Mwatela Kutiyilila Nakanañachima

1-2. (a) Yehova wayiloñeshelaña ñahi antu jindi makonu yakuda yakuspiritu? (Isamu 23:​1, 2, 5) (b) Yumanyi yitukuhanjekahu muchinu chibaaba?

MAKONU, Yehova watuloñeshelaña yakuda yayivulu nankashi yakuspiritu. Chakadi nikujina, tukwiteja mazu ahosheliyi Davidi nindi: “Yehova diyi Kabiña kami. Hinukukaankila chumaku.”—Tañenu Isamu 23:​1, 2, 5.

² Yehova watuloñeshelaña yakuda yakuspiritu kuhitila mukupompa kwetu kwachipompelu. Iyi diyi njila yimu mwatwinkelañayi iyi yakuda makonu. Haniku kupompa, kakavulu twahitulukaña munsañu yitweluka dehi. Ilaña twatela kutiyilila kuniyi yanukishu hela chakwila “[twashimata] dehi chikupu muchalala.” (2 Pet. 1:12) Hela chochu, neyi hakupompa mutiya nsañu yitwahanjekahu dehi kakavulu, komana chayikalilaña kutiyilila nakanañachima? Neyi chayikalilaña, achinu chibaaba chikuyikwasha. Tukuhanjeka kulonda twiluki chichalemena kutiyilila nakanañachima hakupompa. Tukuhanjeka cheñi yuma yatela kwilawu ejima ahanaña jimpanji muchipompelu hakwila nawu akwashi antu atiyilili nakanañachima kuyuma yinakuhoshawu. Nawa tukuhanjeka hayuma yikutukwasha hakwila twiikali antiyilili amawahi. Ilaña tusambilenu kuhanjeka kulonda twiluki wahoshaña nanetu hampinji yakupompa.

ANUKENUÑA NENU YEHOVA DIYI WUNAKUHOSHA NANETU HAKUPOMPA

3. Yehova wahoshaña ñahi nanetu, nawa ambuñindi azatishaña ñahi Izu dindi chiwahi?

³ Yehova wahoshaña nanetu kuhitila Mwizu dindi, Bayibolu. (2 Tim. 3:​16, 17) Yesu niyena welukili chumichi. Wazatishileña chiwahi Izu daNzambi nawa chumichi chasañumwini antiyilili jindi kwihula nawu: “Indi iwu muntu weluka ñahi Nsona henohu kanda yayeñahu dehi kumashikola?” (Yow. 7:15) Antu adiña nanyichima yashinshika chatiyiliwu Yesu nakulumbulula chiwahi Izu daNzambi, azañaleli nankashi. AkaKristu amumafuku awapostolu, chidi neyi kapostolu Pawulu nikapostolu Apolosi, niwena alumbulwileña chiwahi Nsona neyi anakuhanjeka nawantu. (Yilw. 17:​2, 3; 18:​24, 28) Etu aYinsahu jaYehova tweluka chikupu netu yuma yitwatañishaña yekalaña muyibaaba, muma JW Broadcasting, mujimpanji nimumavidiyo yafumaña muBayibolu. Antu amavulu enzaña nakupompa nanetu katachi ahayamaña muloña amonaña nawu Bayibolu dimukanda wutwazatishaña nankashi hakupompa kwetu. Ejima ekalaña najimpanji haniku kupompa, ashindamenaña Hezu daNzambi hampinji yinakutañishawu. Nawa atañaña Bayibolu nikukwasha antu adi mwizaza kwiluka chakuzatisha nsañu yidimu.—Luka 24:32.

4. Mazu akwila nawu “kutiya” ‘nikutiyilila’ atalisha mudihi?

⁴ MuBayibolu, mazu akwila nawu “kutiya” ‘nikutiyilila’ kakavulu atalishaña kukwovwahila muntu. Dichi neyi Yehova nakuhosha nanetu kuzatisha Izu dindi hakupompa kwetu nawa twiluka yuma yinakukeñayi, chikwikala chaswayi kumwovwahila. Twatela kukuhwelela chikupu netu Yehova watiyaña kuwaha neyi tumutiyililaña nawa twilaña yuma kwesekeja nachinakukeñayi.—Yish. 27:11.

MULOÑADI CHITWATELA KUTIYILILA NAKANAÑACHIMA HAKUPOMPA?

5. Kukeña kutwamukeña Yehova kwatusañumunaña kwiladi? (Yowanu 4:​23, 24; 1 Yowanu 5:3)

⁵ Twatiyililaña hakupompa muloña twamukeña Yehova. (Mat. 22:37) Neyi tumwiluka Yehova chiwahi chekalayi, dihitukusweja kumukeña. Iku kukeña kwatusañumunaña kwikala namuchima wakumutiyilila, wakumwovwahila niwakudifukula kudi yena kwesekeja nachakeñañayi, neyi chashimunawu Mwizu dindi.—Tañenu Yowanu 4:​23, 24; 1 Yowanu 5:3.

6. Yumanyi yitwadizaña hakupompa kwetu kutalisha hakukwasha akwetu?

⁶ Twatiyililaña hakupompa muloña twakeña antu. (Mat. 22:39) Hampinji yakupompa, Yehova watudizishaña chitunateli kukwasha akwetu akakwitiya niantu achidi kanda amwiluki. Chakutalilahu, broshuwa yaKeñenu Antu, Ilishenu Atumbanji yatukwashaña kwikala nayilwilu yikutukwasha kuzata chiwahi mudimu wakushimwina. Komana chayikalilaña kutachika kuhanjeka chiwahi nawantu neyi munakushimwina? Neyi chayikalilaña, chuma chinateli kuyikwasha hikushaku muchima nankashi neyi amanakwenu niahela anakuhana jimpanji muchibalu chikweti mutu nawu “Shenu Muchima haMudimu waKushimwina” hakupompa kwamukachi kamulungu.

7. Muloñadi chichalemena kutwalekahu kutiyilila kudi Yehova?

⁷ Twatiyililaña hakupompa muloña twakeña wumi. Neyi chayilejeliyi Yehova ambuñindi kunyima, hakwila twiikali namuzañalu nikwikala nawumi wahaya nyaaka, twatela kwovwahila Izu dindi. (Kuhit. 32:​44-47) Neyi tutiyililaña hakupompa, tukwiluka yuma yikutukwasha kutwalekahu kuhembelela nakuumika kwinza kwakaayi kakaha. (Rom. 8:25) Yinu diyi mpinji yitwatela kutiyilila nankashi kudi Yehova muloña tunakushakama mumafuku akukuminina, nawa twatela kutwalekahu kwikala akola kuspiritu.—Mat. 24:​42-44; Chim. 1:3.

YUMA YITWATELA KWILA HAKWILA TUKWASHI ANTU KUTIYILILA HAKUPOMPA

8. Muloñadi amanakwetu ekala namudimu wakutañisha hakupompa chatelelawu kutwalekahu kuwahishaku wuswa wawu wakuhosha chiwahi?

⁸ Amanakwetu ekala namudimu wakutañisha hakupompa, sweje-e ahanaña mpanji jawantu amavulu, atela kutwalekahu kuwahishaku wuswa wawu wakuhosha chiwahi. Neyi manakwetu aloñesha chiwahi mpanji nawa yikuma yinakuhoshayi yinakufuma muBayibolu, mpanji yindi yinateli kukokola chikupu antu kwinza muchalala nikukwasha amanakwetu niahela kutwalekahu kwikala muchalala. Ninenu neyi anayinki mpanji hakupompa kudi kwejima, mwatela kwanuka nenu mpanji yenu yinateli kukwasha antu nankashi kubadika nichimunakutoñojoka. Dichi neyi mwekala naniku kukooleka, talenu yikuma yinalondelihu chiyinateli kuyikwasha hampinji yimunakuloñesha mpanji. Hela chakwila iyi yikuma yinakundami nankashi amanakwetu ahanaña mpanji jawantu amavulu, ilaña yinateli kutukwasha wejima wetu enkañawu mpanji jitwahanaña hakupompa.—2 Tim. 4:2; Tit. 1:9.

9. Yumanyi yimwatela kwila hakwila mukwashi antu kutiyilila kumpanji yenu nakanañachima?

⁹ Shenu yikuma chiwahi mundonda. Neyi munakuhana mpanji, chuma chimunakufwila hikukwasha antu kutiya nsañu yimunakuhosha. Chinateli kuyikalila antu mwizaza kutiyilila nakanañachima neyi muvulisha nankashi nsañu mumpanji yenu. Iyi diyuma yimwatela kwila hakwila mushi chiwahi yikuma mundonda: (1) Hakutachika kuhosha mpanji, shimunenu yikuma yamaneni yidi mumpanji. (2) Hanjekenu haniyi yikuma chimu-chimu, hudikilenu chanti himunakufuma hachikuma chimu cheneni nakuya hachikwawu kulonda mukwashi antiyilili jenu kwiluka nawu himukuya hachikuma chikwawu. (3) Hitulukenu muyikuma yamaneni muwihi hampinji yimunakukunkulula mpanji.

10. Muloñadi chichalemena kwiluka chiwahi nsañu yimunakuhoshahu mumpanji?

¹⁰ Ilukenu chiwahi nsañu yimunakuhoshahu. Mukuhana mpanji yenu neyena neyi mukeña yikuma yidimu. (Yish. 2:​4, 5; Yilw. 4:20) Hakwila nawu muwani iyi yikuma yikuyitiyisha kuwaha, mwatela kutoñojokahu chikupu haNsona ninsañu yidi mumpanji yenu. Manakwetu wumu wakuUnited States wudi muyaaka yamuma 70, wanukaña mpanji yatiyiliyi hachidiñayi mukwenzi. Wahosheli nindi: “Nichidi kwanuka nhoshi chatukolesheliyi chitwatela kutoñojokahu chikupu hansañu yitunatañi Mwizu daNzambi. Wahosheli neyena nawa walumbulwili chiwahi chitwatela kwila mwenimu. Iyi mpanji yankwashili chikupu kuwahishaku njila yami yakutañilamu Bayibolu nikukolesha wubwambu wami naYehova.”

11. Muloñadi chichalemena kuhosha hohu hayuma yalema hampinji yimunakuhana mpanji? (1 Timotewu 4:​13-16)

¹¹ Toñojokenu hakukala kunakumona antu antiyilili jenu, nawa shimunenu yuma yikuyikwasha. Chatela muhosheña hansañu yayivulu nankashi, zatishenu hohu mavasi amuBayibolu akuyikolesha antiyilili jenu niyuma yikuyikwasha. Dicheliliyi nikapostolu Pawulu. Wamulejeli hohu Timotewu yuma yamukwashili kutwalekahu kwikala wapama hazatileñayi muEfwesesa mudimu wamwinkeliyi. (Tañenu 1 Timotewu 4:​13-16.) Dichimwatela kwila ninenu; toñojokenu hayuma yikukwasha antiyilili jenu, nawa yikwashenu kulonda amoni yuma yalema yidi mumpanji yinateli kuzatishawu muchihandilu chawu.

12. Muloñadi chichalemena kuhosha neyi munakuhanjeka hampinji yimunakuhana mpanji?

¹² Hitulukenuña mumpanji yenu nezu datiyakana hakwila mwakatweshi kuyihana neyi munakuhanjeka. Antu adi mwizaza chikuyipelela kutiyilila nikutiyishisha nsañu yidi mumpanji neyi hampinji yimunakuyihana munakuhosha neyi munakuhanjeka, chatela musoneki mpanji yenu hezu-hezu hela kuyitaña chakuyitaña. Broshuwa yaShenu Muchima kuKutaña Nikukutañisha yahosha nawu: “Hoshenu neyi munakuhanjeka, munjila yayiwahi yikumwekesha chimunakutiya hanoyu nsañu nichiyinateli kukwasha antiyilili jenu.” Dichi neyi muhanaña mpanji neyi munakuhanjeka, antu adi mwizaza akutiyililaña nakanañachima, akushaña muchima kuyuma yimunakuhosha nawa chikuyisañumuna kuyizatisha.

13. Muloñadi amanakwetu atañishaña muchipompelu chatela kulejelawu anhoshi akulukila nawu ayikwashiku? (Talenu nimwevulu.)

¹³ Lejenu manakwetu wakulukila mukuhana jimpanji kulonda ayikwashi kwikala nhoshi wamuwahi. Chakutalilahu, henohu kanda muhani mpanji yenu, munateli kumuleja iwu manakwetu nsañu yimunasoneki nawa neyi nayileji himwatela kuhimpa, himpenu kulonda mpanji yenu yakatiyakani chiwahi. Kubombelahu, mulejenu atiyilili kumpanji yenu himunakuhitulukamu nezu datiyakana kulonda ayileji himwatela kuwahisha. (Yish. 1:5) Wejima wetu mpinji yikwawu chatukalilaña kwiluka neyi yuma yitunakuhosha yinakutiyakana hela nehi. Dichi iwu manakwetu wukuyileja yuma yikuyikwasha hakwila yikuma yidi mumpanji yenu yitiyakani nawa yikwashi antu. Tunakukeña kwikala antañishi nawa anhoshi amawahi hakwila tutwesheña kukwasha antiyilili jetu kutiyishisha yuma yalema yakuspiritu yekala muBayibolu.a

YUMA YITWATELA KWILA HAKWILA TUTIYILILEÑA NAKANAÑACHIMA

14. Muloñadi chitwatela kumwekeshela chilwilu chamwekesheliyi nsoneki yaIsamu 119? (Isamu 119:​24, 111, 167)

¹⁴ Tukutiyililaña nakanañachima hakupompa neyi twanukaña netu yanukishu yaYehova yalema nankashi. Twatela kwovwahila yanukishu yaYehova hakwila nawu tuumikeña kukala kutunakumona mujinu “mpinji jakala.” (2 Tim. 3:1) Dichi hela chakwila oyu nsañu yitunakudiza yinakumwekana neyi twayidizahu dehi kakavulu, tukwila chiwahi nankashi neyi tumwekesha chilwilu chamwekesheliyi nsoneki yaIsamu 119 kutalisha hayanukishu yaNzambi.—Tañenu Isamu 119:​24, 111, 167.

15. Tunateli kutwalekahu ñahi kulemesha yakuda yakuspiritu yitwatambwilaña hakupompa kwetu?

¹⁵ Twatela kutwalekahu kulemesha yakuda yakuspiritu yitwatambwilaña, neyi chateleleliwu aIsarela kutwalekahu kulemesha manina ayinkeleñawu kudi Yehova hampinji yadiñawu mwisaña. (Kwid. 16:​15, 31) Chakadi nikujina, hakusambila aIsarela alemesheleña manina nankashi. Nawa awa manina afumineña kudi Yehova, atiyakeneña chiwahi nawa ayikwashileña kutwalekahu kuhanda. Hela chochu mukuhita kwampinji, antu amakwawu aheleli manina muloña akeñeleña wanyi kuda yakuda yoyimu hefuku-hefuku. (Kuch. 21:5) Yumanyi yitunakudizilaku? Bayi tumonaña yakuda yakuspiritu netu yalema wanyi hela netu anasweji kuyifuntisha-funtishahuku. Ilaña, twatela kwiluka netu Yehova diyi watwinkaña iyi yakuda. Twatela kwanukaña netu kuloñesha kwaYehova kwatondaña chachiwahi chikupu nsañu yaloñeshañawu yitwadizaña. Twatela cheñi kwanukaña netu yuma yitwadizaña yatukwashaña kufuukula yuma chiwahi nikukiña wumi wetu.—Yish. 3:​13, 16-18; Yow. 17:3.

16. Yumanyi yinakwashi ambuña aYehova amakwawu anamukalakeli hadi yaaka yayivulu kutwalekahu kutiyilila nakanañachima hakupompa? (Talenu nichikasha chinakwila nawu “Yuma Yikuyikwasha Kutiyilila Nakanañachima.”)

¹⁶ Tunateli kwikala antiyilili amawahi neyi tuzatishaña iyi yuma yinalondelihu. Talenu yuma yinakwashi ambuña aYehova amakwawu anamukalakeli hadi yaaka yayivulu kutwalekahu kutiyilila nakanañachima hakupompa. Manakwetu Ashley, wunamukalakeli Yehova hadi yaaka kubadika 30, wahosheli nindi: “Kuloñesha dichuma chacheni chankwashaña kutiyilila nakanañachima. Neyi naloñeshi wanyi chankalilaña kwakulahu nawa yitoñojoka yami yayaña kwacheñi hampinji yakupompa.” Manakwetu József, wunamukalakeli Yehova hadi yaaka 52, wahosheli nindi: “Natiyaña kuwaha kutiyilila kunsañu yinatiyahu dehi, muloña kutiyilila kunsañu yoyimu munjila yaambukaku kwankwashaña kutiyishisha oyu nsañu.” Wabombelelihu nindi: “Neyi manakwetu hinhoshi wamuwahi nankashiku, nashaña muchima kunsañu yinakuhoshayi kufuma Mwizu daNzambi bayi hanochu chinakuhoshayiku.”

17. Yumanyi yimwatela kwila yikuyikwasha kutiyilila nakanañachima hakupompa? (Talenu nimwevulu.)

¹⁷ Talenu yuma yimunateli kwila yikuyikwasha kutiyilila nakanañachima hakupompa. (1) Mwatela kutondolwela kuda yakuda yayivulu nankashi henohu kanda muyi nakupompa hakwila nawu mubuleña kunoñoka. (2) Shikenu swayi nawa shakamenu henohu progilamu yakupompa kanda yitachiki. (3) Foni yenu hela tabuleti, yishenu hakwila mubuleña kutambwila mameseji hela kuyitemeshela foni hampinji yakupompa. (4) Toñojokelenu chadimu hayikuma yimunamoni nenu diyikuhoshayi nhoshi. (5) Mutalenuña nhoshi hampinji yinakuhanayi mpanji. (6) Sonekenuña nsañu yantesha hela kufunjeka nyevulu yayikuma yalema yimunakutiya. (7) Toñojokenu hansona jinazatishiwu mumpanji nichinajinuñañeshiwu chiwahi. (8) Dihulenu nenu, ‘Nateli kuzatisha ñahi iyi nsañu hakukwasha muntu muchipompelu hela mumudimu wakushimwina?’ (9) Henohu kanda muyi kukupompa kwanyanya hela kweneni, tañenu mutu wahanodu ifuku, nyitu yansañu yimukudiza ninsona hanashindameni mpanji-himpanji. (10) Shakamenu wumweneni nakutiyilila nakanañachima kutumina nimavidiyo anakutalishawu hakutachika kwaprogilamu, nawa kwila mwenimu kukuyikwasha kushaku muchima kuyuma yikuyidizishañayi Yehova hakupompa.

TWALEKENUHU KUMUTIYILILA YEHOVA

18. Muloñadi chitwatela kutwalekelahu kutiyilila hakupompa?

¹⁸ Twatela kutwalekahu kutiyilila hakupompa hakwila nawu Yehova atulomboleña “mumajila akuloña.” (Mas. 23:3; 31:3) Twovwahileña wunlomboli wutwatambwilaña hakwila nawu abuli kutufumisha munjila yakuloña neyi watu chawulelulañawu kudi mpepela. Dichi, “mwatela kutiyilila nakanañachima” nikwovwahila wunlomboli wutwatambwilaña hakupompa kwetu kwachipompelu. (Luka 8:18) Antu amutiyililaña Yehova, akwikalaña namuzañalu chayinu mpinji nawa akekala nawumi wahaya nyaaka kumbidi.—Mas. 119:​2, 14.