ZIRLAI 13
Sakhaw Dik Lovin Pathian Hming A Tihchhiat Dân
Pathian chu hmangaihna a nih si chuan, engvângin nge sakhuate hian Pathian hminga thil sual râpthlâk takte an tih? A awlsam zâwnga sawi chuan, hêngte hi sakhaw dik lo an ni a, an ṭawngkam leh thiltihin Pathian hming an tichhia a ni. Engtin nge an tihchhiat? Chu chu Pathianin engtin nge a ngaih? Chumi chungchângah eng nge a tih ang?
1. Engtin nge sakhaw dik lovin a zirtîrnate hmanga Pathian hming a tihchhiat?
Sakhaw dik lo chuan ‘Pathian thutak chu dâwtah’ a chantîr a. (Rom 1:25) Entîr nân, sakhaw tam zâwkte chuan an mite chu Pathian hming an zirtîr lo va. Mahse, Bible chuan Pathian hming chu hman ngei tûr niin a sawi. (Rom 10:13, 14) Sakhaw hruaitu ṭhenkhat chuan thil ṭha lo a lo thlen hian Pathian remruat niin an sawi ṭhîn a. Mahse, chu chu dâwt a ni. Pathianin engtik lai mahin thil sual a thlentîr ngai lo. (Ṭah Hla 3:33 chhiar rawh.) Lungchhiatthlâk takin, sakhuate thusawi chuan mite chu Pathian a hlattîr a ni.
2. Engtin nge sakhaw dik lovin a thiltihte hmanga Pathian hming a tihchhiat?
Sakhaw dik lo chuan Jehova’n mite a cheibâwl angin a cheibâwl lo va. Bible chuan sakhaw dik lo “sualnate chuan vân pawh a tawng ta hial” tih a sawi. (Thu Puan 18:5) Kum zabi tam tak chhûngin sakhuate chu politics-ah an inrawlh a, indonate an thlâwp bâkah, mi tam takte thihna an thlen, a nih loh leh an remti bawk a ni. Sakhaw hruaitu ṭhenkhat chu nuamsa takin an nung a, an mi leh sate hnênah thawhlâwm an phût a. Hêng an thiltihte hian Pathian hming chawimawi chu sawi loh, a hriat pawh an hre lo tih a târ lang a ni.—1 Johana 4:8 chhiar rawh.
3. Engtin nge Pathianin sakhaw dik lo chu a ngaih?
Sakhaw dik lo thiltihte avânga i thinrim a nih chuan, Pathian Jehova chu eng anga a awm nge i rin? Ani chuan mite chu a hmangaih a; mahse, a hming tichhetu leh dik lo taka an mite cheibâwltu sakhaw hruaitute chungah erawh a thin a rim hle a. Sakhaw dik lo chu tihchhiat a ni ang a, “tumân an hmu leh tawh tawp lo vang” tih min tiam a ni. (Thu Puan 18:21) Nakin lawkah Pathianin sakhaw dik lo zawng zawng a tiboral vek ang.—Thu Puan 18:8.
ZIR BELHIN HMUH BELH RAWH
Sakhaw dik lo chungchânga Pathian ngaih dân bih chiang lehzual rawh. Sakhaw dik lo thiltihte zir belh la; mahse, chu chu Jehova hriat loh phah nâna hman tûr a nih loh chhan zir bawk ang che.
4. Pathianin sakhua zawng zawng a pawm vek lo
Mi tam tak chuan sakhuate chu Pathian hnêna min hruaitu kawng chi hrang hrang angin an ngai a. Mahse, chu chu a dik em? Matthaia 7:13, 14 chhiarin, he zawhna hi sawiho vang che u:
Nunnaa hruaitu kawng chungchângah Bible-in eng nge a sawi?
VIDEO chu chhuah la, a hnuaia zawhna hi sawiho vang che u.
Bible-in Pathian tilâwmtu sakhua tam tak a awm tih a sawi em?
5. Sakhaw dik lo chuan Pathian hmangaihna a lan chhuahtîr lo
Sakhuate chuan Pathian hming chu kawng tam takin an tichhia a. An tihchhiat dân râpthlâk ber chu indonaa an telna hi a ni. Entîrna pakhat hriat nân, VIDEO chu chhuah la. Tichuan, a hnuaia zawhnate hi sawiho vang che u.
Khawvêl indopui pahnihna chhûng khân Kristian sakhuate’n eng nge an tih?
An thiltihte chu engtin nge i ngaih?
Johana 13:34, 35 leh 17:16 chhiar rawh. Tichuan, hêng zawhnate hi sawiho vang che u:
Sakhuate indonaa an inrawlh chu Jehova’n engtin nge a ngaiha i rin?
Sakhaw dik lo chuan thil ṭha lo tam tak tihnaah mawh a phur a. Sakhuate’n Pathian hmangaihna an entawn lohzia chu eng kawngtein nge i hmuh?
Sakhaw dik lo chuan Pathian hmangaihna a lan chhuahtîr lo
6. Pathianin mite chu sakhaw dik lo chhuahsan tûrin a duh
Thu Puan 18:4 chhiarin,a he zawhna hi sawiho vang che u:
Sakhaw dik lovin a hruai sualte Pathianin chhan chhuah a duh tih i hriatna chuan engtin nge a awmtîr che?
7. Pathian dik chungchâng chu zir zawm zêl rawh
Sakhaw dik lovin Pathian i thlîr dân a nghawng tûr a ni em? A pa kaihhruaina fing tak hnâwltu fapa pakhat han mitthla teh. Fapa chuan in chhuahsanin nun kawng ṭha lo a zawh a. A pain a fapa thiltihte chu a pawmpui lo. Engvângin nge a fapa hel hmang nun dân avânga a pa dem chu thil dik a nih loh vang?
Sakhaw dik lo thiltihte avânga Pathian Jehova dem leh a chungchâng zir bânsan chu thil dik a ni ang em?
MI ṬHENKHAT SAWI DAN: “Sakhuate hian harsatna tam tak an thlen avângin Pathian thu ka ngaihven lo.”
Chutiang chuan i ngai ve em?
Engvângin nge sakhaw dik lo thiltihte chuan Jehova kan thlîr dânah nghawng a neih loh vang?
KHAIKHAWMNA
Sakhaw dik lo chuan a zirtîrna dik lo leh a thil chîn râpthlâk takte hmangin Pathian hming a tichhia a. Pathianin sakhaw dik lo a tiboral dâwn.
Ennawnna
Engtin nge sakhaw dik lo zirtîrna leh thiltih dânte chu i ngaih?
Engtin nge Jehova’n sakhaw dik lo chu a ngaih?
Sakhaw dik lo chungah Pathianin eng nge a tih ang?
HRIAT BELH NAN
Sakhaw tam zâwkin Pathian an tihlâwm loh dân kawng hnih chhiar rawh.
“Sakhua Zawng Zawng A Inang Vek Em? Pathian Hnênah Min Hruai Thleng Vek Ang Em?” (Website thuziak)
Engvângin nge Jehova’n mi dangte ruala amah be tûra min duh?
Puithiam pakhat chu a sakhaw vawnin a rilru a tibuai a. Mahse, Pathian dik chungchâng a zirna a bânsan lo.
“Puithiam Pakhatin A Kohhran A Chhuahsan Chhan” (Awake!, February 2015)
Chhuan tam tak chhûng chu sakhuate chuan Pathian chu hnaih theih loh leh nunrâwng tak anga sawiin mite an bum a. Chûng dâwt thu pathumte chungchânga thutak zir ang che.
“Pathian Hmangaih Theih Lohva Siamtu Dâwt Thute” (Vênnainsâng, November 1, 2013)