Bung 18
Chatuanin Pathian Rawngbâwl Tum Rawh
1, 2. Pathian hriatna neih bâkah eng nge la ṭûl?
RO HLU ropui tak awmna pindan luhna kawngka inkalh tlat bula ding angah han inchan la. Thuneitu pakhatin kawngka chabi chu a pe che a, chûng thil hlu tak takte chu i duh ang anga hmang tûrin a hrilh che angah lo ngai ta bawk la. Chu chabi chu i hman si loh chuan i tân ṭangkaina engmah a nei lo vang. Chutiang bawkin, hriatna hlâwkpui tûr chuan chu hriatna chu i hmang tûr a ni.
2 Hei hi Pathian hriatna chungchângah a bîk takin a dik a ni. Pathian Jehova leh Isua Krista hriatna dik tak chu chatuana nunna a ni si a. (Johana 17:3) Mahse, chu beiseina chu hriatna neih ringawtin a tak a chang thei lo va. Chabi hlu tak i hman ang bawkin, Pathian hriatna pawh chu i nunah i hman a tûl a ni. Isua chuan Pathian duhzâwng titute chu ‘vân ramah an lut ang’ a ti a. Chûng mite chu chatuana Pathian rawngbâwl tûrin chanvo hlu tak pêk an ni dâwn a ni!—Matthaia 7:21; 1 Johana 2:17.
3. Kan tâna Pathian duhzâwng chu eng nge ni?
3 Pathian duhzâwng chu eng nge ni tih kan hriat hnuin a tiha tih a pawimawh êm êm a ni. I tâna Pathian duhzâwng chu eng nge nia i rin le? Inâwm takin hêng thute hian a khai khâwm theih ang: Isua hi entawn rawh, tiin. Petera Lehkha Thawn Pakhatna 2:21 chuan: “Krista pawh khân a tuarsak che u avângin hetiang ti tûrin koh in ni asin; a hniaka in zuina tûrin entawn tûr a hnutchhiah che u kha,” tiin min hrilh a ni. Chuti a nih chuan, Pathian duhzâwng ti tûrin Isua’n entawn tûr a hnutchhiah chu a hnaih thei ang bera i zui a ngai ta a ni. Chu chu Pathian hriatna a taka i hman dân tûr chu a ni.
ISUA’N PATHIAN HRIATNA A HMAN DAN
4. Engvângin nge Isua’n Jehova chanchin a hriat tam êm êm a, he hriatna hi engtin nge a hman?
4 Isua Krista hian mi dangte aiin Pathian hriatna a nei ril lehzual a. Leia a lo kal hmain vânah Pathian Jehova hnênah kum rei tak a lo khawsa tawhin hna a lo thawk tawh a ni. (Kolossa 1:15, 16) Chûng a hriatna zawng zawng chu Isua’n engtin nge a hman? Chutianga hriatna neih ringawtah chuan a duhtâwk mai lo. Isua chuan a takin a nunpui a ni. Chuvângin a mihringpuite a dâwrna kawngah pawh a ngilneiin a dawhthei êm êm a, hmangaihna a nei bawk a ni. Chutiang chuan Isua’n vâna a Pa chu a entawn a, Jehova kawngte leh miziate a hriatna nêna inmilin thil a ti a ni.—Johana 8:23, 28, 29, 38; 1 Johana 4:8.
5. Engvângin nge Isua’n baptisma a chan a, a baptisma chan awmzia nêna inmilin engtin nge a nun?
5 A hriatna neih chuan Isua chu rahbi pawimawh tak zawh tûrin a chêttîr bawk a. Galili khua aṭangin Jordan luiah a kal a, chutah chuan Johana’n baptisma a lo chantîr a ni. (Matthaia 3:13-15) Isua baptisma channa chuan eng nge a entîr? Juda mi a nih angin, Pathian hnêna inpumpêk tawh hnam zîngah a lo piang a. Chuvângin, Isua chu a piantirh aṭang rêngin inpumpêk tawhsa a ni. (Exodus 19:5, 6) Baptisma changin chutih hun laia a tâna Pathian duhzâwng ti tûrin Jehova hnênah a inhlân a. (Hebrai 10:5, 7) Isua chu a baptisma chan awmzia nêna inmilin a nung bawk a ni. Jehova rawngbâwlnaah a inhmang a, a remchâng apiangah Pathian hriatna chu mite hnênah a hrilh a ni. Isua’n Pathian duhzâwng tih chu a hlimpui êm êm a, a tân chuan chaw ang mai a nih thu a sawi hial a ni.—Johana 4:34.
6. Eng kawngin nge Isua kha amah leh amah a inphat?
6 Isua chuan Jehova duhzâwng tih chu a hautak hle dâwn a, a nunna hial pawh a chân phah dâwn a ni tih a hre chiang hle a ni. Chuti chung pawhin, Isua chuan a mi mal mamawhte chu ngai pawimawh hmasa lovin, amah leh amah a inphat a, Pathian duhzâwng tih chu eng lai pawhin a ngai pawimawh ber zêl a ni. Hemi chungchângah hian Isua’n entawn tûr ṭha famkim a siam hi engtin nge kan zui ve theih ang?
CHATUAN NUNNAA HRUAITU RAHBITE
7. Baptisma chang tûra tling tûrin miin eng rahbi ṭhenkhat nge a zawh ang?
7 Isua ang lo takin ṭha famkim lo kan ni a, rahbi pawimawh tak tak dangte kan zawh hnuah chauh baptisma channa hun pawimawh tak chu kan thleng thei a. Hei hi Pathian Jehova leh Isua Krista hriatna dik tak kan thinlunga kan neih aṭangin a rawn inṭan a ni. He thil kan tihna hian kan rinna tilang tûr leh Pathian hmangaihna thûk tak nei tûrin min siam a ni. (Matthaia 22:37-40; Rom 10:17; Hebrai 11:6) Pathian dânte, thu bulte, leh tehnate kan zawmna chuan, tûn hmaa kan thil sual tihte avânga Pathian lama lungngaihna lantîr a, sim tûrin min chêttîr tûr a ni. Hei hi inlehna a ni a, chumi awmzia chu Pathian hriatna kan neih hmaa kawng dik lo kan lo zawh tawh rêng rêng inlamlêta bânsan vek tihna a ni. (Tirhkohte 3:19) Thil fel ti lova a rûka sual engemaw kan la ti cheu a nih chuan kan inlamlêt tak tak lo tihna a ni. Pathian chu bum theih a ni lo. Vervêkna zawng zawng chu Jehova’n a hmu tlang vek a ni.—Luka 12:2, 3.
8. Ram thuhrilna hnaah hian tel ve i duh hunah eng thil nge i tih ang?
8 Tûna Pathian hriatna i lo neih tâkah hian, thlarau lam thilte chu mi mal taka i ngaihtuah ve hi a inâwm hle a ni lâwm ni? I thil zirte chu i laichînte, i ṭhiante, leh mi dangte hrilh hlân pawh i lo nghâkhlel mai thei a. Dik takin, Isua’n chanchin ṭha chu mite hnênah a remchân dân ang zêla a hrilh ang bawkin, nang pawhin i lo ti ṭan tawh pawh a ni thei bawk. (Luka 10:38, 39; Johana 4:6-15) Tûnah hian a aia tam lehzual thawh i duh mai thei a. Kristian upate chuan Jehova Thuhretute Ram thuhrilna hnaah hian tel ve tûrin i tling nge tling lo tih rêl fel tûra kawm che chu an châkzawng tak a ni. I tling a nih chuan rawngbâwlnaah Thuhretu pakhat kalpui tûrin upaten ruahmanna an siamsak mai dâwn che a ni. Isua zirtîrte pawhin an rawngbâwlna chu fel taka an hlen chhuah theih nân a zirtîrnate chu an zâwm a ni. (Marka 6:7, 30; Luka 10:1) Ram thuchah chu in tinah leh kawng dang danga theh darhnaa i tel vena aṭangin chutiang ṭanpuina chu i hlâwkpui ve dâwn a ni.—Tirhkohte 20:20, 21.
9. Engtin nge Pathian hnênah mi a inpumpêk a, inpumpêkna chuan engtin nge mi nun a khawih danglam?
9 Kohhran thuhrilna huam chhûnga mi chi hrang hrangte hnêna chanchin ṭha hril hi thinlung fel pu mite zawn chhuahna kawng a ni a, rinna i nei tih finfiahna hnathawh ṭhate zînga mi a ni bawk. (Tirhkohte 10:34, 35; Jakoba 2:17, 18, 26) Kristian inkhâwmnaa tel zat zat leh thuhril hnaa awmze nei taka tel ve ṭhin te hi, i simin i inlamlêt tawh a, tûnah chuan Pathian hriatna nêna inmilin nun i tum nghet tawh tih lantîrna kawngte a ni bawk. A dawt leha rahbi zawh tûr dik chu eng nge ni? Pathian Jehova hnêna inpumpêk hi a ni. Chumi awmzia chu thinlung taka i ṭawngṭainaah, Pathian hnênah a duhzâwng ti tûrin i nun chu duh tak chung leh thinlung zawng zawngin i pe tih i hrilh tihna a ni. Hei hi Jehova hnêna i inpumpêk dân tûr leh Isua Krista nghâwngkawl nuam tak i bah dân tûr kawng chu a ni.—Matthaia 11:29, 30.
BAPTISMA—I TANA A AWMZIA
10. Jehova hnêna i inpumpêk hnuah engvângin nge baptisma i chan ang?
10 Isua sawi angin a hnungzuitute zawng zawng chuan baptisma an chang tûr a ni. (Matthaia 28:19, 20) Pathian hnêna i inpumpêk tawh hnuah engvângin nge hei hi a ṭûl? Jehova hnêna i inpumpêk tawh avângin amah chu i hmangaih a ni tih a hria a. Mahse Pathian i hmangaihna chu mi dangte hriattîr ve tûrin thil dang i tizawm duh ngei ang. Baptisma chu Pathian Jehova hnêna i inpumpêkna vântlâng hmaa i lantîr theihna hun remchâng chu a ni.—Rom 10:9, 10.
11. Baptisma hi eng nge a awmzia?
11 Baptisma hian awmzia thûk tak a nei a. Tuia hnim pil emaw, “phûm” emaw i nih chu, tûn hmaa i nun dân kawng chu i thihsan tawh tihna ang a ni. Tui aṭanga i lo chhuah chuan, i duh dân ni tawh lovin Pathian duh dânin a thunun, nun thar neiin i lo chhuak tihna a ni. Chu chu engmah i tisual tawh lo vang tihna a ni lo, a chhan chu ṭha famkim lo vek kan nih avângin ni tin thil kan tisual a ni. Amaherawhchu, inpumpêka baptisma chang tawh Jehova chhiahhlawh i nih angin, amah nên a bîk taka inlaichînna i lo nei ang a. I simna leh inngaitlâwm taka baptisma i channa avângin Jehova chuan Isua tlanna inthawina ṭan chhanin i sualte chu a ngaidam duh a ni. Chutiang chuan baptisma hian Pathian hmaah chhia leh ṭha hriatna thiang tak min neihtîr a ni.—1 Petera 3:21.
12. Hêngte hi eng nge a awmzia (a) ‘Pa hminga’ baptis? (b) ‘Fapa hminga’ baptis? (c) ‘Thlarau Thianghlim hminga’ baptis?
12 Isua’n a hnungzuitute hnênah zirtîr ni tharte chu “Pa leh Fapa leh Thlarau Thianghlim hmingah” baptis tûrin thu a pe a. (Matthaia 28:19) Isua thusawi hi eng nge a awmzia? ‘Pa hminga’ baptis tih hian baptisma changtu chuan a thinlung zawng zawngin Pathian Jehova chu Siamtu-ah leh lei leh vâna Chungnungber dik takah a pawm tih a entîr a ni. (Sâm 36:9; 83:18; Thuhriltu 12:1) ‘Fapa hminga’ baptis tih hian baptisma changtu chuan Isua Krista—a bîkin A tlanna inthawina—chu Pathianin chhandamna atâna a ruahman kawng awm chhun a ni tih a pawm tihna a ni. (Tirhkohte 4:12) ‘Thlarau Thianghlim hminga’ baptis tih hian baptisma changtu chuan Jehova thlarau thianghlim emaw, thiltihtheihna emaw chu A thil tumte hlen chhuah nâna Pathian hmanrua a ni tih leh, A thlarau kaihhruai pâwl nêna thawkho chunga A duhzâwngte ti thei tûra A chhiahhlawhte tihchak nâna Pathian hmanrua a ni tih hi a pawm tih a entîr a ni.—Genesis 1:2; Sâm 104:30; Johana 14:26; 2 Petera 1:21.
BAPTISMA CHANG TURIN I INPEIH TAWH EM?
13, 14. Pathian Jehova rawngbâwl thlan hi engvângin nge kan hlauh loh vang?
13 Baptisma hian awmzia thûk tak a neih avâng leh mi mal nuna hun pawimawh lai ber a nih bawk avângin, he rahbi hi i hlau tûr em ni? Ni teh suh e! Baptisma chang tûra thu tlûkna siam hi ho taka ngaih tûr a nih loh laiin, thu tlûkna i siam theih zawng zawngah chuan hnial rual lohvin a finthlâk ber a ni thung.
14 Baptisma chu Pathian Jehova rawngbâwl i thlang tih finfiahna a ni. I hmêlhriatte zawng zawng han ngaihtuah la. Eng kawng zâwng ber emaw chuan hotu pakhat rawng an bâwl ṭheuh a ni lâwm ni? A ṭhen chuan sum leh pai rawng an bâwl a. (Matthaia 6:24) Mi dangte chuan an ei zawnna kawngah hmasâwn tumin ṭhahnemngai takin an bei a, a nih loh leh anmahni duhzâwng tihpuitlinna chu an nuna dah pawimawh berin mahni rawng an inbâwl ṭhîn a ni. Mi dang lehte chuan pathian dik lote rawng an bâwl thung a. Nang erawh chuan Pathian dik, Jehova rawngbâwl chu i thlang tawh a ni. Hetiang khawpa nasa ngilneihna te, lainatna te, leh hmangaihna te hi tu dang mahin an lantîr ve lo. Pathian chuan mihringte chu chawi sângin an hnênah chhandamna kawhhmuhtu tûr thil tum nei tak hna a pe a. Ani chuan a chhiahhlawhte chu chatuan nunna lâwmman a pe dâwn a ni. Isua entawna awm leh Jehova hnêna i nun pêk chu kawng hlauh tûr a ni lo tih a chiang hle a ni. A nihna takah chuan, Pathian tihlâwm theihna kawng awm chhun a ni a, a âwm hliah hliah bawk a ni.—1 Lalte 18:21.
15. Baptisma channa dâltu tlângpui chu engte nge ni?
15 Nimahsela, baptisma hi mi dangte nawrna avânga chan mai tûr a ni lo va. Hei hi nangmah leh Jehova inkâr thil liau liau a ni. (Galatia 6:4) Thlarau lamah hma i lo sâwn zêl chuan, “Baptisma channa tûr engin nge mi dâl kher?” tiin i ngaihtuah ve mai thei a ni. (Tirhkohte 8:35, 36) ‘Chhûngte dodâlna hian min dang em ni? Pathian thu nêna inmil lo dinhmunah emaw, chîn dân sual ṭhenkhatah emaw ka la inhnamhnawih cheu em? Khawtlângah mite duhsakna chân ka hlauh vâng a ni thei ang em?’ ti tein i inzâwt thei a ni. Hêngte hi thil ngaihtuah tûr zînga ṭhenkhat chu a ni a, mahse ngun takin chhût hlawm ang che.
16. Jehova rawngbâwlna hi engtin nge i hlâwkpui ang?
16 Jehova rawngbâwl hi a hlâwknate ngaihtuah tel lova a chânnate chauh chhût chu a dik lo vang. Entîr nân, chhûngte dodâlna chungchâng hi han ngaihtuah la. Isua chuan a zirtîrten amah an zui avângin an chhûng leh khatte chân mah sela, thlarau lam chhûngkaw rual zâwk an nei ang tih a lo tiam a ni. (Marka 10:29, 30) Hêng i rinpuite hian unau hmangaihna chu i chungah an lantîr ang a, tihduhdahna chhel taka tuar thei tûrin an ṭanpui ang chia, nunna kawnga i kal zêlnaah an thlâwp tlat bawk ang che. (1 Petera 5:9) A bîk takin kohhrana upate chuan buaina i tawhte chu hneh tûrin leh, chona dangte pawh hneh tûrin an ṭanpui thei che a ni. (Jakoba 5:14-16) He khawvêla duhsakna chân chungchângah chuan, ‘Lei leh vân Siamtu pawm tlâk niha, ka nun kawng thlan avânga amah ka tihlâwm hi eng nêna khaikhin theih nge ni ang?’ tiin nangmah leh nangmah i inzâwt thei a ni.—Thufingte 27:11.
I INPUMPEKNA LEH BAPTISMA NENA INMILA NUN
17. Baptisma hi a tâwpna ni lovin a bul ṭanna ang chauhvah engvângin nge i ngaih ang?
17 Baptisma chu thlarau lama i hmasâwnna kawng tâwp ber a ni lo tih hriat reng hi a pawimawh hle a. Baptisma chu rawngbâwltu atâna nemngheh tawh leh Jehova Thuhretute zînga mi pakhat anga dam chhûnga Pathian rawngbâwlna inṭanna a ni. Baptisma hi pawimawh hle mah sela, chhandam ni tûra nemnghehna a ni lo. Isua’n: ‘Baptisma chang apiang chhandamin an awm ang,’ a ti lo va. “A tâwp thlenga tuar peih apiang chu, chu mi ngei chu chhandamin a awm ang,” a ti zâwk a ni. (Matthaia 24:13) Chuvângin, i nunah dah pawimawh bera Pathian Ram i zawn hmasak chu a pawimawh êm êm a ni.—Matthaia 6:25-34.
18. Baptisma chan hnuah tum zui tûr ṭhenkhat chu engte nge ni?
18 Chhel taka Jehova rawng bâwl tûrin thlarau lamah tum i insiam duh ngei ang a. Tum manhla tak pakhat chu Pathian hriatna tipung tûra a hun taka mahnia a Thu zir hi a ni. Ni tina Bible chhiar tûrin ruahmanna nei ang che. (Sâm 1:1, 2) Kristian inkhâwmnaahte tel zat zat ang che, chumi hmuna unaute inkawmhona i hmuh chuan thlarau lama chakna a pêk theih che avângin. Nangma lamah chuan, Jehova fak leh mi dangte tichangkâng tûrin inkhâwmnaa zawhna chhân chu engvângin nge i tum loh vang? (Rom 1:11, 12) Tum tûr dang leh chu i ṭawngṭai dân tihchangkân hi a ni thei ang.—Luka 11:2-4.
19. Thlarau thianghlimin eng miziate nge târlang tûra a ṭanpui theih che?
19 I baptisma chan awmzia nêna inmila i nun dâwn chuan englai pawha i thil tih i ngaihven reng a ṭûl a, Pathian thlarau thianghlim chu hetiang mizia hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, leh insûmtheihna te hi nangmahah rah chhuahtîr ang che. (Galatia 5:22, 23; 2 Petera 3:11) Jehova’n a thlarau thianghlim chu ṭawngṭaia dîltu zawng zawngte leh, a chhiahhlawh rinawm nia a thu zâwmtute hnênah a pe ṭhîn a ni tih hi hre reng ang che. (Luka 11:13; Tirhkohte 5:32) Chuvângin a thlarau thianghlim dîlin Pathian hnênah ṭawngṭai la, amah tilâwmtu miziate lantîr thei tûrin ṭanpuina dîl bawk ang che. Pathian thlarau thununna chu i lo ngaihsak chuan chûng miziate chu i thusawiah leh chêtziaah te a lo langsâr lehzual dâwn a ni. Kristian kohhrana mi tinte hian Krista an lo an deuh deuh theih nân ‘mihring thara’ inthuam tûrin an bei fan fan ṭheuh rêng a ni. (Kolossa 3:9-14) Thlarau lama hma kan sâwn dân a inchen loh avângin hetianga kan beihna kawngah hian mi tinin chona chi hrang hrang kan hmachhawn a. Mi ṭha famkim lo i nih avângin, Krista mizia ang nei tûr chuan theihtâwp chhuahin i bei tûr a ni. Mahse hemi kawngah hian beidawng ngai suh ang che, Pathian ṭanpuinain a hlawhtlin theih si a.
20. Rawngbâwlnaah hian eng kawngtein nge Isua i entawn theih?
20 Thlarau lama tum i neihte zîngah chuan Isua’n entawn tûr a lo siam hnaih lehzuala entawn i tumna hi a tel tûr a ni. (Hebrai 12:1-3) Ani chuan rawngbâwlna chu a ngaina êm êm a ni. Ram thuhril hnaah hian tel ve theihna chanvo hlu i nei a nih chuan, hna kalhmang pangngai ang lek nihtîr suh ang che. Isua’n a lo tih angin Pathian Ram chanchin mi dangte i zirtîrnaah hian lungawina hmuh tum la. Zirtîrtu ṭha zâwk ni tûra ṭanpui tûr chea kohhranin zirtîrna a pêk chu a takin hmang ang che. I rawngbâwlna hlen chhuak tûrin Jehova chuan chakna a pe thei che a ni tih hi ring ngam bawk ang che.—1 Korinth 9:19-23.
21. (a) Baptisma chang tawh mi rinawmte chu Jehova’n ro hlu takah a ngai tih engtin nge kan hriat theih? (b) He thil kalhmang suaksualte chunga Pathian phuba lâkna lo thleng tûrah hian kan dam khawchhuahna tûrin baptisma hi a pawimawh tih engin nge lantîr?
21 Inpumpêka baptisma chang tawh, Isua hnungzui tûra rinawm taka beitu chu Pathian tân a hlu êm êm a ni. Jehova chuan mihring vaibêlchhe tam takte thinlung hi a en fiah a, chutiang mi chu an vânzia pawh a hre chiang a. Chutiang mite chu ro hlu tak, a “duhzâwngte” angin a ngai a ni. (Hagaia 2:7) Pathianin chutiang mite chu he thil kalhmang suaksualte chunga a phuba lâkna lo thleng thuai tûrah hian dam khawchhuak tûrin a chhinchhiah a ni tih Bible hrilh lâwknate chuan a târlang. (Ezekiela 9:1-6; Malakia 3:16, 18) “Chatuana nun duhna rilru dik tak neitu” i ni em? (Tirhkohte 13:48, NW) Pathian rawngbâwltu anga chhinchhiah nih hi i duh tak zet em? Inpumpêkna leh baptisma-te hi chumi chhinchhiahnaa tel chu a ni a, dam khawchhuahna atân pawh a ṭûl a ni.
22. “Mipui tam tak”te chuan eng beiseina nge nghâkhlel taka an thlîr theih?
22 Khawvêl pum huap Tuilêt hnuah khân, Nova leh a chhûngte chu lawng ata lo chhuakin lei then faiah chuan an awm ta a. Chutiang bawkin tûn laiah pawh Pathian hriatna an nuna hmangtu, Jehova pawm tlâk “mipui tam tak” te chuan he thil kalhmang suaksualte tâwpnaa dam khawchhuahna leh, lei then fai hlen tawh chunga chatuana nun chên tûrin beiseina an nei a ni. (Thu Puan 7:9, 14) Chu nun chu eng ang nge ni ang le?
I HRIATNA FIAH RAWH
Jehova’n amah i hriatna chu eng anga hmang tûrin nge a duh che?
Baptisma chang tûra rahbi ṭhenkhat chu engte nge ni?
Engvângin nge baptisma hi a tâwpna ni lova a bul ṭanna chauh a nih?
Kan inpumpêkna leh baptisma nêna inmilin engtin nge kan nun theih ang?
[Phêk 172-naa milem]
Ṭawngṭaiin Pathian hnênah i inpumpêk tawh em?
[Phêk 174-naa milem]
Baptisma i channa tûr engin nge dâl che?