ZIRTIRAHTE SIAM RAWH
ZIRLAI 11
Hriatthiam Awlsam Tak
Thu bul: “Ṭawng hriat awla in sawi loh chuan eng thu nge in sawi engtin nge a hriat theih ang?” —1 Kor. 14:9.
Isua Tih Dân
1. VIDEO chu en la, a nih loh leh Matthaia 6:25-27 chhiar rawh. Chumi hnuah, a hnuaia zawhnate hi ngaihtuah ang che:
Engtin nge Isua chuan Jehova’n min ngaihsak tih min hrilhfiah?
Isua’n sava chanchin tam tak hre mah se, hriatthiam awlsam tak eng thu nge min hrilh? Engvângin nge chu chu zirtîr dân ṭha tak a nih?
Isua Hnên Aṭangin Eng Nge Kan Zir?
2. Hriatthiam awlsam taka kan zirtîr hian, mite chuan kan thu zirtîrte chu an hre reng ang a, an thinlung kan thlen thei bawk ang.
Isua Entawn Rawh
3. Ṭawng tam lutuk suh. Thu pakhat in zir hunah, i hriat zawng zawng hrilh vek aiin, zirlaia târ lan thute chauh chu ngaihven ang che. Zawhna i zawh hnuah, a chhânna chu dawhthei takin nghâk la. A chhâng thei lo emaw, Bible zirtîrna nêna inkalh ngaih dânte a sawi emaw a nih chuan, in sawiho mêk thute hre thiam tûrin zawhna dangte zawh belh ang che. I Bible zirpuiin thu pawimawh lai a hriatthiam tawh chuan, a dawtah kal ang che.
4. I Bible zirpui chu a hriatthiam sa thute ṭanchhanin thil tharte hre thiam tûrin ṭanpui rawh. Entîr nân, thawhlehna chungchâng in zir ṭan hmain, mitthite dinhmun chungchânga i Bible zirpui lo zir tawhte chu tâwi têin i ennawnpui hmasa thei ang.
5. Tehkhin thute chu fîmkhur takin hmang rawh. Tehkhin thu i hman hmain, heti hian inzâwt ang che:
‘Hei hi tehkhin thu pângngai tak a ni em?’
‘Ka Bible zirpui hian a hre thiam nghâl thei ang em?’
‘Chu chuan a tehkhin thu chauh ni lovin, a thu pawimawh laite hre thiam tûrin a ṭanpui ang em?’