Ṭhalaite U—Jehova’n In Thawhrimna A Theihnghilh Lo Vang!

“In hnathawh leh a hming chunga hmangaihna in lantîr, mi thianghlimte rawng in lo bâwl, tûn thleng pawha in la bâwl cheu chu theihnghilh tûrin Pathian chu mi fel lo a ni si lo va.”​—HEBRAI 6:10.

1. Engtin nge Hebrai leh Malakia lehkhabute chuan Jehova’n i rawngbâwlna a hlutzia a târ lan?

LAWMTHU sawina pawh dawng lovin i ṭhian tuemaw tân thil i tihsak tawh ngai em? Inpêkna thiltih chu hlut loh, a nih loh leh theihnghilh ṭhak a nih leh phei chuan rilru a tina thei hle a ni. Mahse, Jehova rawng tih tak zeta kan bâwl nên chuan a va inang lo tak êm! Bible chuan: “In hnathawh leh a hming chunga hmangaihna in lantîr, mi thianghlimte rawng in lo bâwl, tûn thleng pawha in la bâwl cheu chu theihnghilh tûrin Pathian chu mi fel lo a ni si lo va,” a ti. (Hebrai 6:10) Chu mi awmzia chu han ngaihtuah teh. A rawngbâwlnaa i thiltihte leh i la tih zêlte theihnghilh chu atân fel lohna​—sual​—angah a ngai a ni. Lâwm nachâng hria Pathian a va ni êm!​—Malakia 3:10.

2. Engin nge Jehova rawngbâwl chu chanvo vâng tak nihtîr?

² Lâwm nachâng hria he Pathian biak theihna leh a rawngbâwl theihna chanvo hlu tak chu i nei a. Khawvêl zawng zawnga mi tlûklehdingawn ruk vêl zîngah i rinpuite chu maktaduai ruk vêl lek an nih avângin, i chanvo chu chanvo vâng tak a ni ngei mai. Chu bâkah, chanchin ṭha i ngaihthlâk a, i chhân lêtna ringawt pawh hi Jehova’n a mi mala a ngaihsakzia târ langtu a ni. Tihah chuan, Isua chuan: “Pa mi tîrtuin a hîp loh chuan tumah ka hnênah an lo kal thei lo vang,” a ti alâwm. (Johana 6:44) Ni e, Jehova chuan mite chu Krista inthawina hlâwkna hmang ṭangkai tûrin a mi mal ṭheuhvin a ṭanpui a ni.

I Chanvo Ropui Chunga Lâwmin

3. Engtin nge Kora fapate’n Jehova rawngbâwlna chanvo an neih chunga an lâwmzia an târ lan?

³ Thuziak hmasaa sawi tawh angin, Jehova thinlung tilâwm thei dinhmun duhawm takah i ding a. (Thufingte 27:11) Hei hi i ngaihthah tûr thil a ni lo. Pathian thâwk khuma an phuah fakna hla pakhatah chuan, Kora fapate chuan Jehova rawngbâwl theihna chanvo an neih avânga an lâwmzia an sawi a. Hetiang hian kan chhiar: “I biak in hung chhûng kawtlaia ni khat awm hi, [hmun danga] ni sângkhat aiin a ṭha zâwk si a. Suahsualna puan intea awm ai chuan, kan Pathian ina kawngkhâr vêngtu nih pawh ka duh zâwk a ni,” tiin.​—Sâm 84:10.

4. (a) Engin nge mi ṭhenkhat tân Jehova rawngbâwl chu thil khirh tak anga ngaihtîr? (b) Eng kawngin nge Jehova chuan a chhiahhlawhte enthlâk leh lâwmman pêk a châkzia a târ lan?

⁴ Chutiang chuan i Pa vâna mi rawngbâwlna chanvo i neih chungah i lâwm ve em? Jehova rawngbâwl chuan i zalênna a khuahkhirh deuh anga lan châng a nei thei a. Bible thu bulte mila nung tûrin mahni inpumpêkna engemaw a ngai tih pawh a dik. Mahse, Jehova’n ti tûra a phût apiang che u chu a tâwp atâwpa nangmahni tâna ṭha tûr vêk a ni. (Sâm 1:​1-3) Chu bâkah, Jehova chuan i thawhrimna a hmu reng a, i rinawmna a ngaihhlutzia chu a târ lang ṭhîn a ni. Dik takin, Paula chuan Jehova chu amah “zawngtute hnêna lâwmman pêk hmang” a nih thu a ziak a ni. (Hebrai 11:6) Jehova chuan chutianga tih theihna tûr hun remchâng chu a zawng reng a. Hmasâng Israel zâwlnei fel tak chuan heti hian a sawi: “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni,” tiin.​—2 Chronicles 16:9.

5. (a) Jehova lama i thinlung sakhatzia lantîr theihna kawng ṭha ber pakhat chu eng nge ni? (b) Engvângin nge i rinna chungchâng mi dangte hrilh chu thil harsa anga a lan?

⁵ Jehova lama i thinlung sakhatzia lantîr theihna kawng ṭha ber pakhat chu a chungchâng thu mi dangte hnêna hrilh hi a ni a. I school kalpuite hnêna i rinna chungchâng hrilhna hun remchâng i nei tawh ngai em? A tîrah chuan, chutianga tih chu a tîmawm mai thei a, tum chhinna mai pawh hian a tihlau deuh mai thei che a ni. ‘Min nuihzat mai ta se engtin nge ni ang? Ka sakhua chu mak ti viau ta se engtin nge ni ang?’ titein i ngaihtuah mai thei. Isua chuan mi zawng zawngin Lalram thuchah chu an ngaithla dâwn lo tih a hria a. (Johana 15:20) Mahse, nuihzabûr leh hnâwl i ni ngei dâwn tihna a ni kher lo. Chutih ahnêkin, Thuhretu ṭhalai tam takte chuan ngaithlatu an hmu a, an thurina an din ngheh avângin an ṭhiante chuan an zah phah sawt zâwk a ni.

“Jehova’n A Ṭanpui Ang Che”

6, 7. (a) Engtin nge kum 17 mi hmeichhe tleirâwl chuan a pâwlpuite hnênah thu a hrilh theih? (b) Jenniferi thiltawn aṭangin eng nge i zir?

⁶ Mahse, engtin nge i rinna chungchâng sawi chhuak tûrin huaisenna i neih theih ang? Engvângin nge mite’n i sakhua chungchâng an zawh hunah dik tak leh tlang taka i hrilh mai loh vang? Kum 17 mi Jenniferi thiltawn hi ngaihtuah teh. Ani chuan: “School-a chhûn chaw ka ei lai a ni a. Ka dawhkâna ṭhu hmeichheho chuan sakhua chungchâng an sawikhâwm a, an zînga pakhat chuan eng sakhua nge ka nih min zâwt a,” a ti. A chhânna a pêk lai hian Jenniferi chu a zâm em? Ani vêk chuan: “Zâm e, min chhân lêt dân tûr ka hre chiah si lo va,” a ti. Engtin nge a tih tâk? “Hmeichheho chu Jehova Thuhretute zînga pakhat ka nih thu ka hrilh ta a. A tîr chuan mak an tih hmêl hlawm hle a. Jehova Thuhretute chu mi danglam tak an ni tih thu an lo hre tawh a nih hmêl hle. Chu chuan zawhna min zawh duhna a neihtîr a, hriat dik loh an neihte chu ka hrilhfiah theih phah a ni. Chu mi hnuah pawh chuan, hmeichheho zînga ṭhenkhat chuan a khât tâwkin zawhna min zâwt zêl a ni,” a ti.

⁷ Jenniferi chuan a rinna chungchâng a sawi chhuak ta chu a inchhîr em? Teuh lo mai! Amah vêk chuan: “Chhûn chawlh hun a tâwp chuan ka awm a nuam tak tak a ni. Tûnah chuan chûng hmeichheho chuan Jehova Thuhretute nihna dik tak chu an hre fiah zâwk ta a ni,” a ti. Jenniferi thurâwn pêk chu a harsa lo hle: “I pâwlpuite emaw, zirtîrtute emaw hnêna thu hrilh har i tih chuan, han ṭawngṭai zawk la. Jehova’n a ṭanpui ang che. Hun remchâng i neih chu thuhrilh nâna i hman avângin i hlim hle ang,” tih hi a ni.​—1 Petera 3:15.

8. (a) Engtin nge ṭawngṭainain Nehemia chu dinhmun rin lâwk loh a tawn hunah a ṭanpui? (b) School-a Jehova hnêna ngawi renga ṭawngṭai zawk a ngaih mai theihna dinhmun ṭhenkhat chu engte nge ni?

⁸ I rinna chungchâng hriattîrna hun remchâng a lo awm huna Jehova hnêna ‘ṭawngṭai zawk’ tûrin Jenniferi’n a râwn che tih chhinchhiah ang che. Chutiang chiah chuan Persia Lal Artazerzia uain semtu Nehemia pawhin a rin loh deuh dinhmun a tawh lai khân a ti a ni. Nehemia chuan Judate dinhmun ṭha lo tak leh Jerusalem kulh bangte chu a tluchhe vek tih a hriat avângin pâwna lang chhuak khawpin a ngui a ni. Lal chuan Nehemia lungngai hmêl chu a hmu a, a chhan a zâwt a. A chhân hmain Nehemia chu ṭanpuina dîlin a ṭawngṭai zawk a ni. Chutah khawpui tluchhe tawh tundinlehnaa ṭanpui tûra Jerusalema kîrtîr tûrin huaisen takin phalna a dîl ta a. Artezerzia chuan Nehemia dîlna chu a phalsak ta a ni. (Nehemia 2:​1-8) Eng nge zir tûr awm? I rinna chungchâng mite hriattîrna hun remchâng i neih huna i zâm chuan, ngawi renga ṭawngṭai theihna hun remchâng i neih chu ngaihthah suh ang che. “[Jehova’n] a ngaihsak ṭhin che u avângin in manganna zawng zawng ama chungah nghat vek rawh u,” tiin Petera chuan a ziak a ni.​—1 Petera 5:7; Sâm 55:22.

“Chhâng Tûrin Inpeih Sa Fo Ang Che U”

9. Engtin nge kum 13 mi Leaii’n Young People Ask lehkhabu copy 23 lai a sem chhuah theih?

⁹ Thiltawn dang hi lo ngaithuahleh ta ila. Kum 13 mi Leaii chuan an school-ah chhûn chawlh chhûngin ṭhalaite zawhna chi hrang hrang chhânna bu, Young People Ask​—Answers That Worka tih lehkhabu a chhiar a. “Mi dangte chuan min en reng a, a hnu lawkah chuan mi tam tak chuan ka hnungah dingin, an en ta ṭhup mai a ni. Chutah, eng ang lehkhabu nge a nih min zâwt ṭan ta hlawm a,” tiin a sawi. Tlai lamah chuan hmeichhe paliin Young People Ask lehkhabu chu Leaii hnênah an dîl phah a ni. Chûng hmeichhiate chuan an lehkhabu chu mi dang an hawhtîr thuai a, anni pawhin neih an duh veleh zêl a. A hnu kâr engmeaw zât lekah chuan Leaii chuan Young People Ask lehkhabu copy 23 lai chu a school kalpuite leh an ṭhiante hnênah a sem thei ta a ni. A tîra mi dangin a lehkhabu chhiar lai chungchâng an zawh chuan Leaii tân hrilhfiah a awlsam em? A awlsam lo rêng rêng. Ani chuan: “A tîrah chuan ka zâm hle a. Mahse, ka ṭawngṭai a, Jehova’n min awmpui tih ka hria a ni,” a ti.

10, 11. Engtin nge Israel hmeichhe naupangin Jehova chungchâng zir tûra Suria sipai hotu a ṭanpui a, ani chu a hnuah engtin nge a inthlâk danglam?

¹⁰ Leaii thiltawn chuan Suria rama sala hruai, Israel hmeichhe naupang pakhat, chutiang dinhmun bawk tawngtu chu a hriatchhuahtîr mai thei che u a. Suria sipai hotu Naamana chu phâr hri vei a ni a. He hmeichhe naupangin a rinna chungchâng a sawi chhan chu Naamana nupuiin titina a ṭan vâng a ni mai thei. Hmeichhe naupang chuan: “Ka pu hi Samari khuaa zâwlnei hmaah va kal sela ka va ti êm ve aw! a phâr hi a lo tidam mai tûr,” a ti a ni.​—2 Lalte 5:​1-3.

¹¹ Chu hmeichhe naupang huaisenna avângin, Naamana chuan “Israel ramah ngawt lo chuan leilung zawng zawngah hian Pathian a awm lo ve tih” a hriat phah a ni. “LALPA hnênah ngawt lo chuan hâlral thilhlan leh inthawina rêng rêng hi pathian dangte hnênah ka hlân dâwn tawh hauh lo a nia,” tiin thutlûkna a siam hial a ni. (2 Lalte 5:​15, 17) Chu hmeichhe naupang huaisenna chu Jehova’n mal a sâwm tak zet a ni. Tûn laia naupangte tân pawh chutiang bawk chu a tih theih a, an ti bawk ang. Chutiang chu Leaii pawhin a tawng a. A hnuah chuan, a school kalpuite chuan Young People Ask lehkhabuin nungchang lama a ṭanpuizia an rawn hrilh hlawm a ni. Leaii chuan, “Jehova chungchâng zir tûr leh an nun thlâk tûrin mi dangte ka ṭanpui tih ka hriat avângin ka lâwm a ni” a ti.

12. I rinna humhim tûrin eng anga tihchak theih nge i nih?

¹² Chûng Jenniferi leh Leaii te neih ang thiltawn chu nang pawhin i nei ve thei a. Kristian i nih angin “nangmahnia awm in beisei chhan zâwt apiang che u chhâng tûrin inpeih sa fo ang che u, nimahsela thuhnuairawlh tak leh ṭih dêk chungin,” tih fuihna thu ziaktu Petera thu chu zâwm ang che u. (1 Petera 3:15) Engtin nge i tih theih ang? ‘Huai taka’ thu an hrilh theih nâna Jehova ṭanpuina dîla ṭawngṭaitu, kum zabi pakhatnaa Kristiante nun kawng chu entawn rawh. (Tirhkohte 4:29) Tichuan, i rinna chungchâng chu huaisen takin mi dangte hrilh ang che. A rah chhuah chu mak i ti hle mai thei a nia. Chu bâkah, Jehova thinlung i tilâwm bawk ang.

Video-te leh Zirlai Tiphuisuitu Hna Dangte

13. Ṭhalai ṭhenkhatin eng hun remchâng nge thuhrilh nân an hman ṭangkai? (Phêk 30 leh 31-naa bâwm en rawh.)

¹³ Ṭhalai tam tak chuan video-te hmangin an rinna chu an school kalpuite emaw, zirtîrtute emaw an hrilhfiah a. A châng chuan school-a zirna tiphuisuitu hna dangte pawhin Jehova chawimawi theihna hun remchâng a pe bawk. Entîr nân, kum 15 mi Jehova Thuhretu tleirâwl pahnihte chu khawvêl chanchin an zirnaah khawvêla sakhaw pakhat chanchin ziak tûra tih an ni a. Anni chuan Jehovah’s Witnesses​—Proclaimers of God’s Kingdomb tih chu ṭanchhana hmangin Jehova Thuhretute chanchin ziah chu an tum ta a. Anni chu minute 5 chhûng thu sawi tûra tih an ni bawk a ni. Chu mi hnuah chuan, zirtîrtu leh zirlaite chuan zawhna an ngah êm avângin chûng tleirâwl pahnihte chuan minute 20 chhûng lai hun an hmang a ni. A hnu kâr engemawzâtah pawh, an pâwlpuite chuan Jehova Thuhretute chugchâng zawhna an zâwt zêl a ni!

14, 15. (a) Engvângin mi dang ngaih dân pawisak luat a hlauhawm? (b) Engvângin nge mi dangte hnênah i rinna chungchâng i hrilh ngam ang?

¹⁴ Thiltawn kan hmuh tâkte’n a târ lan angin, Jehova Thuhretute zînga pakhat i nih anga i rinna chungchâng mi dangte hrilhna hmangin malsâwmna nasa tak i dawng thei a ni. Mihring hlauhna chuan Jehova hre tûra mi dangte ṭanpui theihna chanvo hlu hlimawm tak i neih chu hman lohtîr che suh se. Bible chuan: “Midang ngaih dân pawisak luat a hlauhawm a, LALPAa innghah erawh chu a him,” a ti.​—Thufingte 29:25.

¹⁵ Kristian ṭhalai i nih angin, i ṭhiante mamawh êm êm thil engemaw chu i nei a ni tih hre reng ang che​—tûna nun kawng ṭha ber leh nakina chatuana nunna thutiam chu. (1 Timothea 4:8) Mak tak maiin, ngaih dân lâkkhâwmna pakhat chuan United State-ah​—a tlângpuia mite’n an ngaihsak loh emaw, hna lampang buaipui zâwk emawa an ngaihna ramah​—hian a lo berah ṭhalai awmte zînga a chanve vêl chuan sakhuana an la thutak hle a, a dangte tân chuan sakhaw rinna hi an nun “thununtu ber” a ni tih a sawi. Khawvêl hmun dang dangah pawh chutiang bawk chu a nih hmêl hle a. Chuti a nih chuan, school-a i ṭhiante chuan Bible chungchâng i sawi tûrte chu an ngaihthla duh mai thei a ni.

I Ṭhatlaiin Jehova Hnaih Rawh

16. Jehova tihlâwmnaah hian a chanchin mi dangte hnêna hrilh bâk eng nge tel?

¹⁶ Jehova thinlung tihlâwmnaah chuan a chanchin sawi mai aia tam a tel a. A tehnate mila in nun pawh a ngai tel bawk a ni. Tirhkoh Johana chuan heti hian a ziak a: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin. (1 Johana 5:3) Jehova i hnaih phawt chuan he thu dikzia hi i hria ang. Engtin nge Jehova i hnaih theih ang?

17. Engtin nge Jehova i hnaih theih?

¹⁷ Bible leh Bible ṭanchhan thu leh hla chhuahte chhiar nân hun hmang rawh. Jehova chungchâng i zir tam poh leh, a thu zawm leh a chungchâng thu mi dangte hnêna hrilh chu i awlsam sawt ang. “Mi ṭha chuan a thinlung robâwm ṭha ata thil ṭhate a theh chhuak ṭhîn . . . thinlunga khat liam chu a kain a sawi ṭhîn a ni si a,” tiin Isua chuan a sawi. (Luka 6:45) Chuvângin, i thinlung chu thil ṭhain hnawh khat ang che. Engvângin nge he mi chungchângah hian tum i insiam loh vang ni? Chawlhkâr lo awm tûra kohhran inkhâwm atâna i inpuahchah dân i tichangkâng thei a. A dawtlehah chuan thinlunga tih tak zeta chhânna tâwi tê pêk chu i tum leh thei a ni. Tin, i thu zirte nunpui bawk chu a ṭûl hle.​—Philippi 4:9.

18. Dodâlna ṭhenkhat in tâwk a nih pawhin, eng nge in rin tlat theih?

¹⁸ Jehova rawngbâwlna aṭanga malsâwmna lo awmte chuan a daih rei a​—chatuan a daih hial a ni. Jehova Thuhretu i nih avânga dodâlna emaw, nuihzabûrna emaw tawh châng i nei ngei ang. Chutih hunah chuan Mosia hi ngaihtuah ang che. Bible-in ani chuan “lâwmman pêk tûr chu a thlîr” tih min hrilh a ni. (Hebrai 11:​24-26) Nangpawhin, a chanchin zir nân leh mi dangte hrilh nâna i thawhrimna lâwmman chu a pe ngei ang che tih i ring tlat thei a ni. Ni e, “in hnathawh leh a hming chunga hmangaihna in lantîr” chu a theihnghilh ngai lo vang.​—Hebrai 6:10. (w03 4/15)

[Footnote-te]

I Hre Chhuak Em?

• Engvângin nge Jehova’n in rawngbâwlna a ngaihlu tih in chian theih?

• Ṭhenkhatin school-a eng ang chi thuhrilhna nge hlawhtling an tih?

• Pâwlpuite hnêna thuhriattîr tûrin engin nge tichak thei che?

• Engtin nge Jehova i hnaih theih?

[Phêk 30-naa bâwm/milemte]

Naupangte Pawhin Jehova An Fak!

Naupangte pawhin school-ah thu an hrilh thei a. Hêng thiltawnte hi ngaihtuah teh.

Pâwl nga zir lai, kum 10 mi Amberi te class chuan Indopui II-na laia Nazi hovin Juda mite an suasâm chungchâng chu an zir a. Amberi chuan Purple Triangles tih video chu an zirtîrtu entîr a rilrûk ta a. Zirtîrtuin Nazi hovin Jehova Thuhretute pawh an tiduhdah tih a hriat chuan mak a ti hle a. Video chu an class pum pui hmaah a chhuah ta hial a ni.

Kum 8 mi Alexai chuan Kristmas lawmnaa a tel theih loh chhan an class-ah ziakin a thawn a. Zirtîrtu chuan ṭha a ti lutuk a, Alexai chu a class-ah leh class dang pahnihah pawh a lehkha ziah chu a chiarchhuahtîr hial a ni! A thuziak tâwp lamah chuan: “Ka sakhaw vawn ang vuan lote chunga zahna lantîr tûrin zirtîrna ka dawng a, Kristmas hmang lo tûra ka thu tlûkna min zahsak avângin ka lâwm e,” tiin a ziak a ni.

Erica chuan pâwl khat a zawm hnu lawkah, Ka Bible Thawnthu Lehkhabu chu school-ah a keng a, a pâwlpuite hmuhtîr phalna a dîl a. A zirtîrtu chuan: “Tih dân ṭha zâwk ka hria. Engatinge i pâwlpuite hmaah i chhiar chhuah zâwk lo vang ni?” tiin a lo chhâng a. Erica chuan a chhiar chhuak ta a. A tâwpah chuan, chu mi lehkhabu neih duh apiangte chu bân phar tûrin a sâwm a. An zirtîrtu pawh tiamin, mi pariat laiin bân an phar a ni. Tûnah chuan Erica chuan mahni puala thuhrilhna bial neiah a inngai ta a ni.

Kum kaw mi Whitneyi chu Jehovah’s Witneses and Educationc tih brochure avâng chuan a lâwm hle a. “Ka nuin he brochure hi kan zirtîrtute hnênah kum tin a pe ṭhîn a; mahse, kumin chu keimah ngeiin ka pe a; he brochure avâng hian kan zirtîrtu chuan ‘student of the week’ atân min thlan phah a ni,” a ti.

[Footnote]

[Phêk 31-naa bâwm/milemte]

Ṭhenkhatin An Rinna Chungchâng Sawi Nâna An Hman Dinhmunte

School-a report pêk tûr emaw, hna thawh tûr emaw pêk an nihin, ṭhenkhat chuan thu hrilh theihna hun remchâng pe thei chi an thlang

Ṭhalai tam tak chuan class-a an zirlai nêna inkungkaihna nei video emaw, thu leh hla chhuah emaw chu zirtîrtu hnênah an pe

Ṭhalai ṭhenkhat chu chawlh an neih chhûnga Bible emaw, Bible ṭanchhan thu leh hla chhuahte emaw an chhiar laiin ṭhalai dante’n an rawn pan a, zawhnate an zâwt ṭhîn