I Nun Hian Khawi Lam Nge A Pan?

• Mi tam tak chuan nî tin nuna an buai êm avângin an nunin a pan lam pawh an ngaihtuah hman lo.

• Bible chuan kan hma lawka thil ropui tak lo thleng tûr chungchâng min hrilh a. Mihring pâwl dinte hi khawvêl puma thlâkthleng thut a nih tûr thu pawh min hrilh lâwk bawk a ni. Bible hrilh lâwknate hlâwkpui tûr leh chhiatna lo thleng tûrte pumpelh tûr chuan, hma kan lâk nghâl vat a ngai a ni.

• Bible thusawite hria a, nunpui tum zet si a, dam chhûng lungkhamnate avânga tawlh bo leh ta mi ṭhenkhat an awm a ni.

• I nunin a pan lam chuan i lung a tiawi em? Thil engemaw tih i tum hian, i nuna kumkhaw thiltum i neihte a nghawng dân tûr chu i ngaihtuah em?

[Phêk 9-naa bâwm/milemte]

Eng Nge I Ngaih Pawimawh Ber?

Engtin nge a hnuaia târ lante hlutna hi i bituk ang? I ngaih pawimawh dân indawtin number pe teh.

Hêng zînga tam tak hian nunah hmun inâwm tak a chang ṭheuh va; mahse, thlang dâwn ta la, eng nge i dah pawimawh ber ang? a dawtah eng nge i dah ang? chutiang zêl chuan ti thla rawh le.

․․․ Intihhlimna/infiamna

․․․ Ka hna emaw, ka eizawnna emaw

․․․ Ka hrisêlna

․․․ Mahni hlimna

․․․ Ka kawppui

․․․ Ka nu leh pate

․․․ Ka fate

․․․ In ṭha, thawmhnaw ṭha

․․․ Thiltih apianga tiṭha ber nih

․․․ Pathian chibai bûk

[Phêk 10, 11-naa bâwm]

I Duhthlante Chuan I Kal Duhna Takah A Hruai Che Em?

HENG ZAWHNATE HI NGAIHTUAH TEH

INTIHHLIMNA/INFIAMNA: Ka infiamna thlan chuan min tihahdam em? Ka hrisêlna atâna hlauhawm thei chi emaw, rual ban lova min siam kumkhua thei chi emaw a tel em? Chu chu dârkâr rei lo tê chhûng chauh “hlimna” min pe a, a hnua rei tak min tihrehawm thei chi a ni em? Ka intihhlimna thlan chu ṭha tak pawh ni se, thil pawimawh zâwk min ngaihthahtîr thei khawpin hun ka hmang tam lutuk em?

KA HNA EMAW, KA EIZAWNNA EMAW: Chu chu ka mamawh phuhrûk nân a ni em? Nge, a bawiah ka tâng zawk? Ka hrisêlnain a tlin loh khawpa thawhrim ngai a ni em? Ka hnaah thawh hun tûr bituk aia tam ka thawk dâwn nge, ka kawppui emaw, ka fate emaw nêna hun hmanho ka thlang zâwk dâwn? Ka hna thawhna pu ber chuan ka chhia leh ṭha hriatna tibuaitu hna emaw, thlarau lam thil ngaihsakna hun khawih buai fotu hna emaw min thawhtîr chuan, hna thawh lai chân ka hlauh avângin chutiang chuan ka thawk ang em?

KA HRISELNA: Ka hrisêlna ka ngaihthah nge, fîmkhur takin ka enkawl reng zâwk? Chu chu ka titi pui ber a ni em? Ka hrisêlna ka enkawl dân chuan ka chhûngte ka ngaihtuahzia a târ lang em?

MAHNI HLIMNA: Chu chu ka thupui ber a ni em? Ka kawppui emaw, chhûngte emaw hlimna aiin ka dah pawimawh zâwk em? Mahni hlimna ka zawn dân chu Pathian dik betu nihna nên a inmil em?

KA KAWPPUI: Ka kawppui chu min tihhlim hunah chauh ṭhian angin ka thlîr em? Ka kawppui chu mi zahawm anga cheibâwlin ka chawimawi em? Pathian ka rinna chuan ka kawppui ka thlîr dân chu a thunun em?

KA NU LEH PATE: Naupang ka la nih chuan, ka nu leh pate chu zah taka chhângin, in chhûng hna sekrek thawh tûra min tukte thawkin, ina haw hun tûra an ruat huna haw thlap thlapin, leh ṭhian kâwm lo tûra min hrilhte kâwm lo leh ti lo tûra min hrilh thilte ti lovin an thu chu ka âwih em? Puitling tawh ka nih chuan, ka nu leh pate thu zahna nêna ngaithlain, an mamawh hunah ka ṭanpui em? Anmahni ka dâwr dân chu mahni remchân dân hian a thunun nge Pathian Thua kaihhruainate’n a thunun zâwk?

KA FATE: Ka fate hnêna nungchang tehna zirtîr chu ka mawhphurhnaah ka ngai nge school-in a zirtîr ka beisei zâwk? Ka fate nên hun ka hmang ṭhîn nge naupang inawmlemna thilte, TV te, a nih loh leh computer te ka kawmtîr ṭhîn zâwk? Ka fate chu Pathian thu hriattîrte an ngaihthah hunah ka thunun ziah ṭhîn nge, min tihthinur hunah chauh ka thunun ṭhîn zâwk?

IN ṬHA, THAWMHNAW ṬHA: Ka incheina leh ka thil neihte ka ngaihsak dân chu engin nge thunun? Ṭhenawmte hnêna ngaih dân ka pêk tûr hian nge, ka chhûngte ṭhatna tûr hian nge, Pathian betu ka nihna hian?

THILTIH APIANGA TIṬHA BER NIH: Thiltih apiang chu ṭha taka tih a pawimawh niin ka hria em? Tiṭha ber nih tumin ka bei em? Mi dangin an tihṭhat zâwkin ka thîk em?

PATHIAN CHIBAI BUK: Pathian pawm nih chu ka kawppui emaw, ka fate emaw, ka nu leh pate emaw, a nih loh leh ka hna thawhna pu ber emaw pawm nih ai chuan ka ngai pawimawh zâwk em? Nuamsa zâwka ka nun theih nân, Pathian rawngbâwl chu thil pawimawh lo zâwka dah mai ka duh em?

HENG BIBLE FUIHNATE HI NGUN TAKIN NGAIHTUAH RAWH

Pathianin i nunah eng hmun nge a chan?

Thuhriltu 12:13: “Pathian ṭih la, a thupêkte vawng rawh; hei hi mihring zawng zawng tih tûr chu a ni mai.”

HETIANG HIAN INZAWT RAWH: Ka nun dân hian chutianga thil ka thlîrzia a târ lang em? Pathian thupêkte zawmna chuan in lam, hna thawhna lam, a nih loh leh school lama ka mawhphurhna ka hlen dân a thunun em? Nge thil dang emaw, nuna nêksâwrnate emaw chuan Pathian tâna hun ka insiamna a thunun zâwk?

Pathian nên eng ang inlaichînna nge i neih?

Thufingte 3:​5, 6: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che.”

Matthaia 4:10: “Lalpa i Pathian chibai bûk la, ama rawng chauh bâwl rawh.”

HETIANG HIAN INZAWT RAWH: Pathian chungchângah chutiang chuan ka ngai em? Ka nî tin thiltihte leh dinhmun harsate ka chinfel dân chuan chutianga rinna leh inpêkna chu a târ lang em?

Bible chhiar leh zir hi eng ang takin nge i ngaih pawimawh?

Johana 17:3: “Hei hi chatuana nunna a ni, nang Pathian tak chauh leh i tirh Isua Krista hriat hi.”

HETIANG HIAN INZAWT RAWH: Pathian Thu chhiar leh chhût ngun ka ngaih pawimawh dân chuan a chunga thu ka rin tak zetzia a târ lang em?

Kristian kohhran inkhâwm chu eng ang takin nge i ngaih pawimawh?

Hebrai 10:​24, 25: “Hmangaih leh thil ṭha tiha inchawk tho tûrin inngaihtuah tawn ang u . . . ni chu lo hnai telh telha in hriatin infuih tawn nasa lehzual sauh rawh u.”

Sâm 122:1: “‘LALPA inah i kal ang u,’ ka hnêna an tih lai khân ka lâwm a.”

HETIANG HIAN INZAWT RAWH: Ka nun dân hian Pathian Thua he kaihhruaina lâwm taka ka pawmzia a târ lang em? Thla kalta chhûng khân, thil dang engemaw ka ngaih pawimawh zâwk avângin Kristian inkhâwm ka ṭhulh em?

Pathian leh a thiltumte chungchâng chu ṭhahnemngai takin mi dangte i hrilh em?

Matthaia 24:14: “He ram chanchin ṭha hi . . . hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang.”

Matthaia 28:​19, 20: “Chutichuan kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u.”

Sâm 96:2: “LALPA chawimawia hla sain, a hming fak ula; ni tin a chhandamna thu chu hriattîr rawh u.”

HETIANG HIAN INZAWT RAWH: Chanchin ṭha hrilh hian a phu ang ngeiin ka nunah hmun pawimawh a chang tak zet em? Chanchin ṭha hrilhnaa ka tel dân hian kan chênna hun hmâwr tawhzia ka ring tih a târ lang em?