A Tâwp Thlengin I Chhel Thei

“Kan hmaa intlânsiakna tûr awmah hian chhel takin i tlân zêl ang u.”—HEBRAI 12:1, 2.

1, 2. Chhel tih awmzia chu eng nge ni?

“CHHELNA in ngai asin,” tiin tirhkoh Paula chuan kum zabi pakhatna Hebrai Kristiante hnênah a ziak a. (Hebrai 10:36) He nihna pawimawhzia sawi uarin, tirhkoh Petera pawhin Kristiante chu: “In rinnaah chuan . . . chhelna telh ula,” tiin a fuih a ni. (2 Petera 1:5, 6) Mahse, chu chhelna chu eng chiah nge ni?

² Greek-English dictionary chuan “chhel” tih thumal atâna Greek verb hi “tlân chhe lo va ding nghet reng . . . huaisen taka hmachhawn, nghet,” tiin a hrilhfiah a. “Chhelna” tih thumal atâna Greek noun chungchâng chu lehkhabu râwn ber pakhat chuan: “Chu chu thil tuar theihna thlarau a ni a, ngawi renga tuar ngawih ngawihna ni lovin, beiseina nasa tak nêna tuarna a ni . . . Chu chu mi mahni kea dintîr a, thlihrângte hmachhawntîr thei mizia chu a ni a, tuarna piaha thiltum chu a hmuh avânga tihduhdahna râwng ber pawh ropuinaa chantîr thei ṭhatna a ni,” tiin a sawi bawk. Tichuan, chhelna chuan harsatnate leh dâltute hmachhawn chung pawha beisei bo lovin nghet takin a dintîr thei a ni. He mizia hi a bîk takin tute’n nge mamawh?

3, 4. (a) Chhelna chu tute’n nge mamawh? (b) Engvângin nge a tâwp thlengin kan chhel ang?

³ Kristian zawng zawngte chu chhelna ngai intlânsiaknaa tel angin tehkhin an ni a. C.E. 65 vêlah, tirkoh Paula chuan a rawngbâwlpui leh a zinvahpui rinawm tak Timothea hnênah: “Intihsiakna ṭha chu ka bei zo tawh a, ka tlânsiakna kawng ka hlen tawh a, rinna chu ka vawng reng tawh a ni,” tiin rinngamna neihtîr thei thute a thawn a ni. (2 Timothea 4:7) “Tlânsiakna kawng ka hlen tawh,” tih thu hmangin Paula chuan a Kristian nun kawng chu inṭanna leh tâwpna nei intlânsiakna nên a khaikhin a ni. Chutih hun lai chuan Paula chuan intlânsiakna tâwpna chu hneh takin a pan mêk a, ringngam takin lâwmman a hmuh hun tûr chu a thlîr a. Ani chuan: “Tûnah chuan felna lallukhum chu ka tân dahin a awm tawh a, chu chu Lalpa, ngaihtuahtu fel tak chuan chu mi ni-ah chuan mi pe ang,” tiin a sawi zawm a ni. (2 Timothea 4:8) A tâwp thlenga a chhel avângin lâwmman a hmu ang tih Paula chuan a chiang a. Keini mi dang zawngte chungchâng hi eng nge ni ve le?

⁴ Intlânsiaknaa telte fuih nân Paula chuan: “Kan hmaa intlânsiakna tûr awmah hian chhel takin i tlân zêl ang u,” tiin a ziak a ni. (Hebrai 12:1, 2) Kristian kan nih angin, Isua Krista kaltlanga Jehova hnêna kan inpumpêkna hmangin he chhelna intlânsiaknaah hian kan lût a. Zirtîr nihnaa inṭanna ṭha hi a pawimawh a; mahse, a pawimawh bulpui ber chu a tâwp thlenga kan tlân chu a ni. Isua chuan heti hian a puang a: “A tâwp thlenga tuar peih apiang chu, chu mi ngei chu chhandamin a awm ang,” tiin. (Matthaia 24:13) Hlawhtling taka intlânsiakna hlentute lâwmman hmuh tûr chu chatuan nunna a ni! Chuvângin, rilrua thiltum nei rânin, a tâwp thlengin kan chhel tûr a ni. Chu thiltum chu hmu tûrin engin nge min ṭanpui ang?

Chaw Ṭha—A Loh Theih Loh

5, 6. (a) Nunna atâna intlânsiaknaa chhel tûr chuan, eng nge kan ngaihsak ngai? (b) Eng thlarau lam châwmnate nge kan hman ṭangkai ang a, engvângin nge?

⁵ Greece rama Korinth khawpui kiang vêl chu hmân lai chuan Isthmian Infiamna hmingthang tak neih ṭhinna hmun a ni a. Paula chuan Korinth unaute chuan chu mi hmuna insawizawina lama intihsiakna leh inelna dangte chu an hre hneh hle tih a hria a. An thil hriat ata la chhuakin, ani chuan an telvena nunna atâna intlânsiakna chu a hriatnawntîr a ni: “Intlânsiakhote chu an zain an tlân a, nimahsela pakhat chauhvin lâwmman a hmu ṭhîn tih in hre lo vem ni? In hmuh theih nân chutiang takin tlân rawh u,” tiin. Paula chuan intlânsiaknaa tel reng leh a tâwp thlenga hma lam pan a pawimawhzia a sawi uar a ni. Mahse, chu mi ti tûrin engin nge min ṭanpui ang? “Intlânsiaknaahte chuan a bei ṭâlh ṭâlh apiang chu engkimah an insûm ṭhîn,” tiin a belh a. Ni e, hmân lai inkhelhnaa telte chu hnehtu an nih theih nân zirna khirh tak an nei a, an thil ei leh inah nasa takin an fîmkhur bawk a; tin, an thiltih engkim mai chu an thunun tlat bawk a ni.—1 Korinth 9:24, 25.

⁶ Kristiante intlânsiakna ve thung chu eng nge ni? “Nunna atâna intlânsiaknaah chhel i duh a nih chuan, i thlarau lam chaw hi i ngaihsak tûr a ni,” tiin Jehova Thuhretute kohhrana upa pakhat chuan a sawi a ni. Jehova, “chhelna min petu Pathian” chuan eng thlarau lam chaw nge min pêk tih ngaihtuah rawh. (Rom 15:5, NW) Thlarau lama kan in chhâwmna hnâr ber chu a Thu, Bible hi a ni. Chuvângin, Bible chhiarna hun duan ṭha tak vawng reng âwm kan ni lâwm ni? “Bawi rinawm, fing tak” hmangin Jehova chuan a hun taka chhuak chanchinbu, Vênnainsâng leh Harh Rawh! tihte leh Bible-a innghat thuchhuah tam tak a pe bawk. (Matthaia 24:45) Hêngte taima taka zirna chuan thlarau lamah min thuam ang. Ni e, mi mal zirna atân ‘remchânna kan lei zêl’ tûr a ni.—Ephesi 5:16.

7. (a) Kristian rinna thu bul hriatna maiah engah nge kan lungâwi loh vang? (b) Engtin nge ‘puitlin lam kan pan’ theih ang?

⁷ Zirtîr nihna Kristian kawnga awm reng tûr chuan “thu bul” te aia tam kan zir a, ‘puitlin lam kan pan’ a ngai a ni. (Hebrai 6:1, 2) Thutak “a zauzia te, a seizia te, a sânzia te, a thûkzia te” lakah tuina kan nei tûr a ni a, ‘puitlingte tâna chaw rum’ aṭangin châwmna kan dawng bawk tûr a ni. (Ephesi 3:14-19; Hebrai 5:12-14) Leia Isua nun chungchâng ziakna rintlâk tak pali—Chanchin Ṭha Matthaia, Marka, Luka, leh Johana te entîr nân han la ta ila. Fîmkhur taka he Chanchin Ṭha chhinchhiahte zirna aṭangin, Isua mizia leh a thiltihte kan hriat mai bâkah, amah chêttîrtu a thil ngaihtuah dânte pawh kan hre thei a ni. Tichuan, “Krista rilru kan pu” thei a ni.—1 Korinth 2:16.

8. Nunna atâna intlânsiaknaa chhel tûrin Kristian inkhâwmte hian engtin nge min ṭanpui?

⁸ Paula chuan rinpuite chu: “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” tiin a fuih a. (Hebrai 10:24, 25) Kristian inkhâwmte chu infuihna bul a va ni êm! Min ngaihsaktu leh a tâwp thlenga chhel tûra min ṭanpui duhtu kan hmangaih unaupate leh unaunute nêna awmho hi a va thawventhlâk êm! He Jehova hmangaih ruahmanna hi kan pawisa lo thei lo a ni. Mi mala taima taka kan zirna leh inkhâwm zat zatna hmangin “hriatthiamna lamah chuan puitling,” i lo ni ang u.—1 Korinth 14:20, NW.

Nangmah Chawktho Tûr Lo Thlirtute

9, 10. (a) Chhelnaa intlânsiaknaah eng angin nge lo thlîrtute chu fuihna bul an nih theih? (b) Hebrai 12:1, 2-a ‘min hual vêltu chhûmpui nasa tak ang thlîrtute’ chu eng nge ni?

⁹ Intlânsiak mi chu eng ang pawhin inpuahchah ṭha mahse, intlânsiakna kawng bulah amah tizâm thei chi thil a thleng mai thei a. Paula chuan: “Ṭha takin in tlân ṭhin kha le; thutak chu in zawm loh nân tuin nge dâl ta chu u?” tiin, a zâwt a ni. (Galatia 5:7) Galatia Kristian ṭhenkhatte chuan ṭhian sual an kâwm niin a lang a; chuvângin, anni chu nunna atâna an intlânsiakna ata hnuh pênin an awm a ni. Kawng leh lamah chuan, mi dangte hnên ata ṭanpuina leh fuihna dawnte chuan intlânsiaknaa chhel chu a tiawlsam zâwk thei a. Hei hi intlânsiaknaa telte chunga lo thlîrtute’n nghawng an neih nên a inang hle. Mipui phûr takte chuan intlânsiaknaa telte atîr aṭanga a tâwp thleng tlân tûra fuihtu, an phûrna chu a tizual sauh va. Rimawi ring tak leh kut ben nêna inkawp fo lo thlîrtute auhna chuan, intlânsiaknaa telte’n a tâwpna an hnaih huna an mamawh phurna namai lo chu a pe thei bawk. Khawngaih taka lo thlîrtute chuan intlânsiaknaa telte chungah a ṭha lama thununna a pe thei tak zet a ni.

¹⁰ Kristiante nunna atâna intlânsiaknaah chuan tute nge lo thlîrtute chu? Hebrai bung 11-a chhinchhiah anga Kristian hun hmaa Jehova thuhretute hming a lam hnûah, Paula chuan: “Chutichuan chhûmpui nasa tak ang thlîrtuten min hual vêl avâng hian, . . . kan hmaa intlânsiakna tûr awmah hian chhel takin i tlân zêl ang u,” tiin a ziak a. (Hebrai 12:1, 2) Tehkhin nâna chhûm a hmannaah, Paula chuan ruangâm bîk nei chhûm sawi nâna hman, Greek thumal a hmang lo va. Chutih ahnêkin, dictionary siamtu W. E. Vine-a ziak angin “vân khuhtu ruangâm bîk nei lo chhûm sawina” a hmang zâwk a ni. Chiang takin, Paula chuan thlîrtu mipui nasa takte a sawina a ni zâwk a—chhûmpui ang mai mi tam takte chu.

11, 12. (a) Engtin nge Kristian hun hmaa thlîrtute chuan intlânsiaknaah chhel taka tlân tûrin min tiphûr a tih theih? (b) ‘Chhûmpui nasa tak ang thlîrtute’ aṭangin engtin nge hlâwkna famkim zâwk kan hmuh theih?

¹¹ Kristian hun hmaa thuhretu rinawmte chu tûn laia a ngial a ngana lo thlîrtute an ni thei ang em? Ni thei lo vang. An za-in, thawhlehna nghâkin thihnaah an muhil tawh a ni. Amaherawhchu, anni chu an dam laiin intlânsiak mi an ni a, an entawn siamte chu Bible-ah chhinchhiahin a awm a ni. Pathian lehkha thu thianghlim kan zirin, hêng mi rinawmte hi kan thinlungah an lo nung leh thei a, intlânsiaknaah a tâwp thlenga tlân tûrin min fuih thei, tiin a sawi theih a ni.—Rom 15:4.a

¹² Entîr nân, khawvêl lam remchânnate’n min thlêmin, Mosia’n Aigupta ropuinate a hnâwl dân ngaihtuahna chuan ding nghet tûrin min tur dâwn lo vem ni? Fiahna kan hmachhawn chu nasa hle nia a lan chuan, a fapa Isaaka hlân tûra a ngen laia Abrahama tawn fiahna khirh tak hriat chhuah lehna chuan, rinna fiahnaah tlâwm lo tûrin min fuih chiang hle ang. Hêng “chhûmpui nasa tak” hian he mi kawnga min chawhthawhna chu kan hriatthiamna mita kan hmuhfiah dânah a innghat a ni.

13. Tûn lai Jehova Thuhretute chuan eng ang kawngin nge nunna atâna intlânsiaknaah mi chawhthawh?

¹³ Tûn laiah, keini pawh Jehova Thuhretu tam takte hual vêlin kan awm a. Kristian hriak thihte leh ‘mipui nasa tak’ zînga mite’n rinnaa entawn tûr an siam chu a va ropui êm! (Thu Puan 7:9) An nun kawng chanchin chu magazine leh Watch Tower thuchhuah dangah kan chhiar ziah thei a ni.b An rinna ang kan lantîrin, a tâwp thlenga chhel tûra fuihin kan awm a ni. Tin, Jehova rawng rinawm taka bâwl, ṭhian bulte leh chhûngleh khatte chhawmdâwlna dawn chu a va ropui êm! A ni, nunna atâna intlânsiaknaa min chawktho tûr tam tak kan nei a ni.

I Kal Chak Dân Tûr Fing Takin Insiam Rawh

14, 15. (a) Engvângin nge kan kal chak dân tûr fing taka insiam chu a pawimawh? (b) Engvângin nge thiltum kan insiamnaah kan nunnêm ang?

¹⁴ Thui tak intlânsiaknaah chuan intlânsiak mi chuan a kal chak dân tûr fing takin a insiam ngei tûr a ni. New York Runner magazine chuan: “A ṭannaa tlân chak nghâlna chuan a hlawhchhamtîr thei ang che. A rahchhuah awm thei chu, a tâwp lam mêl engemaw zât chu harsa taka tlân emaw, kawng laka tâwp san emaw a ni thei,” a ti a. Thui tak intlânsiak ṭhîn mi pakhat chuan: “Intlânsiak tûra inpuahchahna zirtîrnaa ka telnaah thusawitu chuan fiah takin: ‘Tlân chak zâwkte chu ûm suh u. In tlân chak theih dân tâwkin tlân zâwk rawh u. Chutilochuan, in chau lutuk ang a, kawng lakah in tâwp dah ang e,’ a ti a. A thurâwn pawisakna chuan a tâwp thlenga tlân tûrin min ṭanpui a ni,” tih a sawi chhuak a ni.

¹⁵ Nunna atâna intlânsiaknaah chuan Pathian chhiahhlawhte chuan an bei hrâm hrâm tûr a ni. (Luka 13:24) Amaherawhchu zirtîr Jakoba chuan: “Chung lam aṭanga finna lo chhuak erawh chu . . . a nunnêm a,” tiin a ziak a. (Jakoba 3:17) Mi dangte entîr siam ṭha takte chuan ṭhahnemngai tûra min fuih laiin, nunnêmna chuan kan theihnate leh kan dinhmunte nêna inrem thiltum dik siam tûrin min ṭanpui ang. Pathian lehkha thu chuan: “Mi tinin mahni thiltih fiah ṭheuh zâwk rawh se, chu mi hunah chuan mi dang chung ni lovin, mahni chung chauhvah chhuan tûr a nei ang. Mi tinin mahni phur an phur ṭheuh dâwn si a,” tiin min hriatnawntîr a ni.—Galatia 6:4, 5.

16. Kan kal chak dân tûr insiamnaah engtin nge inngaihtlâwmna chuan min ṭanpui?

¹⁶ Mika 6:8-ah chuan he zawhna ngaihtuahna la tak hi zawh kan ni: “LALPAN a phût che chu eng nge ni? . . . Pathian nêna thuhnuairawlh [“inngaitlâwm,” NW] taka lên dun a ni lo vem ni?” tih chu. Inngaihtlâwmnaah chuan kan theih chin hriatna hi a tel a ni. Hrisêl lohna leh kum upatna chuan Pathian rawngbâwlnaa kan tih theih thilah chintâwk a siam em? I lunghnual lo vang u. Jehova chuan ‘kan neih loh pui ni lovin, kan neih angzia zêla’ kan beihna leh kan inpêkna chu a pawm a ni.—2 Korinth 8:12. Luka 21:1-4, khaikhin rawh.

Lâwmman chu Thlîr Reng Rawh

17, 18. Eng thlîrna hian nge Isua chu nghaisakna ban tuar tûra chhel tûrin ṭanpui?

¹⁷ Nunna atâna intlânsiaknaah chhelna a ṭûlzia Korinth Kristiante a kawhhmuhnaah, Paula chuan an ngaihsak phu Isthmian infiamna hmêlhmang dang a sawi bawk a. Chu infiamnaa telte chungchâng chu Paula chuan: “Anni zawngin lallukhum chhe thei hmu tûrin an bei a, keini erawh chuan lallukhum chhe thei lo hmu tûrin. Chutichuan tiam chin lam panin ka tlân ngat ngat a ni, boruak mai hnek lovin mahni ka inhnek zâwk ṭhîn a,” tiin a ziak a ni. (1 Korinth 9:25, 26) Hmân lai infiamnaa hnehtu-in a dawn lâwmman chu lallukhum, a nih loh leh pangpâr ṭhi, fâr thing hnaha siam emaw thil danga siam emaw a ni a, a nih loh leh pardi chi khata siam a ni—“lallukhum chhe thei” a ni tak zet mai. Mahse, a tâwp thlenga chhel Kristiante chu eng lâwmmanin nge nghâk?

¹⁸ Kan entawn tûr, Isua Krista chungchâng chu sawiin, Paula chuan: “Ani chuan a hmaa hlimna awm avâng chuan mualphona chu ngaihêpin [nghaisakna ban] chu a tuar a, Pathian lalṭhutphah ding lamah khian a han ṭhu ta a,” tiin a ziak a. (Hebrai 12:1, 2) Isua chuan nghaisakna ban piah lama a lâwmman chu a thlîr a, a hring nun tâwp thlengin a chhel a ni. Chu a lâwmman thlîrte zîngah chuan Jehova hming tihthianghlimnaa chanvo a neihvena avânga hlimna te, mihringte thihna ata a chhanchhuahna avânga hlimna te, leh mihring thuâwihte chu lei paradis-a tâwp nei lo nuna a din thar ruala Lal leh Puithiam Lal anga a awpna tûr te a tel a ni.—Matthaia 6:9, 10; 20:28; Hebrai 7:23-26.

19. Kristian zirtîr nihna kawng kan ûm laiin, eng nge kan thlîr reng ang?

¹⁹ Kristian zirtir nihna kawng kan ûm avânga kan hmaa hlimna awm chu ngaihtuah rawh. Jehova chuan nasa taka lungâwithlâk hna, Pathian Lalram chanchin ṭha hrilhna leh mi dangte nun chhanhimna Bible hriatna pêkna hna chu min pe a ni. (Matthaia 28:19, 20) Pathian dika tuina neite hmuh leh nunna atâna intlânsiaknaa lût tûra tuemaw ṭanpui chu a va nuam êm! Tin, thu kan va hrilhte chhân lêt dân chu engpawh nise, Jehova hming tihthianghlimna hnaa kan telve theihna chu chanvo hlu a ni. Kan rawngbâwlna biala mite ngaihsak lohna emaw, dodâlna emaw tâwk nachunga kan chhelin, Jehova thinlung tihlâwmna avânga hlimna chu kan nei a ni. (Thufingte 27:11) Tin, kan tâna a thutiam ropui tak chu chatuan nunna a ni. A va hlimawm dâwn êm! Hêng malsâwmnate thlîr reng a, intlânsiaknaa kan tlân ṭalh a ngai a ni.

Tâwpna a Hnaih Rualin

20. Tâwpna a hnaih zual avângin engtin nge nunna atâna intlânsiakna a harsat zual theih?

²⁰ Nunna atâna intlânsiaknaah chuan, kan hmêlma lian ber, Diabol-Setana chu kan khin a ngai a. Tâwpna kan hnaih rualin, ani chuan min tihtlûk emaw, min inthlahdultîr emaw chu a tum char char a ni. (Thu Puan 12:12, 17) “Tâwpna hun” chhinchhiahna thilthleng: indonate, ṭâmte, hrilêngte, leh harsatna dang dangte kan thlîrin rinawm taka inpumpêk Lalram thupuangtu nih reng chu a awlsam lo. (Daniela 12:4; Matthaia 24:3-14; Luka 21:11; 2 Timothea 3:1-5) Chu bâkah, tâwpna chu kan rin aia hla zâwk anga a lan châng a awm thei a ni; a bîk takin intlânsiaknaah kum sâwmbi engemaw zât i lo tel tawh a nih chuan. Chutichung pawhin, Pathian Thu thianghlim chuan tâwpna chu a lo thleng ang tih min tiam a ni. Jehova chuan a tlai lo vang tih min hrilh a. Chu tâwpna chu hmuh phâkah a awm reng a ni.—Habakuka 2:3; 2 Petera 3:9, 10.

21. (a) Nunna atâna kan intlânsiak chhunzawm zêlin, engin nge min thuam nghet ang? (b) Tâwpna a hnaih rualin, eng nge kan tumruhna nghet tak tûr chu?

²¹ Tichuan, nunna atâna intlânsiaknaa hlawhtling tûr chuan kan thlarau lam mamawh phuhrûk nâna Jehova hmangaih châwmnate aṭangin chakna kan hmu tûr a ni. Intlânsiaknaa tlân ve kan rinpuite nêna inkawmna aṭanga kan neih theih fuihna zawng zawng pawh kan mamawh bawk. Tihduhdahna nasa tak leh hmuh lâwk loh thil thleng chi hrang hrangin kawng lakah min tlâkbuak mah se, a tâwp thlengin kan chhel thei a ni: Jehova chuan ‘thiltihtheihna nasa tak’ min pêk avângin. (2 Korinth 4:7) Jehova’n hneh taka a tâwp thleng tûrin min duh a ni tih hriat chu a va thlamuanthlâk êm! Tum ruhna nghet tak nên “kan inthlahdah loh zawngin a hun takah chuan kan seng dâwn” tih ring nghet tlatin, “kan hmaa intlânsiakna tûr awmah hian chhel takin i tlân zêl ang u.”—Galatia 6:9; Hebrai 12:1, 2.

[Footnote-te]

I Hre Chhuak Em?

◻ Engvângin nge a tâwp thlengin kan chhel ang?

◻ Jehova hnên ata eng châwmna nge kan ngaihthah loh vang?

◻ Engvângin nge kan kal chak dân tûr fing taka insiam hi a pawimawh?

◻ Intlânsiaknaa kan tlân chhunzawm zêlin, eng hlimna nge kan hmaa dah a nih?

[Phêk 18-naa milem]

Kristian inkhâwmte aṭangin fuihna hmu ang che