1 THUTIAM

A AWMZIA

Thutiamna nei nupate chuan an inneihna chu dam chhûng daih angin an thlîr a, chu chuan an inkârah him nia inhriatna a neihtîr a ni. Hun harsa a lo thlen hunah pawh an kawppuite chuan an inneihna chu an vawng him ang tih an ring tlat a ni.

Nupa ṭhenkhat chu an ṭhiante leh chhûngte tihluihna avâng chauhvin an la khawsa dûn hrâm hrâm a. Mahse, hmangaihna leh inzah tawnnaa innghat thutiamna a awm chuan a ṭha lehzual a ni.

BIBLE THU BUL: “Pasal chuan a nupui ma suh se.”—1 Korinth 7:11.

“In inneihnaa thutiamna i neih chuan, thiam lo zâwk nih i hreh lo vang a. Ngaihdam i peih ang a, ngaihdam i dîl nghâl vat bawk ang. In buainate chu inṭhenna thlentîrtu ni lovin, harsatna tê nau ang chauhvin i thlîr ang.”—Micah-a.

A PAWIMAWH CHHAN

Harsatnate a lo awm hian thu intiamna nei lo nupate chuan, ‘Kan inkawp rem thei lo a nih hi,’ tia thu tlûkna siamin, inṭhen dân kawng zawn an duh ṭhîn.

“Mi tam tak chu ‘inṭhen leh a theih tho a lâwm’ tih rilru puin an innei a. A inṭhen leh theih tih rilru nei râna an inneih hian, an thutiam chu a tîr aṭang rêngin a nghet lo a ni.”—Jean-i.

I TIH THEIHTE

MAHNI INFIAH RAWH

In intihthiam loh hian . . .

• Tûna i kawppui nêna in inneih avângin i inchhîr em?

• Mi dang neih châkna i nei ṭhîn em?

• “Ka chhuahsan dâwn che” emaw, “Min hmangaihtu mi dang ka nei dâwn,” tiin emaw i sawi ṭhîn em?

Chûng zawhna zînga pakhat emaw, a aia tam emaw chu “aw” tia i chhâng a nih chuan, tûn hi in thutiam tihngheh hun a ni.

I KAWPPUI NEN SAWI DUN RAWH U

• Kan inneihna thutiam hi a nghet lo telh telh em? Chutiang a nih chuan, engvâng nge ni ang?

• Kan thutiam tinghet tûrin tûnah eng nge kan tih theih?

THURAWNTE

• I kawppui hnênah i hmangaih thu lehkha thawn ṭhîn rawh

• I hnathawhna hmuna i dawhkânah i kawppui thlalâk hûngin, in thutiam chu vawng rawh

• Hnathawhnaah emaw, pâwn i chhuah hunah emaw, i kawppui chu phone ṭhîn rawh

BIBLE THU BUL: “Pathianin a zawm tawh chu mihringin ṭhen suh se.”—Matthaia 19:6.