Kristian Nungchang Zir La, Zirtîr Bawk Rawh
“Nang, mi dangte zirtîrtu, nangmah i inzirtîr lo maw?”—ROM 2:21.
1, 2. Bible zir i duh chhan tûr eng nge awm?
PATHIAN Thu zir chhan tûr tam tak i nei a. A chhûnga thu dik chuang—mihring te, thil thleng te, a hmun te, leh thil dang te chanchin chu hriat i duh ngei ang. Sakuanate’n dik lo taka an zirtîr Trinity leh hremhmun meidîl ang chite chungchânga thurin dik chu i hre duh a ni. (Johana 8:32) Chu bâkah, Jehova i an lehzual theih nân leh a mithmuha mi dik i nih theih nân amah hriat chian lehzual chu i duh bawk dâwn a ni.—1 Lalte 15:4, 5.
2 Pathian Thu zir nêna inkaihhnawih leh zir chhan pawimawh ber chu mi dangte—i hmangaih te, i hmêlhriat te, leh la hriat loh te—zirtîr thei tûra i inthuam nân a ni. Pathian Thu zir hi Kristiante tân chuan ngaihthah theih thil a ni lo. Isua chuan a zirtîrte hnênah: “Chutichuan kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u,” a ti si a.—Matthaia 28:19, 20.
3, 4. Engvângin nge Isua thupêk anga mi dangte zirtîr chu i tân ngaihsânawm tak a nih?
3 Mi dangte zirtîr duhna avânga Bible zir chu a zahawmin hlimna tluantling neihna a ni thei a ni. Zirtîrna hi hun rei tak chhûng hna zahawma ngaih a lo ni tawh a. Encarta Encyclopedia pawhin: “Juda ho zîngah chuan, puitling tam tak chuan zirtîrtute hi chhandamna kawnga hruaitu ang hiala ngaiin, naupangte chu an nu leh pate aia zirtîrtute ngaisâng zâwk tûrin an fuih a ni,” tiin a sawi. A bîk takin Kristiante tân chuan Bible zirna hmanga mahni inzirtîr a, mi dangte pawh zirtîr bawk chu a ngaihsânawm a ni.
4 “Hna dang zawng aiin zirtîrna hna thawk an tam zâwk a. Khawvêl pum puia mi maktaduai 48 vêl chu zirtîrtu an ni. (The World Book Encyclopedia) Khawvêl lama zirtîrtu chu ṭhalaite rilru kawltîr an ni a, an nakin hun chu a thunun thei a ni. Mi dangte zirtîr tûra Isua thupêk i zawm hian, chu chuan nghawng thui zâwk a nei a ni; an chatuan hmakhua a nghawng avângin. Tirhkoh Paula’n: “Nangmah leh i zirtîrnaah chuan fîmkhur la; chûng thil tiin awm reng rawh; chutiang tiin nangmah leh i thu ngaithlatute chu i chhandam dâwn zuk nia,” tia Timothea a fuih khân he mi chungchâng hi a sawi pawimawh hle a ni. (1 Timothea 4:16) Ni e, i zirtîrnaah chuan chhandamna a tel a ni.
5. Engvângin nge Kristiante thawh zirtîrna chu zirtîrna zawng zawnga sâng ber a nih?
5 Mahni inzirtîr a, mi dangte pawh zirtîr bawk chu Mi Chungnung ber, Lei leh Vâna Lalber thupêk leh kaihhruai a ni a. Chu ringawt pawh chuan he zirtîrna hi khawvêl thila zirtîrna rêng rêng—lehkha thiamna emaw, hnathawh thiamna emaw, a nih loh leh damdawi lam thiamna emaw lama zirtîrnate—aiin a tipawimawh zâwk daih a ni. Kristiante thawh zirtîrnaah chuan zirlai chuan Pathian Fapa, Isua Krista entawn dân a zir phawt a, mi dangte pawh chutianga ti ve tûra zirtîr lehchhâwnna a tel bawk a ni.—Johana 15:10.
Engvângin Nge I Inzirtîr Ang?
6, 7. (a) Engvângin nge keimahni kan inzirtîr hmasak ang? (b) Eng kawngin nge kum zabi pakhatnaa Judate kha zirtîrtu nih an tlin loh?
6 Engvângin nge mahni kan inzirtîr hmasak phawt ang? Kan inzirtîr hmasak phawt loh chuan mi dangte ṭha taka kan zirtîr theih dâwn loh vâng a ni. He thu dikzia hi Paula chuan ngaihtuahna chawktho thei takin a sawi uar a, chu chuan a hun laia Juda mite tân awmze pawimawh tak a nei a, tûn lai Kristiante tân pawh thuchah pawimawh tak a nei bawk a ni. Paula chuan hetiang hian zawhna a siam a: “Nang, mi dangte zirtîrtu, nangmah i inzirtîr lo maw? Nang, mi rûk ru lo tûra hrilhtu, nangin i ru ṭhîn maw? Nang, mi uirê lo tûra hrilhtu, nangin i uirê ṭhîn maw? Nang, milem hawtu, nangin milem biak ina thilte i ru ṭhîn maw? Nang, Dân chhuangtu, nangin Dân i bawhchhiat avângin Pathian i tihmingchhe ṭhîn a ni maw?,” tiin.—Rom 2:21-23.
7 Paula chuan zawhna hmangin Thu Sâwm Pêkin chiang taka a kalh thil pahnihte a sawi chhuak a: I ru tûr a ni lo, tih leh i uirê tûr a ni lo tihte chu. (Exodus 20:14, 15) Paula hun laia Juda mi ṭhenkhat chuan Pathian Dân an neihte chu an chhuang a ni. Anni chu ‘dân thua zirtîrin an awm a, mitdelte hruaitu, thim zînga awmte êntu, mi fing lote tifingtu, nausênte zirtîrtu niah an inring’ a ni. (Rom 2:17-20) Nimahsela, an zînga ṭhenkhat chu an vervêk a, a rûka thil rûk leh uirê an chîng a. Chu chuan Dân leh A Petu vâna mi a tihmingchhia a ni. Chutiang aṭang chuan mi dangte zirtîr tûra an tlin lohzia leh anmahni ngei pawh an inzirtîr lohzia i hmu thei ang.
8. Paula hun laia Juda mi ṭhenkhatte ‘biak in suam’ dân chu eng ang nge a nih theih?
8 Paula chuan biak in rawk thu a sawi bawk a. Juda mite chuan biak in an rawk tak tak êm? Paula chuan eng a sawina nge ni? Dik tak chuan, heta kan thu hmuh hi a tlêm êm avângin, Juda ṭhenkhatin ‘biak in an suam’ dân chiah chu kan suangtuahsak thei lo. A hmain Ephesi khuaa lehkhaziaktu chuan Paula leh a ṭhiante chu “biak in suamhmangte” an ni lo tih a puangzâr a, chu thu puan chhuah chuan mi ṭhenkhatin Judaho chu chutiang ti ṭhînah an ngai a ni tih a târ lang a ni. (Tirhkohte 19:29-37) Biak in suamhmangte chuan hnehtute leh sakhaw lama mi ṭhahnemngaite hneh milem betute biak in aṭanga thil hlute chu anmahniin an hmang emaw, sumdâwn nân an hmang emaw em? Pathian Dânin a sawi ang chuan, chûng rangkachak leh tangkaruaa siam milemte chu tihchhiat tûr a ni a, mi mal tâna hman tûr a ni lo. (Deuteronomy 7:25)a Chuvângin, Paula chuan Pathian thupêkte zah lo va, milem betute biak in aṭanga lo kal thil hlute mahni tâna hmang leh hlâwkna atâna chhawrtu Juda mite a sawina a ni mai thei a ni.
9. Jerusalem biak in nêna inkaihhnawih eng thiltih ṭha lote hi nge biak in rawk nêna thuhmun reng a tih theih?
9 A lehlamah, Josephus chuan Dân zirtîrtu leh hruaitu, Juda mi palite thlentîr Rom khuaa hmingchhiatna chungchâng a sawi a. Chûng mi palite chuan Rom hmeichhia, Juda saphuna inlet ta chu a rangkachak leh thil hlu dangte Jerusalem biak in thawhlâwm atâna thawh tûrin an hmin a. Chûng thilte an lâksak hnu chuan, an tân an hmang vek a—chu chu biak in rawk nên a thuhmun reng a ni.b Mi dangte chuan inthawina ran sawisêl kaite hlânin leh biak in tualchhûnga duhâm taka sumdâwnna hmangin Pathian biak in chu an rawk a ni; biak in chu “suamhmangte pûkah” chantîrin.—Matthaia 21:12, 13; Malakia 1:12-14; 3:8, 9.
Kristian Nungchang Zirtîr Rawh
10. Rom 2:21-23-a chhinchhiah Paula thusawi pawimawhna kan hmaih hauh loh tûr chu eng nge ni?
10 Paula sawi kum zabi pakhatnaa mite thiltih rûk rûk te, uirê te, leh biak in rawk te chu engpawh ni se, a thusawi pawimawhna chu i hmaih hauh suh ang u. Ani chuan hetiang hian zawhna a siam a: “Nang, mi rûk ru lo tûra hrilhtu, nangin i ru ṭhîn maw?” tiin. Paula’n entîr nâna a lâk chhuahte chu nungchang lam kaihhnawih thil a ni a, chu chu chhinchhiah tlâk tak a ni. Hetah hian tirhkoh hian Bible thurin leh thilthleng chanchin chungchâng a thlûr bing lo. Chuvângin, Paula’n mahni inzirtîr a, mi dangte pawh zirtîr ve tûra a sawi chu Kristian nungchang hi a ni.
11. Engvângin nge Pathian Thu i zir hian Kristian nungchang chu i ngaihven ang?
11 Rom 2:21-23 thu kan nunpui dân tûr chu, Pathian Thua Kristian nungchang târ lante chu zir a, chu mi kan zir mila nun bawk a; tin, mi dangte pawh chutiang bawka ti tûra zirtîr chu a ni. Chuvângin, Bible i zir hian, Kristian nungchang dik lâk chhuahna, Jehova tehkhâwng târ lannate chu hmuh tum ang che. Bible-a fuihna leh zir tûr i hmuhte chu ngaihtuah ngun la. I thil zirte chu huaisen takin nunpui ang che. Chutianga ti tûr chuan huaisenna leh tumruhna a ngai tak zet a ni. Famkim lo mihringte tân chuan chhuanlam insiam mai leh dinhmun engemaw bîk hian Kristian nungchang ngaihthahna a awmtîr dân, a nih loh leh ngaihthah a ngaih chhan chungchânga thiam thu sawi mai chu a awl hle a ni. Paula sawi Juda mite pawh khân mahni inthiam chawp nân emaw, mi dangte bum nân emawa chutiang ngaih dân dik lo tak chu an nei a ni mai thei. Nimahsela, Paula ṭawngkam chuan Kristian nungchang chu mahni duh dâna ngaihthah theih emaw, sâwrzîm theih emaw a ni lo tih a târ lang a ni.
12. Engtin nge nungchang ṭha leh ṭha lo chuan Pathian Jehova a tihmingṭhain, a tihhmingchhiat a, engvângin nge he mi chungchâng rilrua vawn reng hi a ṭangkai?
12 Tirhkoh chuan Bible-a i hmuh theih nungchang ṭha zir leh nunpui chhan bul ber chu a sawi uar a. Judate nungchang chuan Jehova a tihmingchhia a ni: “Nang, Dân chhuangtu, nangin Dân i bawhchhiat avângin Pathian i tihmingchhe ṭhîn a ni maw? . . . Pathian hming chu nangmahni avângin Jentailte zîngah tihchhiatin a awm ta a nih hi.” (Rom 2:23, 24) Chutiang bawkin, tûn laiah pawh Kristian nungchang kan ngaihthah chuan, chu nungchang lo Chhuahna chu kan tihmingchhia a. Pathian tehkhâwngte kan vawn ngheh tlat erawh chuan, chu chuan ani chu a tihmingṭha a, a chawimawi a ni. (Isaia 52:5; Ezekiela 36:20) Chu mi i hriatna chuan Kristian nungchang ngaihthah mai chu thil awlsam ber leh remchâng ber anga a lanna dinhmun emaw, thlêmna emaw i tawn hunah pawh Kristian nungchang zawm i tumna chu a tichak ang. Chu bâkah, Paula thu chuan thil dang pawh min zirtîr bawk. Mi dangte i zirtîr laia i nungchang chuan Pathian chu a tihmingṭhain a tihmingchhe thei tih i hriat mai bâkah, i zirtîrte chu nungchang tehna an zirte an nunpui dân chuan Jehova chu a tihmingṭhain a tihmingchhe thei a ni tih hre thiam tûrin ṭanpui ang che. Kristian nungchang chuan mi chu lungawina a neihtîr a, a hrisêlna a vênhim mai bâkah, chu nungchang Dintu leh chutianga nung tûra mite Fuihtu chu a tihmingṭha bawk a ni.—Sâm 74:10; Jakoba 3:17.
13. (a) Engtin nge Bible chuan nungchang lamah min ṭanpui? (b) 1 Thessalonika 4:3-7-a fuihna thu pawimawh lai khaikhâwm rawh.
13 Nungchang chuan mi dangte pawh a nghawng bawk a. Chu chu Pathian nungchang tehkhâwngte nunpui hlutna leh ngaihnêpna rahchhuahte târ langtu Pathian Thua thiltawnte aṭangin i hmu thei a ni. (Genesis 39:1-9, 21; Josua 7:1-25) Tin, nungchang chungchânga hetiang chi fuihna thu langsâr takte pawh hi i hmu thei bawk: “Pathian duhzâwng, in thianghlimna tûr chu hei hi a ni, inngaih bânsan ula; Pathian hre lo Jentailhote anga hur kawng châk lovin, thianghlim leh chawimawiin mahni bêl vawng thiam ṭheuh ula; chu mi kawngah chuan tumah bawhchhiain a unau [“dikna neih chu palzûtsak,” NW] suh sela; . . . Pathianin bawlhhlawh tûrin min ko si lo va, thianghlimah min ko zâwk a ni,” tih ang chi hi.—1 Thessalonika 4:3-7.
14. 1 Thessalonika 4:3-7-a fuihna chungchângah eng nge i inzawh theih?
14 He thu aṭang hian mipat hmeichhiatna lama nungchang khawlohna chuan Kristian nungchang a bawhchhia tih mi tin deuhthawin an hmu thei ang. Mahse, a lang mai aia tam i hrethiam thei a ni. Bible châng ṭhenkhat chuan nasa taka zir leh ngaihtuah zui tûr min pe a, chu chuan hriatthiamna dik zâwk leh thûk zâwk min neihtîr a ni. Entîr nân, Paula’n inngaihna chuan mi chu ‘a unau dikna neih palzûtsaktu’ a nihtîr thei tih a sawi awmzia kha i ngaihtuah thei ang. Eng diknate nge tel a, engtin nge he mi chungchâng hriatthiamna thûk zâwk chuan Kristian nungchang vawng tûra a tur che? Engtin nge chutiang zir chîkna chuan mi dangte zirtîr tûr leh Pathian chawimawi tûra ṭanpui tûrin a thuam ṭhat zâwk che?
Mi Dangte Zirtîr Thei Tûra Zirna
15. Mi mal zirna hmanga i inzirtîr nân eng hmanruate nge i hman theih?
15 Jehova Thuhretute chuan zawhnate chhânna an hmuh nân leh anmahni emaw, mi dangte emaw an inzirtîr laia zawhna lo chhuakte zir chîk nân hmanrua an nei a. Ṭawng chi hrang hranga hmuh theih hmanraw pakhat chu Watch Tower Publications Index hi a ni. Chu chu i neih chuan, Jehova Thuhretute chhuah Bible ṭanchhan thu leh hlate aṭanga i hriat duhte zawn chhuah nân i hmang thei ang. A thu azir emaw, a Bible châng azir emawin i zawng thei ang. Jehova Thuhretute neih hmanraw dang chu, ṭawng lian tham tam taka hmuh theih Watchtower Library hi a ni. He CD-ROM computer program hian thu leh hla chhuah hrang tam tak chu electronic form-in a nei a ni. A program hmang chuan Pathian lehkha thua thupuite leh sawikhâwmte chu zirchîk theih a ni. He hmanrua a eng emaw zâwk zâwk emaw, a pahnihin emaw i neih chuan, mi dangte zirtîr tûra Pathian Thu i zir hunah hmang ṭangkai ang che.
16, 17. (a) 1 Thessalonika 4:6-a sawi dikna chungchânga hrilhfiahna bengvârthlâk tak takte chu khawiah nge i hmuh theih? (b) Eng kawngin nge inngaihna chuan mi dangte dikna neih a palzût theih?
16 A chunga kan târ lan tâk, 1 Thessalonika 4:3-7 khi entîr nân lo hmang ta i la. Chutah chuan dikna chungchângah ngaihtuah tûr a awm a. Tu dikna nge? Engtin nge chûng dikna chu palzût a nih? Hêng zirna hmanrua kan târ lan tâkte hmang hian, he mi châng hrilhfiahna bengvârthlâk tam tak i hmu ang a, Paula sawi dikna pawh eng nge a nih i hmu thei ang. Chûng hrilhfiahnate chu Insight on the Scriptures, Volume 1, phêk 863-4-ah te; True Peace and Security—How Can You Find It?, phêk 145-ah te; Vênnainsâng, November 15, 1989, (English) phêk 31-ah te i chhiar thei ang.
17 I zir chhunzawm zêl chuan, chûng thu leh hla chhuahte chuan Paula thute dikzia an lantîr tih i hmu chhuak ang a. Inngaih hmang chuan Pathian lakah thil a tisual a; tin, amah ngei pawh natna lakah a intâtlût a ni. (1 Korinth 6:18, 19; Hebrai 13:4) Inngaih hmang mipa chuan a hmeichhe ngaih dikna chi hrang hrang chu a palzûtsak a. A nungchang thianghlimna leh a chhia leh ṭha hriatna thiang chu a lâk bosak a ni. Nula a nih chuan, nula thianghlim ni chunga pasal nei tûra a neih dikna leh chutiang mi ni tûra a pasal tûrin a beisei theih dikna chu a palzûtsak a ni. Pawmlai nei a nih chuan hmeichhe nu leh pa leh a pasal rilru a tina bawk. Nungchang bawlhhlawhpa chuan nungchang thianghlim chhûngkua tih hming pu tûra a chhûngte dikna neih chu a tichhe bawk a. Chu pa chu Kristian kohhran chhûnga mi a nih chuan, kohhran a tihmingchhe bawk a ni.—1 Korinth 5:1.
18. Kristian nungchang chungchânga Bible zirna chu engtin nge i hlâwkpui?
18 Dikna chungchânga chutiang hrilhfiahnate chuan Bible châng awmzia chu i hmaah a pharh chhuak a ni lo’m ni? Chutiang chi zirna chu a hlu tak zet a ni. Chutiang zirna i ûm chuan nangmah i inzirtîr tihna a ni a. Pathian thuchah a dikzia leh nghawng nasa tak a neihzia i hriatthiamna chu a pung zêl a. Eng ang thlêmna pawh lo thleng mah se, Kristian nungchang vawn reng i tum tlatna chu i tichak bawk a ni. Chu bâkah, zirtîrtu thiam zâwk a nihtîr dân han ngaihtuah bawk teh! Entîr nân, mi dangte Bible thutak i zirtîr laiin, 1 Thessalonika 4:3-7 thu hriatthiamna i pe thei a, chu mi hmang chuan Kristian nungchang an hriatthiamna leh ngaihhlutna chu i tipung thei a ni. Chutiang chuan, i zirna chuan nangmah leh mi dang tam takte chu Pathian chawimawi tûrin a ṭanpui thei a ni. Tûnah hi chuan, Thessalonika khuaa mite hnêna Paula lehkha thawn aṭangin entîrna pakhat chauh kan en a. Kristian nungchang kaihhnawih thil dang tam tak pawh a awm a; tin, i zir a, i nunpui a, mi dangte pawh i zirtîr theih tûr chutiang chi Bible entîrna leh fuihna thu dang tam tak a awm bawk a ni.
19. Engvângin nge Kristian nungchang chu i vawn tlat a pawimawh?
19 Kristian nungchang neih a finthlâkzia chu zawh ngai lova chiangsa a ni a. Jakoba 3:17 chuan Pathian Jehova hnên aṭanga lo kal, “chung lam aṭanga finna lo chhuak erawh chu atîrin [“nungchang lamah,” NW] a thianghlim phawt a,” a ti. Chu chuan chiang takin Pathian nungchang tehkhâwng zui chungchâng a sawi a ni. Dik takin, Jehova chuan Bible zirtîrnaa a aiawhtute chu nungchang “thianghlimna kawngah” entawn tûr ṭha ni tûrin a phût a ni. (1 Timothea 4:12) Zirtîr hmasa Paula leh Timothea angte nun kawng chuan nungchang lamah an thianghlimzia a târ lang a; nungchang bawlhhlawhna ata an inthiarfihlîm a ni, Paula phei chuan: “Mi thianghlimte tiha mawi âwm rêngin, inngaih leh bawlhhlawh zawng zawng, duhâmna nên in zîngah lam pawh lamin awm suh se; zahmawh te, thu lawi lo sawi te, fiamthu [bawlhhlawh] te pawh,” tiin a ziak hial a ni.—Ephesi 5:3, 4.
20, 21. Engvângin nge 1 Johana 5:3-a chhinchhiah tirhkoh Johana thuziakte chu i pawmpui?
20 Pathian Thua nungchang tehkhâwngte chu chiang fiah hle mah se, phur rit a ni lo. A nih lohzia chu tirhkoh zînga dam rei ber Johana aṭang hian a hriat theih a ni. Kum sâwmbi engemaw zât a dam chhûnga a thiltawn aṭangin, Kristian nungchang chu a hlauhawm lo tih a hria a ni. Chutih ahnêkin, a ṭhain, a ṭangkaiin, malsâwmna a ni zâwk a ni. Johana chuan: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tia ziakin, he mi thu hi a sawi uar a ni.—1 Johana 5:3.
21 Nimahsela, Johana chuan Kristian nungchang chungchânga Pathian thu zawm chu harsatnate leh a rah chhuah ṭha lote laka min vênhim avâng maia nun kawng ṭha ber anga sawi a ni lo tih hria ang che. Ani chuan chutianga Pathian thu zawm chu Pathian Jehova kan hmangaihzia kan lantîrna, amah kan hmangaihzia kan lantîr theihna hun hlu tak a ni tih sawi lang hmasain Pathian thu zawmna thlîr dân tûr dik tak a sawi a ni. Pathian hmangaih tûra mahni leh mi dangte zirtîr tûr chuan, a tehkhâwng sâng takte pawm leh nunpui a ngai a ni. Ni e, chu chu Kristian nungchang mahni inzirtîr leh mi dangte pawh zirtîr ve hi a ni. (w02 6/15)
[Footnote-te]
a Judate chu thil thianghlimte zah angin lantîr ni mah se, Josephus chuan Pathian dân chu hetiang hian a sawinawn a: “Tumahin ram dangte biak pathian chu sawichhiatsak lo sela, ram dang mite biak in rawk lo sela, eng pathian hming pawha thil hlu hlante chu la bawk suh se,” tiin. (Hawrawp kan tihâwn a ni.)—Jewish Antiquities, Bu 4, bung 8, paragraph 10.
b Jewish Antiquities, Bu 18, bung 3, paragraph 5.
I Hre Chhuak Thei Em?
• Engvângin nge mi dangte kan zirtîr hmain mahnia zirin kan inzirtîr hmasak ang?
• Engtin nge kan nungchangin Jehova a tihhmingṭhat theih a, a tihhmingchhiat theih?
• Inngaih hmangtu chuan tu dikna neih nge a palzût theih?
• Kristian nungchang chungchânga i thutlûkna chu eng nge ni?
[Phêk 30-naa milem]
“A thupêk chu a khirh si lo”