Khawiah Nge Ṭhenawmte An Awm Zawh Tâk?

“Tûn lai khawtlâng hian ṭhenawm nih dân an hre lo.”​—Benjamin Disraeli, 19th-century English statesman.

CUBA rama tarte chuan hmakhaw ṭhatna tihpun dân kawng danglam tak an nei a ni: círculos de abuelos (pi pute pâwl) an tih chu. Kum 1997-a report dawn dânin, Cuba mi za zêla sawmhnihte chu chu pâwlah chuan an tel a, chuta ṭang chuan nun dân ṭha nei tûra inṭhianna te, inthlâwpna te, leh inṭanpuina ṭangkai takte an dawng a ni. World-Health magazine târ lan dânin, “vêngchhûnga damdawi lam thiamte’n natna laka invênna lam beihpui an thlâknaa ṭanpui an mamawh apiangin . . . círculos de abuelos mi leh sate chu ṭanpui inhuam leh ṭanpuina an hmuhna ber a ni.”

Mahse, lungchhiatthlâk takin, khawvêl hmun tam zâwkah chuan chutiang ṭhenawm inngaihsakna chu a awm tawh lo. Entîr nân, Europe khawthlang lama apartment building pakhata khawsa Wolfgang Dircks-a chunga thilthleng lungchhiatthlâk tak hi han ngaihtuah teh. Kum engemaw zât kaltaa The Canberra Time chanchinbuin a sawi dânin, Wolfgang-a khawsakna apartment-a khawsa ve chhûngkaw dang 17-te chuan a reh vâng vâng tih an hre chung pawhin, “tuma’n a kawngka bell hmetin an va en lo va.” A tâwpa in neitupa a lo kal chuan “television hmaa ruhro lo ṭhu reng chu a va hmu chhuak ta a.” Ruhro malchungah chuan kum 1993, December 5-a television program list chu a lo in pharh reng a. Wolfgang-a thihna chu kum nga lai a lo ni tawh reng mai a ni. Ṭhenawm inngaihsakna leh inngaihvenna tlâkchhamzia târ langtu thilthleng lungchhiatthlâk tak a va ni êm! The New York Times Magazine-a thuziaktu pakhatin a khawsakna vêng chu, vêng dang tam tak ang bawka, “inhmêlhriat lohna vêng” a lo ti pawh hi thil mak a ni lo ve. In vêng chu chutiang a ni ve em?

Thingtlâng khaw ṭhenkhatah chuan ṭhenawm inngaihsakna tak tak a la awm ngei mai a; tin, khawpui ṭhenkhatah pawh ṭhenawmte ngaihsak tûra beihpui thlâk a ni bawk. Nimahsela, khawpuia chêng mi tam takte chu mahni chênna vêng ngei ngeiah pawh mal leh derthâwng tak niin an inhria a. Inhmêlhriat lohna bang phênah an mal ngawih ngawih mai a ni. Engtin nge?

Inhmêlhriat Lohna Bang Phênah

Kan za hian kan kiang hnaia khawsa ṭhenawm hnai kan nei ṭheuh ngei mai. An in aṭanga meikhu lo chhuak te, tukverha hlimthla lo lang zauh zauh ṭhîn te, khâwnvâr chhit leh tihhlum ṭhin te, naupang infiam thâwm te, kawngkhâr inhawng hmuh te: hêng zawng zawng hi ṭhenawmte an “nung” tih hriat theihna a ni. Amaherawhchu, mihring inchên hnaih takte chu inhmêlhriat lohna bang phêna an bihrûk emaw, nun dân buai nuai nuai kâra an inngaihthah emaw hian, ṭhenawm nihna awmze dik tak chu a bo ṭhîn a. Mite chuan ṭhenawmte nêna inkungkaih vak ngai an ti lo mai thei a, engkawng pawha an laka bâ neih chu an hreh mai thei bawk a ni. Australian chanchinbu Herald Sun chuan: “Mite chuan an chhehvêl thilte chu an hre chiang lo zâwk a, chuvângin khawtlâng thilte hian anni chu a khuahkhirh lo. Tûnah chuan khawtlânga mi challang vak lote ngaihthah chu a awlsam hle tawh a ni,” a ti.

He thil a lo thleng hi a mak lo. “Mahni inhmangaihtu” awmna khawvêlah hian, khawtlângte chuan mi tam takte mahni hmasial nun kawng ûmna sawhkhâwk chu a seng mêk a ni. (2 Timothea 3:2) Chu a sawhkhâwk chu mal ngawih ngawih nia inhriatna leh inmihranna te hi a ni a. Inmihranna chuan inrin lohna a hring a, a bîk takin tharum thawhna leh dân bawhchhiatnate’n vêngchhûng a tihthlabâr hunah a ni zual a ni. Tichuan, inrin lohna chuan mihring inkhawngaihna chu a tichawmawlh thuai ṭhîn.

In vêngchhûng dinhmun chu eng ang pawh ni se, ṭhenawm ṭhate chu khawtlâng tân an ṭangkai a ni tih i pawm ngei ang. Mite hian tum thuhmun neia an thawhho hian an hlawhtling duhzual ṭhîn a. Chu bâkah, ṭhenawm ṭha chu malsâwmna a ni thei bawk a ni. Chutiang a nih theih dân chu thuziak dawtleh chuan a rawn târ lang ang. (w02 9/1)