Jehova Laka Rinawm Nghehna Vawng Rawh

RINAWM NGHEHNA chu tûn laia hmuh zen zen loh ṭhatna pakhat ni mah se, Pathian dik, Jehova chhiahhlawhte chhinchhiahna a ni tlat a. Mi rinawm nghet chu fiahna hnuaiah pawh a ding nghet tlat a, hun leh nite liam ṭhîn mah se, a nghîng chuang lo. Lal ṭha Hezekia hi han ngaihtuah teh. Bible chuan: “A hnua Juda lal zawng zawngte zîngah amah ang tumah an awm lo va, a hmaah pawh an awm hek lo,” a ti a. Engin nge Hezekia chu chutianga danglam tak nihtîr le? Pathian dik lo Moleka betute hualvêlin awm mah se, ‘LALPA [Jehova] chu a vawn tlat” vâng a ni. Ni e, Hezekia chuan ‘[Jehova] a zui chu a bâng duh lo va, a thupêkte chu a zâwm’ a ni.—2 Lalte 18:1-6.

Jehova laka rinawm nghehna vawngtu dang leh chu tirhkoh Paula a ni. Kristian Greek Pathian Lehkha Thu-a (Thuthlung Thar-a) chhinchhiah Paula rawngbâwlna chuan thlarau zawng zawnga Pathian rawng a bâwlzia a lailang chiang hle. A hring nun tâwp dâwnah Paula chuan: “Intihsiakna ṭha chu ka bei zo tawh a, ka tlânsiakna kawng ka hlen tawh a, rinna chu ka vawng reng tawh a ni,” tiin a insawi thei a ni.—2 Timothea 4:7.

Hezekia leh Paula rinawm nghehna chu entawn tlâk a va ni êm! Kan Pathian ropui, Jehova laka kan rinawm nghehna vawng rengin, an rinna chu i entawn ang u.—Hebrai 13:7.