Engtin Nge I Chhût Chian Theih Ang?

Vân thengrenga thil awmte leh a chhûnga nunna neite hi Pathian siam nge ni a, amaha lo awm? He thuziaka kan târ lan tâk scientist pahnihte thusawi leh Bible-a châng hmasa bera thute chuan, chu zawhna chungchânga chhânna inang lo tak pahnih a târ lang a ni. Chûng thlîr dân pahnihte chuan thlâwptu tam tak a nei ve ve a. Nimahsela, mi tam tak erawh chuan khawi zâwk nge rin tûr tih an chiang lo a ni. Hemi chungchângah hian mite chu lehkhabu lâr tak takahte leh TV-a ngaih dân sawi chhuahna programme-ahte chuan an inhnial nasa ṭhîn hle.

School-a in zirtîrtute chuan vân thengrenga thil awmte leh a chhûnga nunna neite hi amaha lo awm a nih thu leh Siamtu a awm loh thu inringtâwk takin an sawi mai thei. Mahse, Siamtu a awm lo tih an finfiah thei em? Kawng leh lamah chuan, sakhaw hruaitute’n Siamtu a awm thu an sawi chu i hria pawh a ni mai thei a. Nimahsela, an thusawi chu a dik tih nemnghettu finfiahna an pe thei che em? Nge ni a, thurin pakhat anga pawm tûrin an ti mai zâwk che?

Nang pawhin chumi chungchâng chu i ngaihtuah pawh a ni thei a, Siamtu a awm leh awm loh tu mahin chiang takin an sawi thei lo, niin i ngai pawh a ni thei. Chu bâkah, a chhânna hriat chu a pawimawh tak zet leh tak zet loh i ngaihtuah mai thei bawk.

Tun ṭum chhuak Harhna! magazine-ah hian Siamtu a awm tih ring tûra mi tam takte hmintu thudik ṭhenkhat târ lan hmasak a ni ang a. Chumi hnuah chuan, leia nunna a lo inṭan dân chungchânga zawhnate chhânna hriat a pawimawh chhan târ lan a ni ang.