Stress Chu Eng Nge Ni?

Stress chu i taksain dinhmun eng emaw tak a chhân lêt dân hi a ni a. I thluakin hormone tam tak chu i taksa pêng hrang hrangah a thawn chhuak a. Chu chuan i lungphu a tirang a, i BP a tisâng a, i thâwk lâk a tibuaiin, i tihrâwlte a tiṭang mar a. Chutiang chuan, i hriat loh laiin i taksa chuan a lo chhâng lêt dêr tawh ṭhîn a ni. I stress a reh hnuah chauh, i taksa chu “inring reng” dinhmun aṭangin dinhmun pângngaiah a kîr leh a ni.

STRESS ṬHA LEH ṬHA LO

Stress chu dinhmun harsa leh hlauhawm takte hmachhawn thei tûra min buatsaihtu thil pângngai tak a ni a. Chu chu i thluakin a chhâng lêt hmasa ber a ni. Stress ṭha chuan eng thilah pawh hma la vat tûr emaw, chhâng lêt vat tûr emawin a ṭanpui thei che a. Chu bâkah, exam-naah te, hna dîlnaah te leh, infiamna lamahte i thiltum hlen tûrin emaw, ṭha lehzuala ti tûrin emaw a ṭanpui thei bawk che a ni.

Mahse, stress nasa tak neihna, a nih loh leh hun rei tak chhûng stress neihna chuan a tichhe thei che a. I taksa chu “inring reng” dinhmuna a awm fo emaw, a awm reng emaw hian, i taksa, rilru leh, ngaihtuahnain a tuar ṭan thei a. Chu chuan mi dangte i dâwr dân mai bâkah, i miziate thlengin a thlâk danglam thei a ni. Hun rei tak chhûng stress neihna chuan a lutuka eina leh zu inna te, damdawi hman khawlohna te, zial zûkna te leh, chîn dân ṭha lo neihnate a thlen thei bawk a. Chu chuan rilru lama beidawn ngawih ngawihna te, chauh ngawih ngawihna te leh, mahni intihhlum duhnate hial pawh a thlen thei a ni.

Stress-in min nghawng dân chu inang vek lo mah se, natna chi hrang hrang erawh min thlen ṭheuh va. Chu bâkah, taksa pum deuhthawah nghawng a nei thei bawk a ni.