ZIRLAI 14
Engtin Nge Pathian Chu A Lâwm Zâwngin Kan Biak Theih Ang?
Zirlai hmasaa kan sawiho tawh angin, sakhua zawng zawng hian Pathian an tilâwm vek lo va. Mahse, min Siamtu chu a lâwm zâwngin kan be thei a ni. Amah tilâwmtu “sakhaw biak dân,” a nih loh leh sakhua chu eng nge ni? (Jakoba 1:27) Bible zirtîrnate hi lo ngaihtuah ta ila.
1. Kan biakna chu engah nge a innghah ang?
Kan biakna chu Bible-ah a innghat tûr a ni a. Isua’n Pathian hnênah: “I thu chu thutak a ni,” tiin a sawi a ni. (Johana 17:17) Sakhaw ṭhenkhat chuan thlarauva thâwk khum Pathian Thu, Bible-a thutakte chu an hnâwl a. Chûngte chu mihring zirtîrnate leh thurochhiahtein an thlâk a ni. Mahse, Jehova chuan ‘Pathian thupêk duh lotute’ chu a lâwm lo. (Marka 7:9 chhiar rawh.) Kawng leh lamah chuan, amah kan biaknaa Bible kan ṭanchhan a, a thurâwnte kan nunpui hian, a thinlung kan tilâwm a ni.
2. Engtin nge Jehova kan biak ang?
Jehova chu min Siamtu a nih avângin amah chauh kan be tûr a ni a. (Thu Puan 4:10, 11) Chumi awmzia chu amah kan hmangaihin, milem te, milim te, leh chhinchhiahnate tel lovin amah chauh kan be tûr tihna a ni.—Isaia 42:8 chhiar rawh.
Kan biakna chu Jehova tâna ‘thianghlim leh lawm tlâk’ a ni tûr a ni a. (Rom 12:1) Chumi awmzia chu nungchang lama a tehnate mila kan nun a ngai tihna a ni. Entîr nân, Jehova hmangaihtute chuan inneihna chungchânga a tehnate chu an ngainain an zâwm a. Anni chuan vaihlo hman te, damdawi leh zu hman sualnate ang chî thil chîn ṭha lote chu an hnâwl a ni.a
3. Engvângin nge kan Kristian unaute ruala Jehova kan biak ang?
Chawlhkâr tina kan inkhâwmte chuan ‘inkhâwmnaah Jehova fak’ theihna hun remchâng min pe a. (Sâm 111:1, 2) Chutianga kan tih theih dân kawng khat chu Pathian faka zai hi a ni. (Sâm 104:33 chhiar rawh.) Jehova chuan min hmangaih vâng leh inkhâwma telna chuan chatuana hlim tûrin min ṭanpui dâwn tih a hriat avângin tel ziah tûrin min ti a. Infuih tawn tûra kan inhmuh khâwm hian keimahni ngei pawhin kan hlâwkpui a ni.
ZIR BELHIN HMUH BELH RAWH
Jehova’n amah biaknaah milem hman a duh loh chhan bih chiang la. Pathian kan chawimawi theih dân kawng pawimawh takte zir ang che.
4. Pathian biaknaah milemte kan hmang tûr a ni lo
Engtin nge Pathian biaknaa milemte hmanna chuan amah a tilâwm dâwn lo tih kan hriat? VIDEO chu chhuah la, a hnuaia zawhna hi sawiho vang che u.
Bible hun laia Pathian mi ṭhenkhatin milem hmanga amah biak an tum khân, eng thil nge thleng?
Mi ṭhenkhat chuan an biaknaah milem hmangin Pathian hnaih lehzual an tum a. Mahse, chu chuan amah a hlattîr zâwk mah em? Exodus 20:4-6 leh Sâm 106:35, 36 chhiarin, hêng zawhnate hi sawiho vang che u:
Pathian biaknaa mite thil hman engte nge i hmuh tawh?
Engtin nge Jehova’n biaknaa milemte hman chu a ngaih?
Engtin nge milemte hman chu i ngaih?
5. Jehova chauh biakna chuan ngaih dân dik lote lakah min chhuah zalên
A pawm tlâka Jehova biakna chuan ngaih dân dik lote laka min chhuah zalen theih dân en ang che. VIDEO chu chhuah rawh.
Sâm 91:14 chhiarin, he zawhna hi sawiho vang che u:
Jehova chuan amah chauh biakna hmanga kan hmangaihna kan târ lan hian eng nge tihsak min tiam?
6. Kohhran inkhâwmahte Pathian kan bia
Kohhran inkhâwmahte hian hlate saa chhânnate pein, Jehova kan chawimawiin kan intichak tawn a ni. Sâm 22:22 chhiarin, hêng zawhnate hi sawiho vang che u:
Inkhâwmnaa mi dangte chhânna pêk ngaihthlâk chu nuam i ti em?
Chhânna pe tûra inbuatsaih chu i duh ang em?
7. Kan thuzirte mite hnêna kan hrilh chhâwn hian Jehova chu a lâwm
Mi dangte hnêna Bible thutak kan hrilh theih dân kawng tam tak a awm a. Sâm 9:1 leh 34:1 chhiarin, he zawhna hi sawiho vang che u:
Bible aṭanga i thu zir, mi tuemaw hnêna hrilh chhâwn i duh chu eng nge ni?
MI ṬHENKHAT SAWI DAN: “Pathian tihlâwm chu thil theih a ni lo.”
Eng nge i ngaih dân?
KHAIKHAWMNA
Min Siamtu chu amah chauh kan biak a, kohhran inkhâwma amah kan chawimawi a, kan thuzirte mi dang hnêna kan hrilh chhâwn hian kan tilâwm.
Ennawnna
Engtin nge a pawm zâwnga Pathian biak dân kan zir theih?
Engvângin nge Jehova chauh kan biak ang?
Engvângin nge amah tihlâwm duhtute ruala Pathian kan biak ang?
HRIAT BELH NAN
“Milem bâwih ka ni tawh lo” tih nun kawng chanchinah nu pakhatin milem biak a bânsan dân chhiar ang che.
Kohhran inkhâwmtea chhânna pe tûra ṭanpui theitu che thuziak chhiar rawh.
“Kohhran Inkhâwmah Jehova Fak Rawh” (Vênnainsâng, January 2019)
Ṭhalai pakhatin a harsa hle chung pawha, kohhran inkhâwma tel a hlâwkpui dân en rawh.
Mi tam tak chuan Kross chu Kristianna nêna inzawm tlat niin an ngai a; mahse, chu chu Pathian biaknaah kan hmang tûr a ni em?
“Engvângin Nge Jehova Thuhretute’n An Biaknaah Kross An Hman Loh?” (Website thuziak)
a Hêng thute hi zirlai dangah sawiho a ni ang.