“Nangni Zawng Zawng Chu Unau In Ni Si A”
“‘Rabbi’ tihin awm suh u; in zirtîrtu chu pakhat chuah a ni a, nangni zawng zawng chu unau in ni si a.”—MATTHAIA 23:8.
1. Eng thilin nge kan ngaihtuah phû?
“TUTE’N nge chawimawi phû zâwk, Bethel-a awmte’n nge missionary-te’n?” tiin, Khawchhak lama Kristian nu pakhat chuan mâwlmang takin Australia aṭanga lo kal missionary pakhat chu a zâwt a. Ani chuan tunge zah zâwk tûr, ram dang aṭanga lo kal missionary te nge, Watch Tower Society branch office-a thawk tualchhûng rawngbâwltute tih chu hriat a duh mai a ni. Chu zawhna mâwlmang tak, thlei bîk neihna tilangtu chuan chu missionary chu a barakhaih chiang hle. Tuin nge zah phû zâwk tih zawhna chu thiltihtheihna leh mi thununtheihna lama mite dinhmun hriat duhna aṭanga lo chhuak a ni.
2. Pathian chibai kan bûkpuite eng angin nge kan thlîr ang?
2 He suangtuahna hi thil thar a ni hauh lo mai. Isua zirtîrte meuh pawh, tunge ropui ber tih chungthu-ah an lo inhnial reng ṭhîn. (Matthaia 20:20-24; Marka 9:33-37; Luka 22:24-27) Anni chu kum zabi pakhatnaa Juda sakhuana, thlei bîk neihna aṭanga lo kalte an ni a. Chu chu hre rengin Isua chuan a zirtîrte chu hetiangin a zilh a: “‘Rabbi’ tihin awm suh u; in zirtîrtu chu pakhat chauh a ni a, nangni zawng zawng chu unau in ni si a,” tiin. (Matthaia 23:8) “Zirtîrtu” tihna “Rabbi” tih thu mal, sakhaw lama nihna chuan, “chu nihna chelhtu chu chapona leh u zâwk nia inngaihna; leh chu nihna chelh ve lote tân thîkna leh hnuai zâwk nia inhriatna a siam duh a; tin, chu rilru put hmang zawng zawng chu ‘Krista rilru tlâwmna’ nên a inkalh tlat a ni” tiin Bible zirlai Albert Barnes-a chuan a chhinchhiah a ni. Dik takin, Kristiante chuan an zînga hmahruaitute chu “Upa chu mi kha mi” tia kovin, “upa” tih nihna thu mal hi mi fak der nân an hmang lo. (Joba 32:21, 22) Jehova’n amah betu rinawmte a chawimawi ang leh, Isua Krista’n a hnungzuitu rinawmte a chawimawi ang chiahin, Isua fuihna anga nung upate chuan kohhran mi leh sate chu an chawimawi zâwk a ni.
Jehova leh Isua Entîr Siam
3. Jehova’n engtin nge a thlarau thil siamte a chawimawi?
3 Jehova chu “Chungnungber” ni mah se, atîr aṭang rênga a hnaa teltîrvena hmangin a thil siamte chu a chawimawi a ni. (Sâm 83:18) Mihring hmasa ber a siam pawh khân, Jehova chuan a Fapa mal neih chhun chu “mi themthiam” angin a hnaah a teltîr a. (Thufingte 8:27-30; Genesis 1:26) Lal suaksual Ahaba tihboral a tum pawh khân, a tihboral dân tûrah a vântirhkohte pawh an ngaihdân sawi tûrin a sâwm hial a ni.—1 Lalte 22:19-23.
4, 5. Jehova’n engtin nge a thil siam mihringte a chawimawi?
4 Jehova chuan lei leh vâna Lal Chungnungber angin ro a rêl a. (Deuteronomy 3:23, 24) Chuvângin, mihring a râwn ve a ṭûl lo rêng rêng. Mahse, anmahni hre tûrin a intihniam a tih theih a ni. “LALPA kan Pathian chung lama ṭhutphah neia, vâna thil awmte leh leia thil awmte en tûra intihnuai ṭhîna ang hi, tunge awm? Ani chuan rethei chu vaivut ata a kai tho ṭhîn,” tiin fakna hla phuahtu chu a zai a ni.—Sâm 113: 5-8.
5 Sodom leh Gomorra a tihchhiat hma khân, Jehova chuan Abrahama zawhna ngaihthlâksakin, rorêl dikna nia a hriatna chu a tihlungawisak a ni. (Genesis 18:23-33) Jehova chuan Abrahama ngenna rah chhuah tûr hre lâwk vek mah se, dawhthei takin a ngaihthlâksak a, a thil chhût dân chu a pawmpui a ni.
6. Habakuka’n zawhna a zawh khân Jehova’n ani chu a chawimawi a, chu chuan eng rah nge a chhuah?
6 Jehova chuan: “Aw LALPA, eng chen nge ka au vang a, min ngaihthlâk loh vang?” tih Habakuka zawhna pawh a ngaithlâksak bawk. Ani chuan chu chu a thuneihna chonaah a ngai em? Ngai lo, Habakuka zawhnatte chu âwm rêngah a ngai a; tichuan, a thil ruahman, rorêlna thlentîr tûra Kaldai mi a chawh thawh tûrzia chu hriattîr ta a. ‘He rorêlna hrilh lâwk thu hi a lo thleng ngei ang’ tih zawlnei chu a tiam bawk. (Habakuka 1:1, 2, 5, 6, 13, 14; 2:2, 3) Habakuka rilru vei zâwngte lâk urhsûnsakna leh chhânna hmangin, Jehova chuan zâwlnei chu a chawimawi a ni. Chuvângin, zâwlnei lungngai tak chu a chhandamna Pathianah rinna pumhlûm neiin, a hmêl a lo êng leh a, a lo hlim leh ta a ni. Hei hi, tûn laia Jehova laka kan rinna tichaktu Habakuka thâwk khum hrilh lâwk lehkhabu-ah târ lan a ni.—Habakuka 3:18, 19.
7. C.E. 33 Pentikost nia Petera chanvo chu engvângin nge pawimawh tak a nih?
7 Mi dangte zahna lantîr kawnga entawn tûr ṭha tak dang leh chu Isua Krista hi a ni. Isua chuan: “Tupawh mite hmaa mi phat apiang, ka Pa vâna mi hmaah ka phat ve ang,” tiin a zirtîrte a hrilh tawh a. (Matthaia 10: 32, 33) Nimahsela, amah an man zân khân, a zirtîr zawng zawngte chuan an tlânchhiatsan vek a, tirhkoh Petera phei chuan vawi thum ngawt a phat a ni. (Matthaia 26:34, 35, 69-75) Isua chuan a pâwnlâng mai aia thûk zâwk enin, Petera rilru chhûngril leh a inlamlêtna ril tak chu a hria a. (Luka 22:61, 62) Chu mi hnu ni 51 lek, Pentikost niah a zirtîr 120-te ai a awhtîr a; chu bâkah, “vân ram chabite” zînga a hmasa ber hmantîrin Krista chuan tirhkoh inlamlêta chu a chawimawi a ni. (Matthaia 16:19; Tirhkohte 2:14-40) Petera chu ‘hawi kîr leh a, a unaute tihngheh theihna’ hun remchâng pêk a ni.—Luka 22:31-33.
Chhûngkaw Zînga Mite Chawimawina
8, 9. Pasalin a nupui a chawimawinaah, engtin nge Jehova leh Isua a entawn theih?
8 Pasalte leh nu leh pate chuan Pathian pêk thuneihna hmannaah Isua Krista leh Jehova an entawn tûr a ni. Petera chuan: “Chutiang bawkin nangni pasalte u, in nupuite nên in khawsak dânah bêl keh awl zâwk an nih hre thiam ula, . . . chawimawi rawh u,” tiin a fuih a ni. (1 Petera 3:7) Thinga siam bung bêl aia keh awlsam êm êm zâwk bung bêl ṭha tak hmang ni ta la, i hmang fîmkhr hle dâwn lo vem ni? Pasal chuan Jehova entawnna leh chhûngkaw thil an rêl huna an nupuite ngaihdân ngaihthlâksakna hmangin bêl keh awlsam tak chu fîmkhur takin a hmang thei a ni. Jehova chuan Abrahama biak nân hun a hmang tih hre chhuak ang che. Famkim lo a nih angin, pasal chuan thil engkim chu a hre vek lo thei a. Chuvângin, tih tak zeta a nupui ngaihdân ngaihtuah telna hmanga a nupui chawimawi chu atân a fin thlâk dâwn lâwm ni?
9 Mipate thuneihburna ramah chuan, pasal chuan a nupuiin a rilru zawng zawng phawrh chhuah ngam lohna a nei thei tih a hre tûr a ni. Isua Krista’n leia a awm laia nakina a nupui la ni tûrte zînga mite a dâwr dân kha entawn ang che. Ani chuan ṭanpui an dîl hma pawhin, an tisa leh thlarau lam theih chinte a ngaihtuah a, anni chu a duat êm êm a ni. (Marka 6:31; Johana 16:12, 13; Ephesi 5:28-30) Chu mai bâkah, in chhûngkaw tân leh i tâna i nupui thiltihte chu enthla la, ṭawngkam leh thiltihin i ngaihhlutzia lantîr ang che. Jehova leh Isua chuan a phûte chu an ngaisâng a, an fak a; tin, mal an sâwm bâwk ṭhîn. (1 Lalte 3:10-14; Joba 42:12-15; Marka 12:41-44; Johana 12:3-8) Khawchhak rama awm Kristian nu pakhat chuan a pasal Jehova Thuhretute zînga pakhat a nih hnuah heti hian a sawi a: “Ka pasal chuan thil zawng zawng min kentîr vekin, ka hma pên thum pên li vêla hlaa min kalsan ṭhîn kha a ni a. Tûnah chuan, bungruate chu ama’n a keng a, in lama ka thiltihte a ngaihhlutzia min hrilh ṭhîn!” tiin. Ngaihhlut tak zetna ṭawngkam chuan, hlut an nihzia hre tûrin i nupui chu nasa takin a ṭanpui ang.—Thufingte 31:28.
10, 11. Jehova’n hel hrât hnam, Israelte a dâwr dân aṭangin nu leh pate’n eng nge an zir theih?
10 Naupangte nêna an indâwr dânah, abîk takin zilh a ṭûl hunah, nu leh pate chuan Pathian entîr siam chu an entawn tûr a ni. An kawng sual ata hawi kîr tûrin ‘Jehova chuan Israelte leh Judate chu a vaukhân ṭhîn a,’ nimahsela an “intiluhlul” tlat a ni. (2 Lalte 17:13-15) Israelte chuan “amah chu an kâin an fak der a, an leiin a hnênah dâwt thu an sawi ṭhîn” hial bawk. Nu leh pa tam takte chuan an fate’n chutianga awm châng neiah an ngai mai thei. Mahse, Israel mite chuan “Pathian an fiah a,” an tivui a, an tilungngai chung pawhin, Jehova chu “lainatnaa a khah avângin an khawlohna chu a ngaidam a, anni chu a tiboral lo.”—Sâm 78:36-41.
11 Jehova chuan: “Hawh teh u, i ngaihtuah tlâng teh ang u! In sualte chu sen lâr angin awm tawh nah sela, vûr angin a vâr ang,” tiin Israel mipuite chu a ngên hial a ni. (Isaia 1:18) Jehova chu thil tisual zâwk ni lo mah se, thil awm dân tifel tûra ngaihtuah tlân puiah hel hrât hnam chu a sâwm a ni. Nu leh pate tân entawn tûr rilru put hmang ṭha a va ni êm! A ṭûl hunah an thu sawite ngaihthlâksakin, anni chu chawimawi la; inthlâk thleng an ngaih chhan chu titipui ang che.
12. (a) Engvângin nge Jehova aia kan fate chawimawi chu kan pumpelh ang? (b) Kan fate kan zilh huna an zahawmna zahsak thei tûr chuan eng nge ngai?
12 Naupangin, zilhna khauh tak an mamawh châng zawng a awm ngei mai. Nu leh pate chuan ‘Jehova aia a fate chawimawi zâwk’ Elia ang nih chu an duh hauh lo vang. (1 Samuela 2:29) Mahse, naupangte chuan hmangaih avânga zilh an ni tih an hmuh thiam a pawimawh a ni. An nu leh pate’n an hmangaih a ni tih an hre thiam tûr a ni. Paula chuan pate chu: “In fate tithinur suh ula, Lalpa [Jehova] thununnaah leh zilhnaah chuan enkawl zâwk rawh u” tiin, a fuih a. (Ephesi 6:4) A sawi tum chu, chhûngkuaa pa berin thuneihna a lâk hian, naupangte zahawmna a ngaihtuah reng tûr a ni a, vîn hrepin a tihthinur tûr a ni lo tih hi a ni. Ni e, naupangte zahawmna ngaihtuah thei tûrin hun leh thawh rim a ngai a; mahse, a rah chhuah chu man hla tak a ni thung.
13. Chhûngkuaa tarte chungchâng Bible thlîr dân hi eng nge ni?
13 Chhûngkaw zînga mite chawimawinaah chuan nupui fanaute tihzahawmna mai a tâwk lo. “I lo upatin, i fate thu zâwm rawh,” tih hi Japan-ho thufing a ni a. A sawi tum chu nu leh pa tarte chuan thuneihna an la vek tûr a ni lo; an fa puitling tawhte thusawi chu an zâwm tûr a ni tihna a ni. Nu leh pate’n an thusawi ngaithlâkna hmanga an fate chawimawi chu Pathian duhzâwng ni mah se, naupangte chuan chhûngkuaa tarte zah lohna rilru put hmang an lantîr tûr a ni lo. “I nu chu a lo tarin hmusit suh” tiin, Thufingte 23:22 chuan a sawi si a. Lal Solomona chuan chu thufing chu zâwm a, a hnêna dîlna siam tûra a nu a lo kal khân a lo chawimawi a ni. Solomona chuan a ding lamah lalṭhuthleng a hun sak a; tichuan, a nu upa tawh tak, Bath-shebi thu hrilh tûr chu a ngaithla a ni.—1 Lalte 2:19, 20.
14. Kohhrana tarte chu engtin nge kan chawimawi theih?
14 Kan thlarau lam chhûngkaw lian takah hian, kohhran mi leh sa tar tawhte chawimawina kawngah “hma hruai” tûrin dinhmun ṭha takah kan ding a ni. (Rom 12:10, NW) Anni chuan tûn hma angin an thawk ṭha thei tawh lo mai thei a, chu chuan an tibeidawng thei a ni. (Thuhriltu 12:1-7) Ṭum khat chu hriak thih Thuhretu upa tawh tak, damdawi in khuma mu reng chuan chutiang beidawnna chu hetiang hian a sawi a: “Ka hna vâna thawk zawm tûrin thih hlân ka nghâkhlel khawp mai,” tiin. Chutiang upa tawhte chu an phû hliah hliah hriatthiamna leh chawimawina chuan a ṭanpui thei a ni. Israel mite chu: “Lûa kêlsam ṭote hmaah chuan i ding zêl ṭhîn tûr a ni a, tar hmêl chu i zah tûr a ni,” tih thu pêk an ni. (Leviticus 19:32) Tarte chu ṭangkai leh ngaihsân nia inhriatna neihtîrin, i ngaihtuahzia lantîr rawh. “Ding” tih hian zahna leh chawimawina a keng tel a, chuvângin a châng chuan an bula ṭhua kum tam tak kal taa an thiltih an sawite ngaihthlâksakna a huam tel thei ang. Chûng chuan tarte a chawimawi ang a, kan thlarau lam nun ngei pawh a tichangtlung ang.
‘Inchawmawinaah Hma Hruai Rawh’
15. Kohran mi leh sate chawimawi tûrin upate’n eng nge an tih theih?
15 Upate’n entawn tûr ṭha an siamin kohhran mite chu an hlim ṭhîn. (1 Petera 5:2, 3) An hun chêp tak kârah pawh, mi ngaihtuah tak upate chuan tleirâwl te, chhûngkaw lûte, hmeithaite, chhûngpui nute, leh tarte chu harsatna an neih leh neih loh hre tûrin an be hmasa ṭhîn. Upate chuan kohhran mi leh sate thusawi chu an ngaihthlâksak ṭhîn a, an thiltihte chu an fak ṭhîn. Unaupa emaw, unaunu emaw thiltih hlut taka fak ṭhîn upa thil chîk mi chuan, Jehova, a lei lam thilsiamte ngaihlu êm êmtu chu a entawn a ni.
16. Upate chu kohhrana mi dangte ruala chawimawi phû niin engvângin nge kan ngaih ang?
16 Jehova entawnin, upate chuan: “Unaute hmangaih kawngah chuan hmangaih takin inlainat tawn ṭheuh rawh u; inchawimawi tawnna kawngah chuan hma hruai u la,” tih Paula fuihna thu a taka hmanna kawngah entawn tûr ṭha an siam a ni. (Rom 12:10, NW.) Hei hi thlei bîk neihna rama awm upate tân chuan a harsa deuh mai thei. Entîr nân, Khawchhak lama ram pakhatah chuan, “unau” tih sawi nân thu pahnih a awm a, pakhat chu zahderna ṭawngkam a ni a, pakhat zâwk chu a narâna hman a ni. Kohhran mite chuan upate leh tarte tân zahderna ṭawngkam zâwk an hmang ṭhîn a, mi dangte tân chuan a narân zâwk an lo hmang ṭhîn a. Amaherawhchu, Isua’n a hnungzuitute hnênah “nangni zawng zawng chu unau in ni si a” a tih avângin a narân zâwk hmang reng tûra fuih an ni. (Matthaia 23:8) Ram dangah hetiangin alang apauva inthliarna hi awm lo mah se, mihring rilru âwn zâwng thlei bîk neih duhna lakah kan fîmkhur tûr a ni.—Jakoba 2:4.
17. (a) Engvângin nge upate chu nêlawm tak an nih ang? (b) Kohhran mi leh sate an dâwrnaah eng kawngin nge upate’n Jehova an entawn theih?
17 Paula chuan upa tuemawte chu “a leh hniha chawimawi” tlâka ngai tûrin min fuih ngei a; mahse, anni pawh unaute tho an la ni. (1 Timothea 5:17) Chungnungbera ‘khawngaihna lalṭhutphah mah huai taka kan pan’ theih si chuan, Jehova awm dân latu tûr upate chu huai takin kan pan thei hle zâwk tûr a ni lo vem ni? (Hebrai 4:16; Ephesi 5:1) Enkawltute chuan an nêlawm leh awm loh chu miin fuihna dawng tûr emaw, rawtna pe tûr emawa an pan zin dân aṭangin an chhût thei ang. Jehova’n a hnaa mi dangte a teltîr dân hi zir ang che. Ani chuan mawhphurhnate an chunga nghatin mi dangte chu a chawimawi ṭhîn a. Thuhretu dangte rawtna siam ṭhenkhat chu ṭangkai lêm lo mah se, ngaihtuahna an lantîr avângin upate chuan an rawtna pêk chu an hlut tûr a ni. Abrahama zawhna chipchiar tak leh Habakkuka mangang au thâwm Jehova chhân dân kha hre reng ang che.
18. Mi dangte siam ṭhatnaah upate’n engtin nge Jehova an entawn theih?
18 Kan Kristianpui ṭhenkhat chu siam ṭhat an ngai hle. (Galatia 6:1) Mahse, Jehova mithmuhah chuan an hlu a, zah taka enkawl an phû reng tho a ni. “Miin min zilh hunah zahawm tak anga min cheibâwl chuan, inthlahrung lo takin ka pan ngam ṭhîn” tiin, Thuhretu pakhat chuan a sawi a. Zahawm tak anga cheibâwl an nihin, mi tam zâwk chuan zilhna an dawng ṭha zâwk ṭhîn. Hun duh rei deuh mah se, kawng dik lo zawhtu thusawi ngaihthlâk tluanchhuahsakna chuan zilhna ṭûl engpawh chu awlsam zâwkin a pawmtîr thei a ni. Jehova’n Israel mite a lainat êm avânga a biak nawn ṭhin dân kha i rilruin vawng reng rawh. (2 Chronicles 36:15; Tita 3:1, 2) Ṭanpui mamawhte dinhmun hre thiam tak leh tuarpui taka zilhna pêk a nih chuan an rilru a khawih ngei ang.—Thufingte 17:17; Philippi 2:2, 3; 1 Petera 3:8.
19. Kristian rinna nei ve lote chu engtin nge kan thlîr ang?
19 Nakina kan thlarau lam unau lo la ni mai theite lakah pawh mi dangte kan chawimawina kan lantîr a. Chûng mite chuan tûnah mai chuan kan thuchah chu pawm mai rih lo mah se, kan dawh theih a ngai a, mihring an nih angin zahna kan lantîr tûr a ni. Jehova chuan ‘tuma boral a duh lo va, mi zawng zawng lo sim tûrin a duh’ a ni. (2 Petera 3:9) Keini pawhin Jehova ngaihdân kan nei ve tûr a ni lâwm ni? Dân narânin, ṭhenawm ṭha nih tum rengin, thuhrilh theihna kawng kan sial thei a ni. Mahse, thlarau lam atâna hlauhawm inkawmna chu kan hawisan ngei tûr a ni. (1 Korinth 15:33) Chutichung pawhin, kan rinpui ni lote chu hmusit lovin, kan “tiṭha” thei a ni.—Tirhkohte 27:3.
20. Jehova leh Isua Krista entîr siam chuan eng ti tûrin nge min chêttîr ang?
20 A ni, Jehova leh Isua Krista chuan kan zain zah tlâkah min ruat a. An thiltih dân leh inchawimawi tawnna kawnga hma an hruai dân chu i hre reng ṭhîn ang u. Tin, kan Lalpa Isua Krista thu: “Nangni zawng zawng chu unau in ni si a,” tih hi rilruah i vawng reng bawk ang u.—Matthaia 23:8. (w00 6/15)
Engtin nge I Chhân Ang?
• Pathian chibai kan bûkpuite chu engtin nge i thlîr ang?
• Jehova leh Isua entawn tûr siam chuan mi dangte chawimawi tûrin engtin nge a chêttîr che?
• Pasal leh nu leh pate’n engtin nge mi dangte an chawimawi theih?
• Kristianpuite an unau anga thlîrna chuan upate chu eng anga thil ti tûrin nge a chêttîr?
[Phêk 26-naa milem]
Ngaihhlutna ṭawngkamin i nupui chawimawi rawh
[Phêk 26-naa milem]
An thusawi ngaithlain i fate chu chawimawi rawh
[Phêk 26-naa milem]
Kohhran mi leh sate zah taka i cheibâwlna chuan i zilhna pawm a tiawlsam ang