Chatukwashaña Ntanjikilu Yakwikala naMazanvu aMudimu waKushimwina

1-2. Amanakwetu niahela amavulu atiyaña ñahi hantanjikilu yakwikala namazanvu amudimu wakushimwina?

MUNAKWANUKA chimwatiyili hefuku dayitejeliwu nawu munekali mukakushimwina wansañu yayiwahi? Chakadi nikujina, mwazañaleli nankashi muloña mwekalili mwizanvu deneni dawakakudifukula ashimekaña ijina daYehova. (Mas. 148:​1, 2, 12, 13) Kubombelahu, hadodina ifuku mwekalili cheñi mwizanvu danyanya nankashi damudimu wakushimwina, mwekalaña hohu amanakwetu niahela antesha. Awa mazanvu aleteshaña chitupeleleña kuzata chiwahi mudimu wakushimwina nsañu yayiwahi yaWanta “mwahita iseki dejima mwashakamawu antu.”—Mat. 24:14.

² Mwatiyaña ñahi hakwikala nantanjikilu yamazanvu amudimu wakushimwina? Talenu chahosheli awa akushimwina. Muhela wejina daWendya wahosheli nindi: “Kwikala mwizanvu dakushimwina kunankwashi muyuma yayivulu. Nadizili kudi akwetu njila jajiha jakushimwinamu nikudizisha. Ankwashaña kwila yuma yankwashaña kuswina kwakwihi naYehova nawa nikweti amabwambu alala amavulu, muloña waniyi ntanjikilu yayiwahi.” Manakwetu Rich wahosheli nindi: “Kwikala mukulumpi wezanvu himudimu wawuwahi chikupu. Hela chakwila akakushimwina amakwawu akwashaña muntu kushikahu kupapatishewa, ilaña mukulumpi wezanvu diyi wekala namudimu wakutwalekahu kukwasha muntu kupama kuspiritu hanyima yakupapatishewa.” Muhela Dinah wahosheli nindi: “Ntanjikilu yakwikala namazanvu yayiwahi nankashi! Amanakwetu niahela ekala mwizanvu detu nayimonaña nami hichisaka chami.”

3. Yumanyi yitukuhanjekahu muchinu chibaaba?

³ Muchinu chibaaba, tukuhanjeka ntahi hamudimu wazataña mukulumpi wezanvu ninkwashi yindi nawa tukumona chakwashañawu antu adi mwizanvu dawu. Kuhiñahu, tukuhanjeka hayuma yitwatela kwila hamuntu-hamuntu hakwila tukwashi izanvu detu damudimu wakushimwina. Nkumininaku, tukumona iyi ntanjikilu yayiwahi chiyinateli kutukwasha.

MUKULUMPI WEZANVU NANKWASHI YINDI

4. (a) Mudimwinyi weneni wazatañayi mukulumpi wezanvu? (b) Mukulumpi wezanvu wakwashaña ñahi antu adi mwizanvu dindi? (Talenu chikasha chinakwila nawu “Yuma Yatela Kwilayi Mukulumpi Wezanvu.”)

⁴ Izanvu dakushimwina adilombolaña kudi mukulumpib atondañawu kudi izanvu dawakulumpi kulonda yakwasheña akakushimwina adi mwizanvu kupaminaku kuspiritu. Welaña ñahi mwenimu? Chatachi, wakamenaña chikupu muntu wejima wudi mwizanvu dindi. (Yish. 27:23) Chineli hikabiña wakamenaña, wayilukaña chiwahi ejima adi mwizanvu nawa wahanjekaña nawu mpinji yejima hakwila yeluki chinakuhandawu. Chafumañamu, wayikwashaña kuspiritu, muyitoñojoka nikumujimba. (Yish. 12:25; Isa. 32:2; Yak. 2:​15-17) Chamuchiyedi, wakwashaña mukakushimwina wejima kwikala wadikita mumudimu wakushimwina. Wazataña hakumina ñovu jindi mumudimu wakushimwina hamu nezanvu, sweje-e kunsa yamulungu. Wazataña cheñi mumpinji-mumpinji namukakushimwina wejima kulonda yamukoleshi nikumudizisha. Neyi kudi yuma yinamukañeshi kuya kwizanvu, walejaña nkwashi yindi hela mukakushimwina mukwawu washikahu kwakamena izanvu. Chamuchisatu, wakwashaña amanakwetu apapatishewa kulonda ashikihu kuzata nyidimu muchipompelu. (1 Tim. 3:1) Hakwila nawu ayikwashi awa amanakwetu kushikahu kwikala ankoñi akuzatila hela akulumpi, wayihamekaña chakufuma hamuchima, wayifumbaña kuzatisha Bayibolu nawa wayidizishaña mpinji yejima. Chineli iwu mudimu wakwikala mukulumpi wezanvu walema nankashi, izanvu dawakulumpi datondaña akulumpi ashikahu chikupu kuzata iwu mudimu.

5. Kukalanyi akulumpi amakwawu amazanvu amonaña?

⁵ Kudi yuma yayivulu yinateli kuletesha mukulumpi wezanvu chimukalili kwakamena chiwahi antu adi mwizanvu dindi. Talenu chahosheli Jörg, mukulumpi wezanvu wakuGermany, wukweti nyidimu yayivulu muchipompelu neyi yikweti akulumpi amakwawu amavulu. Wahosheli nindi: “Kwikala mukulumpi wezanvu nawa hampinji yoyimu nikuzata nyidimu yikwawu muchipompelu, kwankalilaña nankashi. Muloña wachumichi, chankalilaña kuhanjeka namukakushimwina wejima wudi mwizanvu dami kwesekeja nachinafuukula.” Manakwetu Abel, wakuUganda wudi nayaaka 70 nawa mukulumpi muchipompelu, wahosheli nindi: “Tukweti akulumpi niankoñi akuzatila antesha nankashi muchipompelu chetu. Dichi mumazanvu etu mudi antu amavulu. Muloña wachumichi, chankalilaña kubiña mukakushimwina wejima kwesekeja nachinnakukeña.” Nawa Obed, mukulumpi wakuSuriname, wahosheli nindi: “Nakeña kudizisha akwetu nyidimu. Ilaña hakwila nili mwenimu nazatishaña mpinji yeneni niñovu, nawa hashimbulaña hakwila muntu inakudizisha ashikihu kuzata nyidimu. Chafumañamu, nashaña muchima nankashi kunyidimu yikwawu kubadika mudimu wakudizisha.” Yumanyi yinateli kukwasha akulumpi amazanvu amonaña kukala kwamuchidiwu nikukala kukwawu?

6. Kwikala nawantu antesha mumazanvu kwakwashaña ñahi akulumpi amazanvu kwakamena chiwahi antu adi mumazanvu awu?

⁶ Neyi chinatwesheki, mumazanvu mwatela kwikala antu antesha hakwila chiyipeleleña akulumpi amazanvu kwiluka chiwahi antu ejima adi mwizanvu dawu nikuyikwasha kutwalekahu kwikala akola kuspiritu. Mwatela kwila ñahi neyi muchipompelu chenu mudi akulumpi antesha? Chatela mumazanvu mwiikali antu amavulu nankashi chakwila akulumpi amazanvu akañanyeña kuzata nyidimu yatela kuzatawu, izanvu dawakulumpi dinateli kutonda nkoñi wakuzatila kulonda akameneña izanvu hanoyu mpinji. Neyi mumazanvu mwikala antu antesha nankashi, chikuyipelela akulumpi amazanvu kuzata chiwahi mudimu walema nankashi wukwetiwu wakukwasha amanakwawu niahela kutwalekahu kwikala ashinshika kudi Yehova nikuumika kukala kunakumonawu.

7. Neyi muchipompelu mudi akulumpi antesha, yumanyi yatela kwilawu akulumpi amazanvu hakwila akameneña chiwahi akakushimwina ejima adi mwizanvu dawu? (1 Petulu 5:2) (Talenu nimwevulu.)

⁷ Neyi mudi mukulumpi wezanvu muchipompelu mudi akulumpi antesha, shenuña muchima nankashi hakumukwasha nkwashi yenu kulonda ayikwasheñaku kwakamena mukanka wanyikoku yaNzambi. (Tañenu 1 Petulu 5:2.) Mwinkenuhu nyidimu kulonda yayikwasheñaku. Chakutalilahu, mumpinji-mumpinji mwinkenuña mudimu wakulombola hakubulakana kwakuya nakushimwina. Lombelenuhu nawa hanjekenu nindi hanyidimu yawakakushimwina adi mwizanvu denu kulonda mumoni chimwatela kuyikwasha. Mumpinji-mumpinji yenuña nankwashi yenu mumudimu wakubiña nawa mulejenu nshimbi jakulondela henohu kanda muyi nihanyima yakubiña. Mukuhita kwampinji, nkwashi yenu niyena nateli kushikahu kwikala mukulumpi wezanvu. (2 Tim. 2:2) Munateli cheñi kuleja akaKristu amakwawu apama kulonda ayikwasheñaku mumudimu wakudizisha. Chakutalilahu, apayiniya niakakushimwina amakwawu akulukila anateli kuzatila hamu nawakakushimwina amaha niabula kwiluka yuma yayivulu. Akakushimwina amakwawu apama niwena anateli kukwasha akwawu anakukeña kwiluka chakutachika kuhanjeka nawantu mumudimu wakushimwina, chakufuntila hela chakulombola atudizi aBayibolu. Ichi tuhanjekenu hayuma yisatu yitwatela kwila wejima wetu hakwila tukwashi izanvu detu damudimu wakushimwina.

YUMA YIMWATELA KWILA HAKWILA MUKWASHI IZANVU DENU DAMUDIMU WAKUSHIMWANA

8. Tunateli kukwasha ñahi izanvu detu damudimu wakushimwina? (ARoma 1:12)

⁸ Shimwinenuña hamu nezanvu denu. Neyi mushimwinaña hamu nawamanakwenu niahela, ‘mukudikoleshaña.’ (Tañenu ARoma 1:12.) Kushimwina hamu kunateli cheñi kuyikwasha kubula kutiya woma hampinji yimunakuhanjeka nawantu nawa kukuyikiña neyi munakushimwina kumaluña kwekala wubanji. Neyi mudimu wenu wakumujimba wunakuyikañesha kuya nakubulakana kwizanvu, munateli kumuleja mukulumpi wenu wamudimu ayihimpi mpinji yakuzatilamu. Hadaha wukwiteja. (Neh. 2:​4-6) Neyi munakukañanya kuya nakubulakana kwizanvu muloña wakukatakata indi kwiji muloña wakukula kumujimba, munateli kumulejamu mukulumpi wezanvu denu. Nateli kuyiloñeshelaku ntanjikilu yakwila nawu musokankesheña kwizanvu kuzatisha vidiyo konfalensi nawa wukuyikwasha kushimwina kuzatisha foni hela kusoneka nyikanda. Komana muchidi kansi nawa mwakola kumujimba ilaña chinakuyikalila kuya nakushimwina mpinji yejima? Neyi dichichidi, munateli kutiyañana kuzatila hamu mulungu-himulungu namanakwetu hela muhela wekala mwizanvu denu. Mukwila chiwahi neyi mutoñojoka hachuma chalema nankashi chimwatela kutwamijaku muchihandilu chenu nichakuzatisha mpinji yenu chiwahi. (Rom. 12:11; Kol. 4:5) Chimwela mwenimu, mukufuma yuma yayiwahi. Lombenu kudi Yehova, nawa wukuyinka “muchima wakufwila kukoña yuma niñovu yakwilamu.”—Fwili. 2:13.

9. Tunateli kukwasha ñahi antu adi mwizanvu detu kwikala namuzañalu nikumona nawu twayikeña? (ARoma 12:13)

⁹ Ikalenu nachisambu. Tunateli kukwasha antu adi mwizanvu detu kwikala namuzañalu nikumona nawu twayikeña neyi twikalaña “nachisambu mpinji yejima.” (Tañenu ARoma 12:13.) Chakutalilahu, tunateli kwiteja itala detu kulonda izanvu dibulakeneñamu hakuya nakushimwina. Muyipompelu yikwawu mazanvu adihimpahimpaña hakwakamena anhoshi enzaña nakuhana mpanji kufuma kuyipompelu yacheñi. Neyi dimulungu wayilejeliwu kumuloñeshela nhoshi yakuda, antu amakwawu mwizanvu abulakanaña hamu nakuda nikudikolesha hela chakwila nhoshi nenzi nakuda hela nehi. Payiniya wejina daSarah wahosheli nindi: “Naswejaña kwakama neyi nitambika akwetu kwinza kwitala dami, dichi naloñeshaña hohu yakuda yantesha. Nashaña muchima nankashi hakuyiluka chiwahi chekalawu chatela niswejeña kwakama hakuloñesha yakuda yayivulu.” Neyi izanvu detu dizatilaña hamu neyi chisaka nakumwekesha chisambu, tukuswina kwakwihi naYehova nikudi wumu namukwawu.—Neh. 8:10; Yilw. 20:35.

10. Chumanyi chitwatela kwila neyi tunakukeña kwiluka chakushimwina nikudizisha chiwahi? (Yishimu 1:5; 27:17) (Talenu nimwevulu.)

¹⁰ Lombenu wukwashu kudi akwenu. Neyi twiluka chakushimwina nikudizisha chiwahi, tukutiyaña kuwaha kuya nakushimwina hamu nezanvu detu. Kudihu chuma chimwatela kwila hakwila mushimwineña nikudizisha chiwahi? Munateli kulomba wukwashu kudi mukwenu, hadaha payiniya indi kwiji mukakushimwina wakulukila wudi mwizanvu denu. (Tañenu Yishimu 1:5; 27:17.) Mulejenumu mukulumpi wenu wezanvu chuma chimunakufwila kwila, nawa nateli kuyikwasha. Munateli kulomba wukwashu nikudi antu amakwawu. Muhela wejina daHeather dicheliliyi. Hela chakwila wekala nansonyi, wahosheli nindi: “Nalejeli payiniya wumu nami yankwashi chakufuntila kudi antu anamwekeshi mpwila. Wammwekesheleli kukeña niluwi nawa twazatileña hamu kakavulu. Wankwashili cheñi kutachika kadizi waBayibolu hadi antu inafuntilileñaku. Nelili chachiwahi nankashi kulomba wukwashu muloña chayinu mpinji natachiki cheñi kwikala namuzañalu mumudimu wakushimwina.” Mwamweni, kudi njila jajivulu mutunateli kukwashila izanvu detu.

NTANJIKILU YAKWIKALA NAMAZANVU AMUDIMU WAKUSHIMWINA CHIYATUKWASHAÑA

11-12. Ntanjikilu yakwikala namazanvu amudimu wakushimwina yatukwashaña ñahi kuspiritu? Shimunenu chakutalilahu.

¹¹ Ntanjikilu yakwikala namazanvu chiyatukwashaña kuspiritu. Ntanjikilu yakwikala namazanvu yatukwashaña wejima wetu kuspiritu. Chakutalilahu, mukulumpi wetu wezanvu wukweti mudimu wakukwasha antu akeñayi nankashi Yehova nawa anakukeña kuyakamena chikupu, chidi neyi antuluwa, anyana anshona niantu anashinakaji dehi. (1 Tes. 2:8; Yak. 1:27) Atudizishaña cheñi njila jashiyashana jatukwashaña kuzata chiwahi mudimu waWanta wakushimwina nikudizisha. Amanakwetu adi nachakutalilahu chachiwahi ayidizishaña kulonda ashikihu kuzata nyidimu muchipompelu.—1 Tim. 3:10.

¹² Talenu ntanjikilu yakwikala namazanvu chiyamukwashili muhela Wendy, ashimunawu hakusambila. Wahosheli nindi: “Atata aheleli nankashi chalala, muloña wachumichi, chayipeleleleña wanyi amama kuya nakushimwina hamu nezanvu kunsa yamulungu. Ilaña ami añitejeli kuya nawa nayileña. Muhela wumu wakula dehi nawa payiniya wanlejeli nindi tuzatileña hamu, nawa wankwashili kwiluka yuma yinakunkwasha kuzata chachiwahi mumudimu wakushimwina nimuchipompelu. Nanukaña mukulumpi wetu wezanvu chanfumbileñayi, kakavulu wazatishileña Bayibolu, nawa nichidi kuzatisha akuna kufumba nichayinu mpinji.”

13. Yumanyi yayiwahi yafumañamu neyi tuzatilaña hamu nawamanakwetu niahela mwizanvu detu? (Talenu nimwevulu.)

¹³ Ntanjikilu yakwikala namazanvu yatukwashaña kwikala nawamabwambu atukeña nawa atukwashaña. Neyi tunakudikitila “hamu” mumudimu wakushimwina nawamanakwetu niahela amwizanvu detu, wubwambu wetu wakolelañaku. (Fwili. 1:27) Neyi mwizanvu mudi antu antesha, chikuyipelela niakakushimwina amwena hela akweti nsonyi kwikala nawamabwambu. (2 Kor. 6:13) Amanakwetu niahela adi mwizanvu detu atukwashaña neyi tunakati, tunaneñi, tunakwakama nankashi hela neyi tunafwishi muntu itwakeña. (1 Tes. 5:14) Chakadi nikujina, kumbidi twakakeñekaña nankashi kwikala nawamabwambu alala. (Mat. 24:21) Hela chakwila kukala kutunakumona hikunateli kumanaku, tukuumika neyi twiluka netu amanakwetu niahela atukeña nawa atukwashaña.—Yish. 17:17.

14. Amanakwetu niahela adi mwizanvu detu atukwashaña ñahi neyi kunamwekani wubanji hela kukala kwakukasumwisha?

¹⁴ Ntanjikilu yakwikala namazanvu yatukwashaña kumujimba. Amanakwetu niahela amwizanvu detu atukwashaña neyi kunenzi musoñu, wubanji wadimwekenaña, tunakati mukukasumwisha, anakutukabisha nawa neyi tudi nakukala kwamali. Neyi yuma yamuchidiwu yimwekana, akulumpi amazanvu atukwashaña. Chakutalilahu, neyi kunamwekani wubanji, ahanjekaña nayisaka yejima yidi mumazanvu awu kulonda amoni yuma yinakaankiliwu chidi neyi yitumbu, yakuda, menji, yakuvwala niiluña hakushakama. Neyi akulumpi amazanvu aneluki dehi kukala kukwetiwu, akuzatilahu. Kuhiñahu, alejaña Kometi yaMudimu yaChipompelu akakushimwina anakaankili yuma yitunashimuni, nawa azatilaña hamu kuwana njila mwakuyikwashila. Mwamweni, ntanjikilu yakwikala namazanvu amudimu wakushimwina yatukwashaña nankashi!

15. Mudimwinyi watunuñañeshaña wejima wetu mukuloñesha kwaYehova?

¹⁵ Neyi chashimunawu dehi, kuloñesha kwaYehova kweneni nankashi. Muchibalu chamwiwulu, mudi añelu ashinshika amavulu nankashi. Nawa muchibalu chahanu hamaseki, mudi antu akubadika ha 9 miliyoni adifukulaña kudi Yehova, nawa anatwalekihu kuvulilaku hefuku-hefuku. (Zek. 8:23; Chim. 5:11) Akakudifukula aYehova ejima azatilaña hamu mukunuñañana kushimwina nsañu yayiwahi yaWanta waNzambi! (Chim. 14:​6, 7) Dichi tutwalekenuhu kulemesha ntanjikilu yakwikala namazanvu amudimu wakushimwina, muloña yatukwashaña kumushimeka Yehova namuchima wetu wejima.—Mas. 111:1.