Zirtîrtu Ropui Entawn Rawh

“Chutichuan kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u.”​—MATTHAIA 28:​19, 20.

1, 2. (a) Eng kawngin nge kan zavai hian zirtîrtu kan nih vek? (b) Zirtîrna chungchângah, Kristian dikte hian eng mawhphurhna danglam bîk tak nge an neih?

ZIRTIRTU i ni em? Engemaw kawng zâwng chuan kan ni vek a ni. Khualzin kawng bo kawng i kawhhmuh châng te, i hna thawhpuite hnêna hna thawh dân tûr i hrilh châng te, a nih loh leh naupang hnêna a pheikhawk suih dân tûr i zirtîr chângtein zirtîrtu i ni a. Chûng kawnga mi dangte ṭanpuina chuan lungâwina nasa tak a thlen a ni lâwm ni?

² Zirtîrna chungchângah chuan, Kristian dikte hian mawhphurhna danglam bîk tak an nei a. ‘Mite zirtîrahte siam a, . . . zirtîr’ tûra thupêk chu kan dawng a ni. (Matthaia 28:​19, 20) Korhhranah pawh zirtîrna hun kan neih châng a awm a. Mi puitlingte chu kohhran tihchangkân nâna “kohhran châwmtu leh zirtîrtu” atâna ruat an ni. (Ephesi 4:​11-13) Hmeichhe puitlingte chu an nî tin Kristian thiltihnaah an aia naupang zâwkte hnêna “ṭha lam zirtîrtute” an ni tûr a ni a. (Tita 2:​3-5) Kan zavaiin kan rinpuite tisâwt tûra fuih kan ni vek a, chu fuihna chu mi dangte tisâwt tûra Bible hmanna hmangin kan zâwm thei a ni. (1 Thessalonika 5:11) Pathian Thu zirtîrtu nih leh chatuana hlâwkna thlentu thlarau lam thil hlute hriattîr theihna chanvo kan neih chu a va hlu êm!

3. Engtin nge kan zirtîr thiamna chu kan tihchangkân theih ang?

³ Mahse, engtin nge kan zirtîr thiamna chu kan tihchangkân theih? A bul berah chuan, Zirtîrtu Ropui, Isua entawn hi a ni. Ṭhenkhat chuan, ‘Ani chu ṭha famkim a ni si a, engtin nge Isua chu kan entawn theih ang?’ an ti mai thei. A dik a ni, zirtîrtu sawisêl bo zawng kan ni thei lo vang. Chutichung chuan, kan thiamna chu engpawh ni se, Isua zirtîr dân kawng entawn tûrin theihtâwp kan chhuah thei a ni. Tûnah hian, a zirtîr dân kawng chi lîte lo sawikhâwm ta ila​—Tluangtlamna te, zawhna hman ṭangkai te, chhût dân dik te, leh tehkhin thu inhmeh te chu.

Tluangtlam Takin Zirtîr Rawh

4, 5. (a) Engvângin nge tluangtlamna hi Bible thutak nihphung ber a nih? (b) Tluangtlam taka zirtîr tûrin, engvângin nge kan ṭawngkam hmana fîmkhur chu thil pawimawh tak a nih?

⁴ Pathian Thua thutak bulte chu hriat harsa khawpin a hnawk lo. Isua chuan a ṭawngṭainaah: “Aw ka pa, . . . nangin mi fing leh mi bengvârte hnênah hêng thu hi i zêp a, nausênte hnêna i puan avâng hian ka fak a che,” tiin a sawi a ni. (Matthaia 11:25) Jehova chuan a thiltumte chu mi ngîlte leh inngaitlâwmte hnênah a puang ṭhîn a. (1 Korinth 1:​26-28) Chuvângin, tluangtlamna chu Bible thutak nihphung ber a ni.

⁵ In lama Bible zirna i kaihhruai hunah emaw, tuina neite i tlawhkîr hunah emaw engtin nge tluangtlam takin i zirtîr theih ang? Aw le, Zirtîrtu Ropui hnên aṭangin eng nge kan zir? A thu sawi chu a ngaithlatu mi tam zâwk “lehkha thiam lo, mi mâwl tak” te hriatthiam atân, Isua chuan ṭawngkam hriatthiam awl tak a hmang ṭhîn a. (Tirhkohte 4:13) Tichuan, tluangtlam taka zirtîr tûra thil ṭûl hmasa ber chu kan ṭawngkam hman fîmkhur hi a ni. Pathian thu thutak chuan mi a hmin lehzual nân ṭawngkam leh ṭawngkauchheh ropui tak tak leh sâng tak takte kan hman a ngai lo. Chutiang “thusawi ropui” chuan mi, a bîk takin thiamna leh theihna sâng vak lote chu a titîm thei a ni. (1 Korinth 2:​1, 2) Uluk taka thlan chhuah thu mal tluangtlam takte chuan thutak a târ lan nasat zâwk theihzia Isua entîrna chuan a lantîr a ni.

6. Engtin nge thu tam tak hmanga Bible zirlai tihhrilhhai chu kan pumpelh theih ang?

⁶ Tluangtlam taka zirtîr tûr chuan, Bible zirlai chu thu tam tak hmanga tihrilhhai lo tûrin kan fîmkhur bawk tûr a ni. Isua chuan a zirtîrte tlin tâwk chu a ngaihtuah a. (Johana 16:12) Keini pawhin zirlai tlin tâwk chu kan ngaihtuah ve tûr a ni. Entîr nân, Chatuan Nunnaa Hruaitu Hriatna tih lehkhabu kan zirpuiin chipchiar lutuka kan hrilhfiah kher a ngai lo va.a Zir tûra bituk chin zawh chu thil pawimawh ber ni ang hrima hmanhmawh taka zirpui tûr lah a ni hek lo. Chutih ahnêkin, zirlai mamawh leh thiam theih dân azir zêla kal chu a finthlâk zâwk a ni. Kan tum ber chu Krista zirtîr leh Jehova betu lo ni tûra zirlai ṭanpui chu a ni a. Tuina nei zirlai chuan a thil zirte chiang taka a hriat thiam nâna ṭanpui tûrin a ṭul ang anga hun kan lâk a ngai a ni. Chutiang chuan, thutak chuan a thinlung a khawih ang a, thil ti tûrin a chêttîr ang.​—Rom 12:2.

7. Kohhrana thu sawi hunah, eng rawtnate’n nge tluangtlam taka sawi thei tûra min ṭanpui thei?

⁷ Kohhrana thu kan sawiin, a bîk takin mi thar rawn inkhâwm an awmin, engtin nge “hriat awla” thu kan sawi theih ang? (1 Korinth 14:9) Min ṭanpui thei rawtna pathum hi ngaihtuah teh. Pakhatna, ṭawngkam hriat ṭhan loh i hman tûr rêng rêng chu hrilhfiah zêl rawh. Kan Pathian Thu hriat thiamna hian ṭawngkam kawh bîk nei engemaw min pe a. Kan ṭawngkam hman ṭhin, “bawi rinawm, fing tak” te, “berâm dang” te, leh “Babulon Khaw Ropui” tih ang chi te kan hman chuan, a awmzia chiang taka târ langtu ṭawngkauchheh tluangtlam tak hmanga kan hrilhfiah a ngai mai thei a ni. Pahnihna, ṭawng tui tam lutuk suh. Thu tam lutuk leh chipchiar lutuka sawi chuan ngaithlatute tuina a tireh thei a. Ṭawngkam leh ṭawngkauchheh ṭûl lêm lote paih bona chuan thusawi a tifiah zâwk ṭhîn a ni. Pathumna, thil tam lutuk sawi tum suh. Kan zirchîkna aṭangin thil tuiawm chipchiar tam tak kan hmu thei ang a. Mahse, thu sawi tûr chu a thu pawimawh zualte hmanga khaikhâwm a, chûng thute finfiahna tûr thu dangte leh hun tiam chhûnga fiah taka sawi theih tûrte chauh hman chu a ṭha ber a ni.

Zawhna Hmang Ṭangkai Rawh

8, 9. Engtin nge in neitu rilru la zâwng tak zawhna chu kan thlan theih ang? Entîrna pe rawh.

⁸ Isua chuan a zirtîrte’n an rilrua vei zâwng an sawi chhuah nân te, an ngaihtuahnate chawhthawh nân leh sâwizawi nân tea zawhna hman a thiamzia kha han ngaihtuah chhuak leh la. Zawhna hmangin, Isua chuan dam têin an thinlung a chêttîr ṭhîn a ni. (Matthaia 16:​13, 15; Johana 11:26) Engtin nge Isua angin zawhna kan hman ṭangkai ve theih ang?

⁹ In tina thu kan hrilh hunah, Pathian Ram chanchin kan sawi theihna tûra tuina chawhthawh nân, zawhna kan hmang thei a. Engtin nge in neitu rilru la zâwng tak zawhna chu kan thlan theih ang? Mit vâr tak ni ang che. In pakhat i va pan chuan, in leh a vêl chu enkual hmasa zung zung ang che. Naupang an neihzia lantîrtu, naupang infiamna thilte chu tuallaiah a awm em? A awm chuan, ‘I fate an lo ṭhanlen huna khawvêl awm dân tûr hi i ngaihtuah tawh ngai em?’ tiin zawhna kan zâwt thei ang. (Sâm 37:​10, 11) Kawngkhârah chuan a kalhna tala tam tak a awm thluah em? A nih loh leh, in rawk hmangho laka vênhimna khâwl a awm em? A awm chuan: ‘Mite, nang leh kei ngei pawh hi mahni inah leh kawtthlêrah te him taka kan awm theih hun a lo thlen theih i ring em?’ tiin i zâwt thei bawk ang. (Mika 4:​3, 4) Kailâwnah Wheelchair kalna tûr siam a ni em? A nih chuan: ‘Mi nungdam zawng zawngin hrisêlna ṭha kan neih theih hun hi a awm ngai ang em?’ tiin i zâwt thei ang. (Isaia 33:24) Rawtna tam tak chu Reasoning From the Scriptutes-ah a hmuh theih a ni.b

10. Engtin nge zawhna chu Bible zirlai thinlung leh ngaihtuahna ‘phawrh chhuah’ nân kan hman theih ang a; mahse, eng nge kan hriat reng ngai?

¹⁰ Bible zirna kan kaihhruaiin engtin nge zawhna kan hman ṭangkai theih ang? Isua angin mite thinlung kan hre ve thei lo va. Mahse, dinhmun azira rem hre taka zawhna zawh chuan zirlai rilru leh thil vei zâwngte “phawrh chhuak” tûrin min ṭanpui thei a ni. (Thufingte 20:5) Entîr nân, Hriatna bua “Pathian Ngaihsaka Nunin Hlimna A Thlen Chhan” tih bung lo zir ni ta ila. Chutah chuan rinawm lohna te, inngaih te, leh thil dangte chungchâng Pathian thlîr dân sawiho a ni a. Zirlai chuan zawhna chhutchhuahte chu dik takin a chhâng a ni thei; mahse, a thil zirte chu a pawm tak zet em? ‘Hêng thilte Jehova thlîr dân hi a âwm i ti em?’ ‘Engtin nge hêng Bible thu bulte hi i nunpui theih ang?’ tiin kan zâwt thei a ni. Mahse, zirlai chu zahna lantîrin, mi zahthiam tak kan nih a ngai tih hre reng ang che. Bible zirlai tihrilhhai thei emaw, timualpho thei emaw chi zawhna chu kan zâwt duh ngai lo vang.​—Thufingte 12:18.

11. Eng kawngin nge vântlâng thu sawituin zawhna a hman ṭangkai theih?

¹¹ Vântlâng thu sawitu tân pawh zawhna hi ṭangkai taka hman theih a ni. Chhân ngai lo zawhna​—a ngaithlatute lam aṭanga chhânna beisei kher loh zawhna​—chuan a ngaithlatu chu ngaihtuah a, chhût bawk tûrin a ṭanpui thei a. Isua chuan chutiang zawhna chu a hmang fo a ni. (Matthaia 11:​7-9) Chu bâkah, thuhmahruai a sawi zawhah, thu sawitu chuan a thusawi tûra thu pawimawh deuh deuh târ lan nân zawhna a hmang thei a. Hetiang hian a sawi thei ang: “Vawiina kan thu sawi tûrah hian, hêng a hnuaia zawhnate chhânna hi kan ngaihtuah dâwn a ni,” tiin. Tichuan, a tlip nân, chûng zawhnate chu a thu pawimawh deuh deuhte ennawn nân a hmang leh thei ang.

12. Kristian upate chuan an rinpuite’n Pathian Thu aṭanga thlamuanna an neih theihna tûra ṭanpui nân zawhna an hman theihzia târ langtu entîrna pakhat pe rawh.

¹² Kristian upate chuan berâmte an kannaah “rilru tête” chuan Jehova Thu aṭanga thlamuanna an hmuh theihna tûra ṭanpui nân zawhna an hmang thei bawk a ni. (1 Thessalonika 5:14) Entîr nân, mi lungngai tak tuemaw ṭanpui nân, upa chuan Sâm 34:18 a kawhhmuh thei a. Chu châng chuan: “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn,” a ti a ni. Lungngaitu chuan chu châng chu ama tân a nihzia a hriatthiam nân, upa chuan: ‘Jehova chuan tute nge a hnaih? ‘Thinlunga lungchhiat’ châng leh “rilrua inchhîr” châng i nei ṭhîn em? Bible sawi anga Jehova chuan chutiang mite a hnaih si chuan, i kiangah a awm tihna a ni dâwn lâwm ni?’ tiin. Chutianga dam taka thlamuanna chuan lungngai ngawih ngawihte rilru chu a tithar leh thei a ni.​—Isaia 57:15.

Chhût Dân Dik

13, 14. (a) Engtin nge a hmuh theih loh Pathian a rin loh thu sawitu chu kan chhûtpui ang? (b) Engvângin nge mi zawng zawng hmin vek tûra kan inbeisei loh vang?

¹³ Kan rawngbâwlnaah hian, chhût dân dik leh rilru hneh thei tak hmanga mite thinlung thlen chu kan duh a. (Tirhkohte 19:8; 28:​23, 24) Chu chu Pathian Thu, thutak chungchânga mi dangte rilru hneh nân chhût dân harsa leh sâng tak tak hman kan zir tûr tihna em ni? Ni lul lo ve. Thil chhût dân dik chu a harsa kher tûr a ni lo. Tluangtlam taka chhût dân dik hman chu a ṭangkai ber fo a ni. A hnuaia entîrna hi ngaihtuah ta la.

¹⁴ Tuemawin hmuh theih loh Pathian chu a rin loh thu sawi ta se, engtin nge kan chhân lêt ang? Thil engemaw a thlen rêng rêng hian a titu a awm ṭhîn tih leilung pianken dân chu kan chhûtpui thei a ni. Thil thleng pakhat kan hmuh hian, a titu a awm ngei tih kan pawm thlap ṭhîn a ni. Hetiang hian kan sawi thei ang: ‘Hmun fianrial taka awm ni ta la, in ṭha tak mai, ei tûr tinrênga khat i hmuh chuan (thil thleng), tumemawin (titu) chu in chu a sa a, ei tûrin a tikhat tih chu i pawm nghâl ngei ang. Chutiang bawkin, leilunga thilte inruahman dân leh he lei “ei tûr dahna pindana” ei tûr hnianghnâr tak awmte hian (thil thleng), Tuemaw (titu) mawh phurtu a awm a ni tih rin chu a tiâwm viau lo maw?’ tiin. Bible chuan he thudik hi chiang takin a sawi: “Chhûng tin hian puipa tu emaw tal an nei ṭheuh si a; engkim puipa erawh chu Pathian a ni,” tiin. (Hebrai 3:4) Nimahsela, kan chhût dân chu eng anga dik leh ṭha pawh ni se, mi zawng zawng chu kan hmin vek dâwn lo. Bible chuan “chatuana nun duhna rilru dik tak” neitute chauh ringtu an lo ni ang tih min hrilh a ni.​—Tirhkohte 13:​48, NW; 2 Thessalonika 3:2.

15. Jehova miziate leh a thiltih dânte sawi uar nân eng chhût dân nge kan hman theih a, eng entîrna pahnihte hian nge chutiang chhût dân kan hman theih dân chu târ lang?

¹⁵ Thlawhhma rawngbâwlnaah a ni emaw, kohhranah a ni emaw kan zirtîrna apiangah hian Jehova miziate leh a thil tih dânte sawi uar nân, chhût dân dik kan hmang thei a. Ṭangkai zual tak mai chu, Isua pawhin a châng chânga a hman ṭhin ‘a nasat zâwk tûrzia’ chhût dân hi a ni. (Luka 11:13; 12:24) Hetianga thil inkalh khaikhinna hmanga chhût dân hian mite thinlung a hneh thei hle a. Hremhmun mei dîl thurin a dik lohzia laihlan nân, hetiang hian kan sawi thei ang: ‘Hmangaihna nei pa ber chuan a fa kut chu meia hâlsakin a hrem hauh lo vang. Hmangaihnaa khat kan Pa vâna mi tân phei chuan hremhmun mei dîl ngaih dân ringawt mai pawh hi a va tenawm nasa lehzual dâwn êm!’ tiin. (Jeremia 7:31) Jehova chuan a chhiahhlawhte chu a mal mala a ngaihsakzia zirtîr nân hetiang hian kan sawi thei ang: ‘Jehova chuan vâna arsi tlûklehdingâwn za tam takte mah an hminga a koh vek theih chuan, amah hmangaihtu, a Fapa thisen hlu taka a lei tawh mihringte chu a va ngaihtuah nasa lehzual dâwn êm!’ tiin. (Isaia 40:26; Tirhkohte 20:28) Chutiang mi hneh thei tak chhût dân hian mi dangte thinlung thleng tûrin min ṭanpui thei a ni.

Tehkhin Thu Inhmeh Tak

16. Engvângin nge tehkhin thu hi zirtîrnaah a hlut êm êm?

¹⁶ Tehkhin thu ṭha takte hi kan zirtîrna tituiawmtu a ni a. Engvângin nge zirtîrnaah hian tehkhin thu hi a hlut êm êm? Mi thiam pakhat chuan: “Hmuh theih thil tel lova thil ngaihtuah theih hi mihring tih theih zînga thil harsa ber a ni,” tiin a sawi a. Tehkhin thu chuan kan rilru mitthla a siam a, ngaih dân thar chu hre thiam lehzual tûrin min ṭanpui a ni. Isua chu tehkhin thu hmanna kawngah a langsâr hle. (Marka 4:​33, 34) Tûnah chuan, he zirtîr dân kan hman ṭangkai theih dân hi i lo ngaihtuah ang u.

17. Eng thil palite’n nge tehkhin thu chu tehkhin thu ṭha tak nihtîr?

¹⁷ Engin nge tehkhin thu chu tehkhin thu ṭha tak nihtîr? A bul berah chuan, tehkhin thu chu a ngaithlatu nên a inmil tûr a ni a, an hriat ṭhan dinhmunte a ni tûr a ni. Isua chuan a tehkhin thu tam tak chu a thu ngaithlatute nî tin nuna thilte hmangin a sawi ṭhîn tih kan hria a ni. A pahnihnaah chuan, tehkhin thu chu kan thu sawi nên a inmil tûr a ni. Chutianga a inmil loh chuan, kan tehkhin thu chuan a ngaithlatute rilru a kuai pêng thei a ni. A pathumnaah chuan, tehkhin thu chu ṭûl lêm lo thu chipchiar hian a khuhbo tûr a ni lo. Isua chuan a pawimawh laite chipchiar taka sawiin, a pawimawh lêm lo lai chu a sawi kân mai ṭhîn tih hre reng ang che. A palinaah chuan, tehkhin thu kan hman rêng rêngin, a thu zir tûr chu kan tichiang hle tûr a ni. Chuti a nih loh chuan, ṭhenkhatin kan sawi tum ber chu an man lo mai ang.

18. Engtin nge tehkhin thu inhmeh tak kan hman theih ang?

¹⁸ Engtin nge tehkhin thu inhmeh tak kan ngaihtuah chhuah theih ang? Thawnthu sei, leh chipchiar tak kan ngaihtuah a ngai lo. Tehkhin thu tâwi tê pawh hi a ṭha thei êm êm a. Thu sawikhâwm lai entîrnate ngaihtuah han tum phawt mai la. Entîr nân, Pathian ngaihdamna chungchâng kan lo sawiho ni ta se, Tirhkohte 3:​19-a Jehova’n kan sualte a “thai bo,” a nih loh leh a tihreh chungchângah tehkhin thu kan sawi duh ta a ni. Chu thu chu amah ngei pawh tehkhin thu a ni tawh a; mahse, tehkhin nân thil tak tak eng nge kan hman theih​—nawhrehna em ni ang? nge nawhfê zâwk? Hetiang hian kan sawi thei ang: ‘Jehova’n kan sualte a ngaihdam hian, nawhfê (a nih loh leh nawhrehna) hmanga a hru reh vek ang mai a ni,’ tiin. Chutiang tehkhin thu tluangtlam hman chuan kan sawi tum man ṭhelh a tiharsa hle a ni.

19, 20. (a) Khawi aṭangin nge tehkhin thu ṭha kan hmuh theih? (b) Kan thu leh hla chhuah zînga tel tehkhin thu ṭha tak ṭhenkhatte chu engte nge? (Bâwm en bawk rawh.)

¹⁹ Khawi aṭangin nge nuna tawn tak tak entîrna pawh tiamin tehkhin thu inhmeh tak chu i hmuh theih ang? Nangma thiltawnah emaw, lo chhuahna chi hrang hrang nei i rinpuite thiltawnah emaw i zawng thei ang. Tehkhin thu chu thil dang chi hrang hrang aṭang pawhin a lâk theih a, thil nung leh nung lote aṭang te, inchhûngkhur bungrua aṭang te, a nih loh leh tualchhûnga hriat lâr tak thil thleng aṭang tein a lâk theih a ni. Tehkhin thu ṭha hmuh theih dân bul ber chu harhvân a, nî tina kan vêla dinhmunte ngun taka “en” hi a ni. (Tirhkohte 17:​22, 23) Mipui hmaa thusawi dân chungchâng ziakna lehkhabu pakhat sawi dân chuan: “Mihring nun leh a hnathawh chi hrang hrang thlîr a, mi chi hrang hrang pâwl a, ngun taka thil chîka a hriat thiam hma loha zawhna zâwt ṭhîn thusawitu chuan mamawh huna ṭangkai êm êm tûr tehkhin thu tam tak a khâwlkhâwm ṭhîn,” tiin a sawi.

²⁰ Tehkhin thu lâkkhâwmna hnâr ṭha tak dang pawh a la awm a​—Jehova Thuhretute chhuah Vênnainsâng te, Awake! te, leh an thu leh hla chhuah dangte chu. Hêng thu leh hla chhuahte’n tehkhin thu an hman dân enna aṭangin nasa takin kan inzir thei a ni.c Entîr nân, Hriatna bu bung 17, paragraph 11-a tehkhin thu a hman hi lo en ta la. Kohhrana mize hrang tam takte chu kawngpuia motor chi hrang hrang kal nên a khaikhin a ni. Engin nge tehkhin thu ṭha nihtîr? Nî tin dinhmun ṭanchhana siam a ni tih i hria ang a, thu sawi tûr nên a inrem êm êm bawk a; tin, a hrilhfiahna chu a chiang hle bawk a ni. Kan zirtîrnaah chuan thu leh hla chhuaha tehkhin thu chhuah tawhte chu kan hmang thei a, Bible zirlaite tân emaw, thusawiah emaw a ṭûl dân azira siamremin kan hmang thei ang.

21. Pathian Thu zirtîrtu hlawhtling tak nihna aṭangin eng lâwmman nge lo awm?

²¹ Zirtîrtu hlawhtling nih lâwmman chu a ropui hle. Kan zirtîr hian, mi dangte kan hrilh a; anmahni ṭanpui nân kan inhmang ve tihna a ni. Chutiang thilpêk chuan hlimna a thlen a ni, Bible-in: “Englo lâk aiin pêkin lukhâwng a nei zâwk,” a tih avângin. (Tirhkohte 20:35) Pathian Thu zirtîrtute tân chuan, chu hlimna chu chatuan daih thil hlu leh dik engemaw​—Jehova chungchâng thutak​—chu mite hnênah kan sem tih hriatna avânga hlimna kan neih chu a ni. Chu bâkah, Zirtîrtu Ropui, Isua Krista kan entawn tih kan hriat avânga lungawina pawh kan nei thei bawk. (w02 9/1)

[Footnote-te]

I La Hre Reng Em?

• Engtin nge in lama Bible zirna kan kaihhruai leh kohhrana thu kan sawiin tluangtlam taka kan zirtîr theih?

• Engtin nge in tina thu kan hrilhin hlawhtling takin zawhna kan hman theih ang?

• Engtin nge Jehova miziate leh a thiltih dânte sawi uar nân chhût dân dik kan hman theih?

• Khawi aṭangin nge tehkhin thu inhmeh takte kan hmuh theih?

[Phêk 23-naa bâwm/milem]

Hêng Tehkhin Thute Hi I La Hria Em?

Hêng a hnuaia kan târ lante hi tehkhin thu hman tlâk tam takte zînga tlêm tê chauh a ni a. Engvângin nge râwn tûr târ chhuahte hi en a, tehkhin thuin kan thu sawikhâwm lai a tihchian lehzual dân i en loh vang ni?

• Thil siam chhuaktute hnên aṭanga a hman dân tûr inkaihhruaina lehkhabu angin, Bible chu min Siamtu hnên aṭanga zirtîrna leh kaihhruaina lehkhabu a ni.​—Chatuan Nunnaa Hruaitu Hriatna, phêk 7.

• Lunga thuziak inker ang maiin, kan nu leh pa hmasa berte taksaa ze inthlah chhâwnna kengtu-ah chuan sualna chu a intuh nghet hle.​—Chatuan Nunnaa Hruaitu Hriatna, phêk 58.

• Kâwlphetha chuan a hnathawhtîr hmanraw hmêlhmang ang a put ve zêl loh ang bawkin, nunna thahrui hian a tihnun thilsiamte zia leh nihna engmah a pu lo.​—Chatuan Nunnaa Hruaitu Hriatna, phêk 82.

• Sapêl mite tân sa chah a ṭangkai ang bawkin, thlarau zâwlna pawh hi ramhuaihote tân a ṭangkai êm êm a: an sa pelh chu a hîp tlat a ni.​—Chatuan Nunaa Hruaitu Hriatna, phêk 111.

• Damdawi ina zai i tawh hnu chuan, zaina hliam chu an ṭhui ping leh ṭhîn a. A hun hmaa a ṭhuina phelh chu a hlauhawm thei a ni. Chutiang bawkin, mihring sawrkârte pawhin Pathian Ramin lei pum pui hi a awp hma loh zawng mipui an chelh khâwm rih a. Anmahni dodâl chu a hun hmaa inzaina ṭhuina phelh nên a khaikhin theih a ni.​—Chatuan Nunnaa Hruaitu Hriatna, phêk 133-34.

• I ngaih dânte sawi chhuah chu ball theh ang a ni. Zâwi têin i theh emaw, inhliamna thlen thei khawpa nâin i theh emaw thei a ni.​—Chatuan Nunnaa Hruaitu Hriatna, phêk 144.

• Lung chunga sak lawng kaihhruaina khâwnvâr in angin, Pathian dân chu a nghet a, a inthlâk danglam thei lo.​—Vênnainsâng, April 1, 2002, phêk 25.

[Phêk 20-naa milemte]

Kristian dikte chu Pathian Thu zirtîrtute an ni

[Phêk 21-naa milem]

Upate chuan Pathian Thu aṭanga thlamuanna hmuh tûra an rinpuite ṭanpui nân zawhna an hmang thei