28) Pathian hna pêk an thawh zawhna tûra ṭanpuiin, hêng hmeichhiate hian Pathian an chawimawi a ni. Tin, Pathianin an thiltih a pawmzia chu, chhuan lo la awm tûr zawng zawngte chhiar atâna an thilphalna chanchin Bible-a chhinchhiahna hmangin a lantîr a ni.​—Thufingte 19:17; Hebrai 6:10.

Dorki chu hmeichhe mi khawngaih thei tak, ‘thil tihṭhat leh thilpêk ngah’ tak a ni a. A awmna tuipui kam, Joppa khuaa awm ṭanpui ngai hmeithaite tân kawr leh puante a siamsak ṭhîn. A puante thlengin aman a tum nge, a lo ṭhuisak ringawt tih erawh kan hre lo. Nimahsela, a thil tihṭhat avângin, a ṭanpuina dawngtute leh amah zahngai taka lâwmman petu Pathian chuan ani chu an ngainat phah a ni.​—Tirhkohte 9:​36-41.

Rilru Put Hmang Dik A Pawimawh

Hêng mite hi engin nge thilpêk pe tûra tur le? Khawngaihna avânga mi dangte ṭanpui duhna mai a ni lo. Retheihna te, hrehawmna te, natna te, leh harsatna dang tuarte ṭanpui nâna an tih theih apiang nî tina tihsak chu an tihtûr, an mawhphurhna niin an ngai tlat a ni. (Thufingte 3:​27, 28; Jakoba 2:​15, 16) Hei hi Pathian tilâwmtu thilpêk pêk dân a ni. Chu chu a bul berah chuan, Pathian hmangaihna nasa tak leh mi a khawngaihna leh a thilphalna entawn duhnain a tur vânga lo awm a ni.​—Matthaia 5:​44, 45; Jakoba 1:17.

Tirhkoh Johana chuan thilpêk pêkna pêng pawimawh tak chu: “Tupawhin khawvêl sum neiin a unau tlachhamin hmu sela, ani chu lainat si suh sela, Pathian hmangaihna chu amahah engtin nge a awm ang?” tih zâwtin a târ lang a. (1 Johana 3:17) A chhânna chu a lang chiang hle. Pathian an hmangaihna chuan mite chu ṭanpui ngaite ṭanpui tûrin a tur a ni. Pathianin amah entawna thilphalte chu a ngaisângin, mal a sâwm ṭhîn. (Thufingte 22:9; 2 Korinth 9:​6-11) Hetiang chi thilphalna hi tûn laiah kan hmu em? Tûn hnai lawka Jehova Thuhretute kohhrana thilthleng hi ngaihtuah ta ila.

Kristian nu upa lam pakhat in chu nasa taka siam ṭhat ngaiin a awm a. Amah chauhva khawsa a ni a, ṭanpuitu tûr chhûngkhat a nei lo va. Kum tluanin a in chu Kristian inkhâwm nâna hman a ni a, a sâwmna dawng duh apiang chu chaw ei-ah a ko ziah bawk. (Tirhkohte 16:​14, 15, 40) A harsatna an hmuh chuan, kohhran mi leh sate chu ṭanpui tûrin an inrâwnkhâwm a. Ṭhenkhatin sum leh pai an thawh a, a ṭhenin tha leh zung an thawh bawk a. Chawlhkâr rei lo te chhûngin, unaute chuan in chung an khuh thar a, êk in thar an sa a, in chhâwng khatna chu an siam ṭhain rawng thar an hnawih a; tin, chokaah bungbêl dahna bâwm thar an siam bawk a ni. An thilpêk chuan unaunu mamawh a phuhrûk bâkah, kohhran mi leh sate chu a inhnaih zualtîr a; tin, Kristian dik thil inpêkna a nih angin ṭhenawmte rilru chu a khawih hle a ni.

Mi mala mi dangte ṭanpui theih dân kawng tam tak a awm a. Pa nei lo naupangte kan kâwm thei ang em? Hmeithai tar kan hriatte kan bazârsak emaw, puan kan ṭhuisak emaw thei ang em? Retheite tân chaw kan chhumsak emaw, an sênso phuhrûk nân sum kan pe emaw thei ang em? Ṭanpuina pe tûrin kan hausak kher a ngai lo. Tirhkoh Paula chuan: “Inpeihna chu a awm phawt chuan, mi a neih loh pui ni lovin, a neih angzia zêla a pêk chu lawm tlâk a ni,” a ti. Chutianga mi mala thilpêk pêk chu Pathian malsâwm duhzâwng thilpêk pêk dân awmchhun a ni em? Ni lo ve.

A Huhova Chhawmdâwlna Chungchâng Eng Nge Ni Ve?

A châng chuan mi mala ṭan lâk ringawt pawh a tâwk lo va. Isua leh a tirhkohte ngei pawhin retheite ṭanpui nân sum an khâwl tlâng a; tin, an rawngbâwlnaa an hmuh mi dang ngaihsaktute hnên aṭang pawhin thawhlâwm an dawng a ni. (Johana 12:6; 13:29) Chutiang bawkin, kum zabi pakhatnaa Kristian kohhrante pawhin a ṭûl hunah thawhlâwm a khawn a, a huhova chhawmdâwlna lian tham tak tak a nei a ni.​—Tirhkohte 2:​44, 45; 6:​1-3; 1 Timothea 5:​9, 10.

Chutiang thil chu C.E. 55 khân a lo awm a. Judai rama kohhrante chu an rethei hle a, chu chu a hma lawka ṭâm nasa tak a tlâk vâng a ni thei ang. (Tirhkohte 11:​27-30) Tirhkoh Paula chuan retheite a ngaihtuah reng ṭhîn a, Makedonia rama kohhrante hnên thlengin ṭanpuina a dîl a ni. Amah ngeiin thawhlâwm a khawn a, a mi rinte chu a pêktîr a. (1 Korinth 16:​1-4; Galatia 2:10) Amah ngei emaw, mi dang inhnamhnawihte emaw chuan chutianga an thawhna aṭangin hlawh an hmu rêng rêng lo.​—2 Korinth 8:​20, 21.

Tûn laia Jehova Thuhretute pawh, leilung chhiatna râpthlâk tak a lo thlen hian ṭanpuina pe tûrin an inpeih reng a. Entîr nân, kum 2001 nipui chhûnga ruah leh thlipui nasa tak chuan Houston, Texas, U.S.A. ramah tui nasa takin a tilian a ni. Thuhretute in 723 lai a chhia a, tam tak phei chu tihtlâk awm hauh lovin a chhe vek a ni. Mi mal tinte mamawh hre chiang tûr leh chu dinhmun an hmachhawn theihna tûr leh an in chhia siam ṭhatna tûra tualchhûng Thuhretute hnêna ṭanpuina sem tûrin, Leilung chhiatna tuarte chhawmdâwltu pâwl chu Kristian upa mi tling takte hmanga din nghâl thuai a ni. A bul hnaia awm kohhrana mite chuan mahnia inpein hna ṭûl zawng zawng an thawk a ni. Thuhretu pakhat chuan ṭanpuina a dawnte avânga a lâwm êm avângin, insurance company aṭanga a in siam ṭhat nâna zângna dawmna a dawn ve leh, chu chu mi dangte ṭanpui lehchhâwn nân chhawmdâwlna thawhlâwm atân a thawh nghâl vat a ni.

Mahse, a huhova thilpêk chungchângah chuan, ṭanpui dîlna tam tak kan dawnte kan ngaihtuah hunah kan fîmkhur tûr a ni. Ṭanpui ngaite ṭanpuitu pâwl ṭhenkhat chuan an pâwla hnathawkte hnênah hlawh an pe emaw, ṭanpui dîlna tih chhuah nân an insênso nasat avâng emawin, an tum ber atâna hman tûr a awm tlêm thei ṭhîn hle. Thufingte 14:15 chuan: “Mi mâwl chuan thu tin a ring a, mi remhria erawh chuan a kalna a en ṭha ṭhîn,” a ti. Chuvângin thil nihphung dik tak chhût chu a finthlâk a ni.

Thilpêk Ṭangkai Ber

Ṭanpui ngaite ṭanpui aia pawimawh zâwk thilpêk pêk dân a awm a. Rorêltu tlangvâl hausa takin chatuan nunna neih nâna a tih tûr a zawhna a chhânnaah Isua chuan he mi chungchâng thu hi a sawi thawi a ni. Isua chuan: “Kal la, i neih chu hralh la, pachhiate hnênah pe rawh, chutichuan vânah ro i nei ang; tin, lo kal la, mi zui ang che,” a ti. (Matthaia 19:​16-22) Isua’n ‘Pachhiate ṭanpui la, tichuan nunna i nei thei ang,’ a ti mai lo tih chhihchhiah ang che. “Lo kal la, mi zui ang che,” tih a sawi belh zâwk mah a ni. Thu danga sawi chuan, ṭanpui ngaite ṭanpui chu a fakawma a ṭangkai êm êm rualin, Kristian zirtîr nihna chuan thil tam zâwk a kaihhnawih a ni.

Isua vei ber chu mi dangte thlarau lama ṭanpui hi a ni a. A thih hma lawk khân, Pilata hnênah: “Thutak hriattîr hi ka pian chhan leh khawvêla ka rawn kal chhan a ni,” a ti. (Johana 18:37) Pachhiate ṭanpuinaah te, dam lo tihdamnaah te, leh ril ṭâmte hrai puarnaah te hian hma hruai mah se, Isua chuan a zirtîrte chu thu hrilh dân a zîrtîr ber zâwk a ni. (Matthaia 10:​7, 8) Dik tak phei chuan, an hnêna a thupêk hnuhnûng berte zîngah: “Kal ula, hnam tina mi zirtîrahte siam ula,” tih a tel a ni.​—Matthaia 28:​19, 20.

Thu hrilhna chuan khawvêl buaina zawng zawng chu an tiveng dâwn lo va. Mahse, Pathian Ram chanchin ṭha mi chi tinte hnêna hriattîrna chuan Pathian a chawimawi a ni, a chhan chu thu hrilhnain Pathian duhzâwng a tifamkim a, a dawng duhte tân chatuan ṭhatna tûr kawng a hawnsak vâng a ni. (Johana 17:3; 1 Timothea 2:​3, 4) Jehova Thuhretute’n an rawn tlawh leh hunah an thusawi duh chu engah nge i lo ngaihthlâksak loh vang le? Thlarau lam thilpêk pe tûr chein an lo kal a. Chu chu thilpêk an pêk theih dân che kawng ṭha ber a ni tih an hre si a. (w03 6/1)

[Phêk 6-naa milemte]

Ngaihsakna kan lantîr theih dân kawng tam tak a awm

[Phêk 7-naa milem]

Chanchin ṭha kan hriattîrna chuan chatuan ṭhatna tûr kawng a hawng