Thilphalna—Engati Ta Nge?

SEPTEMBER 11, 2001-a New York Khawpui leh Washington, D.C. beihna a thlen hnua mipui vântlângin chhiat tâwkte an ṭanpuina chu a ropui hle a. Ṭanpui ngaite ṭanpuitu pâwlte chuan chhiat tâwk chhûngkhatte ṭanpuina thawhlâwm dollar tlûklehdingâwn 2.7 lai an dawng a, chu chuan an rilru a khawi hle a ni. Chhiatna a râpthlâk dân chuan an rilru a khawih êm avângin, hmun tina mite chuan ṭanpui chu an duh a ni.

Nimahsela, ṭanpui ngaite ṭanpuitu pâwl lian tak takte’n an sum hmuh an hmang dik lo tih hriat chhuah a nih tâkah chuan, mi ṭhenkhat chu an thinur hle a. Ṭanpui ngaite ṭanpuitu pâwl pakhatin chhiat tâwkte ṭanpui nâna an sum dawn dollar maktaduai 546 zînga a chanve ngawt chu thil danga hman an tum tih hriat a nih phei chuan, chu chuan nasa taka thinurna a chawk chhuak a ni. Chu pâwl chuan a hnuah a tum chu ṭhulhin ngaihdam dîl mah se, chanchin petu pakhat chuan: “Mithiamte chuan he inthlâkna pawimawh tak hi [an pâwlin beihna tawh a nih hmaa] mite rin a hlawhna hmuh leh nân a tlai lua niin an hria,” a ti. Eng nge i ngaih ve dân? Ṭanpui ngaite ṭanpuitu pâwlte i rinna chu a nghîng ve em?

Ṭanpuina Nge Khawhralna?

Ṭanpui ngaite ṭanpuitu pâwlte hnêna thilpêk pêk chu a tlângpui thuin thilṭha leh fak tlâk nia ngaih a ni ṭhîn. Mahse, mi tinin chutiang chuan an ngai lo. Kum 200 chuang kalta khân, Sâp lehkhaziak mi, Samuel Johnsona chuan: “Thilpêk ang mai maia pêk aiin, an thawh rimna avânga hnathawktute hnêna pawisa i pêk hian thilṭha ti niin i inngai thei zâwk a ni,” tih a ziak a ni. Tûn laia mi ṭhenkhatte pawhin chutiang bawkin an pe hreh a, thawhlâwmte hmang dik lo ṭanpui ngaite ṭanpuitu pâwlte chuan mipui rin a hlawh lo a ni. Tûn hnaia thilthleng pahnih hi han en ta ila.

San Francisco khuaa sakhaw hminga ṭanpui ngaite ṭanpuitu pâwl hruaitu pakhat chu, finfiahna awm si lova damdawi ina a inzai man ruala hotel-a chaw ei man chawlhkâr khata $500 zêla kum hnih chhûng chaw ei man chu rûl leh tûra a dîl avângin, a hna ata bântîr a ni. Britain ramah chuan, television-a thilthleng thawn chhuahna hmanga ṭanpui ngaite ṭanpuina tûr thawhlâwm khawn ṭhîn pâwl lian tak pakhat hruaitute chu, Romania rama fahrahte chênna tûr in sak nâna pound maktaduai ruk leh a chanve (dollar maktaduai 10) an thawn chhuahte aṭangin in ṭha lêm lo 12 chauh sak a ni a, dollar nuai engemaw zât chu a hmanna hriat lohvin a rîral tih hmuh chhuahna chuan a barakhaih hle a ni. Hetiang chanchin duhawm lo takte hian thawhlâwm thawhtute chu an thawh zât leh an thawhna tûr chungchângah a fîmkhurtîr a ni.

Pêk Tûr Nge Pêk Loh Tûr?

Nimahsela, mi ṭhenkhat leh pâwl ṭhenkhatte thiltih avânga mi dangte kan ngaihsakna leh kan khawngaihna hloh mai chu a lungchhiatthlâk hle ang. Bible chuan: “Kan Pathian leh Pa mithmuha sakhaw biak dân thianghlim leh sual tel lo chu hei hi a ni, fahrah leh hmeithaite an hrehawm laia kan . . . ṭhin hi,” a ti. (Jakoba 1:27) Ni e, retheite leh chanhaite tâna thil engemaw tih chu Kristianna atân thil pawimawh tak pakhat a ni.

Amaherawhchu, ‘Ṭanpui ngaite ṭanpuitu pâwlte hnênah ka la pe zêl dâwn nge, a mi malin ka ṭanpui zâwk dâwn?’ tih i ngaihtuah mai thei. Eng ang chi thilpêk nge pe tûra Pathianin min beisei? A dawta thuziak chuan hêng zawhnate hi a chhâng ang. (w03 6/1)