Pathian Tiam Khawvel Thar
PATHIAN Thu ziak, Bible chuan: “A thutiam ang chuan vân tharte leh lei thar, a chhûnga felna awmte chu kan beisei a ni,” tiin beiseinain min tikhat a ni.—2 Petera 3:13.
“Vân tharte” chu eng nge ni? Bible chuan vân chu rorêlna nên a thlun zawm ṭhîn a. (Tirhkohte 7:49) “Vân tharte” chu leilung awptu tûr sawrkârna thar a ni. A thar a nih chhan chu tûna inawpna ding mêk hi a thlâk vek dâwn vâng a ni a; Pathian thiltum hlen chhuah nâna hma lâkna thar a nih vâng a ni bawk. He Lalram hi a ni, Isua’n dîl tûra min zirtîr chu ni. (Matthaia 6:10) A lo din chhuahna Bul chu Pathian a nih vâng leh Pathian chu vâna awm a nih avângin ‘vân ram’ tia koh a ni.—Matthaia 7:21.
A nih leh, “lei thar” chu eng nge ni ve? Bible-in lei hi chatuana luah tûr a tih tlat avângin, leilung thar sawina chu a ni thei lo. “Lei thar” chu mihring pâwl thar sawina a ni a. Mi suaksual zawng zawngte tihboral vek a nih tawh dâwn avângin a thar a ni dâwn a ni. (Thufingte 2:21, 22) Chuta chêng zawng zawngte chuan Siamtu chawimawiin a thu an âwih ang a, a thil phûtte milin an nung ang. (Sâm 22:27) Chûng thil phûtte chu zir a, chu mi mila tûn la laa nung tûrin hnam tina mite chu sâwm an ni a. Chutiang chuan i nung em?
Pathian khawvêl tharah chuan, mi tinin A rorêlna chu an zah ang. Pathian i hmangaihna chuan a thu zâwm tûrin a chêttîr che em? (1 Johana 5:3) Pathian thu i zawmzia chu i inah te, i hnathawhnaah te, i school-ah te, tûna i nun i hman dânahte hian a lang em?
Chu khawvêl tharah chuan, mihringte chu Pathian dik chibai bûknaah chuan an inpumkhat tawh ang. Lei leh vân Siamtu chu chibai i bûk em? Pathian i biakna chuan hnam tina mi, chi tina mi, leh ṭawng tina mi i chibai bûkpuite nên a inpumkhattîr tak zet che em?—Sâm 86:9, 10; Isaia 2:2-4; Zephania 3:9.
[Phêk 17-naa bâwm]
Hêng Thilte Min Tiamtu Pathian Chu
Ani chu vânte leh Leilung Siamtu a ni a. Isua Krista’n “Pathian tak chauh,” tia a târ lana chu a ni.—Johana 17:3.
Khawvêl mihring tam zâwkte chuan mahni siamchawp pathiante an chawimawi a. Mi maktaduai tam takte chu nunna nei lo milem hmaah an kûn a ni. Mi dangte chuan mihringte din chawp pâwl te, khawvêl hausakna te, a nih loh leh anmahni châkzâwng thilte chu an chawimawi bawk. Bible hmanga inchhâlte tak ngial pawhin, Bible-in “Pathian tak” tia a târ lana hming chu an chawimawi vek chuang lo.—Jeremia 10:10.
Siamtu ngei chuan, ama chungchâng sawiin: “Kei JEHOVA ka ni,” a ti a. (Exodus 6:2) Chu hming chu atîra Bible ziakah chuan vawi 7,000 vêl lai a lang a. Isua Krista pawhin a zirtîrte chu: “Kan Pa vâna mi, i hming zahawm rawh se,” tia ṭawngṭai tûrin a zirtîr a ni.—Matthaia 6:9.
Pathian dik chu eng ang mi nge a nih? Amah ngei chuan “lainatnaa khat, mi khawngaih thei tak, thin nel tak, ngilneihna leh thutak ngah” niin a insawi a; tin, a thupêkte duhrêng vânga bawhchhetute chu hrem lo va chhuah ngai lo niin a insawi bawk. (Exodus 34:6, 7) Chutiang mi a nihzia chu mihringte a dâwr dân chanchin chuan a nemnghet a ni.
A hming leh a hming putu chu thil zahawm, a nih loh leh thil thianghlim anga cheibâwl tûr a ni a. Siamtu leh Lei leh Vâna Lal Chungnungber a nih avângin, a thu kan âwih leh amah chibai kan bûk chu a phu hliah hliah a ni. A nih leh, a thu chu i âwihin, amah chibai i bûk em?
[Phêk 18-naa bâwm/milem]
“Vân Tharte leh Lei Thar” Chuan Eng Nge A Rawn Thlen Dâwn?
Lei hi Paradis-ah a chantîr ang Luka 23:43
Hnam tina mite, chi tina mite, Johana 13:35;
ṭawng tina mite hmangaihnaa inpumkhat Thu Puan 7:9, 10
khawvêl pum huap chhûngkua a siam ang
Khawvêl puma remna, mi zawng zawng Sâm 37:10, 11;
tâna muanna dik a thlen ang Mika 4:3, 4
Hna lungawithlâk tak leh ei tûr Isaia 25:6; 65:17, 21-23
tam tâwk a awmtîr ang
Natna te, lungngaihna te, thihna te Isaia 25:8;
a tibo vang Thu Puan 21:1, 4
Pathian dik biaknaa inpumkhat Thu Puan 15:3, 4
khawvêl a siam ang
[Phêk 19-naa bâwm/milemte]
I Hlâwkpui Ang Em?
Pathianin dâwt a sawi thei lo!—Tita 1:1, 2.
Jehova chuan heti hian a puang a ni: “Ka ka aṭanga thu chhuak chu . . . engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” tiin.—Isaia 55:11.
Jehova chuan “vân tharte leh lei thar” chu a siam dêr tawh a. Vân lam sawrkâr chuan ro a rêl ṭan dêr tawh a ni. “Lei thar” nghahchhan lungphûm pawh phûm a ni daih tawh bawk.
Mihringte tâna ‘vân tharte leh lei tharin’ a rawn thlen tûr thil ropui tak tak ṭhenkhat a sawi hnuah, Thu Puan chuan Lei leh Vâna Lal Chungnungber, Pathian ngei chuan heti hian a sawi tih a târ lang: “Ngai teh, thil engkim ka siam thar e,” tiin. Tin, heti hian a sawi bawk: “Ziak rawh, hêng thu hi a rinawmin a dik si a.”—Thu Puan 21:1, 5.
Zawhna pawimawh tak mai chu, “Vân tharte” hnuaia “lei thar” zînga tel tlâka chhiar kan nih theih nân insiam rem ngai apiang kan insiamrem em? tih chu a ni.