Vân Thengrenga Thil Awmte Aṭanga Kan Zir Theihte

Vân thengrenga thil awmte khi mumal takin an awm. Astronomy magazine-a thuziak pakhat chuan, “Vâna arsi hlâwmte khi mumal nei lova inzâr pharh ni lovin, mumal takin an awm zâwk,” tiin a sawi. Chu chu engtin nge a nih theih? Scientist-te chuan dark matter tia sawi, hmuh theih loh thil eng emaw vâng a nih an ring a. Chu dark matter chu “arsi hlâwm te, . . . arsi hlâwm bâwr te leh, arsi hlâwm bâwr lian lehzualte . . . mumal taka inzawmkhâwma an inchherchhuanna, hmuh theih loh thingsakawr (scaffolding) ang tak,” tia koh a ni.

Engtin nge vân thengrenga thil awmte chu mumal taka an lo awm? Anmahnia lo awm mai an ni ang em? Mitthi tawh Allan Sandage-a thusawi hi lo chhinchhiah ta ila. Ani chu “kum zabi 20-na hun laia arsi chanchin zir mite zînga ropui ber pakhat leh mite ngaihsân tak” a ni a, Pathian ringtu a ni.

Ani chuan: “Chûng thilte chu mumal taka amaha lo awm a nih ka ring thei lo. Mumal taka awmtîrtu thil eng emaw a awm ngei tûr a ni,” tiin a sawi.

Vân thengrenga thil awmte khi nunna awm theihna tûra mumal taka awm an ni. Scientist-te’n weak force tia an koh hi lo ngaihtuah ta ila. Chu weak force chuan kan nî khi a sat dân ngai rengin a sattîr a. Weak force chu tûn ai khian chak lo ta se, nî khi a insiam thei ngai lovang a. Tûn ai khian chak ta se, nî khi a kan ralna a rei tawh ang.

Weak force chu nunna a lo awm theihna tûra kan mamawh chakna mumal taka awm tam tak zînga pakhat mai a ni a. Science lam chanchin zirtu Anil Ananthaswamy chuan, chûng zînga pakhat lek pawh a nihphung dang lam se chuan “arsî te, planet te leh, arsi hlâwmte khi a insiam thei ngai lo vang a. Nunna pawh engti kawng mahin a awm thei lo vang,” tiin a sawi.

Vân thengrengah hian mihringte chênna atâna hmun ṭha ber a awm. Lei hian tuamtu boruak a neih bâkah, a tâwk chauhva tam tui a pai a, nghet taka a awm theih nân amah hêltu a tâwk chauhva lian thla a nei bawk. National Geographic chuan, “Leilung awm dân te, a boruak awm dân te leh, a chhûnga nunna nei chi hrang hrangte hian kan leilung hi mihringte chên theihna awm chhunah a siam a ni,”a tiin a sawi.

Ziaktu pakhatin a sawi dân chuan, kan nî leh a hêltu arsite hi kan awmna arsi hlâwma “arsi dangte aṭanga hla takah” a awm a. Mahse, chutia hla taka an awmna chu leia nunna awmtîr theitu a ni. Arsi dang—kan awmna arsi hlâwma a chhûngril emaw, a bahra ngul zem zînga mi emaw—hnaih lehzuala kan awm a nih chuan, êng zung an pêk chhuahte chu kan nunna atân a hlauhawm ang. Chutiang chu ni lovin, lei hi arsi hlâwma nunna a awm theihna hmun a ni zâwk a ni.

Vân thengreng leh a chhûnga thil awmte science thiamna hmanga a hriatna behchhanin, scientist Paul Davis-a chuan heti chian thu tlûkna a siam a ni: “Vân thengrenga kan lo awm chhan hi tihpalh thil emaw, hmân laia thil thleng palh emaw, vâna thil inthlâk danglam nasa tak awm vâng emaw mai a nih ka ring thei lo. . . . Heta kan lo awm hian chhan a nei takzet a ni,” tiin. Davis-a chuan Pathianin vân thengreng leh mihring nunna a siam thu a zirtîr lo; mahse, engtin nge i ngaih? Vân thengreng leh lei hi nunna awm theihna tûra siam ni ngeiin a lang. Siam an nih avânga chutianga lo awm chu a ni thei ang em?