I Duhzâwng Ring Tûra Dikna I Neih
I duhzâwng apiang ring tûra dikna i neih chu i hlut ngei a rinawm. Mi tin deuhthaw hian chu dikna chu an hlut a ni. Chutiang dikna an neih chu an hman avângin, khawvêla mi tlûklehdingâwm ruk lai hian rinna leh ngaihdân chi hrang hrang an neih phah rêng a ni. Thil siama kan hmuh danglamna chi hrang hrang, a rawng te, a pianphung te, thil thap zâwng te, thil tuizâwng te, a rim te, leh a ri te ang bawk hian, rinna leh ngaihdân chi hrang hrangte chuan nunah hian ngaihsakna te, phûrna te, leh hlimna te a awmtîr fo ṭhîn. Chutiang thil hrang hrangte chuan nun hi a tinuamin a tiphûrawm tak zet a ni.—Sâm 104:24.
NIMAHSELA fîmkhur ngaihna lai a awm. Rinna leh ngaihdân ṭhenkhat chu a danglam mai ni lovin, a hlauhawm a ni. Entîr nân, kum zabi 20-na tîr lam khân mi ṭhenkhat chuan Juda-te leh Freemason hote chuan “Kristianho chu tihtâwp a, an pahniha ṭangrualin khawvêl awp an tum,” tih an ring a. He mi rinna lo chhuahna chu Judate dona, Protocols of the Learned Elders of Zion tih tract hi a ni. Chu an thiltumah chuan ‘Thâwklehkhata Jentailte hausakna chu tihchhiat rup’ a nih theih nâna chhiah tihsân vak te, râlthuam siam uar te, leh sum dâwnna zawng zawng chu company pakhat vawntîr te; ‘Jentailte chu hriatna nei lo ramsa ang maia siam nâna’ zirna lam tihchhiat te; Juda upate’n ‘anmahni dodâltu apiang an tihboral theih nâna’ an khawpuite chu lei hnuai rêl kawnga zawmte a tel angin chu tract chuan a târ lang a ni.
Hêng zawng zawngte hi dâwt vek—Judate huatna tihsosân nâna ruahman vek a ni. He mi chungchângah hian British Museum-a mi Mark Jone-a chuan heti hian a sawi: ‘He tract hi’ 1903-a chanchinbua a lan hmasakna ber, ‘Russia ram aṭanga darh zau zêl a ni’ a ti. Tichuan, chu thu chu May 8, 1920 chuan The Times of London chanchinbuah a chuang a. A hnu kum khat aia reiah, The Time chanchinbu chuan dâwt a nih thu a sawi chhuak ta chuah a ni. Mahse, chutih chhûng zawng chuan thil a khaw lo hman vek a. Jones-a bawk chuan ‘Hetiang rêng dâwt thu hi tihtâwp a harsa a ni,’ a ti. Miin vawikhat an lo pawm tawh chuan, chûng dâwt thute chuan inhuatna te, tûr hlauhawm te, leh rinna hlauhawm tak takte a tichhuak ṭhîn.—kum zabi 20-nain a târ lan tawh angin rah chhuah râpthlâk tak takte pawh a chhuah fo ṭhîn a ni.—Thufingte 6:16-19.
Rinna leh Thutak Inkhînna
Rin sualna chu duh rêng vâng ni lova dâwt sawina aṭang pawhin a lo awm thei a. A châng chuan thil kan hre sual mai a ni thei. Dik nia an rinte an tih avângin mi engzâtin nge a hun lova thihna an tawn? Chu bâkah, kan rin duh avâng maiin thil kan ring châwk bawk ṭhîn. Professor pakhat chuan, scientist-te takngial pawh hian “an thil hmuhchhuah leh ngaihdânte an ngaihlu êm êm ṭhîn,” tiin a sawi. An rinna chuan thutâwp fel takin a siamtîr thei lo ṭhîn. Tichuan, chu rinna dik lo chu a dikzia târ lan nân an dam chhûng hun chu an khawhral ṭhîn a ni.—Jeremia 17:9.
Chutiang thil chu inkalhna nasa tak awmna, sakhaw rinnaah pawh a thleng a ni. (1 Timothea 4:1; 2 Timothea 4:3, 4) Pa pakhat chuan Pathianah rinna nghet tak a nei a. Mi dang chuan miin “Thu âtthlâk tak aṭangin sakhaw rinna a nei” thung a. Mi pakhat chuan thih hnua dam khawchhuak thlarau thi thei lo neih chu a ring tlat bawk a. Mi dang chuan mi an thih chuan an awm tawh lo, a bo hlen vang vang mai a ni tih a ring bawk. Chiang takin, hêng rinna inkalhte hi an dik vek thei lo a ni. Chuvângin, i rin duhzâwng a nih avânga ring ni mai lo va, i thu rin chu thu dik ngei a ni tih fiah chu a finthlâk hle lâwm ni? (Thufingte 1:5) Engting nge i fiah tâk ang? Thuziak dawt leh chuan he mi chungchâng hi a sawifiah ang. (w01 8/1)
[Phêk 3-naa milem]
1921-a “Protocols of the Learned Elders of Zion” dik lohzia târ langtu thuziak