“An Pil Ta”
“Tui thûk takin a chîm zo ta: lung angin tui thûk takah an pil ta.”
HENG thute hmang hian, Mosia leh Israel mite chuan Tuipui Sena chhanchhuah an nihna leh Aigupta an hmêlma—Pharaoa leh a sipaihote—tihboralna chu hlaa hrilin an lâwm a ni.—Exodus 15:4, 5.
Chu thilthleng maksak tak mit ngeia lo hmutute tân chuan zir tûr chu a lang chiang êm êm a ni. Jehova thuneihna hlawhtling taka cho emaw, dang emaw chunga dam reng thei tumah an awm lo tih chu. Nimahsela, thla engemaw zât lek hnuah chuan, Israel mi lâr takte—Kora te, Dathana te, Abirama te, leh anmahni thlâwptu mi 250 te—chuan Pathianin Mosia leh Arona hnêna a pêk thuneihna chu mipui hmaah an cho a ni.—Number 16:1-3.
Jehova kaihhruainain, Mosia chuan Israel mite chu helhmangte puan in chhuahsan tûrin a hrilh a. Chhûngte thlâwpna dawng Dathana leh Abirama te chuan luhlul takin an rilru put hmang an thlâk duh lo va. Tichuan, Mosia chuan, Jehova’n mipuite hnênah Ama tih dân dânin hêng mite hian “LALPA an lo ngainêp a ni” tih a târ lang dâwn tih a puang a ni. Chutah zet zawng, Jehova chuan an awmna hnuai lei chu a tikhi chat ta phuk mai a. “Chutichuan anmahni leh an ta zawng zawng chu Seol-ah chuan anung chungin an pil ta vek a, lei chuan a kâ a chîp hnan a.” Kora leh hel hmang mi dangte chungah eng nge thleng ve? “LALPA aṭangin mei a lo chhuak a, rimtui hlântu mi zahnih leh sawmnga te chu a rawn kânghlum ta a.—Number 16:23-35; 26:10.
Pharaoa leh a sipaite, leh thlalêra helte chu Jehova thuneihna leh a mite a duhsakna an pawm duh loh avângin, an zain an boral vek a ni. Chuvângin, he hun khirh tak chhûnga Jehova vênhimna dawng tûrte chuan Jehova chungchâng an zir a, “Chungnungbera” leh “Engkimtitheia” thu an zawm chu a hmanhmawhthlâk hle a ni. Chutianga tihna hmangin, hêng Jehova thute hi nasa takin an thlamuanpui thei a ni: “I sîrah sâng an tlu ang a, i ding lamah sîng an tlu bawk ang; nimahsela nang chu a hnaih lo vang che. I mitin i en ang a, mi suaksualte rulhna chu a hmuhin i hmu chauh ang. Aw LALPA, nang chu ka inhumhimna i ni si! Chungnungbera chu i awm nân i hmang a,” tih hi.—Sâm 91:1, 7-9.