I Thurin Chu Engvânga Ring Nge I Nih?

Ring tih awmzia chu “a dik ngei emaw, a tak ngei emawa pawm” tia hrilhfiah a ni. United Nations Universal Declaration of Human Rights chuan mi tinte “zalên taka ngaihtuah nâna dikna a neih, zalên taka chhia leh ṭha hriatna leh sakhua vuan tûra dikna a neih” chu a humhim tlat a. He diknaah hian miin a duh phawt chuan “a sakhua emaw, a rinna emaw thlâk” tûra zalenna a neih pawh a tel a ni.

NIMAHSELA, engvângin nge miin a sakhua emaw, a rinna emaw chu thlâk a duh ang? “Rinna ka nei a, ka duh tâwk êm êm a ni” tih hi ngaih dân tlângpui a ni a. Rinna dik lo pawhin mi a tichhe chuang lo vang, tih hi mi tam takte ngaih dân a ni. Entîr nân, lei hi a phêk a ni tih ringtu pawhin a lo rin dik loh avângin amah ngei emaw, mi dangte emaw a tihnat a rinawm lo. Ṭhenkhat chuan “Ngaih dân inang lote chu kan pawmzam mai tûr a ni,” an ti bawk. Chutianga tih chu a finthlâk em? Doctor pakhat chuan a doctor ṭhian pakhatin mitthi dahna hmuna ruang a sâwngbâwl zawhah damdawi in chhûnga damlo dangte kan kual nghâl theiah inngai ta se, a ṭhianpa rin dân chu a pawmpui mai dâwn em ni?

Sakhaw chungchângah pawh, rinna dik lo chuan hmân lai ata tawh pawi nasa tak a lo khawih a ni. Sakhaw hruaitute’n “Kristian firfiakte chu nasa taka tharum thawh tûra an fuih” avânga Middle Age hun chhûnga Holy Crusades tia an vuah tharum thawhna a hrin chhuahte han ngaihtuah teh. A nih loh leh tûn hnai khawtlâng indonnaa “Kristian” silai chelek chîng mi, “medieval hun laia pasalṭha, an ngûnhnâm fawnga mi thianghlimte hming ziaktute anga an silai kâwma nula thianghlim lem beltute” chungchâng han ngaihtuah teh. Hêng sakhaw mi firfiakte hian thil dik tak ti niin an inring tlat a. Mahse, hêngte leh sakhaw dangte indonate hi thil dik lo râpthlâk tak a ni.

Tûn laiah hian engvângin nge buaina leh indonate a tam êm êm? Diabol-Setana’n ‘khawvêl zawng zawng a bum’ vâng a ni tih hi Bible chhânna chu a ni. (Thu Puan 12:9; 2 Korinth 4:4; 11:3) Tirhkoh Paula chuan sakhaw hruaitu tam takte chu lungchhiat thlâk takin “mi bum nâna thilmak tinrêng titu,” Setana buma an awm avângin “boral tûra thiam loh chantîr” an ni ang tiin a vaukhân a ni. Paula chuan, chutiang mite chuan “anmahni chhandam theitu tûr thutak hmangaihna lakah an rilru an khâr tlat,” ang a, ‘dâwt thu ringa an pilbo’ thu a sawi a ni. (2 Thessalonika 2:​9-12, The New Testament, by William Barclay) Dâwt thu rin palh theihna chu engtin nge i tihtlêm ang? Dik takin, tûna i thurin chu engvângin nge i rin theih?

Ring Tûra Enkawl Seilen I Nih Vâng Em Ni?

In chhûngkaw rinnaa seilian i ni mai thei. Chu chu thil ṭha pawh a ni mai thei. Pathian chuan nu leh pate chu an fate zirtîr tûrin a duh a. (Deuteronomy 6:​4-9; 11: 18-21) Entîr nân, tleirâwl Timothea chuan a nu leh a pi zirtîrna chu a hlâwkpui hle a. (2 Timothea 1:5; 3:​14, 15) Nu leh pate rinna chu zah tûrin Bible pawhin min fuih a ni. (Thufingte 1:8; Ephesi 6:1) Mahse, i nu leh pate rinna avâng maia chûngte chu ring ve mai tûrin Siamtu chuan a ti che em? Chhuan hmasate rinna leh thiltihte ngaihtuah chiang lo va vawn bur mai chu dik tak chuan a hlauhawm thei a ni.​—Sâm 78:8; Amosa 2:4.

Isua kâwmtu Samari hmeichhia chu an sakhua ring tûra enkawl seilen a ni a. (Johana 4:20) Isua chuan a rin duh zâwng a rin theih nâna zalênna a neih chu a zahsak a; mahse, “Nangnin in hriat loh chibai in bûk ṭhîn,” tiin a hrilh bawk a ni. A sakhaw thurin tam tak chu a dik lo va; tin, pawm tlâk​—“thlarau leh thutaka”​—Pathian chibai bûk tûr chuan a rinnaah inthlâkthlengna a siam tûr a ni tih a hrilh a ni. A lo duh êm êm thurin chu vuan bur lovin, amah leh amah ang mi dangte chuan Isua Krista hmanga târ lan “rinna chu an âwih,” a ngai a ni.​—Johana 4:​21-24, NW, 39-41; Tirhkohte 6:7.

Ring Tûra Zirtîr I Nih Vâng Em Ni?

Zirtîrtute leh hriatna bîk nei mi thiamte chuan nasa taka zah an phu a ni. Mahse, mihring chanchin chu ngaih dân dik lo tak tak neitu zirtîrtu hmingthang tak taktein a khat tlat bawk si. Entîr nân, Greek mi fing Aristotle-a’n scientific chungchâng a ziah, lehkhabu pahnihte chungchâng chu historian Bertrand Russell-a chuan “tûn lai science thiamna aṭanga han thlîr chuan a thuziak lehkhabu pahnih chhûnga sentence pakhat tê mah hi pawmtlâk a ni lo,” tiin a sawi a ni. Tûn lai mi thiamte pawhin thil an chhût sual nasa fo ṭhîn bawk. “Boruak aia rit zâwk khâwl thlâwk thei a awm thei lo,” tiin British scientist Lord Kelvina’n kum 1895-ah inring tâwk takin a sawi a ni. Chuvângin, mi fing tak tak chuan mi thiam zirtîrtute thusawi apiang chu an ring ngawt ngai lo.​—Sâm 146:3.

Sakhaw inzirtîrna chungchângah pawh chutiang bawka fîmkhur chu a ngai a ni. Tirhkoh Paula chu sakhaw lama a zirtîrtute aṭangin lehkha a zir thiam êm êm a; tin, ‘thlahtute thurochhiah chungah ṭhahnem a ngai nasa bîk’ êm êm bawk a ni. Nimahsela, thlahtute thurochhiah chunga ṭhahnem a ngaihna nasa tak chuan harsatna a siam zâwk a. ‘Pathian Kohhranho nasa taka tiduhdahin a tihbuaitîr’ a ni. (Galatia 1:​13, 14; Johana 16:​2, 3) Chu aia nasa zâwk chu Paula chuan Isua Krista rintîr theitu tûr thilte hnâwlin, hun rei tak chhûng ‘chhunna tiang khen chu a tai’ reng a. A rinna tidanglam tûrin Isua ngei a inrawlh a ngai hial a ni.​—Tirhkohte 9:​1-6; 26:14.

Chanchin Puanchhuahte’n An Hneh Vâng Che Em Ni?

Chanchin puanchhuahte hian i rinna chu a thunun viau a ni thei. Mi tam takte chuan chanchin hmantlâk tak an dawn theih avângin, zalên taka thu sawi theihna leh ziak theihna chungah an lâwm a. Nimahsela, chanchin puanchhuahna chelek vêl thei leh chelek vêl ṭhîn thil tithei tak a awm a ni. Chanchin chhuahte zîngah chuan i ngaihtuahna tichhe thei chanchin dik lo a tel fo ṭhîn.

Chu bâkah, mi tam zâwk hîp theih nân, mite rilru la zâwng leh thil mak tak tak an chhuah ṭhîn bawk. Kum rei lo tê kaltaa mipui vântlâng hriat phal loh thilte pawh tûn laiah chuan hmun tinah hmuh theihin a awm tawh a. Zawimuanga thleng ni mah se, nungchang mawi tehnate chu tuiêk ei chhiat anga ei chhiat a ni ta. Mite ngaihtuahna chu zawi zawiin a phê ruai tawh bawk. ‘Thil ṭha lo chu thil ṭha, thil ṭha chu thil ṭha lo’ niin an ring tawh a ni.​—Isaia 5:20; 1 Korinth 6:​9, 10.

Rinna Tûra Chhan Dik leh Nghet Hmuhna

Mihring finna leh ngaih dântea innghah chu ṭiauvut chunga in sak ang a ni a. (Matthaia 7:26; 1 Korinth 1:​19, 20) A nih chuan i rinna chu engah nge i nghah ang? Pathianin i vêla thilte ngaihtuah a, thlarau lam thil chungchâng zawhnate zâwt thei tûra hriat theihna min pêk avângin, chûng i zawhnate chhânna dik tak pawh pe che tûra rin chu a âwm hle lâwm ni? (1 Johana 5:20) Ni e, a pe ngei ang! A nih leh biakna dik leh tak chu engtin nge i hriat theih ang? Pathian Thu, Bible chuahvin chu hriat theihna chu a pe tih chiang takin kan sawi ngam a ni.​—Johana 17:17; 2 Timothea 3:​16, 17.

Tuemaw chuan, “Ngawi teh, he khawvêla buaina leh indona siamtute hi Bible pawmtute an ni lâwm ni?” a ti mai thei. Ni e, Bible zâwma inchhâl sakhaw hruaitute hian ngaih dân buaithlâk tak leh inkalh tak takte an tichhuak a ni. A chhan chu an thurin chuan Bible a ṭanchhan tak tak loh vâng a ni. Chûng mite chu tirhkoh Petera chuan “zâwlnei derte” leh “zirtîrtu derte,” “mi tichhe thei rin hranna,” siamtute tiin a sawi a. Chûng an thiltihte avâng chuan “kawng dik tak [thutak] chu sawichhiat a ni ang,” tiin a sawi bawk a ni. (2 Petera 2:​1, 2) Chuti chung chuan Petera chuan, “hril lâwkna thu nghet lehzual chu kan nei a ni, . . . khâwnvâr hmun thima êng an ngaihsak anga in ngaihsak chuan in tiṭha ang,” tiin a ziak bawk a ni.​—2 Petera 1:19; Sâm 119:105.

Bible chuan kan thurin chu a zirtîrna hmanga enfiah tûrin min fuih a. (1 Johana 4:1) He magazine chhiartu mi maktaduai tam takte chuan chutianga enfiahnain nun awmze nei zâwk leh nghet zâwk an neihzia an fiah thei a ni. Chuvângin, Beroi khuaa mite ang ni ve rawh. I rin tûr i thlan fel hmain ‘ni tin Pathian Lehkha Thu enfiah’ ang che. (Tirhkohte 17:11) Jehova Thuhretute chuan chutiang ti tûra ṭanpui che chu an inpeih reng a ni. I rin tûr thlan chu nangma thu vek a ni. Amaherawhchu, i rinna chu mihring finna leh duh dân ni lo va, Pathian Thu thutak thua inngat zâwk a nih leh nih loh fiah chu a fin thlâk hle ang.​—1 Thessalonika 2:13; 5:21. (w01 8/1)

[Phêk 6-naa milemte]

I rinna chu Bible-ah i nghat thei