Bung 4
Isua Krista—Pathian Hriatna Kawng Chu
1, 2. Pathian hriatna kawng chu khawvêl sakhuaten engtin nge an khawih danglam?
KAWNGKA bulah dingin i chabite chuan kawng chu hawn i tum a. A vawtin a thim hle mai a, in chhûnga luh hlân pawh i nghâkhlel hle a—mahse kawng chu i hawng thei si lo. Chabi chu a dik niin a lang si a, mahse, tala chu a tihawng thei chuang lo. A va beidawnthlâk êm! I chabite chu i han en nawn leh a. A dik tak i hmang em? Mi tuin emaw i chabi chu a lo tichhia em ni ang?
2 Chu chu Pathian hriatna chungchânga he khawvêl sakhaw buainain thil a tih dân chu a ni. A awmzia chu, Isua Krista—Pathian hriatna min hriat thiamtîrtu kawng a nihna hi an khawih danglam tihna a ni. Sakhaw ṭhenkhat chuan chu kawng, Isua chu an hlamchhiah ṭhak a. A dangte chuan Isua dinhmun chu sawi danglamin Pathian Engkimtitheia angin an be bawk. Engpawh ni se, he mi pawimawh tak, Isua Krista hriatna dik tak kan neih loh chuan Pathian hriatna hi kan tân khâr tlat a ni.
3. Engvângin nge Isua hi Pathian hriatna kawng tia koh theih a nih?
3 Isua’n: “Hei hi chatuana nunna a ni, nang Pathian tak chauh leh i tirh Isua Krista hriat hi,” tia a sawi kha i hre chhuak leh mai thei a. (Johana 17:3) He thu a sawi hian Isua kha a chapo a ni lo. Krista hriatna dik tak neih a ṭûlzia hi Pathian Lehkhathuin uar takin a sawi nawn a sawi nawn a ni. (Ephesi 4:13; Kolossa 2:2; 2 Petera 1:8; 2:20) Tirhkoh Petera chuan, “A [Isua Krista] chanchin hi zâwlnei zawng zawngin an hriattîr ṭhîn,” a ti a. (Tirhkohte 10:43) Tirhkoh Paula pawhin: “Finna leh hriatna ro zawng zawng thuhrûkna Krista chu,” tiin a ziak a ni. (Kolossa 2:2,3) Paula vêkin Isua avângin Pathian thutiam zawng zawngte chu a thleng dik zêl a ni tih a sawi bawk. (2 Korinth 1:20) Chuvângin Pathian hriatna kawng dik tak chu Isua Krista hi a ni. Isua kan hriatna chu a nihna leh Pathian ruahmannaa a chanvo chungchânga ngaihdân herh danglamte lakah a fihlîm tûr a ni. Mahse, engvângin nge Isua hnungzuitute hian ani chu Pathian thil tumah a bul ṭhut pawimawh tak nia an ngaih?
THUTIAM MESSIA CHU
4, 5. Messia-ah eng beiseinate nge innghat a, Isua zirtîrten amah chu eng angin nge an ngaih?
4 Mi rinawm Abela hun aṭang tawh khân Pathian chhiahhlawhte chuan Pathian Jehova ngeiin a lo sawi lâwk tawh Chi Thlah lo awm tûr chu nghâkhlel takin an thlîr a. (Genesis 3:15; 4:1-8; Hebrai 11:4) Chi Thlah chuan Messia angin Pathian thil tumte chu a tihlawhtling dâwn tih târlan a ni tawh a. Messia tih chu “Hriak Thiha” tihna a ni. Ani chuan “sualna a titâwp” ang a, a Ram ropuizia pawh sâm-ah hian sawi lâwk a ni. (Daniela 9:24-26; Sâm 72:1-20) Messia chu tu tak ni ang maw?
5 Juda tlangvâl Andria’n Nazaret Isua thusawi a ngaihthlâk laia a phûr tûrzia kha lo mitthla teh. Andria chu a unaupa Simon Petera hnênah a tlân thuai a: “Messia kan hmu ta,” tiin a hrilh a ni. (Johana 1:41) Isua zirtîrte chuan ani chu thutiam Messia a nih ngei an ring tlat a. (Matthaia 16:16) Kristian dikte pawhin Isua chu sawi lâwk tawh Messia emaw, Krista emaw a nih ngei an rin tlat avângin an nun chân hial an ngam bawk a ni. Eng finfiahna nge an lo neih? A chianna kawng thum i lo ngaihtuah ho vang u.
ISUA CHU MESSIA A NI TIH A CHIANNA
6. (a) Thutiam Chi Thlah chu eng chhûngkaw inthlah chhâwng aṭangin nge a lo pian ang a, chu chhûngkaw thlah aṭang chuan Isua a lo piang tih engtin nge kan hriat theih? (b) Engvângin nge C.E. 70 hnu lama nungdama awm tu tân mah Messia nia inchhâlna rêng rêng fiah theih a nih loh?
6 Isua pian leh mûrna hi thutiam Messia a ni tih thliar hranna hmasa ber a ni. Jehova’n A chhiahhlawh Abrahama hnênah a thlah aṭangin thutiam Chi Thlah chu a lo pian tûr thu a hrilh a. Abrahama fapa Isaka, Isaka fapa Jakoba, leh Jakoba fapa Juda te khân chu thutiam tho chu an dawng ṭheuh va. (Genesis 22:18; 26:2-5; 28:12-15; 49:10) Kum zabi tam tak hnua Lal Davida hnênah a chhûngkaw thlah aṭangin he Mi hi a lo pian tûr thu hrilh a nih khân, Messia thlahtute chu a chiang lehzual ta a ni. (Sâm 132:11; Isaia 11:1, 10) Matthaia leh Lukate Chanchin Ṭha ziak hian chu chhûngkaw thlah kal zêl aṭang chuan Isua chu a lo piang a ni tih a nemnghet a ni. (Matthaia 1:1-16; Luka 3:23-38) Isua’n hmêlma tam tak a nei naa, a hmêlmate tumahin mite hriat lâr tak a thlahtute chungchâng hi an sawi buai lo. (Matthaia 21:9, 15) Chuvângin, a pian leh mûrna chu rinhlelh rual a ni lo tih a chiang a ni. Mahse, Rom sipaiten C.E. 70-a Jerusalem an chhut chhiat khân Juda chhungkaw chhinchhiahna awmte chu an tichhe vek a. Chu mi hnuah chuan, thutiam Messia nia inchhâlna dang rêng rêng tuman an finfiah thei tawh lo.
7. (a) Isua chu Messia a ni ngei tih a chianna pahnihna chu eng nge ni? (b) Mika 5:2 hi Isua chungchângah engtiangin nge a famkim?
7 Hrilh lâwkna thleng famkim hi a chianna pahnihna chu a ni. Hebrai Pathian Lehkhathua hrilh lâwkna tam tak chuan Messia nun kawng lan dân hrang hrang a sawifiah a. Zâwlnei Mika chuan Bethlehem khaw tlâwm takah he rorêltu ropui tak hi a lo pian tûr thu B.C.E. kum zabi pariatnaah a lo sawi lâwk a. Israel ramah hian Bethlehem hming pu khaw pahnih a awm a, mahse, he hrilh lâwkna hian khawi khua zâwk nge tih a sawi chiang a: Lal Davida pianna khua, Bethlehem Ephratha-ah a ni. (Mika 5:2) Isua nu leh pa, Josefa leh Marite chu, Bethlehem hmâr lam kilometer 150-a hla Nazaret khuaah an chêng a. Amaherawhchu, Mari nau pai laiin, Rom lal Kaisara Awgusta’n mi zawng zawng chu anmahni khua ṭheuhva an hming ziak tûrin thu a pe a.a Chuvângin, Josefa chuan a nupui rai ṭeuh chu Bethlehemah a hruai a ṭûl ta a, chutah chuan Isua chu a lo piang ta a ni. —Luka 2:1-7.
8. (a) “Hapta” 69 hi engtikah nge a inṭan a, eng thil thleng aṭangin nge a inṭan? (b) “Hapta” 69 hi engtia rei nge ni a, a lo tâwp khân eng nge thleng?
8 B.C.E. kum zabi paruknaah, zâwlnei Daniala chuan, Jerusalem din thar leh sa ṭha tûra thupêk a chhuah hnu “hapta” 69-ah “Hotu Messia” a lo lan tûr thu a sawi lâwk a. (Daniela 9:24, 25) Heta “hapta” khat hi kum sarih zêla rei a ni.b Bible leh khawvêl thil thleng chanchina inziak angin, Jerusalem sa ṭha leh tûra thupêk chhuah hi B.C.E. 455-ah a ni a. (Nehemia 2:1-8) Chuvângin, B.C.E. 455 aṭanga chhiara kum 483 (69 vawi 7) hnu-ah Messia chu lo lang tûr a ni ta a ni. Chu chu C.E 29, Jehova’n thlarau thianghlima Isua hriak a thih kum tak kha a ni a. Tichuan Isua chu “Krista” (“Hriak Thiha” tihna a ni) emaw, Messia emaw a lo ni ta a ni.—Luka 3:15, 16, 21, 22.
9. (a) Sâm 2:2 hi engtin nge a famkim? (b) Isua chunga thleng famkim hrilh lâwkna ṭhenkhat dang chu engte nge ni? (chart en rawh)
9 Isua chu thutiam Messia a ni tih mi zawng zawngin an pawm vek lo va, hei hi Pathian Lehkhathu pawhin a lo sawi lâwk a ni. Sâm 2:2-a ziak angin, Lal Davida chu: “Leia lalte an hel a, hotute pawhin LALPA leh a hriak thiha chu an phiar hlawm a,” tia sawi lâwk tûrin Pathian thlarauva thuam a ni a. He hrilh lâwkna hian Jehova Hriak Thiha emaw, Messia emaw chu do tûrin ram pakhat aia tama hotute chu an insuihkhâwm dâwn tih a entîr a ni. Chutiang tak chuan a lo thleng ta a. Juda sakhaw hruaitute, Lal Heroda te, Rom mi ram awptu pakhat Pontia Pilata-te chuan Isua thihna chungchângah inhnamhnawihna an nei ṭheuh va. Chumi aṭang chuan tûn hmaa lo inhmêlmâk ṭhîn Heroda leh Pilata-te chu ṭhian ṭha tak an lo ni ta a ni. (Matthaia 27:1, 2; Luka 23:10-12; Tirhkohte 4:25-28) Isua hi Messia a nih ngeizia finfiahna dang leh atân chuan, “Messia Chungchânga Hrilh Lâwkna Langsâr Ṭhenkhatte” tih thupui hmanga chart siam hi khawngaih takin en ang che.
10. Jehova’n Isua chu a thutiam Hriak Thiha a nihzia eng kawngtein nge a nemngheh?
10 Pathian Jehova’n a nemnghehna hi Isua Messia nihna a chianna pathumna a ni. Isua chu thutiam Messia a nihzia mite hriattîr tûrin Jehova’n vântirhkohte a tîr a. (Luka 2:10-14) Dik takin, Isua leia a awm lai pawh khân amah Jehova ngeiin vân aṭanga thu rawn sawiin, Isua a pawmzia a sawi chhuak a ni. (Matthaia 3:16, 17; 17:1-5) Pathian Jehova chuan Isua chu thilmak tih theihna a pe a. Hêng thilmak tinte hian Isua chu Messia a nih ngeizia a finfiah a ni, a chhan chu Pathianin Messia lema chang hnênah thilmak tih theihna a pêk dâwn loh avângin. Jehova chuan a thlarau thianghlim chu Chanchin Ṭha ziakte thâwk khum nân a hmang a, chu chu Isua Messia nihna a chianna hi, lehkhabu lehlin tam ber leh sem chhuah tam ber, Bible-a a tel ve theih nân a ni.—Johana 4:25, 26.
11. Isua chu Messia a ni ngei tih a chianna engzât nge awm?
11 A zavaiin, hêng a chianna ṭhen hrang hrangahte hian Isua hi thutiam Messia anga thliar hrangtu thudik za tam tak a awm bawk a. Chuvângin, Kristian dikte chuan ani chu ‘a chanchin zâwlnei zawng zawngin an hriattîr’ ṭhina kha a ni tih leh Pathian hriatna kawng a ni tih dik takin an pawm a ni. (Tirhkohte 10:43) Mahse, Isua Krista hi Messia a nihzia thu chauh ni lovin a chanchin hi zir tûr tam tak a la awm a ni. Khawi aṭangin nge a lo chhuah? Eng ang mi nge a nih?
ISUA MIHRING A NIH HMAA A AWMNA
12, 13. (a) Isua chu leia a lo kal hmain vânah a awm tawh a ni tih engtin nge kan hriat theih? (b) “Thua” chu tu nge ni a, mihring a nih hmain eng nge a tih?
12 Isua nun kawng hi chhâwng thumin a ṭhen theih ang a. A chhâwng hmasa ber chu leia a lo pian hma hun rei tawh takah khân a lo inṭan tawh a ni. Mika 5:2 chuan Messia lo chhuahna chu “hmasâng ata, chatuan aṭangin a ni,” tiin a sawi. Isua pawhin “chung lama” chhuak a ni tih a sawi a, chu chu vân aṭangin tihna a ni. (Johana 8:23; 16:28) Leia a lo kal hmain vânah engtia rei nge a lo awm tawh?
13 Isua chu Jehova’n amah ngeiin a siam a nih avângin Pathian “Fapa mal neih chhun” tia koh a ni a. (Johana 3:16) “Thilsiam zawng zawnga piang hmasa ber” a nih angin, chutih lai chuan Isua chu Pathianin thil dang zawng zawng siamtu atân a hmang a ni. (Kolossa 1:15; Thu Puan 3:14) Johana 1:1 chuan, “Thua” (Isua mihring a nih hmaa a hming) chu “atîrin” Pathian hnênah a awm tih a sawi a. Chuvângin, Thua chu “lei leh vân” siam a nih lai khân Jehova hnênah a awm a ni. Pathianin: “Kan anpuiin . . . mihring siam ila,” a tih khân Thua a bia a ni. (Genesis 1:1, 26) Chutiang bawkin, Thufingte 8:22-31-a mihring anga a sawi finna, Jehova kianga thil zawng zawng siam hna thawktu, Pathian duhtak “mi themthiam” chu Thua hi a ni ngei ang. Pathian Jehova’n awm tûra a siam hnuin, Thua chu mihring ni tûra leia a lo kal hma zawng chu vânah Pathian hnênah kum tam tak a lo khawsa tawh a ni.
14. Engvângin nge Isua chu “hmuh theih loh Pathian anpui” tia koh a nih?
14 Chuvângin, Kolossa 1:15-in Isua chu “hmuh theih loh Pathian anpui” tia a sawi pawh hi a mak lo ve! Kum chhiar sên loh inpawh taka an lo awm dun tawh avângin Fapa thuawih tak chu a Pa, Jehova ang a lo ni ta a. Hei hi Isua chu nunna pe thei Pathian hriatna kawng a nihna chhan dang leh chu a ni. Isua’n leia a thiltih zawng zawng kha Jehova pawhin a tih ve dân tûr chiah chiah a ni. Hemi avâng hian Isua hriat chu Jehova kan hriatna tihpun zêlna a ni bawk. (Johana 8:28; 14:8-10) Chuvângin, Isua Krista chanchin tam lehzual zir hi a pawimawh êm êm tih a chiang hle a ni.
LEIA ISUA NUN KAWNG
15. Engtin nge Isua chu nausên ṭha famkimah a lo pian?
15 Isua nun kawng chhâwng hnihna chu he leiah hian a ni a. Pathianin Juda nula thianghlim leh rinawm Mari chhûlah a nunna a sawn khân ani chu thinlunga duh takin a inpe a. Jehova thlarau thianghlim chak tak emaw, a thiltihtheihna emaw chuan Mari chu a ‘hliahkhuh’ a, tichuan nau a lo pai a, a tâwpah nausên ṭha famkim a rawn hring ta a ni. (Luka 1:34, 35) A nunna lo chhuahna Bul chu a ṭhat famkim avângin, Isua chuan famkim lohna a rochung ve lo. Isua chu thingrem siam mi Josefa fapa angin chhûngkaw tlâwm takah enkawl seilen a ni a, unau rual tak zîngah a upa ber a ni.—Isaia 7:14; Matthaia 1:22, 23; Marka 6:3.
16, 17. (a) Thilmak tih theihna hi Isua’n khawi aṭangin nge a dawn a, a thilmak tihte zînga ṭhenkhat chu engte nge ni? (b) Isua lantîr mize ṭhenkhat chu engte nge ni?
16 Pathian Jehova laka Isua’n inpêkna thûk tak a neih chu kum 12-a upa a lo nih chuan chiang takin a lang tawh a. (Luka 2:41-49) A lo ṭhanlena kum 30 mi nia a rawngbâwlna a ṭan hnuin, Isua chuan a mihringpuite hmangaihna thûk tak a lantîr bawk a ni. Pathian thlarau thianghlimin thilmak ti thei tûra a han thuam chuan, damlo te, ke bai te, piangsual te, mitdel te, bengngawng te, phâr te chu lainat takin a tidam a. (Matthaia 8:2-4; 15:30) Isua chuan mipui rilṭâm sâng tam tak a hrai tlai bawk a. (Matthaia 15:35-38) A ṭhiante tithlabârtu thlipui hlauhawm tak chu a tireh bawk a. (Marka 4:37-39) Dik takin, mitthite pawh a kaitho hial a ni. (Johana 11:43, 44) Hêng thilmakte hi mihringte chanchina thu dik awm nghet tlat a ni a. Isua hmêlmate ngei pawhin “thilmak tam tak a ti” tih chu an pawm a ni.—Johana 11:47, 48.
17 Isua chuan Pathian Ram chanchin mite zirtîrin a pianna ram chu a fang chhuak a. (Matthaia 4:17) A âwm tâwka thil tihna kawngah leh dawhtheihna kawngah entawn tûr ṭha ber a siam bawk. A zirtîrte a beisei anga an awm loh pawhin, anmahni hre thiam takin: “Thlarau zawngin a peih a, tisa erawh chu a chak lo a ni,” a ti a. (Marka 14:37, 38) Chuti chung chuan, mi hnuaihnung hnehchhiahtute leh thutak hmusittute lakah Isua chu a huaisenin a tlang hrâk mai a ni. (Matthaia 23:27-33) Hêng zawng zawng ai mahin, a Pa hmangaihna hi famkim takin a entawn a ni. Mihring famkim loten hmabâk beisei tûr an neih theih nân Isua chuan thih hial pawh a hnial lo. Chuvângin, Isua hi Pathian hriatna kawng chu a ni tia kan sawi hi a mak lo ve! Ni e, ani chu kawng nung a ni! Mahse, engvângin nge kawng nung kan tih? He zawhna hian a nun kawng chhâwng thumnaah min hruai thleng ta a ni.
VAWIIN NIA ISUA
18. Vawiin nîah Isua Krista chu eng angin nge kan mitthla ang?
18 Bible-in Isua thih thu sawi mah sela tûnah chuan a nung a ni! Dik takin, C.E kum zabi pakhatna hun laia mi za engemaw zât chu Isua a tho leh a ni tih thudik mit ngeia hmutute an ni a. (1 Korinth 15:3-8) Hrilh lâwk tawh angin, chuta chinah chuan a Pa dinglamah a ṭhu a, lal thuneihna a chan hun tûr chu vânah a nghâk ta a ni. (Sâm 110:1; Hebrai 10:12, 13) A nih leh Isua chu vawiin nîah hian eng angin nge kan mitthla ang? Ran chaw pêkna thlênga mû, nausên engmah ti thei lo angin kan ngai tûr em ni? A nih loh leh mihring thi tûra na tak tuar lai angin em ni kan mitthla ang? Ni lo ve. Ani chu Lalber chak tak leh rorêl lai a ni! Tûn aṭanga rei lo têah, buainaa khat kan awmna leiah hian a rorêlna chu a rawn lantîr dâwn a ni.
19. Nakin lawkah Isua’n eng nge a tih dâwn?
19 Thu Puan 19:11-15-ah chuan, Lal Isua Krista chu mi sualte tiboral tûra thiltihtheihna nasa tak nêna lo kal angin chiang taka sawi a ni a. He hmangaihnaa khat vân Rorêltu hian vawiin nîa mihring vaibêlchhe tam tak tichi-aitu tawrhnate hi tihtâwp a va han châk tawh dâwn êm! Chutiang bawkin leia a awm laia entawn tûr ṭha famkim a lo hnutchhiah chu entawn tuma theihtâwp chhuahtute chu ṭanpui a châk êm êm bawk a ni. (1 Petera 2:21) Isua’n anni chu vân Pathian Ram tâna lei khua leh tui nia chatuana an nun theih nân, Armageddon tia sawi ṭhin, “Pathian Engkimtitheia indona ni ropui” lo thleng thuai tûr lakah hian humhim a duh a ni.—Thu Puan 7:9, 14; 16:14, 16.
20. A Kum Sâng Rorêl chhûngin Isua’n mihringte tân eng thil nge a tih ang?
20 Hrilh lâwk anga Isua remna Kum Sâng Rorêl chhûngin ani chuan mihring zawng zawng tân thilmak a ti dâwn a ni. (Isaia 9:6, 7; 11:1-10; Thu Puan 20:6) Isua’n natna tinrêng a tidam ang a, thihna pawh a tibo hlen tawh ang. Mi tlûklehdingâwn tam takte chu he leia chatuana nung tûra hun remchâng an neih ve theih nân a kaitho leh dâwn a ni. (Johana 5:28, 29) Bung tâwp lama a Messia Ram chungchâng tam lehzuala zir pawh i phûr ngei ang. Hei hi chiang ngam ang che: Ram awpna hnuaiah chuan eng ang takin nge kan nun a ropui dâwn tih hi kan suangtuah phâk lo. Isua Krista hriat chian lehzual hi a va pawimawh tak êm! Ni e, chatuan nunnaa hruaitu Pathian hriatna kawng nung, Isua hi englai maha kan theihnghilh loh hi a pawimawh tak meuh a ni.
[Footnote-te]
a Hetianga hming an ziah hian Rom sawrkâr tân chhiahkhawn a awlsam phah a. Hemi avâng hian, Awgusta chuan ‘ram ropuinaa chhiahkhawntu kal tlangtîrtu’ tûr rorêltu pakhat chungchânga hrilh lâwkna hi famkim tûrin hre miah lovin a lo ṭanpui a ni. Chu hrilh lâwkna vêk chuan “thuthlung Hotu,” emaw Messia chu he rorêltu rawn thlâktu lal laiin “keh sawmin” a awm dâwn tih a sawi lâwk bawk a. Isua chu Awgusta hnua lal, Tiberia lal laiin tihhlum a ni ta a ni.—Daniela 11:20-22.
b Hmasâng Juda-te chuan a tlângpui thuin kum hi hapta angin an chhiar deuh ber a. Entîr nân, ni sarih nî apiang chu chawlhni a ni a, kum sarih kum apiang chu chawlh kum a ni.—Exodus 20:8-11; 23:10, 11.
I HRIATNA FIAH RAWH
Isua pian leh mûrna hian Messia a nihzia engtin nge a thlâwp?
Isuaa thleng famkim Messia chungchânga hrilh lâwkna ṭhenkhat kha engte nge ni?
Pathianin Isua chu a Hriak Thiha a ni tih amah ngeiin engtin nge a lantîr?
Engvângin nge Isua hi Pathian hriatna kawng nung a nih?
[Phêk 37-naa chart]
MESSIA CHUNGCHANGA HRILH LAWKNA LANGSAR THENKHATTE
HRILH LAWKNA THIL THLENG FAMKIMNA
A NAUPAN LAI NUN
Isaia 7:14 Nula thianghlim lakah a piang Matthaia 1:18-23
Jeremia 31:15 A pian hnuah nausên tam tak thah an ni Matthaia 2:16-18
A RAWNGBAWLNA
Isaia 61:1, 2 Pathian aṭanga Luka 4:18-21
mawhphurhna a neih
Isaia 9:1, 2 Rawngbâwlna chuan mite êng Matthaia 4:13-16
ropui tak a hmuhtîr
Sâm 69:9 Jehova in tân Johana 2:13-17
ṭhahnem a ngai
Isaia 53:1 Amah an ring lo Johana 12:37, 38
Zakaria 9:9; Sabengtung no chunga Matthaia 21:1-9
chuangin Jerusalem
Sâm 118:26 a lût; Jehova hminga
lal lo kal angin
chawimawi a ni
AMAH PHATSANNA LEH A THIHNA
Sâm 41:9; 109:8 Tirhkoh pakhat a rinawm lo; Tirhkohte 1:15-20
Isua a phatsan a, a hnuah
a aiawh lâk a ni
Zakaria 11:12 Tangka 30-in phatsan Matthaia 26:14, 15
a ni
Sâm 27:12 Hretu derte a lakah hman an ni Matthaia 26:59-61
Sâm 22:18 A kawr atân ṭhum an vâwr a Johana 19:23, 24
Isaia 53:12 Mi sualte zîngah chhiar tel ve a ni Matthaia 27:38
Sâm 22:7, 8 A thih dâwn ṭêpah deusawh a ni Marka 15:29-32
Sâm 69:21 Uain thûr an pe Marka 15:23, 36
Isaia 53:5; Feia chhun a ni Johana 19:34; 37
Zakaria 12:10
Isaia 53:9 Mi hausa thlânah phûm a ni Matthaia 27:57-60
Sâm 16:8-11, A ṭawih hmain kaihthawh leh a ni Tirhkohte 2:25-32;
hrilhfiahna. 13:34-37
[Phêk 35-naa milem]
Pathianin Isua chu damlote tihdam theihna a pe