Chhiartute Zawhna

Baptisma chang duhtu chu inhnimphûm tiharsa tûrin ramtuileilohna nasa tak a nei emaw, a hrisêlna a ṭha lo hle emaw a nih chuan, baptisma chang tûrin tuia hnimphûm pumhlûm kher a ṭûl em?

“Baptisma” tih thumal chu Grik ṭawnga thiltih sawina baʹpto aṭanga lehlin a ni a, a awmzia chu chiah pil tihna a ni. Bible-ah chuan “babtisma chang” tih leh “hnimphûm” tih chu a thuhmun a ni. Philipa’n Ethiopia mi tilreh a baptis chungchângah, Rotherham-a lehlin The Emphasised Bible chuan: “Philipa leh mi tilreh chu tuiah chuan an zuk kal dûn a​—tin, a ni chuan tuiah a hnimphûm ta a,” a ti a. (Tirhkohte 8:38) Chuvângin, baptisma changtu chu tuia chiah pil vek a ni.​—Matthaia 3:16; Marka 1:10.

Isua chuan a zirtîrte chu: “Chutichuan kal ula, hnam tina mi zirtîrahte siam ula, . . . baptis ula,” tiin kaihhruaina a pe a. (Matthaia 28:​19, 20) Chutiang zêl chuan, Jehova Thuhretute chuan tuikhuahahte, dîlahte, luiahte, a nih loh leh an inhnimphûmna tûra tui tam tâwk awmna apiangah baptisma an chang ṭhîn a ni. Inhnimphûm pumhlûmna hmanga baptisma chan chu Pathian Lehkha Thu thil phût a nih avângin, a dinhmun avânga tuemaw pumpelhtîr tûrin mihringte’n thuneihna an nei lo. Chuvângin, mi chu a dinhmun avânga thil tih ngai loh eng engemaw tih ngai pawh nise, hnimphûm tûr a ni. Entîr nân, tarte leh hrisêl lote tân chuan inbualna chawhtawlh liana baptisma chan chu a remchâng hle. Chawhtawlha tui chu tihlum theih a ni a, baptisma changtu tûr chu zâwi muangin tuiah ṭhuttîrin, tuia awm a ngai neih deuh hnuah baptis theih a ni.

Ramtuileilohna nasa tak neite pawh baptisma chantîr an lo ni tawh ṭhîn a. Entîr nân, thâwkna dâwt zai pawh avânga hrawka kua nei rengte leh thâwk nâna khâwl hman ngaite pawh hnimphûm an ni tawh a ni. Chutiang baptisma chantîr nân chuan, uluk taka inbuatsaihna neih chu a ngai ngei mai. Nurse puitling emaw, a awm chuan doctor emaw chu inring renga neih a finthlâk ang. Chutianga invên lâwkna engkim tih hnuah chuan, baptisma chu chantîr theih a ni tlângpui a. Chuvângin, mi chuan baptisma chan a duh tak zet a, hlauhawm thleng thei thilte a pawm duh phawt chuan, chutiang mi chu tuia baptisma chantîr tûrin theihtâwp chhuaha inpuahchah tûr a ni. (w02 6/1)