“Rorel Hun” A Lo Thleng Ta

BIBLE bu hnuhnûng ber, Thu Puan bu chuan vântirhkoh vanlaizâwla thlâwkin ‘tlângaupui tûr chatuan chanchin ṭha’ a neih thu min hrilh a. Ani chuan aw ring takin: “A rorêl hun chu a lo thlen tâk avângin Pathian chu hlau ula, chawimawi rawh u,” a ti a. (Thu Puan 14:​6, 7) Chu ‘rorêl hunah’ chuan Pathian rorêlna leh chu mi puan chhuahna a tel ve ve a. Chu chu ‘ni hnuhnûng’ vâwrtâwp a ni a. Tûnah hian chu ni hnuhnûngah chuan kan awm tawh a ni.​—⁠2 Timothea 3:⁠1.

“Rorêl hun” lo thleng chu felna ngainatute tân chuan chanchin ṭha a ni a. Chu hun chu Pathianin he hmangaihna tel lo khawvêl pâwngnêkna tuartu a chhiahhlawhte a tihthawven hun tûr a ni.

Tûnah hian, “rorêl hun” chu he khawvêl kalhmang suaksual tihchhiatna hmanga a tâwp hma hian: “Pathian chu hlau ula, chawimawi rawh u,” tiin fuihna kan dawng a ni. Chutiang chuan i ti em? Chutianga tihnaah chuan, “Pathian ka ring e,” tih mai aia tam a tel a. (Matthaia 7:​21-23; Jakoba 2:​19, 20) Pathian hlauhna dik, amah ṭihna chuan amah zahna min neihtîr tûr a ni a. Sual min hawisantîr tûr a ni. (Thufingte 8:13) Tin, sualna chu hua a, ṭhatna ngaina tûrin min ṭanpui tûr a ni bawk. (Amosa 5:​14, 15) Pathian kan chawimawi chuan, zahna nasa tak lantîr chungin a thu kan awih ang a. A Thu, Bible chhiar hman lo khawpin thil dangah kan buai lutuk lo vang. Amah chu kan thinlung zawng zawngin engtik lai pawhin kan ring tlat reng zâwk ang. (Sâm 62:8; Thufingte 3:​5, 6) Amah chawimawi tak tak tute chuan, ani chu lei leh vân Siamtu, Lei leh Vâna Lal Chungnungber a ni tih an pawm a, an chunga thuneitu Lal Chungnungber a ni tih hriain, a hnênah an intulût thlap a ni. He mi chungchâng hi ngaihsak zual ngai nia kan inhriat chuan, muangchâng lovin i ngaihsak nghâl vat ang u.

Vântirhkohvin a sawi rorêl hun hi “LALPA ni,” tia koh a ni bawk a. Chutiang “ni” chu B.C.E. 607 khân, hmân lai Jerusalem khuaa mite’n zâwlneite hmanga Jehova vaukhânna an ngaih pawimawh loh avângin an lo tawng tawh a ni. An rilrua Jehova nî sawn hlain, an nun chu dinhmun hlauhawm lehzualah an dah a. Jehova chuan, a nî chu: “A hnaiin a thleng thuai dâwn a ni,” tiin a vaukhân a ni. (Zephania 1:14) “LALPA ni” dang chu B.C.E. 539 khân hmân lai Babulon chungah pawh a thleng tawh bawk a. (Isaia 13:​1, 6) An kulh bangte leh an pathiante an rinchhan avângin, Babulon mite chuan Jehova zâwlneite vaukhânna chu an ngaihthah a ni. Mahse, zan khat thil thu-ah Babulon chu Media leh Persia kutah a tlâwm ta a ni.

Eng nge tûn laiah kan hmachhawn? “Lalpa ni” dang leh râpthlâk zâwk chu kan hmachhawn a ni. (2 Petera 3:​11-14) Pathian rorêlna chu “Babulon Khaw Ropui” chungah puan a ni tawh a. Thu Puan 14:8 sawi angin, vântirhkoh chuan: “Babulon khaw ropui . . . chu a tlâwm ta,” tiin a puang a ni. Chu chu a thleng dêr tawh a. Jehova chibai bûktute chu a khuahkhirh reng thei tawh lo. A bawlhhlawhna leh indonaa a inrawlhzia chu nasa taka laihlan vek a ni tawh a. A boral hlen vang vangna tûr chu a hnai tawh hle a ni. Chuvângin, Bible chuan khawvêl hmun tina mite chu: “A sualnaahte in tel lohna tûr leh, a hremnate in hmuh ve lohna tûrin, [Babulon Khaw Ropui] chhûng ata chuak rawh u. A sualnate chuan vân pawh a tawng ta hial a, Pathianin a thiltih fel lote pawh chu a hre reng si a,” tiin a vaukhân a ni.​—⁠Thu Puan 18:​4, 5.

Babulon Khaw Ropui chu eng nge ni? Hmân lai Babulon mizia ang pu khawvêl sakhaw kalhmang hi a ni. (Thu Puan, bung 17, 18) An inanna kawng ṭhenkhat lo ngaihtuah ta ila:

• Hmân lai Babulon sakhaw hruaitute chu politics-ah an inrawlh thui hle a. Tûn laia sakhaw hruaitute pawh chutiang bawkin an inrawlh a ni.

• Babulon sakhaw hruaitute chuan indona an thlâwp fo va. Tûn lai sakhaw hruaitute pawhin indonaa sipaite malsâwmna kawngah hma an hruai fo a ni.

• Hmân lai Babulon zirtîrna leh thil chînte chuan an hnam chu nungchang bawlhhlawhna nasa takah a hruai a. Tûn laia sakhaw hruaitute pawhin nungchang lama Bible tehnate an ngaihthah avângin, sakhaw hruaitute zîngah leh an mi leh sate zîngah nungchang bawlhhlawhna a hluar hle. Thil chhinchhiah tlâk tak mai chu Babulon Khaw Ropui hi khawvêl leh a politics kalhmang laka a inphalrai avângin, Thu Puan buin nawhchizuar tia a koh hi a ni.

• Bible chuan Babulon Khaw Ropui “intihnawmsakzia” pawh a sawi bawk a. Hmân lai Babulon-ah chuan, biak in ruahman pâwl chuan ram zau tak a chang a, sakhaw hruaitute chu sumdâwnna lama mi challang tak an lo ni ṭhîn. Tûn laiah pawh, Babulon Khaw Ropui chuan a biak in hmun mai bâkah, sumdâwnna leh ram zau tak tak a nei a ni. A zirtîrna leh a ni serh hmante chuan a tân leh sumdâwnna khawvêla mite tân hausakna nasa tak a thlen a ni.

• Milem te, aien te, leh dawithiam hman te chu hmân lai Babulon-ah chuan a hluar hle a, tûn lai hmun tam takah pawh a hluar bawk. Thihna chu nun danga lawiluhna anga ngaih a ni a. Babulon chu a pathiante chawimawina biak in leh ṭawngṭaina hmun tein a khat tlat a; mahse, Babulon mite chuan Jehova chibai bûktute chu an do tlat a ni. Chutiang bawk rinna leh thiltihte chu Babulon Khaw Ropui pawhin a ti ve bawk a ni.

Hmân lai chuan, Jehova chuan amah leh a duhzâwngte hmusit lui tlattute hrem nân, politics leh sipai lama chak ramte chu a hmang ṭhîn a. Chuvângin Samari pawh B.C.E. 740 khân Assuria hovin an tichhe vek a. Jerusalem pawh B.C.E. 607 khân Babulon hovin an suam chhe vek a, C.E. 70 khân Rom hovin an tichhe vek bawk a ni. Chutah Babulon ho chu B.C.E. 539 khân Media leh Persia a hnehtîr leh chhâwng a. Kan hunah chuan, sakawlh anga sawi politics sawrkâr chuan, “nawhchizuar” chu a bei ang a, engmah lo leh saruakin a siam ang a, a mizia tak tak a hailang ang a, a tiboral phiar ang.​—⁠Thu Puan 17:16.

Khawvêl sawrkârte hian chutiang chu an ti tak zet ang em? Bible chuan “Pathianin an thinlungah a tîr” dâwn tih a sawi a ni. (Thu Puan 17:17) Chu chu rang tak, mak tak, leh râpthlâk tak a ni ang a, hriat lâwk theih emaw, zawi muang emawin a thleng lo vang.

Eng nge i tih ngai? Hetiang hian inzâwt rawh: ‘Babulon Khaw Ropui nêna inzawmna nei zirtîrna leh thiltihtein a tihkhaw loh sakhaw pâwl chu ka la vuan reng em?’ tiin. Chutiang sakhua i vuan lo a nih pawhin, heti hian inzâwt ang che: ‘Babulon Khaw Ropui rilru put hmang hian min thunun em?’ tiin. Eng ang rilru put hmang nge? Nungchang khawlohna pawmzamna rilru put hmang te, Pathian aia sum leh pai leh nawmsipbâwl hmangaihna rilru put hmang te, a nih loh leh Jehova Thu (thil tê tham takah pawh) ngaih pawimawh loh luihna rilru put hmangte a ni. I chhânna chu ngun takin ngaihtuah ang che.

Jehova duhsakna dawng tûr chuan, kan thiltih leh kan rilru duhzâwngte hmanga Babulon Khaw Ropui zînga mi kan nih loh tak zetzia kan lantîr a ṭûl a. Vuaicha nân hun a awm tawh lo. Tâwpna a lo thlen thut dân tûr sawiin, Bible chuan: “Babulon khaw ropui chu hetianga nasa [“rang,” NW] hian paih thlâk a ni ang a, tuman an hmu leh tawh tawp lo vang,” a ti.​—⁠Thu Puan 18:21.

Chu mai a ni lo. “Rorêl hun” hmêlhmang dangah chuan, Pathian Jehova chuan khawvêl puma politics inawpna leh a hruaitute chungthu chu a rêl ang a; tin, Isua Krista kut hnuaia vân lam Lalram hmanga rorêl tûra Pathian neih dikna hnâwltute chungthu a rêl bawk ang. (Thu Puan 13:​1, 2; 19:​19-21) Zâwlnei inlârna hmuh, Daniela 2:​20-45-a chhinchhiah chuan hmân lai Babulon hun aṭanga tûn thlenga politics hruaitute chu rangkachak te, tangkarua te, dâr te, thir te, leh bellei tea siam milim hrawl tak angin a târ lang a. Kan hun chungchângah hrilh lâwkna thu chuan heti hian a sawi lâwk a ni: “Vân Pathianin ram a rawn din ang a, chu chu a chhe ngai tawh lo vang,” tiin. Tin, Jehova “rorêl hun” chhûnga Lalramin a tih tûr chungchângah Bible chuan: “Hêng [mihring din] ram zawng zawngte hi a tikeh sawmin a tiral zâwk ang a, kumkhuain a ding reng ang,” tih a puang a ni.​—⁠Daniela 2:44.

Bible chuan Pathian chibai bûktu dik takte chu “khawvêla thil awm zawng zawng”​—⁠Pathian dik laka inla hrang he khawvêl nun dân zawng zawngte chu hmangaih lo tûrin a vaukhân a ni. (1 Johana 2:​15-17) I thu tlûkna siam leh i thiltihte chuan Pathian Ram i ṭan tlat tih a târ lang em? Pathian Ram chu i nunah i dah hmasa ber tak zet em?​—⁠Matthaia 6:33; Johana 17:​16, 17.

[Phêk 14-naa bâwm]

Engtikah Nge Tâwpna A Lo Thlen Ang?

“In rin loh hunah Mihring Fapa a lo kal dâwn si a.”​—⁠Matthaia 24:44.

“Ngaihven rawh u, a nî leh a hun chu in hre si lo va.”​—⁠Matthaia 25:13.

“A tlai . . . lo vang.”​—⁠Habakuka 2:⁠3.

[Phêk 14-naa bâwm]

A Hun Hre Ta La, I Danglam Phah Ang Em?

Pathian rorêlna lo thleng mai tûr hi kum engemaw zâtin a la rial dâwn tih hre chiang ta la, chu chuan tûna i nun i hman dân a thlâk danglam ang em? He khawvêl tâwpna hi i beisei aiin lo thleng tlai ta se, chu chu Jehova rawngbâwlnaa vuaicha nân i hman phah ang em?​—⁠Hebrai 10:​36-38.

A hun dik tak kan hriat lohna chuan rilru dik tak pua Pathian rawngbâwl kan nihzia târ lan theihna hun ṭha tak min pe a. Jehova hre chiangtute chuan, a dâwn ṭêpa ṭhahnemngaihnain thinlung enfiahtu Pathian rilru a khawih dâwn lo tih an hria a ni.​—⁠Jeremia 17:10; Hebrai 4:13.

Jehova hmangaih tak taktute chuan, ani chu an nunah an dah pawimawh ber fo a ni. Mi dangte ang bawkin, Kristian dikte chuan ei zawn nân hna an thawk ve a. Amaherawhchu, an tum ber chu hausak ni lovin, ei leh bâr silh leh fên mamawh tâwk neih nân leh mi dangte hnêna sem tûr engemaw neih theih nân a ni zâwk a. (Ephesi 4:28; 1 Timothea 6:​7-12) Tin, intihhlimna ṭha leh chawlh lâk lawkte pawh an ti ve a; mahse, an duh chu mi dangte tih ang tih ve ni lovin, chawlh hahdam a, intihharhfîm chu a ni. (Marka 6:31; Rom 12:⁠2) Isua Krista ang bawkin, Pathian duhzâwng tih chu an lâwmzâwng tak a ni.​—⁠Sâm 37:4; 40:⁠8.

Kristian dikte chuan chatuana nunga Jehova rawngbâwl chu an duh a. Chu mi beiseina dawng tûra ṭhenkhat rin aia rei an nghah a ngaih pawhin, chu an beisei chuan a hlutna a hloh ṭhen chuang lo.

[Phêk 15-naa bâwm/milem]

Lal Chungnunna Thu Buai

Pathianin hrehawm tawrhna tam tak awm a phal chhan hre thiam tûr chuan, lal chungnunna thu buai hi kan hriatthiam a ngai a. Eng nge lal chungnunna chu? Chu chu thuneihna sâng ber a ni.

Siamtu a nih avângin, Jehova chuan lei leh a chhûnga chêng zawng zawngte chunga rorêl tûrin dikna a nei a. Mahse, Bible chuan mihring chanchin inṭannaah khân, Jehova lal chungnunnain chona a tawh thu min hrilh a ni. Diabol-Setana chuan Jehova chu mi khuahkhirh hmang tak, kan nu leh pa hmasa berte hnêna Pathian dânte ngaihthaha anmahni thu thua thil an tih rah chhuah tûr chungchânga dâwt sawitu niin a puh a; tin, Pathian tel lova mahnia ro an inrêl chu an tâna a ṭhat zâwk tûr thu a hrilh bawk a ni.​—⁠Genesis, bung 2, 3.

Pathianin chu hel hmangte chu tiboral nghâl se chuan, chu chuan a thiltihtheihna a lantîr ang a, a puhnate erawh chu a chingfel dâwn lo a ni. Jehova chuan hel hmangte chu tihlum nghâl mai lovin, helna rah chhuahte chu a thil siam finna neite a hmuhtîr zet a. Chu chuan hrehawm tawrhna awmtîr mah se, kan tân pian theihna hun remchâng ṭha min pe a ni.

Chu bâkah, Jehova chuan a thu âwihtute leh a Fapa tlanna inthawina ringtute chu sualna leh a rah chhuah aṭanga zalên a, Paradis-a nun an chen theih nân inpêkna nasa tak ngai ruahmanna a siam bawk a. Chu Paradis-a nun chu a ṭûl chuan thihna ata kaihthawh lehna hmang pawhin a ni thei a ni.

Chu thu buai chinfel nâna hun pêkna chuan Pathian chhiahhlawhte chu Pathian hmangaihna an chhân lêt theihzia leh eng dinhmun pawha Jehova laka an rinawmzia târ lanna hun remchâng a pe bawk a ni. Pathian lal chungnunna thu buai leh chu mi nêna inkûngkaih mihringte rinawmna chungchâng thu buai chinfel chu lei leh vânah dân zahna dik tak a awm theih nân a pawimawh hle. Chu mi tel lo chuan, remna dik chu neih theih rual a ni lo vang.a

[Footnote]

[Milem]

Khawvêl puma politics rorêlna hi a tâwp dâwn