Ṭhen 6
Pathianin Tuarna Awm A Phalna Chhan
1, 2. Kan nu leh pa hmasa berten Pathianin bul ṭanna ṭha tak a pêk kha engtin nge an tihkhawloh?
ENG NGE kal dik lo ta a? Paradis Eden-a Pathianin kan nu leh pa hmasa berte ṭanna ṭha tak a lo pêk tikhawlo tûrin eng thil nge thleng? Engvângin nge, Paradis-a remna leh muanna aiah khân, kum sâng tam tak chhûng sualna leh tuarna hi a lâr êm êm?
2 A chhan chu Evi leh Adaman zalên taka an duhthlan theihna an hman dik loh vâng a ni. Pathian leh a dânte aṭanga awm hranga ding chang tûra siam an ni lo tih hi an hmu ṭhelh chiang hle a ni. An nunnain hma a sâwn phah zâwk tûra ngaiin Pathian lak aṭanga inlâk hran an rêl ta a. Tichuan Pathianin zalên taka duhthlan theihna huam chin tûra dân a siam tawh aṭangin an pên chhuak ta a ni.—Genesis, bung 3.
Khawvêl Pumpuia Lalber Nihna Thil Ngaihtuah Fel Tûr Chu
3-5. Engvângin nge Pathianin Evi leh Adama kha tiborala bul a ṭan ṭhat leh mai loh?
3 Engvângin nge Pathian khân Evi leh Adama kha tiborala mihring nupa tuak dang hmanga a ṭan ṭhat leh mai loh chu le? A chhan chu khawvêl pumpuia a lalna, chumi awmzia chu, lâk hran theih loh khawpa rorêl tûra dikna a neih chu, cho a nih vâng a ni.
4 Zawhna awm ta chu: Tu nge rorêl tûra dikna neia, tu rorêlna nge dik? tih hi a ni. Chungnungber a nihna leh thil nung zawng zawng siamtu a nih avângin Pathian chu an chunga rorêl tûr a ni rêng a ni. Kawng engkima fing a nih avângin, thil nung zawng zawngte tân a rorêlna chu a ṭha ber a ni. Mahse Pathian rorêlna chu tûnah hian cho a ni a. Chu bâkah, a thilsiam mihringah hian thil dik lo a awm ta em ni? Mihringte rinawmna chungchâng a tel ve dân chu nakinah kan la chhût chiang ang.
5 Pathian aṭanga mihring a inlâk hran tâkah chuan, zawhna dang a awm leh a: Pathianin ro a rêl loh hian mihringten an ṭhatpui zâwk em ni? tih hi. Siamtu chuan a chhânna chu a hre ngei alâwm, mahse mihringten an zawn chhuah theih dân kawng chiang ber chu an duh anga zalênna pumhlûm neihtîr a ni. Zalên taka an duhthlan theihnain chu kawng chu an thlang a, chu chu Pathianin a phal sak a ni.
6, 7. Engvângin nge Pathianin mihringte tân zalênna pumhlûm hi rei tak a phal sak?
6 Mihringte chu zalênna pumhlûm phal sakin, Pathian chuan mihringte hi Pathian rorêlna hnuaia an awmin nge an ṭhatpui zâwk anga anmahni thua an awmin tih enchhinna hun rei tâwk tak a pe tûr a ni. Mihringten ram awp dân, thil siamna leh sumdâwnna kawng, finna thil leh damdawi lama an hlawhtlinna sâng ber nia an ngaih thleng thei tûr chuan hun phal sak chin chu rei tâwk a nih a ngai a ni.
7 Chutichuan, Pathian chuan keini hun thleng pawh hian amah hawisana mihringte mahni thua ro an inrêlna a hlawhtlin theih leh theih loh rinhlelh rual lohva a lan fiahna hun a phal sak a ni. Chutiang chuan mihring chuan ngilneihna leh nunrâwnna, hmangaihna leh huatna, felna leh fel lohna inkârah duh a thlang thei ta a ni. Amaherawhchu, a duhthlanna sawhkhâwk tûr a la hmachhawn a, chu chu: ṭhatna leh remna emaw sualna leh tuarna emaw a ni.
Thlarauhote Helna
8, 9. (a) Thlarau khawvêlah khân engtin nge helna a lo chhuah? (b) Adama leh Evi bâkah Setanan tute nge a heltîr?
8 A thlentîrtu dang ngaihtuah tûr a la awm. Kan thlahtu bul berte chauh kha Pathian rorêlna dodâla hel an ni lo. Mahse khatih lai khân tu dang nge awm ve? Thlarauhote an ni. Pathianin mihringte a siam hmain, nunna chungnung zâwk, vântirhkoh tam tak, vâna chêng tûrin a siam a. Anni pawh zalên taka duhthlan theihna neiin leh Pathian rorêlna hnuaia intukluh ngai tûra siam an ni ve tho.—Joba 38:7; Sam 104:4; Thu Puan 5:11.
9 Bible chuan chu helna chu thlarau huangchhûng aṭanga rawn inṭan a ni tih a târlang a. Thlarau mi pakhat chuan zalênna pumhlûm a duh tlat mai a. Mihringten Pathian biaka an biak pawh a duh hial a ni. (Matthaia 4:8, 9) He thlarau hel hian, Pathianin an lak aṭanga thil ṭha thup bo tlat anga chhâlin, Evi leh Adama heltîrtu a lo ni ta a ni. (Genesis 3:1-5) Tichuan Ramhuai (Sawichhetu) leh Setana (Dodâltu) tia koh a ni ta a ni. A hnuah chuan thlarau mi dangte pawh a heltîr ve leh ta a. Ramhuaiho tia hriat an lo ni ta a ni.—Deuteronomy 32:17; Thu Puan 12:9; 16:14.
10. Mihring leh thlarauhote helna aṭangin eng nge rahchhuah awm?
10 Mihringte chu Pathian dodâla an hel tâk avângin, Setana leh a ramhuaihote thununna hnuaiah an inpe ta a. Chu chu Bible-in Setana “he khawvêl pathian,” “ringlote rilru tideltu,” tia a kohna chhan a ni. Hemi avâng hian, Pathian Thu chuan “khawvêl pumhlûm hi mi sual thu thuin a awm” tiin a lo sawi a ni. Amah Isua ngeiin Setana chu “he khawvêl lal,” tiin a ko a ni.—2 Korinth 4:4; 1 Johana 5:19; Johana 12:31.
Thil Ngaihtuah Fel Tûr Pahnih
11. Eng thil ngaihtuah fel tûr dang chungchângah nge Setanan Pathian a cho?
11 Setana chuan ngaihtuah fel tûr Pathian chona dang a siam leh a. A awmze dik tak chu, Pathian hian mihringte a siam dânah hian a tisual a ni, phût luihnain tumahin thil dik an ti duh bawk lo vang tih chu a puhna a ni. Dik chiah chuan, fiaha an awmin Pathian chu ânchhia an lawh hial ang tiin a chhâl a ni. (Joba 2:1-5) Hetiang hian Setana chuan thilsiam mihringte rinawmna chungchângah rinhlelhna a siam ta a ni.
12-14. Setanan thil ngaihtuah fel tûr pahnih a rawn siamte chungchânga thudik chu engtin nge hunin a rawn laihlan ang?
12 Tichuan, Pathian chuan thilsiam finna nei zawng zawngte tân he thil ngaihtuah fel tûr leh Pathian lalber nihna ngaihtuah fel tûr chu chinfel a nih dân tûr ngaihtuah tûrin hun tam tâwk a phal sak ta a. (Exodus 9:16 tehkhin rawh.) Mihringte chanchina a tâwpa an thil tawn chuan hêng thil ngaihtuah tûr pahnih chungchânga thu dik chu a rawn lailang tawh dâwn a ni.
13 A hmasa berin, khawvêl pumpuia lalber nihna, Pathianin rorêl tûra dikna a neihna chungchâng sawifel tûrah hian hunin eng nge a rawn laihlan ang le? Mihringte hian Pathian aiin anmahniin ro an inrêl ṭha thei zâwk em ni? Pathian hawisana mihring rorêlna eng kalhmang pawh hian, indona, dân bawhchhiatna, leh dik lo taka rorêlna te awm lohna khawvêlah a hruai lût dâwn em ni? A enga pawh hian retheihna ûm bovin mi zawng zawng tân hausakna a pe dâwn em ni? A enga pawh hian natna, tarna leh thihna te hi a hneh dâwn em ni? Pathian rorêlna chu chûng zawng zawng ti tûra ruahman a ni.—Genesis 1:26-31.
14 Thil ngaihtuah fel tûr pahnihna chungchângah chuan, thilsiam mihringte hlutna tûr ang hi hunin eng nge a rawn laihlan ang? Pathianin mihringte hetiang mia a lo siam hi tihsual em ni? An zînga tuemaw tal hian fiahna hnuaiah thil dik a ti ang em? Mi tute emaw tal hian mahnia ro inrêl aiin Pathian rorêlna an duh zâwk tih an tilang ang em?
[Phêk 13-naa milem]
Pathianin mihringte tân an hlawhtlinna sâng ber thleng tûrin hun a phal sak a ni
[Milem Hawhtîrtu]
Shuttle: Based on NASA photo