Tuin Nge Tharum Thawhna Titawp Ang?

SEPTEMBER 1999 khân, UN Secretary-General Kofi Annan-a chuan kum tin General Assembly vawi 54-na palaite chu a lo lâwm a. The Toronto Star chanchinbuin thu a thlen dânin, Kofi Annan chuan khawvêl hruaitute hnênah chona thu hetiangin a vawrh chhuak a: “Khawvêl hmun tin aṭanga lainatna ṭawngkam piah lam mamawh mi tam tak an awm a. Anni chuan tharum thawhna inher chhuak leh ṭhîn chu titâwp a, hlawhtlinna kawng him zawh ṭantîr tûr hlawhtling ngei tûr intiamna dik tak an mamawh a ni,” tiin.

UN leh a ṭhuihruai ramte chuan tharum thawhna tihtâwp nâna mamawh “hlawhtling ngei tûr intiamna dik tak” chu an pe thei em? He Star chanchinbu vêk hian U.S. President Bill Clinton-a thusawi: “He kum za bia thisen chhuahna zawng zawng a thlen hnuah chuan ‘a thleng leh ngai tawh lo vang’ tia sawi chu a awlsam hle tih kan hria; mahse, chutiang nihtîr chu thil harsa tak a ni,” tia a sawi chu a telh bawk a. Ani chuan: “Thutiam pêk tam lutuk hi inngaihsak lohna tlukin a nunrâwng thei,” tiin a belh hlak bawk.

Kum 2,500 chuang kalta khân, zâwlnei Jeremia chuan: “Aw LALPA, mihring awm dân chu, mahni thu mai a ni lo tih ka hre ta: Tungchhova kal mihringah hian, a pheikhai hruai tûr a awm lo,” tiin mihring thawhrimna chungchâng a lo sawi tawh a. (Jeremia 10:23) A nih leh, tharum thawhna titâwp tûr chuan eng beiseina nge awm?

Isaia 60:18-a kan chhiar angin, Pathianin thu min tiam a: “Râwng taka thiltih thâwm chu i ramah hriat a ni tawh lo vang a, ṭiauna leh chhiatna thâwm pawh i ramri chhûngah hriat a ni tawh lo vang,” tiin. Pathianin a mi vâkvaite an in leh lova a hruai kîr khân, chu hrilh lâwkna chuan thlen famkimna hmasa zâwk a nei a. Chu chuan kan tel ve theihna thlen famkimna ropui zâwk a nei bawk. Pathian Jehova chuan ‘thutiam a pe tam lutuk’ lo. Chungnungbera leh mihring Siamtu a nih angin, ani chu “tharum thawhna inher chhuak leh ṭhîn” titâwp theitu tûr a ni. Pathian Lalramah chuan, remna a dingchang tawh ang a, tharum thawhna chu a bo hlen tawh ang!—Daniela 2:44. (w00 6/15)