ZIRLAI 56
Kohhranah Inpumkhatna Vawng Rawh
Kan Kristian unaute zînga kan awm hian, Lal Davida’n: “Unaute inngeih dial diala awm khâwm hi a va ṭhain, a va nuam êm!” tia a sawi hi kan ṭâwmpui a ni. (Sâm 133:1) Kan inpumkhatna hi lo awm palh mai a ni lo va. Chumi awmtîr reng tûr chuan mawhphurhna kan nei ṭheuh a ni.
1. Pathian mite zînga thil chhinchhiah tlâk tak chu eng nge ni?
Ram danga kohhran inkhâwma i va tel chuan, an ṭawng chu i hre thiam lo pawh a ni thei; mahse, kawng tam takin tlângnêl nia inhriatna i nei ang. Engvângin nge? A chhan chu hmun tinah thu leh hla chhuah thuhmun hmanga Bible kan zir vâng a ni. Chu bâkah, hmangaihna inlantîr tawn kan tum a. Khawi hmunah pawh chêng ila, kan za hian ‘Jehova hming lamin, thu khat vuain a rawng kan bâwl’ a ni.—Zephania 3:9.
2. Inpumkhatna awmtîr tûrin eng nge i tih theih?
“Ṭhahnem ngai takin inhmangaih tawn rawh u.” (1 Petera 1:22) He fuihna hi engtin nge i nunpui theih? Mi dangte ṭhat famkim lohna ni lovin, an mize ṭhate ngaihtuah tlat rawh. In tui zâwng inang mite chauh kâwm lovin, ṭo bul hrang hrang nei unaute chu hriat chian tum zâwk rawh. Kan neih rûk mai theih inpâwng huatna rilru eng pawh chu paihbo tûrin theih tâwp kan chhuah bawk tûr a ni.—1 Petera 2:17 chhiar rawh.a
3. Kristian unau nêna thu inhmuh lohna in neih hunah eng nge i tih ang?
Kan inpumkhat a; mahse, ṭha famkim kan ni lo. A châng chuan kan intilungni lovin, kan intina tawn hial pawh a ni thei a. Chuvângin, Pathian Thu chuan heti hian min hrilh a ni: “Inngaidam tawn ula,” tia a sawi hnuah, heti hian a sawi belh a ni: “Lalpa chuan a ngaidam che u ang tak khân ngaidam ve rawh u,” tiin. (Kolossa 3:13 chhiar rawh.) Pathian Jehova rilru vawi tam tak tina mah ila, ani chuan min ngaidam ṭhîn. Chuvângin, kan unaute ngaidam ve tûrin min beisei a ni. Tuemaw rilru i tina tih i hriat chhuah chuan buaina chingfel tûrin hma la rawh.—Matthaia 5:23, 24 chhiar rawh.b
ZIR BELHIN HMUH BELH RAWH
Kohhranah inpumkhatna leh remna i awmtîr theih dân kawngte chu zawng rawh.
Remna siam tûrin eng nge i tih ang?
4. Inpâwng huatna hneh rawh
Kan unau zawng zawngte hmangaih chu kan duh a. Mahse, kan mize milpui loh tuemaw chu pawm harsa kan ti mai thei. Engin nge min ṭanpui thei? Tirhkohte 10:34, 35 chhiarin, hêng zawhnate hi sawiho vang che u:
Jehova chuan a Thuhretu ni tûrin mi zawng zawng a pawm a. Chu chuan ṭobul hrang hrang nei mi dangte i thlîr dân chu engtin nge a nghawng ang?
In chhehvêla hluar eng ang inpâwnghuatna nge pumpelh i duh?
Korinth thawn hnih 6:11-13 chhiarin, he zawhna hi sawiho vang che u:
Ṭobul hrang hrang nei unaute chu engtin nge i hnaih lehzual theih i rin?
5. Ngaihdam peih la, remna siam rawh
Jehova chuan kan ngaihdamna a mamawh ngai dâwn lo va; mahse, min ngaidam ṭhîn. Sâm 86:5 chhiarin, hêng zawhnate hi sawiho vang che u:
Jehova ngaihdamna chu eng ang khawpa ropui nge a nih?
Engvângin nge a ngaihdamna avânga i lâwm?
Eng dinhmunte’n nge kan tân mi dangte nêna inrem taka awm tiharsa thei?
Engtin nge Jehova kan entawn theih a, unaute nêna kan inpumkhat reng theih? Thufingte 19:11 chhiarin, he zawhna hi sawiho vang che u:
Tuemawin a tilungni lo che emaw, a tithinur che emaw a nih chuan, dinhmun siam ṭha tûrin eng nge i tih theih?
A châng chuan mi dangte kan tithinur thei a. Chutiang thil a thlen hunah eng nge kan tih ang? VIDEO chu chhuah la, a hnuaia zawhna hi sawiho vang che u.
Video-ah khân, unaunu chuan remna siam tûrin eng nge a tih?
6. I unaute ṭhatna zawng rawh
Kan unaute kan hriat chian lehzual hian an chakna leh an chak lohnate pawh kan hria a. Engtin nge an chakna lai chu kan ngaihven tlat theih? VIDEO chu chhuah la, a hnuaia zawhna hi sawiho vang che u.
Engin nge i unaute mize ṭha hmu tûra ṭanpui thei che?
Jehova chuan kan mize ṭhate a thlîr tlat a. Chronicles pahnihna 16:9a chhiarin, he zawhna hi sawiho vang che u:
Jehova’n i mize ṭhate a thlîr tlat a ni tih hriatna chuan engtin nge a awmtîr che?
Lunghlu mawi tak pawhin hmêlhemna lai a nei a; mahse, a hlu tho a ni. Chutiang bawkin, kan unau zawng zawngte chu an ṭha famkim lo va; mahse, Jehova tân an hlu vek tho a ni
MI ṬHENKHAT SAWI DAN: “Ka mi ngaihdam tûr chuan, ngaihdam a phû tûr a ni.”
Engvângin nge mi dangte ngaihdam kan châk ang?
KHAIKHAWMNA
Unau zawng zawngte ngaidam a, an chunga hmangaihna lantîrna hmangin kohhranah inpumkhatna awm reng tûrin i ṭanpui thei a ni.
Ennawnna
Engtin nge inpâwnghuatna chu i hneh theih?
Kristian unau nêna thu inhmuh lohna in neih chuan eng nge in tih ang?
Engvângin nge mi dangte ngaihdamna kawnga Jehova entawn tûr siam chu zui i duh?
HRIAT BELH NAN
Mi dangte sawisêl lo tûra min ṭanpui theitu Isua tehkhin thu zînga pakhat en rawh.
Thil tisual nia kan inhriat loh chuan, ngaihdam dîl a ngai tho vem?
“Ngaihdam Dîlna—Remna Siam Nâna Thil Pawimawh Tak” (Vênnainsâng thuziak)
Mi ṭhenkhatin inthliar hranna awm lova mi dangte cheibâwl an zir dân chu en rawh.
Mi mal inhmuh thiam lohnain kohhrana remna a tihchhiat hmaa i chinfel theih dân ngaihtuah rawh.
“Inrem Lohna Chu Hmangaihnain Chingfel Rawh U” (Vênnainsâng, May 2016)
a Endnote 6 hmangaihnain Kristiante chu inkaichhâwn theih natna theh darh lo tûra a chêttîr dân ngaihtuah rawh.
b Endnote 7-na chuan sumdâwnna leh dân lam thila buaina chinfel dân a sawi a ni.