Ṭhen 7
Helna Rah Chhuah Eng Nge Ni?
1-3. Hun hian Jehova dikzia engtin nge a tihfiah?
RORÊL tûra Pathian dikna chung thuah, kum zabi kal ta zawng zawnga Pathian laka inla hranga mihringte rorêlna rah chhuah chu eng nge ni? Mihringte hian Pathian aia rorêltu ṭha zâwk an nihzia an tifiah em? Mihringin mihring chunga râwng taka thil a lo tih ṭhin dân aṭanga kan chhût chuan, a hnai lo hle a ni.
2 Kan nu leh pa hmasa berten Pathian rorêlna an han hnâwl chuan, vânduaina râpthlâkin a zui ta nghâl a. Anmahni chungah leh an thlah zêlte chungah tuarna an thlen ta a ni. Anmahni bâk chu tumah dem tûr chuang an nei lo. Pathian Thu chuan: “Ṭha lo takin a chungah an ti a; a fate an ni lo, an sawisêl kaina a ni,” tiin a sawi.—Deuteronomy 32:5.
3 Thil thleng tawhte hian, Pathian ruahman lâwkna aṭanga an tawlh sawn chuan, chhiat lam panin a tâwpah an thi ang tia Pathianin Evi leh Adama a lo vaukhânna dikzia a tilang a ni. (Genesis 2:17; 3:19) Pathian rorêlna hnuai aṭangin an tawlh sawn ngei a, a hunah chuan chhiat lam panin an thi ta ngei a ni.
4. Engvângin nge kan vai hian ṭha famkim lo, natna leh thihna tuar tûr rênga kan lo pian?
4 A hnua an thlahte zawng zawng chunga thil thleng chu Rom 5:12-a: “Chutichuan, mi pakhat [Adama, mihring chhûngkaw lû ber] avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tia a sawi ang hi a ni. Tichuan kan nu leh pa hmasa berte Pathian enkawlna dodâla an hel chuan, ṭha famkim lo mi sual an lo ni ta a. Inthlahchhâwnna dânte nêna inrem takin, an ṭhat famkim lohna chauh chu an thlahte an rochun theih a lo ni ta a ni. Chumi avâng chuan kan vai hian ṭha famkim lo, thihna leh natna tuar tûr rêngin kan lo piang a ni.
5, 6. Remna leh hausakna tak tak thlen tûra mihring beihna hi thil thleng tawhin eng nge a tihlan?
5 Kum zabi tam tak a liam ta. Lalber awp ram zau takte an lo awm a, an bo leh a. Rorêlna an ngaihtuah chhuah theih ang chi apiang an chhin a. Chuti chung pawhin, mihring chhûngkaw chungah chuan thil râpthlâk tak tak a lo thleng nawn leh si ṭhîn a ni. Kum sâng ruk hnuah chuan, mihringte chu lei pumpuia muanna, dikna leh hausaknate din thei tûr khawpin hma an sâwn anga, tûnah chuan ngilneihna, khawngaihna leh thawhhona hlutna te an hre bel hle tawh tûrah miin a lo ngai mai thei.
6 A tak takah erawh chuan a letling chiah a ni thung si. Mi zawng zawng tâna muanna leh hlawhtlinna dik tak chu mihringte ruahman eng sawrkâr mah hian a la thlen lo a ni. Tûn kum zabi 20-naah chauh pawh hian, mihring suat hun laia mi nuai tam tak thah an nih dân leh indonaa mi vaibêlchhe sâwm aia tam thah an nihziate kan hmu a. Kan hunah pawh hian mipui chhiarsên lohte chu khawvêl rorêlna ngaihdân ṭâwmpui loh leh duh dân danglamna avânga nghaisak, râwng taka thah leh lungina khung an ni.
Tûnlai Dinhmun
7. Tûnlai mihring chhûngkaw dinhmun hi engtianga hrilhfiah theih nge?
7 Chu bâkah, tûnlai mihring chhûngkaw pumpui dinhmun hi han ngaihtuah teh. Dân bawhchhiatna leh dik lo taka tharum thawhna te chu khuahkhirh sên pawh a ni lo. Ruihhlo hman dik lohna lah chu tlâng hrilêng a ni ringawt mai a. Mipat hmeichhiatna hman aṭanga natna kaichhâwn chite lah chu khawvêl puma hrilêng a ni si a. Natna râpthlâk AIDS chuan mi maktaduai tam tak a khawih bawk a. Mi tlêmtêin hausakna nasa tak an neih laiin, kumtinin mi vaibêlchhe tam takte chu rilṭâmin emaw natna vângin emaw an thi bawk a. Mihringte hian lei hi an tibawlhhlawhin an rawk a. Chhûngkaw nun leh nun dân ṭha hlutnate chu khawi hmunah pawh a tlachhe tawh a ni. Dik takin, tûn lai nun hian Setana, “he khawvêl pathian” rorêlna tuitang lo tak hi a lantîr a ni. Hotu a nihna khawvêl hi nêlawm lo tak, lainatna awm lo leh sualina a dai kim êm êm a ni.—2 Korinth 4:4.
8. Mihringte hlawhtlinnate hi engvângin nge hmasâwnna dik tak a ni kan tih theih loh?
8 Pathianin mihringte chu an finna thil leh tisa thila an hmasâwnnaa an tawngsân ber thleng thei tûrin hun tam tâwk a phal sak a. Mahse silai puakrang te, tank te, bomb thlâktu thlawhna chak chi te, leh nuclear râlthuamten thal ngul leh thal an han thlâk ta hi hmasâwnna dik tak a ni em ni? Vân boruak sângah mite zin thei mah sela leiah inrem taka an chên ho theih si loh chuan hmasâwnna a ni em ni? Miten zâna kawtthlêra kal an hlauh emaw, chhûnah pawh hmun ṭhenkhata kal an hlauh tlat hian hmasâwnna a ni em ni?
Hunin A Lantîr Tawhte
9, 10. (a) Kum za tam tak liam tate khân chiang takin eng nge an lantîr? (b) Engvângin nge Pathianin zalên taka duhthlan theihna hi a lâkbo dâwn loh?
9 Kum za tam tak fiahnain a lo lantîr chu eng nge tih chuan Pathian rorêlna aṭanga inla hranga mahni pheikhai hlawhtling taka hruai hi mihringte tân a theih loh a ni tih hi a ni. Ei leh in leh thaw lova an nung thei lo ang bawkin chu chu an tân tih theih a ni lo a ni. A fiahna chu a chiang a ni: Chaw, tui leh boruak ring tûra siam kan ni tih a chiang ang chiah hian kan Siamtu kaihhruaina ring tûra duan kan ni.
10 Sualna awm phalin Pathian chuan a vawikhatna leh kumkhua atân zalên taka duhthlan theihna hman dik lohin a rah chhuah lungngaihthlâk tak takte a entîr a ni. Zalên taka duhthlan theihna chu thilthlâwnpêk hlu tak a nih avângin mihringte lâkbo sak aiin Pathian chuan dik lo taka hman awmzia an hriat hi a phal sak a ni. Pathian Thuin: “Tungchhova kal mihringah hian, a pheikhai hruai tûr a awm lo,” a tih hian thu dik tak a sawi a ni. “Mi, mi dang chungah pawi khawpin a intilal ṭhîn,” a tih pawh hian thu dik tho a ni.—Jeremia 10:23; Thuhriltu 8:9.
11. Mihring rorêlna eng chi ber emaw tal hian tuarna a nuai bo em?
11 Pathianin mihringte kum sâng ruk chhûng rorêl a phalna hian mihringin tuarna an tihreh theih lohzia hi sawi loh theih lohvin a rawn sawifiah a ni. Engtikah mah a thei dâwn bawk hek lo. Entîr nân, Israel Lal Solomona khân a hun lai khân a finna, hausakna, leh thiltihtheihna zawng zawng nên pawh mihring rorêlna avânga hrehawmna leh lungngaihna awm ṭhîn chu a tifel thei bik lo a ni. (Thuhriltu 4:1-3) Chutiang bawkin, kan tûnlai khawvêl hruaitute hian, thiamna thar changkâng ber ber nên pawh tuarna hi an nuai bo thei lo a ni. Chu bâka chhe lehzual chu, thil kal tawh hian mihringte Pathian rorêlna laka an inlâk hran avâng hian tuarna hian bo aiin pun lam a pan zâwk a ni tih a lantîr a ni.
Pathian Thlîrna Thui Tak
12-14. Pathianin tuarna awm a phal avângin eng hlâwkpuina thui tak nge lo thleng?
12 Pathianin tuarna awm a phal hi kan tân chuan a hrehawm a. Mahse a hnu daiha rah ṭha lo thleng tûr chu hre rengin, thui tak a lo thlîr lâwk a ni. Pathian thlîrna chu kum tlêmtê emaw, sâng tlêmtê chauh emaw pawh ni lo, mahse kum nuai tam tak, chatuan atân thilsiamten an hlâwkpui dâwn a ni.
13 Hun lo la awm tûrah chuan mi tu emawin zalên taka duhthlan theihna hmang sualin Pathian thiltih dân kawng lo sawi buai ta ang se la, a ngaihdân fiah nân hun pêk a ṭûl tawh lo vang. Kum sâng tam tak helho a lo phal sak tawh hnuah, Pathian chuan khawvel khawi lai hmunah pawh chatuan atâna hman theih tûr dân a din ta a ni.
14 Jehovan tûn lai hun thlenga sualna awm a phalna hian, amah nêna inremna awm lo thil engmah a hlawhtling thei lo a ni tih chiang tâwka fiah a ni tawh ang a. Mihringte emaw thlarau mite emaw ruahmanna hrang engmah hian hlâwkna tluantling a thlen thei lo a ni tih chu rinhlelh rual loh a ni tawh ang a. Tichuan, Pathian chu thu âwih lo tupawh rang taka tiboral tûr a nihzia a lang fiah tawh dâwn a ni. “Mi suaksual erawh chu a tiboral vek ang.”—Sam 145:20; Rom 3:4.
[Phêk 15-naa milem 15]
Kan nu leh pa hmasa berten Pathian aṭanga inlâk hran an thlan hnu chuan, an lo tarin a tâwpah an thi ta a ni
[Phêk 16-naa milemte]
Pathian aṭanga a hranga mihring rorêlna chu a lungngaihthlâkzia a chiang hle a ni
[Milem Hawhtîrtu]
U.S. Coast Guard photo