‘Wahishenuku Ntañishilu’ Yenu muMudimu waKushimwina

1. Chumanyi chitwatela kudiza, nawa muloñadi? (2 Timotewu 4:2) (Talenu nimwevulu.)

YESU wayilejeli akakumulondela nindi: “[Kelishenu] atumbanji . . . , muyidizisheña ahembeña yuma yejima yinnayileji enu.” (Mat. 28:​19, 20) Ilu lushimbi lunakumwekesha nawu akaKristu ejima atela kwikala antañishi. Mwamweni, Yehova wakokaña antu adi “nanyichima yashinshika,” nawa añelu azataña mudimu walema kutulombola hakwila tuwani awa antu. (Yilw. 13:48; Yow. 6:44; Chim. 14:6) Hela chochu, ninetu kudi chuma chitwatela kwila. Talenu yuma yayiwahi yeliliyi kapostolu Pawulu nikapostolu Baranaba. Bayibolu yalumbulula nawu hampinji yashimwinineñawu musinagogi muIkoniyumu, “[ahosheli] munjila yakojejeli izaza dawantu deneni dawaYudeya niaGiriki etiyi.” (Yilw. 14:1) Chakadi nikujina, aPawulu naBaranaba adizili ‘chakutañisha chiwahi.’ (Tañenu 2 Timotewu 4:2.) AkaKristu ejima akwila chiwahi nankashi neyi adiza chakutañisha chiwahi.

2. Muloñadi akaKristu amakwawu chinateli kutoñojokelawu nawu hiyanateli kwikala antañishi amawahiku?

² Amakwawu anateli kutoñojoka nawu hiyanateli kwikala antañishi amawahiku, muloña ataña wanyi nankashi shikola yakumujimba indi kwiji anateli kutoñojoka nawu hiyakweti wuswa wakulumbulula chiwahi yumaku. Antu amakwawu ashimunawu muBayibolu niwena adimweneña nawu ashikilamu wanyi. (Kwid. 4:10; Yere. 1:6) Amakwawu anateli kutachika kuneña hawuswa wukwetiwu wakutañisha muloña anakumona muntañishilu yawakwawu munakufuma yuma yayiwahi ilaña wena nehi. Kafwampi, bayi neyi antu ejima itukuhosha nawu hela itukuwana mumudimu wakushimwina akutambwila chachiwahi nsañu yayiwahiku. Nawa yuma yayiwahi yafumañamu hiyashindamenaña hohu hañovu jetuku. Neyi chashimunawu dehi, Yehova niañelu diwu atukwashaña kuwana antu akweti nyichima yashinshika. Hela chochu, twatela kuzata hakumina ñovu jetu kushimwina nsañu yayiwahi munjila yikutiyakana. Hakwila twili mwenimu, achinu chibaaba chikushimuna yuma yisatu yikutukwasha kwiluka chakuwahishaku ntañishilu yetu mumudimu wakushimwina.

AKAMENENUÑA ANTIYILILI JENU

3. Muloñadi Yesu chashikilileñayi hanyichima yawantiyilili jindi?

³ Bayibolu yahosha nawu Yesu “welukili jadiña mudi muntu.” (Yow. 2:25) Awa mazu atalisha mukwila nawu Yesu welukili yuma yatoñojokeleñawu antu niyuma yafwilileñawu munyichima yawu. Yesu watwesheleña kushika hanyichima yawantiyilili jindi muloña welukili kukala kwadiñawu naku. Wamweni nindi antu adiña nanzala yakuspiritu nawa ayikabishileña muloña watushidikilu twatuvulu twawantu ninshimbi jakasileñawu. (Mat. 9:36; 23:4) Yesu wahosheli haniku kukala muMpanji yindi yahaMpidi. Antu amavulu enjileña kudi Yesu muloña wahosheleña yuma yayikundamini.

4. Tunateli kumwekesha ñahi netu twayakamenaña antu? (Talenu ninyevulu.)

⁴ Tunateli kumwekesha netu twayakamenaña antu itwashimwinaña neyi tufwilaña kwiluka yuma yinakuyakamisha. Muntu wejima itwashimwinaña nakumona kukala muloña wayuma yatama yinakumwekana mukaayi kaSatana. Neyi twiluka chumichi chikutukwasha kutiyila antu adi mwiluña detu wushona. Chakutalilahu, kudihu nsañu yinamwekani yinakwakamisha antu adi mwiluña mutwashimwinaña? Anvwali anakwakama nawu hadaha kudi yuma yatama yinateli kuyimwekena anyanawu kushikola? Komana antu amavulu chinakuyikalila kuwana nyidimu? Fwikijenu chihandilu chanawa antu chichidi hampinji yinakushakamawu muniji “mpinji jakala” chakadi kwiluka yuma yitwachiñejaña yashimunawu muBayibolu.—2 Tim. 3:1; Isa. 65:​13, 14.

5. Yesu wambukiliku ñahi nawaFwarisi? (Matewu 11:​28-30)

⁵ Yesu wayakameneneña antiyilili jindi nawa amweneña chumichi kuhitila muyuma yayililileñayi. Yena wambukiliku chikupu nawaFwarisi adiwileña akwawu antu nikuyimona neyi amukunkulwayi. (Mat. 23:13; Yow. 7:49) Ilaña Yesu wayitiyilileña antu luwi nawa wayilemesheleña. ‘Hazuwileña swayiku’ nawa wadiña ‘wadizoza mumuchima,’ dichi chumichi dichaletesheli ekali ntañishi wamuwahi. (Tañenu Matewu 11:​28-30.) Ninetu twatela kuyitiyilaña luwi antiyilili jetu nikuyilemesha.

6. Tunateli kuyimwekeshela ñahi luwi nikalemesha antu akaanaña hela adimbululaña nsañu yitwashimwinaña?

⁶ Antu amakwawu akaanaña hela kudimbulula nsañu yitwashimwinaña. Yumanyi yitunateli kwila neyi chuma chamuchidiwu chimwekana? Yesu watulejeli nindi kudi yuma yikwawu yitwatela kwila bayi kudiwulaku hohu neyi anakutudimbululaku. Wahosheli nindi “[yililenuña] yuma yayiwahi antu ayihela, kukiswila anakuyishiña, nikulombelaku anakuyituka.” (Luka 6:​27, 28) Chikutupelela kwila mwenimu neyi twanukaña netu hadaha kudi yuma yinakuyiletesha awa antu akaaneña nsañu yitunakuyishimwina. Hela chochu, antu amakwawu akeñaña hohu kutukañesha kushimwina. Ilaña amakwawu hadaha kudi kukala kwamuchisaka kunakuyineñesha indi kwiji kudi yuma yinakuyakamisha, nawa bayi neyi iyetu tunaleteshi oku kukalaku. Hadaha tunayiwanini hohu hampinji yatama. Hela chakwila yuma yidi muniyi njila hela nehi, twatela kulondela kukonkomwena kwakwila nawu “mazu [etu] mpinji yejima ekaleña amawahi, akutoweja namuñwa kulonda [twiluki chitwatela] kwakula muntu-himuntu.” (Kol. 4:6) Neyi tuyitoñojokelañaku antu nawa twiluka kukala kuyanakuhitamu, tukushikenaña wanyi kuhila nawa tukwikala antañishi amawahi.

SHINDAMENENUÑA HEZU DANZAMBI

7. Yesu wamwekesheli ñahi nindi washindameneneña Hezu daNzambi hampinji yatañishileñayi? (Yowanu 7:​14-16)

⁷ Yesu hashindameneni hohu hayuma yelukiliyiku. Ntañishilu yindi yashindameneni Hezu daNzambi, dazatishileñayi munjila yakwila antiyilili jindi chayipeleleleña kutiyishisha nikwanuka yuma yayitañishileñayi. Bayibolu yatulejaña nawu Yesu watañishileña “neyi muntu wukweti wuswa, bayi neyi ansonekiku.” Antu “ahayamini chikupu” hachumichi. (Maku 1:22) Hakwila aleteshi antu alemesheña yuma yatañishileñawu, ansoneki adiñaku mumafuku aYesu neyi anakutañisha azatishileña yuma yahosheleñawu arabi, antu alemesheliwu nankashi. Kwambukaku, Yesu wadizishileña antu yuma yafumishileñayi muNsona yonenewa. Chineli wadiña Mwana kaNzambi washakamini mwiwulu henohu kada yenzi hanu hamaseki, wadi kuzatisha maana indi asweja kulonda yatiyishi antiyilili jindi kuwaha nikuyileja nsañu jajivulu nankashi. Hela chochu, dichelili wanyi. Ilaña, ntañishilu yindi yashindameneni hankeñelu yaNzambi niHezu dindi. (Tañenu Yowanu 7:​14-16.) Yesu welili chuma chachiwahi nankashi chatela kwimbujolawu akakumulondela.

8. Kapostolu Petulu wamwimbujoleli ñahi Yesu?

⁸ Atumbanji twaYesu niwena ashindameneneña Hezu daNzambi neyi anakutañisha. Chakutalilahu, toñojokenu hampanji yahaniniyi kapostolu Petulu hefuku daPentekosta 33 C.E. Petulu hadiña muntu wataña nankashiku. Ilaña, washikili hanyichima yawantiyilili jindi muloña wakulumbulula chiwahi Nsona jahosheleña hawuprofwetu washikijiliyi Yesu. (Yilw. 2:​14-37) Yumanyi yafuminimu? “Antu ejima atambwilili izu dindi namuzañalu ayipapatishili, nawa hanodu ifuku abombeleliku antu akushika ku 3,000.”—Yilw. 2:41.

9. Hampinji yitunakutañisha, chalemenadi kushindamena Hezu daNzambi?

⁹ Kwosi chitwa chikwawu chabadika Izu daNzambi chitunateli kuzatisha hakwila tushiki hanyichima yawantiyilili jetu. (Heb. 4:12) Dichi, twatela kuzatishaña nankashi Bayibolu hampinji yitunakutañisha. Twatela ‘kushimwina izu’ bayi yitoñojoka yetuku. (2 Tim. 4:2) Yishimu 2:6 yahosha nawu: “Yehova yomweni diyi wahanaña maana; mukanwa kindi mwafumaña kwiluka nikashinshi.” Dichi neyi tunakuzatisha Nsona hampinji yitunakutañisha, dikwila nawu tunakumwiteja Yehova kulonda ahosheña. (Mal. 2:7) Tunakukeña antu eluki nawu muBayibolu mwekala nsañu yalema nankashi kubadika maana awantu. Ayonena kudi Nzambi nawa yatukwashaña kwiluka yuma yakeñekaña hakwila tumutiyisheña Nleñi yetu kuwaha nikuhanda chihandilu chachiwahi nawa chamuzañalu.—2 Tim. 3:​16, 17.

10. Tunateli kumukwasha ñahi kadizi waBayibolu kusha muchima Hezu daNzambi?

¹⁰ Hampinji yimunakuloñesha nsañu yimukuzatisha hakudizisha kadizi waBayibolu, toñojokenu hanjila jimukuzatisha jikumukwasha kusha nankashi muchima hanochu chatañishaña Bayibolu. Kadizi wenu watela kwiluka nindi hela chakwila nyevulu nimavidiyo atukwashaña kudiza yuma yalema, Bayibolu dimukanda itwashindamenaña chikupu. Dichi tañenu Nsona yinakukonkomwena hayikuma nawa mukwashenu kadizi wenu kutoñojokahu. Hampinji yimunakuhosha hanyevulu nimavidiyo, mukwashenu kadizi wenu yatiyishishi yishina yalema yamuBayibolu yinakudizilayi kunoyu nyevulu nimavidiyo. Himwatela kuhosha yuma yayivulu hela kutaña nsona jajivulu hakwila mwili mwenimuku. Ilaña mwinkenu kadizi mpinji yakutiyishisha nsona-hinsona yimunatañi nawa neyi chinatwesheki, munateli kuyitaña cheñi oyu nsona. Neyi twilaña muniyi njila, bayi neyi tukudizishaña muntu mukanda hela mwevulu indi kwiji vidiyoku, ilaña tukumudizishaña Bayibolu.—1 Kor. 2:13.

11-12. (a) Tunateli kudiwunjika ñahi nawatudizi etu aBayibolu? (Yilwilu 17:​1-4) (Talenu nimwevulu.) (b) Yumanyi yinateli kubula kwilukawu amakwawu kutalisha haBayibolu, nawa tunateli kuyikwasha ñahi?

¹¹ Neyi kudi chikuma chinakumukalila kadizi wenu kwiteja, anukenu “[kushimwina izu] . . . nakudiwunjika chikupu.” Bayi neyi atudizi ejima anateli kutiyishisha yuma munjila yoyimuku. Atudizi amakwawu akeñekaña mpinji yeneni hakwila nawu atiyishishi chalala chitwamonaña netu chapela. Pawulu washimwinini aYudeya muTesalonika kapampa kakavulu, nakuhanjeka nawu kuzatisha Nsona hakwila nawu amakwawu atiyishishi chikuma chahosheleñayi.—Tañenu Yilwilu 17:​1-4.

¹² Njila yikwawu mutunateli kumwekeshela kudiwunjika hikuyihula atudizi malwihu kulonda twiluki yitoñojoka yawu nawa twatela kutondolwela kuhosha nankashi. Yitiyililenu nakanañachima nawa ilukenu yuma yinakutoñojokawu. Kuhiñahu, tañenu nawa hanjekenu nawu haNsona jikuyikwasha kwiluka chatoñojokañayi Nzambi hanoyu nsañu. Cheñi anukenuña chumichi: Antu amakwawu hiyayiluka Bayibolu hela hantiku, nawa eluka wanyi ninsañu yekalamu. Komana kuyileja Bayibolu yakupulinta kunateli kuyikwasha? Munateli kuyitañila hanasonekiwu nawu “Nsañu Yekala Mwizu daNzambi,” chibalu chekala kumatachikilu aBayibolu yaNsona jaKaayi Kakaha, kulonda muyikwashi eluki nsañu yalema yekala muBayibolu. Kuhiñahu, munateli kuyikwasha kulonda eluki chalemena oyu nsañu kuhitila mukuzatisha Nsona yimu hela jiyedi jidi mulwihu 15 hakwila muyilumbulwili eluki Bayibolu chiyinateli kutukwasha kwikala namuzañalu. Muwihi, neyi muyileja atudizi enu ñovu yikweti Izu daNzambi, ntañishilu yenu yikushikaña atudizi hamuchima chikupu.

YIKWASHENU ASHEÑA MUCHIMA HADI YEHOVA

13. Neyi tunakudizisha antu Bayibolu, twatela kuyikwasha asheña maana nankashi hadinyi? Shimunenu chakutalilahu.

¹³ Chuma chitwafwilaña hikukwasha antiyilili jetu kulonda amwiluki Yehova nikuswina kwakwihi nayena. (Yak. 4:8) Muniyi njila, tunateli kudesekeja namuntu wukweti inoñu wunakumunyikilaku mukwawu kulonda yamoni chuma chinakukeñayi chidi mumwidima. Hampinji yinakumunyikayi, iwu muntu hakudimunyikaña yomweniku. Ilaña, wukutalishaña inoñu kuchuma chinakukeñawu kulonda achimoni. Munjila yoyimu, neyi tunakudizisha antu Bayibolu, twatela kuyikwasha asheña maana nankashi hadi Yehova bayi hadi etuku.

14. Tunateli kumukwasha ñahi kadizi wetu kusha muchima hadi Yehova?

¹⁴ Hampinji yimunakudizisha kadizi, mukwashenu ekali namuchima wakumutiyisha Yehova kuwaha. (Yish. 27:11) Himunakumudizisha hohu kadizi wenu nenu yeleña yuma yaloña nikutondolwela kwila yuma yatama kulonda ekali Chinsahu chaYehovaku. Ilaña munakukeña yahimpi yilwilu yindi kulonda yamutiyisheña Yehova kuwaha. Chakutalilahu, neyi kudi chaaku chatama chinakumukalila kadizi wenu kuleka, mwihulenu awa malwihu: “Muloñadi Yehova chahelelayi ichi chaaku? Muloñadi Yehova chikukeñelayi nindi muleki kwila chuma chimwadiluñishaña? Chumichi chinakumwekesha ñahi nawu Yehova wayikeña?” Neyi mumukwasha kadizi wenu kutoñojoka nankashi hadi Yehova nihayilwilu yindi, mukumukwasha kwiluka chamukeñawu chikupu kudi Tata yetu wamwiwulu. Chikufumamu, kadizi wenu wukufwilaña kumutiyisha Yehova kuwaha.

TWALEKENUHU KUWAHISHAKU NTAÑISHILU YENU

15. Yumanyi yimwatela kwila yikuyikwasha kwiluka chakuwahishaku ntañishilu yenu?

¹⁵ Munateli kumulomba Yehova ayikwashi kwiluka chidi ntañishilu yenu kulonda mumoni neyi hadi himwatela kuwahishaku. (1 Yow. 5:14) Hakwila nawu muzati kwesekeja nakulomba kwenu, mwatela kushaña muchima kuyuma yinakutudizishayi Yehova hampinji yakupompa kwachipompelu. Munateli kusendaku antañishi akulukila kulonda muyi nawu hamu nakulombola kadizi wenu waBayibolu. Hanyima, yihulenu ayileji himwatela kuzatila. Anukenu cheñi nenu, hela chakwila nsañu yimunakumudizisha enu mwayiluka chiwahi, kadizi wenu wayiluka wanyi. Monenuña nsañu yimunakumudizisha neyi chinakuyimonayi yena. Kuhiñahu mukwashenu kadizi wenu eluki nindi nsañu yitunakumudizisha mwamweni hinsañu yayiwahi. Yinateli kumukwasha kwikala nawubwambu wakola naYehova nawa yinateli kumuletela muzañalu walala.—Mas. 1:​1-3.

16. Yumanyi yayiwahi yikufumamu neyi tutwalekahu kuwahishaku ntañishilu yetu?

¹⁶ Kudizisha antu hakwila nawu amwiluki Yehova hichuma chimu chatuletelaña muzañalu chikupu. Iwu mudimu wawuwahi wakudizisha wakakeñekaña kuwuzata nankashi kumbidi mukaayi kakaha. Dichi, tutwalekenuhu kwakamena antiyilili jetu, kushindamena Hezu daNzambi, nikusha muchima hadi Yehova hampinji yitunakushimwina nsañu yayiwahi. Kwila mwenimu kukutukwasha kwiluka chakuwahishaku ntañishilu yetu mumudimu wakushimwina.