‘Ṭhahnemngai Takin Pawisa Lehzual Rawh’
“Benga kan hriatte kha ṭhahnemngai takin kan pawisa lehzual tûr a ni, chutilochuan kan tawlh bo hlauh dah ang e.”—HEBRAI 2:1.
1. Rilru kal pênnain vânduaina a thlen dân tehkhin thu pe rawh.
LIRTHEIA chêtsualna chuan United States-ah ringawt pawh kum tinin mi 37,000 vêl nunna a la a. Mi thiamte sawi dânin a khalhtute hian an kawng hi ngaihsak lehzual se chuan, hêng thihnate hi pumpelh theih tûr niin an sawi a ni. Motor khalhtu ṭhenkhatte chu thu ziak târte leh fakna târ chhuahte emaw, an cell phone hman emaw chuan an rilru a la pêng ṭhîn a. Tin, motor khalh laia thil ei chîng ṭhenkhat an awm bawk a ni. Hêng dinhmun zawng zawngah hian, rilru kal pênna hian vânduaina a thlen thei a ni.
2, 3. Eng fuihna nge Paula’n Hebrai Kristiante hnêna a pêk a, engvângin nge chu chu fuihna inâwm tak a nih?
2 Motor siam chhuah a nih hma kum 2,000 dâwn lai khân, tirhkoh Paula chuan Hebrai Kristian ṭhenkhatte tâna chhiatna thlentu rilru la pêngtu engemaw tak chu a lo sawi a. Paula chuan tholeh Isua Krista chu Pathian ding lama a ṭhut avângin, vântirhkoh zawng zawng aia dinhmun chungnung zâwk pêk a nih thu a sawi uar a. Tichuan, tirhkoh chuan heti hian a sawi a ni: “Chuvângin benga kan hriatte kha ṭhahnemngai takin kan pawisa lehzual tûr a ni, chutilochuan kan tawlh bo hlauh dah ang e,” tiin.—Hebrai 2:1.
3 Engvângin nge Hebrai Kristiante chuan Isua chungchâng an ‘hriatte kha ṭhahnemngai taka an pawisak lehzual’ a ngaih? A chhan chu, Isua’n khawvêl a chhuahsanna kum 30 dâwn lai a ni tawh a. An Pu a awm loh tâkah chuan, Hebrai Kristian ṭhenkhatte chu thutak ata an tawlh bo ṭan ta mai a. An biakna hlui, Juda sakhua chuan an rilru a la pêng tlat a ni.
An Pawisak Lehzual A Ngai
4. Engvângin nge Hebrai Kristian ṭhenkhatin Juda sakhuaa kîr leh an châk?
4 Engvângin nge Kristianin Juda sakhuaa kîrleh a châk le? Awle, Dân hnuaia Pathian biak dânah chuan thil hmuh theih leh khawih theih a tel a. Mite chuan puithiamte chu an hmu theiin, an hâlral thil hlan rimte chu an hre thei bawk a. Nimahsela, Kristianna chu kawng ṭhenkhatah a danglam tlat a ni. Kristiante chuan Puithiam Lalber, Isua Krista chu nei mah se, khawvêl a chhuahsanna kum 30 lai a ni tawh a. (Hebrai 4:14) Biak in nei mah se, a hmun thianghlim chu vân a ni daih a. (Hebrai 9:24) Dân hnuaia tisa serhtan ang ni lovin, Kristian serhtan chu “rilru lama tan” a ni zâwk bawk a ni. (Rom 2:29) Chuvângin, Hebrai Kristiante tân chuan, Kristianna chu hriatthiam harsa tak a ni ngei ang.
5. Engtin nge Paula chuan Isua din biak dân chu Dân hnuaia biak dân aia a chungnun zâwkzia a târ lan?
5 Hebrai Kristiante chuan Krista din biak dân thar chungchânga thil pawimawh tak chu an hriat a ngai a ni. Chu biak dân chu mita hmuh theih aiin rinnaah a innghat zâwk a; mahse, zâwlnei Mosia kal tlanga Dân pêk ai chuan a chungnung zâwk daih a. “Kêl leh bâwngpate thisen leh bâwngla vâp, mi bawlhhlawh chunga theh mahin tisa thiang khawpa a tihthianghlim si chuan, Krista, chatuana thlarau zâra hmêlhem lova Pathian hnêna inhlâna thisen chuan Pathian Nung rawng bâwl tûrin in chhia leh ṭha hriatna chu thiltih thite lakah chuan a va tithianghlim nasa dâwn êm!” (Hebrai 9:13, 14) Ni e, Isua Krista tlanna inthawina rinna avânga ngaihdamna lo awm chu Dân hnuaia hâlral thil hlanin a pêk ai chuan kawng tam takin a chungnung zâwk a ni.—Hebrai 7:26-28.
6, 7. (a) Eng dinhmunin nge Hebrai Kristiante khân ‘benga an hriatte kha ṭhahnemngai taka an pawisak lehzual’ chu thil hmanhmawhthlâk tak nihtîr? (b) Hebrai mite hnêna Paula’n lehkha thawn a ziah lai khân, Jerusalem tân hun engtia rei nge la awm? (Footnote en rawh.)
6 Hebrai Kristiante chuan Isua thusawi an hriatte an pawisak lehzualna tûr chhan dang pawh a la awm a. Ani chuan Jerusalem tihchhiat a nih tûr thu a hrilh lâwk a ni: “I râlten i vêlin lei kulh an siam ang a, an hual ang chia, i vêlin chhuah theih lohvin an awm chhan ang chia, i chhûnga i fanaute, nangmah nên leiah an paih vak ang che, i chhûnga lung intiang rêng rêng an zuah lo vang; an fan lai che i hriat loh avângin chutiang nîte chu i chungah a lo thleng ang,” tiin.—Luka 19:43, 44.
7 Chu chu eng huna lo thleng tûr nge? Isua chuan a hun leh a nî tûr hrilh lovin, he hriattîrna thu hi a pe zâwk a ni: “Sipaihoten Jerusalem khua an hual in hmuh hunah, a boral dâwn tih hria ang che u. Chutih hunah chuan Judai rama awmte chu tlângahte tlân bo rawh se; a chhûnga awmte chuan chhuahsan rawh se; rama awmte chu a chhûngah lût suh se,” tiin. (Luka 21:20, 21) Isua’n hêng thute a sawi hnu kum 30 vêl chhûng chuan, Jerusalem khuaa Kristian ṭhenkhatte chuan a hmanhmawhthlâkzia an hriatna chu an hlauh va, an rilru lâk pênin a awm ta a. Anni chu motor khalh laia kawngpui en lo ang an ni. An ngaihtuahnate an thlâk loh chuan, chhiatna chu a lo thleng ngei ang. An ring emaw, ring lo emaw pawh nise, Jerusalem chhiatna chu a lo thleng thuai dâwn!a Paula zilhna thu chuan thlarau lama muthlu Jerusalem Kristiante a kaihharh ngei beisei a ni.
Tûn Laia ‘Ṭhahnemngai Taka Pawisak Lehzualna’
8. Engvângin nge Pathian Thu, thutak chu ‘ṭhahnemngai taka kan pawisak lehzual’ ang?
8 Kum zabi pakhatnaa Kristiante angin, keini pawhin Pathian Thu, thutak chu ‘ṭhahnemngai taka kan pawisak lehzual’ a ngai a. Engvâng nge? A chhan chu keini pawhin hnam pakhat mai ni lo, khawvêl pum pui chhiatna lo thleng mai tûr chu kan tawn dâwn vâng a ni. (Thu Puan 11:18; 16:14, 16) Jehova’n chu mi chhiatna a thlentîr hun tûr a nî leh dârkâr chiah chu kan hre lo ngei mai. (Matthaia 24:36) Mahse, “nî hnuhnûngahte” kan awm tawhzia chiang taka târ langtu Bible hrilh lâwknate thlen famkimna chu mit ngeia hmutute kan ni. (2 Timothea 3:1-5) Chuvângin, kan rilru la pêng thei thil rêng rêng lakah kan invêng tûr a ni a. Pathian Thu ngaihsakna leh a hmanhmawhthlâkzia kan hriatna chu kan neih reng a ngai a ni. Chutianga kan tih chuahvin, “thil lo thleng tûr zawng zawng chu [kan] pumpelh” thei ang.—Luka 21:36.
9, 10. (a) Engtin nge thlarau lam thilte kan ngaihsak theih? (b) Engtin nge Pathian thu chu ‘kan kê atân khâwnvâr’ a nih a, ‘kan kawng atân êng’ a nih?
9 He hun pawimawh takah hian, engtin nge thlarau lam thilte chu “ṭhahnemngai takin kan pawisa lehzual” a ni tih kan lantîr ang? Kan tih theih dân kawng khat chu Kristian inkhâwmnaah te leh inkhâwmpuinaah te tel vek hi a ni a. Tin, Bible ziaktu, Jehova kan hnaih zual sauh theih nâna Bible zirlai taima tak kan nih bawk a ngai a ni. (Jakoba 4:8) Mahnia zirna leh inkhâwmna hmanga Jehova hriatna kan zir chuan, “I thu hi ka ke atânte hian khâwnvâr a ni a, ka kawng atân êng a ni,” titu, fakna hla phuahtu ang hi kan lo ni ve ang.—Sâm 119:105.
10 Nakin hun atâna Pathian thiltumte min hrilh hian, Bible chu ‘kan kawng atâna êng’ a ni a. Kan “ke atânte hian khâwnvâr” a ni bawk a ni. Kawng danga sawi chuan, chu chuan kan nuna buaina manganthlâk tak kan tawh huna hma kan lâkna kawngah min ṭanpui thei a ni. Chuvângin, kan rinpuite nêna zirtîrna dawng tûra kan kalkhâwm hunah leh mahnia Pathian Thu kan zir hunah ‘ṭhahnemngai taka kan pawisak lehzual’ chu a pawimawh a ni. Kan thu zirte chuan Jehova leh a thinlung tilâwm thei thutâwp finthlâk leh ṭangkai tak siam tûrin min ṭanpui ang. (Thufingte 27:11; Isaia 48:17) Engtin nge thlarau lama Pathian min châwmnate kan ṭangkaipui lehzual theih nân inkhâwm lai leh mahnia zirna hun neih laia kan rilru pêk theih chhûng chu kan tihpun theih ang?
Inkhâwmnaa Kan Rilru Pêk Dân Tichangkângin
11. Engvângin nge Kristian inkhâwmnaa rilru pêk reng chu a châng chuan thil harsa tak a nih?
11 A châng chuan, Kristian inkhâwmnaa rilru pêk chu a harsa hle ṭhîn. Naupang ṭap leh lo thleng tlai ṭhutna zâwng vêlte hian rilru a la pêng sam êm êm a. Nilênga hna kan thawh hnuah, kan chau viau pawh a ni thei. Thusawitu chu thu sawi thiam ber a ni kher lo thei bawk nên, kan inhriat chhuah hmain duhthute kan lo sâm vêl hman der thei a—kan lo muthlu hial thei bawk! Thu sawite chu a pawimawh êm avângin, kohhran inkhâwma kan rilru pêk theihna chu tihchangkân kan tum tûr a ni. Engtin nge kan tihchangkân theih ang?
12. Engin nge inkhâwmnaa rilru pêk chu tiawlsam sawt thei?
12 Ṭha taka kan inbuatsaih lâwk hian inkhâwmnaa rilru pêk chu a awlzâwk tlângpui a. Chuti a nih chuan, engvângin nge kan zir tûr chu lo ngaihtuah lâwk nân hun kan insiam loh vang ni? Chawlhkâr khata Bible chhiar tûr ruatte chhiar leh rilrua chhût ngun nân, nî tin minute tlêm tê chauh a mamawh a. Kan inruahman deuh hlek chuan, Kohhran Lehkhabu Zirna Inkhâwm leh Vênnainsâng Zirna inpuahchah nân pawh hun kan nei thei a ni. Hun duan engpawh thlang mah ila, thil pakhat chiang êm êm a awm: Inbuatsaihna chuan kohhran inkhâwmnaa thu sawiahte rilru pe tûrin min ṭanpui ang, tih chu.
13. Inkhâwmnaa thu sawiho lai ngaihtuah reng tûrin, engin nge min ṭanpui thei?
13 Inpuahchah ṭhat bâkah, ṭhenkhat chuan Kingdom Hall hma lama an ṭhut hian an harhvâng thei zâwk niin an hria a ni. Thusawitu en kar te, Bible châng chhiar lai lo en ve zêl te, leh thu sawi lo lâk chhâwnte chu kan rilru kal pêng tûr vênna kawng dangte a ni. Nimahsela, eng dang zawng ai pawha pawimawh zâwk chu thinlung inbuatsaih neih hi a ni. Kan kalkhâwm chhan kan hriatthiam a ngai a ni. Kan rinpuite nêna kan inhmuhkhâwm chhan bul ber chu Jehova biak hi a ni a. (Sâm 26:12; Luka 2:36, 37) Inkhâwm hi thlarau lama kan inchâwmna kawng pawimawh tak a ni. (Matthaia 24:45-47) Chu bâkah, inkhâwmte chuan ‘hmangaih leh thil ṭha tiha inchawh thawh tawnna’ hun remchâng min pe bawk a ni.—Hebrai 10:24, 25.
14. Inkhâwm tihlawhtlingtu ber chu eng nge ni?
14 Ṭhenkhat chuan inkhâwmnaa chanvo neite zirtîr thiam dân aṭangin inkhâwm ṭhat leh ṭhat loh chu teh an duh mai thei. Thusawitute an thiam viau chuan, inkhâwm chu a ṭha tih theih a ni mai thei. Mahse, zirtîr thiam awm lo anga a lan chuan, inkhâwm a ṭha lo tih ngaih dân kan nei mai thei a ni. Hun neitute chu zirtîr thiamna hmang tûr leh a bîk takin mite thinlung thleng tûra theihtâwp chhuah tûr an ni nameuh mai. (1 Timothea 4:16) Mahse, keini a ngaithlatute hian mite sawisêl chu kan hrât viau tûr a ni lo. Thusawitute zirtîr thiamna chu thil pawimawh tak a ni nachungin, chu chu inkhâwm tihlawhtlingtu ber a ni kher lo. Kan ngaih pawimawh ber chu thusawitu thu sawi thiam lam ni lovin, a thu sawi lama beng kan chhit dân a ni zâwk tûr a ni tih chu i pawm lâwm ni? Inkhâwmnaa kan tel a, chuta thu sawi ngun taka kan ngaihsak chuan, Pathian chu a duh dân milin kan bia tihna a ni. Chu chu a ni, inkhâwm tihlawhtlingtu chu ni. Pathian Thu hriatna zir kan châk a nih chuan, thusawitu chu a thiam emaw, thiam lo emaw pawh nise, inkhâwm chu kan hlâwkpui ngei ang. (Thufingte 2:1-5) Chuvângin, kan inkhâwmnaah hian, ‘ṭhahnemngai taka pawisak lehzual’ chu, theihtâwp chhuahin i tum nghet tlat ang u.
Mahnia Zirna Aṭangin Hlâwkna Pumhlûm Dawng Rawh
15. Engtin nge zirna leh rilrua chhût ngunna chu kan hlâwkpui theih?
15 Mahnia zirna leh rilrua chhût ngunna neih hun chhûnga ‘ṭhahnemngai taka pawisak lehzual’ chu kan hlâwkpui êm êm a. Bible leh Kristian thu leh hla chhuahte chhiarna leh rilrua chhût ngunna chuan, Pathian Thu, thutak chu kan thinlungah a tuhnghet ang a. Chu chuan kan ngaihtuahna leh thiltih chu nasa takin a nghawng dâwn a ni. Ni e, chu chuan Jehova duhzâwng tih chu kan lâwmna ni tûrin min ṭanpui ngei ang. (Sâm 1:2; 40:8) Chuvângin, kan zir huna kan hlâwkpui theih nân kan rilru pêk theihna chu kan tihchangkân a ngai a ni. Rilru lâk pên chu a awl hle! Thil ho tê tê—phone ri emaw, bengcheng dang emawte chuan kan rilru a la pêng thei a ni. A nih loh leh, kan rilru kan pe rei thei lo ve hrim hrim pawh a ni thei. Tum ṭha tak, thlarau lama inchâwm tumna neiin kan ṭhu pawh a ni thei ang; mahse, rei kan ṭhut hmain, kan rilru chu hmun dangah a lo kal pêng mai thei a ni. Engtin nge Pathian Thu mahnia zirna kan neih chhûngin, ‘ṭhahnemngai taka kan pawisak lehzual’ theih ang?
16. (a) Engvângin nge mahnia zirna neih nân hun duan kan insiam a pawimawh? (b) Engtin nge Pathian Thu zir nân hun i insiam theih?
16 Hun duan insiam leh zirna tâna ṭangkai thei ber tûr hmun thlan chu a hlâwk hle. Kan zînga mi tam zâwkte tân chuan hun leh hmun fianrial neih chu thil harsa tak a ni. Nî tin thil thlengte hian lui luang chak takin thingṭang a lên ang maiin min lên vêl niin kan inhre mai thei. Dik takin, tuizangkhauh lai hi hleuhvin, thliarkâr tê pakhat reh tak mai chu kan zawn a ngai a ni. Zirna hun remchâng chu amaha a lo awm mai kan nghâk ngawt tûr a ni lo. Zir nâna hun insiamna hmangin dinhmun chu kan thunun a ngai a ni. (Ephesi 5:15, 16) Ṭhenkhat chuan rilru la pêngtu a tlêm lai zîng kâr hun rei lo tê chu zirna hun atân an hmang a. Mi dangte tân chuan tlai lam chu zirna hun ṭha zâwk a ni. Eng hun pawh nise, a pawimawh ber chu Pathian leh a Fapa hriatna dik zirna ngaihthah loh hi a ni. (Johana 17:3) Chuvângin, mahnia zirna neih nân hun duan insiamin, chu hun duan chu i zâwm tlat ang u.
17. Rilrua chhût ngunna chu eng nge ni a, chu chu engtin nge kan hlâwkpui theih?
17 Rilrua chhût ngunna—kan zirna aṭanga kan thu zirte chhûtna—hi thil hlu tak a ni. Chu chuan Pathian ngaihtuahnate lehkha phêk ata la chhuak a, kan thinlunga dah lût tûrin min ṭanpui a ni. Rilrua chhût ngunna chuan ‘thu ngaithlatute mai ni lovin zâwmtute kan lo nih zâwk’ theih nân Bible zilhna thute nunpui dân hre tûrin min ṭanpui bawk. (Jakoba 1:22-25) Chu bâkah, rilrua chhût ngunna chuan Jehova hnaih zual tûrin min ṭanpui a ni; chu chuan a miziate leh kan zirna hun chhûnga kan thu chhiarin chu a miziate a târ lan dânte chu min ngaihtuahtîr theih avângin.
18. Hlawhtling taka rilrua chhût ngun nân eng dinhmun nge ngai?
18 Zirna leh rilrua chhût ngunna hlâwkpui pumhlûm tûr chuan, kan rilru la pêng thei zawng zawng chu kan paih bo tûr a ni a. Rilrua kan chhût ngun laia kan thil hmuh tharte la lût tûr chuan, tûn lai nuna rilru la pêng thei thil zawng zawng hi kan lâk kian vek a ngai a ni. Chutianga rilrua chhût ngun tûr chuan hun leh hmun fianrial insiam a ngai ngei mai; mahse, Pathian Thua awm thlarau lam chaw leh thutak tui in chuan min va tiharh tak êm!
19. (a) Mahnia zirna chungchângah, engin nge mi ṭhenkhat chu an rilru pêk theih chhûng tipung tûra ṭanpui? (b) Zirna chungah eng rilru put hmang nge kan neih ang a, he thiltih pawimawh tak aṭang hian eng hlâwkna nge kan neih theih?
19 Kan rilru pêk theih hun chhûng chu a tawi a, zirna kan ṭan hnu lawkah kan rilru a kal pêng nghâl mai a nih chuan engtin nge ni ang? Ṭhenkhat chuan zirna rei lo te chhûng nei ṭana, zawi zawia tihsei hret hretna hmangin zirna an neih chhûnga an rilru pêk theihna chu an tichangkâng thei tih an hmu chhuak a ni. Kan tum ber chu zir zawh zung zung ni lovin, hun rei tak chhûng zir chu a ni tûr a ni. Kan zirlai thua tuina tak tak kan insiam a ngai a. Bâwi rinawm, fing tak siam chhuah thu leh hla tam takte hmangin zirchîkna kan neih belh thei a. “Pathian thu ril” bih chu thil hlu tak a ni. (1 Korinth 2:10) Chutianga kan tihna chuan Pathian kan hriatna a tipung a, kan thil hriat theihna a tichangkâng a ni. (Hebrai 5:14) Pathian Thu zirlai taima tak kan nih chuan, ‘mi dangte zirtîr chhâwng thei tûrin’ kan tling bawk ang.—2 Timothea 2:2.
20. Engtin nge Pathian Jehova nêna inlaichînna duhawm tak kan siam a, kan neih reng theih ang?
20 Kristian inkhâwmnaa tel leh mahnia zirna chuan Jehova nêna inlaichînna duhawm tak siam a, nei reng tûrin nasa takin min ṭanpui ang. Chu chu Pathian hnêna: “Aw, i dân hi ka va ngaina êm! Nilênga ka ngaihtuah ṭhin a ni” titu fakna hla phuahtu chungchângah pawh hian a dik hmêl khawp mai. (Sâm 119:97) Chuvângin, inkhâwmnaahte leh inkhâwmpuinaahte tel kim chu i tum tlat ang u. Tin, Bible zir nân leh rilrua chhût ngun nân hun i lei bawk ang u. Chutianga Pathian thu ‘ṭhahnemngai taka kan pawisak lehzual’ avângin lâwmman nasa tak pêk kan ni ang. (w02 9/15)
[Footnote]
a Hebrai mite hnêna lehkha thawn chu C.E. 61-a ziah a nih hmêl hle a. Chuti a nih chuan, a hnu kum nga vêl lekah, Jerusalem chu Cestius Gallus-a sipai rual chuan an hual ta mai tihna a ni. Chûng sipai rual chu an inhnûkdâwkleh ta thuai a, chu chuan Kristian inrâlringte tân tlân chhuahna kawng a hawng a ni. Chu mi hnu kum liah chuan khawpui chu Rom sipai chuan General Titus-a kaihhruaina hnuaiah a tichhe ta a ni.
I La Hre Reng Em?
• Engvângin nge Hebrai Kristian ṭhenkhat chu rinna dik ata an tawlh bo?
• Engtin nge Kristian inkhâwmnaah rilru kan pêk reng theih ang?
• Engin nge mahnia Bible zirna leh rilrua chhût ngunna chu hlâwkpui tûrin min ṭanpui ang?
[Phêk 25-naa milem]
Hebrai Kristiante chu Jerusalem chhiatna lo thleng mai tûr ata an harhvân a ngai