Bung 16
Pathian I Hnaih Theih Dân
1. Sakhaw tam takah eng inannate nge chiang taka hmuh tûr awm?
KHUALZIN mi pakhat, khawchhak ram tlawhtu chuan Buddhist biak ina sakhaw serh leh sâng thil a hmuhte chu mak a ti hle a. Milimte chu Mari leh Isua lim te ni lo mah se, an serh leh sâng tam tak chu in lama an kohhrana an lo serh ṭhinte nên a inang hle a ni. Entîr nân, rosary an hman te leh ṭawngṭai hla an chham te chu a chhinchhiah a. Mi dangte pawhin chutiang chuan an lo khaikhin ve ṭhîn bawk. Khawchhak a ni emaw, Khawthlang a ni emaw, sakhaw lama inpe miten Pathian emaw, an thil biakte emaw hnaih an tum dân kawngte chu mak takin a inang tlâng hle a ni.
2. Ṭawngṭaina hi engtianga hrilhfiah nge ni a, mi tam takte hi engvângin nge an ṭawngṭai ṭhin?
2 Mi tam tak chuan a bîkin ṭawngṭaia Pathian hnaih an tum ṭhîn a. Ṭawngṭaina hi “mihringten thil thianghlimte—Pathian, pathiante, hriatthiam phâk piah lam ram, hmuh theihloh thlarau thiltihtheihna khawvêl—nêna inbiak pawh an tumna a ni” tia hrilhfiah a ni. (The New Encyclopoedia Britannica) Amaherawhchu, ṭawngṭaia Pathian an pan hian, mi ṭhenkhat chuan eng hlâwkna nge an hmuh theih tih ringawt an ngaihtuah ṭhîn. Entîr nân, vawi khat chu pa pakhat hian Jehova Thuhretute zînga pakhat hnênah: “Mi ṭawngṭaisak chuan, ka chhûngkuaah te, ka hnathawhnaah te, leh ka hrisêlna lama harsatna ka neihte hi a kiang vek dâwn em ni?” tiin a zâwt a. Chu mi chuan chutiang chu a nih theih a ring ni ngei tûr a ni, mahse mi tam tak chu an han ṭawngṭai a, an harsatnate chu a awm reng tho si a. Chuvângin, ‘Engvâng chiahin nge Pathian chu kan hnaih ang?’ tiin kan zâwt mai thei a ni.
PATHIAN KAN HNAIHNA TUR CHHAN
3. Tu hnênah nge kan ṭawngṭai ang a, engvângin nge?
3 Ṭawngṭaina hi serh leh sâng awmze nei lo a ni lo va, thil engemaw neih theihna kawng ringawt a ni hek lo. Pathian kan pan nachhan ber chu amah nêna inlaichînna bul tak nei tûrin a ni a. Chuvângin Pathian Jehova hnênah kan ṭawngṭai tûr a ni. Sâm ziaktu Davida chuan, “LALPA chuan a kotu zawng zawngte chu a hnaih ṭhîn,” tiin a lo sawi a. (Sâm 145:18) Jehova chuan amah nêna inlaichînna muanawm tak nei tûrin min sâwm a ni. (Isaia 1:18) He sâwmna pawmtute hian: “Kei atân erawh zawng Pathian hnaih hi a ṭha a ni,” tia sâm ziaktu thusawi hi an pawmpui a ni. Engvângin nge? A chhan chu Pathian Jehova hnaihtute chuan hlimna leh rilru thlamuanna dik an chen dâwn avângin a ni.—Sâm 73:28.
4, 5. (a) Pathian hnêna ṭawngṭai hi engvângin nge a pawimawh? (b) Ṭawngṭaina hmangin Pathian nên eng inlaichînna nge kan siam theih?
4 Pathianin ‘kan dîl hmain engte nge kan mamawh tih a hriat reng’ si chuan, engvângin nge a hnênah ṭanpuina dîla kan ṭawngṭai ang? (Matthaia 6:8; Sâm 139:4) Ṭawngṭaina hian Pathianah rinna kan nei tih leh, ani chu “thilpêk ṭha leh thilpêk famkim zawng zawng” Hnâr angin kan ngai a ni tih a lantîr a ni. (Jakoba 1:17; Hebrai 11:6) Kan ṭawngṭainate hi Jehova lâwmzâwng a ni a. (Thufingte 15:8) Naupangin tih tak zeta lâwmthu a sawi a han hriata a pa a lâwm êm êm ang chiahin, ani pawhin awmze nei taka amah kan ngaihhlutna leh fakna ṭawngkamte a hriatin a lâwm êm êm a ni. (Sâm 119:108) Pa-fa inlaichînna ṭha tak a awmna hmunah chuan inbiak pawhna duhawm tak a awm ṭhîn. Hmangaih hlawh tak naupang chuan a pa nêna tîtî te a duh ṭhîn a. Pathian nêna kan inlaichînna chungchângah pawh hetiang tho hi a ni. Jehova chanchin kan zirte leh kan tâna hmangaihna a lantîrte hi kan ngaihlu tak zet a nih chuan, ṭawngṭaiin a hnênah kan thinlung phawrh vek duhna nasa tak kan nei dâwn a ni.—1 Johana 4:16-18.
5 Pathian Chungnungber kan panin, kan ṭawngkam hman tûr chungchângah a lutuka buai tûr a ni lo naa, amah zahna thinlung kan nei tûr a ni. (Hebrai 4:16) Englai pawhin Jehova kan pan thei reng a ni. Pathian hmaah ṭawngṭaia ‘kan thinlung kan leihbaw’ thei hi chanvo hlû a va ni êm! (Sâm 62:8) Jehova kan ngaihhlutna chuan mi rinawm Abrahama’n Pathian ṭhian anga inlaichînna duhawm tak a lo neih ang kha min neihtîr thei a ni. (Jakoba 2:23) Mahse lei leh vân Lalpa Chungnungber hnêna kan ṭawngṭaiin, amah panna tûra a thil phûtte hi kan zâwm tûr a ni.
PATHIAN HNAIHNA TURA THIL TULTE
6, 7. Kan ṭawngṭainate ngaithla tûrin Pathianin pawisa a phût lo naa, kan ṭawngṭaiin engte nge min phût?
6 Pathian pan tûrin pawisa a ngai em? Mi tam tak chuan anmahni ṭawngṭaisak tûrin sakhaw hruaitute hnênah pawisa an pe ṭhîn a. Ṭhenkhat phei chuan an pawisa thawh zât azir zêlin an ṭawngṭainate chu ngaihthlâk a nih an ring a ni. Amaherawhchu, Pathian Thu chuan ṭawngṭaia Jehova pan tûrin pawisa thawh a ṭûl tih a sawi lo va. Thlarau lama a ruahmannate leh ṭawngṭaia amah nêna inlaichîn theihna hlu takte hi man lova hmuh theih a ni.—Isaia 55:1, 2.
7 A nih leh eng nge ṭûl? Thinlung puthmang dik tak neih hi thil ṭûl pakhat chu a ni. (2 Chronicles 6:29, 30; Thufingte 15:11) Pathian Jehova chu “ṭawngṭaina Ngaithlatu” leh “zawngtute hnêna lâwmman pêk hmang” a ni tih thinlung takin kan ring tûr a ni a. (Sâm 65:2; Hebrai 11:6) Thinlung inngaitlâwm tak kan nei bawk tûr a ni. (2 Lalte 22:19; Sâm 51:17) A tehkhin thute zînga pakhatah, Isua Krista chuan Pathian panna kawngah thinlunga inngaitlâwm tak chhiahkhawntu chu Pharisai chapo tak aiin a fel zâwk tih a târlang a. (Luka 18:10-14) Keini pawhin ṭawngṭaia Pathian kan panin, “thinlunga chapo apiangte chu LALPA tâna tenawm an ni,” tih hi i hre reng ang u.—Thufingte 16:5.
8. Kan ṭawngṭainate Pathianin a chhân kan duh chuan eng thilah nge kan intihthianghlim ang?
8 Kan ṭawngṭainate Pathianin a chhân kan duh chuan keimahni nundân sual aṭangin kan intithianghlim tûr a ni. Tirhkoh Jakoba’n Pathian hnaih tûra mi dangte a fuihnaah: “Mi sualte u, in kutte silfai rawh u; rilru bulbâl nei lote u, in thinlung tithianghlim rawh u,” tiin a sawi belh a. (Jakoba 4:8) Thil sual titute pawhin an sim a, an tûn hma nun kawngte an kalsan chuan, Jehova nên inlaichînna muanawm tak an nei thei a ni. (Thufingte 28:13) A der maia intithianghlim kan nih chuan Jehova’n kan ṭawngṭainate a ngaithla lo vang. Pathian Thu chuan “Lalpa mit chu mi felte chungah a fu a, a beng pawh an ṭawngṭaina lamah a chhi si ṭhîn a, amaherawhchu Lalpa hmêl chu thil tisualtute chungah a awm ṭhîn,” tiin a sawi a ni.—1 Petera 3:12.
9. Tu hmangin nge Jehova kan pan ang a, engvângin nge?
9 Bible chuan: “Thil ṭha titu, thil sual ti hauh lo khawpa mi fel chu lei chungah hian an awm lo takzet a ni,” a ti a. (Thuhriltu 7:20) Chuvângin: ‘A nih leh, Pathian Jehova chu engtin nge kan pan theih ang?’ tiin i zâwt a ni mai thei. Bible chuan: “Tupawhin thil a tihsual chuan Pa hnêna mi sawipuitu, Isua Krista mi fel chu kan nei e,” tiin a chhâng a ni. (1 Johana 2:1) Mi sual ni mah ila, Isua Krista, min tlan nâna thia avâng chuan zalên taka thusawi theihna neiin Pathian kan pan thei a ni. (Matthaia 20:28) Amah chauh hi Pathian Jehova kan pan theihna kawng chu a ni. (Johana 14:6) Isua tlanna inthawina hlutna hi a tûr ve rêngah ngaiin sual kan tilui tûr a ni lo. (Hebrai 10:26) Amaherawhchu, thil ṭha lo laka insûm tûra theihtâwp kan chhuah chung pawha engemaw chânga tisual palh leh ṭhîn kan nih chuan, simin Pathian hnênah ngaihdam kan dîl thei a ni. Thinlung inngaitlâwm taka amah kan pan chuan min ngaithla dâwn a ni.—Luka 11:4.
PATHIAN BIAK PAWH NANA HUN REMCHANGTE
10. Ṭawngṭaina chungchângah engtin nge Isua kan entawn theih a, mahnia ṭawngṭaina hun ṭhenkhat chu engte nge ni?
10 Isua Krista chuan Jehova nêna an inlaichînna chu a ngaihlu êm êm a. Chuvângin, Isua’n mahnia ṭawngṭaia Pathian biak nân hun a insiam a ni. (Marka 1:35; Luka 22:40-46) Isua tihdân hi kan entawna Pathian hnêna hunbi nei taka kan ṭawngṭai chuan kan ti ṭha hle ang. (Rom 12:12) Ṭawngṭaina nêna nî han hman ṭan chu a inâwm hle a, mut dâwnin ni lênga kan hnathawhahte Jehova hnênah lâwmthu kan sawi thei bawk a ni. Chhûn lamah pawh, ‘eng lai pawhin’ Pathian pan tum ang che. (Ephesi 6:18) Jehova’n min hre thei tho a ni tih hriain, kan thinlungah a ri lovin kan ṭawngṭai thei bawk. Mahnia Pathian biakna chuan amah nêna kan inlaichînna tinghet tûrin min ṭanpui a, Jehova hnêna ni tina ṭawngṭaina chuan amah hnaih lehzual tûrin min ṭanpui a ni.
11. (a) Engvângin nge chhûngkuate chu an ṭawngṭaiho ang? (b) Ṭawngṭaina tâwpa “Amen” i tih hi eng nge a awmzia?
11 Jehova chuan mipui aiawha ṭawngṭainate a ngaithla bawk a. (1 Lalte 8:22-53) Inchhûng khura lû ber kaihhruainain, chhûngkua ang pawhin Pathian kan hnaih thei a ni. Hei hian chhûngkaw inzawmna a tinghet a, inngaitlâwm taka Pathian hnêna an nu leh pate ṭawngṭai ṭhîn an hriatna aṭangin naupangte tân Jehova chu mi tak tak a lo ni ṭhîn a ni. Jehova Thuhretute inkhâwmna angah te tuin emaw mipui aiawhin ṭawngṭai ta sela, engtin nge ni ang? Mipui zîngah kan tel a nih chuan, ṭawngṭaina tâwpah, “Ni rawh se” tihna, “Amen” tia thinlung taka kan sawi theihna tûrin ngun takin i ngaithla ṭhîn ang u.—1 Korinth 14:16.
JEHOVA NGAIHTHLAK TAWNGTAINATE
12. (a) Pathianin engvângin nge ṭawngṭaina ṭhenkhatte hi a chhân loh? (b) Ṭawngṭaiin mahni mamawh chauh engvângin nge kan ngaihtuah loh vang?
12 Mi ṭhenkhat chuan Krista hminga an ṭawngṭai chung pawhin Pathianin an ṭawngṭainate a chhâng lo niin an ngai mai thei a. Amaherawhchu, tirhkoh Johana chuan: “Engpawh [Pathian] duhzâwng anga kan dîl chuan anin min ngaihthlâksak ṭhin hi,” tiin a sawi a ni. (1 Johana 5:14) Chuti a nih chuan, Pathian duhzâwng anga kan dîl a ngai a ni. Ani chuan kan thlarau lam ṭhatna tûr a ngaihsak avângin, kan thlarau lam dinhmun khawih thei chi apiang chu ṭawngṭainaa telh âwm tak a ni a. Tisa lam mamawh chauh ngaihtuah tûra thlêmna chu kan do tlat tûr a ni. Entîr nân, natna chungchângah hmuh tlang thiamna leh tuar chhelna nei tûra ṭawngṭai chu a dik nachungin, hrisêlna chungchânga manganna chuan thlarau lam thil ngaihsakna chu a luahlân tûr a ni lo. (Sâm 41:1-3) Kristian hmeichhe pakhat chuan a hrisêlna lam chu a lutukin a ngaihtuah tih a inhre chhuak a, a natna chungchângah ngaihdân dik a neih theih nân Jehova hnênah ṭanpuina a dîl ta a. Chumi avâng chuan a natna pawh a lo ziaawm ta hle a, “thiltihtheihna nasa” tak pêk niin a inhre hial a ni. (2 Korinth 4:7) Mi dangte tân thlarau lama ṭanpuitu nih a duhna chu a zual sauh va, tichuan hun neih zawng zawnga Ram thu puangtu a lo ni ta a ni.
13. Matthaia 6:9-13-a min kawhhmuh angin, kan ṭawngṭainaa kan telh theih thupui inâwm ṭhenkhat chu engte nge ni?
13 Kan ṭawngṭainate Pathianin lâwm taka a lo ngaihthlâk theihna tûrin engte nge kan sawi tel theih? Isua Krista’n a zirtîrte hnênah ṭawngṭai dân tûr a zîrtîr a. Matthaia 6:9-13-a chhinchhiah ṭawngṭai dân tûrah hian dik taka ṭawngṭaia kan dîl theih tûr thupuite chu a târlang a ni. Kan ṭawngṭainaah eng nge kan ngaih pawimawh ber ang? Pathian Jehova hming leh a Ram chu kan ngai pawimawh ber tûr a ni. Tisa lam mamawhte dîl chu a âwm hle bawk a. Kan sualte ngaihdamna te, thlêmnate leh mi sual, Diabol-Setana laka chhan chhuahna te kan dîl hi a pawimawh bawk a ni. Isua chuan he ṭawngṭaina thu hi chham zâwl âwt tûrin emaw, a awmzia pawh ngaihtuah lova chhama sawi nawn sawi nawn tûrin emaw min duh lo. (Matthaia 6:7) Naupangin a pa a biak apianga thu ngai hlîr a sawi chuan an inlaichînna chu eng ang inlaichînna nge ni ang?
14. Dîlna ṭawngṭaina bâkah hian eng ṭawngṭainate nge kan hlan ang?
14 Dîlna leh thinlung taka ṭawngṭaia ngenna bâkah, fakna leh lâwmthu sawi ṭawngṭainate kan hlân tûr a ni. (Sâm 34:1; 92:1; 1 Thessalonika 5:18) Mi dangte tân pawh kan ṭawngṭai thei bawk a ni. Natna emaw, tihduhdahna emaw tuartu thlarau lama kan unaute chungchânga ṭawngṭainate chuan anmahni kan ngaihsak tih a lantîr a, chutiang ngaihsakna kan sawi chhuah chu Jehova’n lâwm takin a lo ngaithla a ni. (Luka 22:32; Johana 17:20; 1 Thessalonika 5:25) Tirhkoh Paula hian: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin a lo ziak a ni.—Philippi 4:6, 7.
TAWNGTAI FAN FAN RAWH U
15. Kan ṭawngṭainate chhân ni lo anga a lan chuan eng nge kan hriat reng tûr?
15 Pathian chungchângah hriatna i nei chho zêl chung pawhin, i ṭawngṭainate chu engemaw châng chuan a chhâng lo che niin i ngai mai thei. Hei hi a chhan chu ṭawngṭaia i dîl taka kha Pathianin chhân hun a la tih loh vâng a ni thei a ni. (Thuhriltu 3:1-9) Jehova chuan thil awm dân chu hun engemawti chhûng inchhunzawm zêl a phal thei a, mahse ṭawngṭainate chu a chhâng ngei a, a chhân hun ṭha ber pawh a hria a ni.—2 Korinth 12:7-9.
16. Engvângin nge kan ṭawngṭai fan fan ang a, hei hian Pathian nêna kan inlaichînna engtin nge a khawih danglam theih?
16 Kan ṭawngṭai fan fanna chuan Pathian hnêna kan thil sawite chu thinlung takin kan ngaihsak a ni tih a târlang a ni. (Luka 18:1-8) Entîr nân, chak lohna engemaw hneh thei tûra min ṭanpui tûrin Jehova kan dîl thei a. Ṭawngṭai fan fanin leh kan dîlnate nêna inmila thil tiin, kan tih tak zetzia kan lantîr a ni. Kan dîlnaah chuan a nihna chiah chiah kan sawiin kan rinawm tûr a ni. Thlêmna kan tawh laiin nasa lehzuala ṭawngṭai hi a bîk takin a pawimawh a ni. (Matthaia 6:13) Sual tih châkna kan neih thunun tûra bei chunga kan ṭawngṭai zawm zêl chuan, Jehova’n min ṭanpui dân kan hmu ang. Hei hian kan rinna a siam ṭha ang a, amah nêna kan inlaichînna pawh a tinghet bawk dâwn a ni.—1 Korinth 10:13; Philippi 4:13.
17. Pathian rawngbâwlnaah rilru taka ṭawngṭaina aṭangin engtin nge kan hlâwkpui ang?
17 Pathian Jehova hnêna rawngbâwlna thianghlim kan hlannaah rilru taka ṭawngṭaina nêna kan tih ṭhin chuan, keimahni chaknain a rawng kan bâwl lo tih kan lo hria ang. Thil tipuitlingtu chu Jehova hi a ni. (1 Korinth 4:7) Hei hi kan pawm chuan mi inngaitlâwm ni tûrin min ṭanpui ang a, amah nêna kan inlaichînna pawh a tipung bawk ang. (1 Petera 5:5, 6) Ṭawngṭai fan fan tûrin chhan ṭha tak tak kan nei a ni. Ṭhahnemngai taka kan ṭawngṭainate leh, hmangaihtu vâna kan Pa hnaih theih dân kan hriatna hlu tak hian kan nunah hlimna tak tak a thlen dâwn a ni.
THIL KHINGBAI NI LO JEHOVA NENA INBIAK PAWHNA
18. Engtin nge Pathian thusawi kan ngaihthlâk theih ang?
18 Pathianin kan ṭawngṭainate a ngaihthlâk kan duh chuan, a thusawi kan ngaithla tûr a ni. (Zakaria 7:13) Ani chuan a thuchahte chu Pathian thlarau hriattîr zâwlneite hmangin a thawn tawh lo va, thlarau zâwlna lam chite a hmang hek lo. (Deuteronomy 18:10-12) Mahse a Thu, Bible, hi zirin Pathian thusawi chu kan ngaithla thei a ni. (Rom 15:4; 2 Timothea 3:16, 17) Kan tâna ṭha tûr tisa lam chaw ei duhna kan nei ang chiahin, “thlarau lam hnutê, engmah pawlh loh chu châk rawh u,” tia fuih kan ni a. Pathian Thu hi ni tina chhiarin thlarau lam chaw ei duhna chu nei zêl ang che.—1 Petera 2:2, 3; Tirhkohte 17:11.
19. Bible-a i thil chhiar ngun taka chhût hi eng nge a hlâwkna?
19 Bible-a i thil chhiarte chu ngun takin chhût ang che. (Sâm 1:1-3; 77:11, 12) Chumi awmzia chu i thil chhiar chungchângte ngaihtuah zui tihna a ni. Hei hi chaw pai ṭawih nên i tehkhin thei ang a. I thil chhiarte chu i lo hriat tawhsate nêna zawm khâwmin thlarau lam chaw chu i pai ṭawih thei a ni. I thil chhiarin eng angin nge i nun a khawih danglam tih te ngaihtuah la, a nih loh leh, chu chuan Jehova mizia leh a thil tih dân chungchângah eng nge a târlan tih te ngaihtuah ang che. Chutianga mahnia Bible i zirna aṭang chuan Jehova pêk thlarau lam chaw chu i ei thei dâwn a ni. Hei hian Pathian a hnaihtîr lehzual ang chia, ni tina harsatna i tawhte pawh ching fel tûrin a ṭanpui ang che.
20. Kristian inkhâwmnaa tel ṭhinna hian Pathian hnaih tûrin engtin nge min ṭanpui?
20 Mipui hmaa Pathian Dân chhiar ngaithla tûra Israel mite pung khâwmin ngun taka an ngaithla ṭhîn ang chiah khân, Kristian inkhâwmnaa Pathian Thu an sawite chu ngaithlain amah chu i hnaih ve thei a ni. Chutih hun laia zirtîrtute chuan an Dân chhiar chu an hrilhfiah zêl a, chutiang chuan an thu chhiar ngaithlatute chu hre thiam tûr leh an hriatte chu a taka hmang tûra an thinlung khawih tûrin an ṭanpui a ni. Hei hian hlimna nasa tak a thlen a. (Nehemia 8:8, 12) Chuvângin Jehova Thuhretute inkhâwmnaah hian tel ve ṭhîn ang che. (Hebrai 10:24, 25) Hei hian Pathian hriatna chu hre thiam tûr leh i nuna a taka hmang tûrin a ṭanpui ang chia, hlimna a thlen bawk ang che. Khawvêl pum huap Kristian inunaunaa i tel vena chuan Jehova hnaiha awm reng tûrin a ṭanpui dâwn che a ni. Kan la hriat tûr angin, Pathian mite zîngah himna dik tak chu i hmu thei a ni.
I HRIATNA FIAH RAWH
Engvângin nge Jehova chu i hnaih ang?
Pathian hnaih tûra thil ṭûl ṭhenkhat chu engte nge ni?
I ṭawngṭainaah engte nge i telh theih?
Engvângin nge i ṭawngṭai fan fan ang?
Tûn laiah engtin nge Jehova thusawi i ngaihthlâk theih?
[Phêk 157-naa milem]