Ṭhenawm Ṭhate Chu An Ṭangkai

“Lamhla taka unau aiin lamhnaia ṭhenawmte chu an ṭha zâwk.”​—Thufingte 27:10.

DAN hretu pakhat, C.E. kum zabi pakhatnaa mi chuan Isua hnênah: “Ka vêngte chu tunge ni?” tiin a zâwt a. Isua chuan a chhânnaah, a vêngte chu tunge a nih a hrilh mai lova, vêng ṭha emaw, ṭhenawm ṭha emaw nihtîrtu chu a hrilh zâwk a ni. Isua tehkhin thu hi i hrebel viau pawh a ni mai thei. Chu chu mi tam tak hriat dânin Samari mi ṭha tehkhin thu a ni a, Chanchin Ṭha Luka ziak-ah a chuang a ni. Isua’n a chanchin a sawi dân chu heti hi a ni:

“Tu emaw Jerusalem khua aṭangin Jeriko khuaah a zuk kal dâwn a, suamhmangte a tâwk hlauh va, chu mite chuan a silhfên an hlihsak vek a, an vaw nek a, thi lek lekin an kalsan ta a. Tin, puithiam tu emaw chu mi kawngah chuan a zuk kal kher a, a hmuh veleh kawng sîr lehlamah a hêl ta mai a. Tin, chutiang bawkin Levia chi mi pakhat pawh chu mi hmun chu a lo thleng a, a hmuh veleh kawngsîr lehlamah a hêl ve ta mai a. Amaherawhchu Samari rama mi tu emaw a zin kalin a awmna chu a lo thleng a, a hmuh veleh a khawngaih êm êm a. A hnênah a va kal a, a pemahte chuan hriak leh uain a leih a, a tuam a, ama sa chungah a chuantîr a, khualbûkah a kalpui a, a enkawl ta a. Tin, atûkah chuan duli pahnih a phawrh a, khualbûk vêngtu hnênah a pe a, ‘Lo enkawl la, he mi bâka i sên zawng chu ka lo kir leh hunah ka rawn rûl leh ang che,’ a ti a. ‘Chu mite pathum zîngah chuan suamhmangho tâwka vêngte chu tu ber nge nia i rin?’ a ti a.”​—Luka 10:​29-36.

Dân hretu chuan tehkhin thu chu a hre thiam a ni ngei ang. “A khawngaihtu chu” tia chhângin hliam tuar pa ṭhenawm dik tak chu chiang takin a sawi nghâl vat mai a ni. Tin, Isua’n a hnênah: “Nang pawh chu ang bawk chuan va ti ve rawh,” a ti a. (Luka 10:37) Ṭhenawm dik tak awmzia tehkhin thu thiltithei tak a va ni êm! Isua tehkhin thu chuan hêng zawhna: ‘Eng ang ṭhenawm nge ka nih ve? Ka hnam emaw, ka pian leh mûrna emaw chuan tute nge ka ṭhenawmte tih thutlûkna ka siamna chu a thunun em? Chûng thilte chuan buaina tâwkte ka ṭanpuina chungah chintâwk a siam em? Ṭhenawm ṭha ni tûrin theihtâwp ka chhuah em?’ tihte hi mahni leh mahni inzâwt tûrin min chêttîr thei a ni.

Khawi Aṭanga Ṭan Tûr Nge?

He mi chungchânga hmasâwn ngai nia kan inhriat chuan, kan rilru put hmang aṭangin kan ṭan tûr a ni. Ṭhenawm ṭha nih chu kan tum ber a ni tûr a ni a. Chu chuan ṭhenawm ṭha nei tûrin min ṭanpui thei a ni. Mihringte inlaichînna kawnga thu bul pawimawh tak chu Isua’n kum sânghnih dâwn lai kal taa Tlâng Chunga Thusawi lâr tak a neihah khân a sawi uar hle a ni: “Chutichuan, thil engkim miin in chunga an tiha in duh tûr ang apiang chu, mi chungah pawh ti ve rawh u,” tiin. (Matthaia 7:12) Mi dangte chu zah tak, ngaisâng tak, leh ngilnei taka kan chei bâwlna chuan, chutiang bawka min chei bâwl ve tûrin anni chu a chêttîr ang.

The Nation Since 1865 magazine-a chhuah, “I Ṭhenawmte Hmangaih Rawh” tih thuziakah chuan chanchinbu mi leh ziaktu ni bawk Lise Funderburg-i chuan inṭhenawm dân tihhmasâwn nâna tih theih thil ho tê tê a târ lang a. Heti hian a ziak a ni: “Ka duh dân chuan . . . ṭhenawmte nêna mi mal inzawmna chu ngilneihna thiltih ho tê tê tam tak​—chanchinbu inlâksak te, naupang inenkawlsak te, in bazârsak te​—hmanga lantîr ni se. Hetiang inlaichînna hi hlauhna leh dân bawhchhiatna avânga khawtlâng chau tak leh him lo, he inlâk hran deuh deuhna khawvêlah hian ka duh a ni,” tiin. Heti hian a sawi belh a: “Khawi emaw lai aṭanga i ṭan a ngai a. Chu chu i kawngka dawt chiaha i ṭhenawmte aṭang pawh a ni thei,” tiin.

Canadian Geographic magazine pawhin ṭhenawmte inkâra rilru put hmang ṭha neih tawn theih dân thu ṭangkai tak a chhuah a. Thu ziaktu Marni Jackson-i chuan chu mi chungchâng chu he ti hian a sawi: “Chhûng tûrte kan thlan theih loh ang bawkin, ṭhenawm tûrte pawh kan thlang thei lo va. Chuvângin, ṭhenawm inlaichînna ṭha neih nân, remhriatna, hawihhâwmna leh dawhtheihna eng engemaw a ngai a ni,” tiin.

Ṭhenawm Ṭhate​—Thilphalte

Dik takin, kan zînga mi tam tak chuan ṭhenawmte va pan chu kan hreh mai thei a. Inkalpawh lova mahnia inkulh hran mai chu thil awlsam tak angin a lang mai thei bawk. Mahse, Bible chuan heti hian a sawi: “Englo lâk aiin pêkin lukhâwng a nei zâwk,” tiin. (Tirhkohte 20:35) Chuvângin, ṭhenawm ṭha chuan a chhehvêla mite hmêlhriat chu a tum a ni. Inṭhian ṭhat a duh vâng ni chiah lêm lo mah se, a châng chângin, ṭawngkam tlêm têin a va titipui a, chu chu nêlawm taka nuihin emaw, kut vaiin emaw pawh a inṭan thei a ni.

A chunga sawi tâk angin, ṭhenawmte’n “ngilneihna thiltih ho tê tê tam tak” an intihsak tawn chu ṭhenawm inlaichînna ṭha siam nân leh tihngheh nân a pawimawh hle. Chuvângin, ṭhenawm hnêna ngilneihna thiltih leh ṭawngkam lantîr theihna zawn chu a ṭha a ni; chu chuan inzah tawnna leh inṭanpui tawn duhna rilru a awmtîr fo avângin. Chu bâkah, chutiang tihna aṭangin Bible fuihna thu: “A phute tân ṭhatna ui suh, i kuta tih theihna a awm phawt si chuan,” tih hi kan zâwm a ni ang.​—Thufingte 3:27; Jakoba 2:​14-17.

Ṭhenawm Ṭhate​—Lâwm Nachâng Hriate

Mi tinin ṭanpuina leh thilpêkte chu lâwm takin an dawng ṭheuh tih theih chu duhthusâm thil a ni ngei ang. Lungchhiatthlâk takin, chu chu thil awmdân a ni ṭhîn lo. Ṭanpuina leh rilru dik tak pua thilpêk tam tak chu lâwm hmêl pawh pu lova dawn a ni fo va; chuvângin, rilru tak taka petu chuan, “Tûn bâk ka pe leh tawh ngai lo vang!” tiin a ngaihtuah hial mai thei a ni. A châng chuan, nêlawm taka i ṭhenawmte chibai i bûkna leh i kut i vaina te chuan hreh tak chunga lu bûkna mai a hlawh thei a ni.

Chutichung chuan, hmun tam takah chuan a dawngtu chu lâwm lo angin lang mah se, lâwm nachâng hre lo a ni lêm lo. A lo ṭhanlenna hnam dân chuan hrehna a neihtîr emaw, nuam a tih lohtîr emaw a ni thei a, chu chuan a lan dâna mi dang ngaihsak lo leh nêlawm lo angin a awmtîr pawh a ni mai thei. Kawng lehlamah chuan, lâwm nachâng hriat lohna he khawvêla i nêlawmna chu mi ṭhenkhat chuan mak an tiin, an ringhlel hial te pawh a ni thei a. Lungngai lo tûra tlêma zâwng hrilh fiah pawh an ngai mai thei a ni. Chuvângin, inlaichînna nêlawm tak siam tûr chuan hun leh dawhtheihna neih a ngai a ni. Amaherawhchu, thilphal dân leh lâwm nachâng hriat dân zir ṭhenawmte chuan ṭhenawmah boruak ṭha, remna leh hlimna chu an awmtîr ang.

Chhiat Tawh Hunah

Ṭhenawm ṭha chu a bîk takin chhiatna râpthlâk tak a lo thlen hunah a ṭangkai a. Inṭhenawmna rilru dik tak chu chhiat tawh hunah a lo lang ṭhîn a ni. Chutiang hun a lo thlen meuh chuan ṭhenawmte’n mahni hmasial lo thiltih an lantîrzia sawi tûr tam tak a awm a. Chhiatna thuhmun lo thleng chuan ṭhenawmte chu tlâwmngai taka mi dang tâna inhmang tawn hrâm hrâm tûrin a chêttîr niin a lang a. Ngaih dân inang lote pawhin hna an thawkho fo a ni.

Entîr nân, The New York Time chuan kum 1999-a Turkey rama lîrnghîng nasa tak khân kum tam tak chhûng inhmêlmate pawhin ṭhenawm inlungrualna an lantîr thu a sawi a. Grik mi chanchin ziaktu Anna Stergiou-i hian Athen chanchinbu pakhatah heti hian a ziak a ni: “Hmân aṭangin Trukey hnam haw tûra zirtîr kan ni a. Mahse, an chhiat tawhna nasa tak chuan min tihlim lo. Kan lung a chhia a, naupang thite kan hmuh hian, hun rei tak kan lo inhuat tawhna zawng zawng chu bo ta ang maiin kan ṭap a ni,” tiin. Chhanchhuahna sawrkârin a tihtâwp hunah pawh Grik hnam chhanchhuaktu pâwlte chuan an chhanchhuahna hna chu an titâwp duh chuang lo a ni.

Chhiatna a thlen hnua chhanchhuahna hna thawh chu ṭhenawm ṭha thiltih ropui leh chawimawi tlâk a ni ngei mai. Chutiang a nih chuan, chhiatna a lo thlen hmaa ṭhenawmte hriattîrna hmanga an nun chhanhimna pawh chu ṭhenawm ṭha thiltih a tih theih ngei ang. Lungchhiatthlâk takin, chhiatna lo thlen hmaa ṭhenawmte vaukhântu chuan lawm a hlawh ṭhîn lo tih thil thleng chanchin chuan a târ lang; vaukhânna an pêk hunah chhiatna lo thleng tûr chu awlsam têa hriat nghâl theih a nih ṭhin loh avângin. Chung vaukhânna thu kengtute chu hnâwl an ni ṭhîn a ni. An dinhmun derthâwng tak hre lote ṭanpui tum apiangte tân beih ṭâng ṭângna leh inpêkna nasa tak a ngai a ni.

Ṭhenawm Ṭha Thiltih Ropui Ber

Tûnah hian, leilung chhiatna aia nasa taka râpthlâk zâwk thil chu mihringte chungah a lo thleng dâwn a. Chu chu sawi lâwk tawh Pathian Engkimtitheia thiltih a ni a, chu chuan he khawvêl ata dân bawhchhiatna te, suahsualna te, leh a zawmpui buaina dangte chu a nuai bo vek ang. (Thu Puan 16:16; 21:​3, 4) He thilthleng râpthlâk tak hi, lo thleng mai thei thil ni lovin, a lo thleng ngei ngei ang! Jehova Thuhretute chuan he khawvêl sâwinghîng khawp thilthleng râpthlâk taka dam khawchhuah nâna mamawh hriatna chu a theih anga tamin mite hrilh chu an duh hle a. Chuvângin, an zirtîrna hna hriat hlawh tak chu khawvêl pumah ṭhahnemngai takin an thawk ṭâng ṭâng a ni. (Matthaia 24:14) Chu chu Pathian leh an ṭhenawmte an hmangaihna avângin, duh tak chungin an thawk a ni.

Chuvângin, Thuhretute i ina an lo lên hunah emaw, hmun dang khawi emaw laia an biak hunah che emaw chuan anmahni i pâwngpaw huatna leh i ninna chuan an thusawi ngaihthlâktîr lo che suh se. Anni chuan ṭhenawm ṭha nih an tum a ni. Chuvângin, Bible zir tûra an sâwmna che chu lo pawm la. Pathian Thu-in nakina ṭhenawmte hlim tak leh inngeih dial diala an khawsak hun min tiamte a hnaih tawhzia zir ang che. Chu mi hunah chuan, hnam inthliarna te, chi inthliarna te, sakhaw inthliarna te, a nih loh leh nihna azira inthliarna te chuan kan zavaia kan thlâkhlelh inlaichînna duhawm tak chu a tichhe ngai tawh lo vang. (w02 9/1)

[Phêk 7-naa milemte]

I ṭhenawma ngilneihna thiltih lantîr chu a ṭha

[Milem Hawhtîrtu]

Leilung: Mountain High Maps® Copyright © 1997 Digital Wisdom, Inc.