Namuzatili Yehova muCuba Hadi Yaaka Kwakwihi na 70

Neyi nanuka, twashakamineña mukuwunda kumukala. Twashakamineña hamu nawantaña jetu amakwawu, kushilahu atata jetu awambanda, amandumi jetu niankaaka jetu. Twadiña nayakuda yayivulu nichihandilu chamuzañalu.

Anvwali jami atachikili kuyidizisha Bayibolu kudi manakwetu Walton Jones hinadiña nayaaka yakuvwalika hadaha yitanu. Iwu mukakushimwina wadikita wendeleña maora kwakwihi na 10 hakwila yashiki kumukala wetu. Mpinji yejima neyi nenzi, antu amavulu amuchisaka chetu adipompesheleña hamu hetala dawankaaka nakuhanjeka nindi nsañu yamuBayibolu hadi mpinji yayilehi. Anvwali jami, kushilahu niatata awanyiki aPedro niatata awambanda aEla, akeñeli nankashi yuma yadizileñawu chakwila hashimbwili wanyi apapatisheweli nakwikala aYinsahu jaYehova. Atata awambanda aEla anashikiji yaaka kwakwihi na 100 nawa anatwalekihu kuzata wupayiniya muCuba.

Hayina mpinji, aYinsahu jaYehova adifukwileña mukukasunuka muCuba. Antu atwilukili chiwahi etu aYinsahu muloña twashimwinineña kwitala niitala. Twasendeleña nyikanda yayivulu yashindamena haBayibolu yitwayinkeleña. Nawa twendeleña maluña amalehi! Natiyaña kuwaha neyi nanuka hinamuzatilileña Yehova muyina ‘mpinji yayiwahi’ hinachidiña kansi. Hela chochu, kudi ‘mpinji yakala’ yenjileña hambidi.—2 Tim. 4:2.

MPINJI YAKALA YASHIKILI

Hinadiña nayaaka yakuvwalika hadaha yitanu, atata anvweli ayili hamu nawatata awanyiki kukupompa kwanyanya kwadiña kukabadi kakwawu kanichi chituutu. Chawushona, hayileñawu, wejima wawu ayedi akwatikili musoñu wafwana muloña wakunwa menji amajilu. Inakwanuka chafuntiliwu, atata awanyiki apelekeli nsuki hohu ilaña afwili wanyi. Hela chochu, atata anvweli wena afwili, nawa adiña hohu nayaaka 32.

Chafwiliwu atata, amama atusendeli etu anyana nakuya hamu nawu kudi ayayawu awamayala ashakamineña mumukala waLombillo. Muloña wachumichi, twashiyili antaña niankaaka jetu, antu itwakeñeli nankashi. Hela chochu, ami, amama niahela jami twatwalekelihu kudifukula kudi Yehova.

Napapatisheweli haAugust 26, 1957, mwijiya dadiña kwakwihi naLombillo. Haniyi mpinji nadiña nayaaka 10. Nelukili wanyi nami muyaaka yiyedi hohu chihandilu chawaYinsahu jaYehova chikuhimpika muCuba. Mu 1959, nfulumendi yayuulileña hayina mpinji ayifumishilihu kudi nfulumendi yacheñi yatachikili kuyuula.

Kufuma haniyi mpinji twekalili muchiyuulu chanfulumendi yalemesheli nankashi mudimu wawushidika. Chumichi chaletesheli chihandilu chawantu jaYehova kutaminaku, muloña hiyadiñijaña muwushidika hela mumapolitiki mumatuña ejima mwekalawuku. Chafuminimu, chovu-chovu twalekeli kwikala nawuswa wakudifukula mukukasunuka wutwadiña nawu hadi yaaka yayivulu. Nkumininaku, nfulumendi yalekesheli nyidimu yetu, nawa amanakwetu amavulu ashinshika ayishili mukaleya. Amanakwetu amakwawu ayeteleña nawa hiyayinkeleña yakuda mpinji yejimaku. Mpinji jikwawu, anhembi ayinkeleña amanakwetu yakuda yelukiliwu nawu yidi namashi, yatukaanisha Bayibolu kuda.

Hela chakwila twamweneña kukala kwamuchidiwu, twatwalekelihu kupompa hamu nakudifukula kudi Yehova. (Heb. 10:25) Mpinji jikwawu twapompeleleña kupompa kwanyanya kumaha hela kumaluña amakwawu mwituña dejima. Inakwanuka mpinji yimu manakwetu watwinkeli lusesa lwakuzatisha iyinda dindi deneni mwadiña anyikoku kulonda tupompelimu kupompa kwanyanya. Twawahishilimu wanyi henohu kanda tupompelimu nawa anyikoku niwena twayifumishilimu wanyi. Dichi hampinji yitwapompeleña, twadiña hamu nawanyikoku!—Mika 2:12.

Twayisakililili amanakwetu azatileña nañovu kutukwasha hakwila twikaleña nayakuda yakuspiritu munana mafuku. Chakutalilahu, mpanji jahakupompa kwanyanya jadiña jamazu akukwata dehi, nawa ajishileña hayozelu nakuyitemeshela aYinsahu mwituña dejima daCuba. Mpinji yikwawu, amanakwetu ayedi hohu diwu enkeleñawu mudimu wakuloñesha nikuhana mpanji jejima jadiña haprogilamu nikujikwata mumazu. Chineli awa amanakwetu adiña nakukwatila mazu kumaluña aswamanyika, mpinji jikwawu mwatiyakeneña atusumbi anakukokola hela mapumba amakwawu. Neyi heluña dakupompela hosi malayiti, manakwetu wumu amwinkeleña mudimu wakuchova nkinga yinemikiwu kwasokankesheleñawu kadikina kedishileña kesi kawuneñu hanakuchovayi. Aka kesi kawuneñu kakwashileña chozelu kuzatika chiwahi nawa twatiyilileña kuprogilamu yejima. Hela chakwila yuma yadiña chiwahi wanyi nawa hitwadiña nanyikanda yayivulu yakupulinta neyi yadiña nawamanakwetu mumatuña amakwawuku, mpinji yejima twadiña nayakuda yakuspiritu. Nawa twamuzatilileña Yehova hamu namuzañalu.—Nehe. 8:10.

KWIKALA APAYINIYA NAWA ANVWALI

Natachikili wupayiniya wampinji yejima mutawuni yaFlorida hinadiña nayaaka 18. Chimwahitili kwakwihi nachaaka chimu, antondeli kwikala payiniya wadimena muCamagüey, musumba weneni nankashi muCuba. Kweniku dikunadimweneni namuhela Emilia, Chinsahu walubanji wakuSantiago de Cuba. Hohenohu twatachikili kudiluka, nawa chaaka chamanini wanyi, twadisumbwili.

Natachikili kuzata mudimu wakumujimba mafuku ejima kukampani yanfulumendi. Muloña wachumichi, ami nañodami Emilia twalekeli mudimu wawupayiniya. Hela chochu, twakeñeleña kuzata nañovu mumudimu waYehova. Dichi nafuukwilihu nami nizateña hefuku-hefuku, kutachika na 03 koloku yantetemena kushika na 11 koloku yantetemena. Nakeñeli wanyi kuhinduka ntetemena, ilaña kuhimpa yuma muniyi njila kwankwashileña kwikala nampinji yakuya nakushimwina nikupompela hamu nañodami Emilia.

Mu 1969, twekalili namwana weyala wawedi, Gustavo. Hashimbwili wanyi kufuma havwalikiliyi, kuloñesha kwanlejeli nawu nifunti mumudimu wampinji yejima wakwenda. Hayina mpinji, ankoñi añinza muCuba ayitejeli kwikala nanyana. Hela chakwila twekalili nanyidimu yayivulu, twadiña namuzañalu chikupu. Ami nañodami Emilia twamweni netu hikukooleka chikupu kukalakela amanakwetu niahela muniwu mudimu. Hampinji yitwadiña mumudimu wakwenda, twekalili namwana mukwawu weyala, Obedi. Kuhiñahu, twekalili cheñi namukwawu weyala, Abner. Nawa mukuhita kwayaaka, twekalili namwana wamumbanda, Mahely.

Neyi nanuka yaaka yitwazatili mumudimu wakwenda, nazañalalaña nankashi hakumona Yehova chinakiswiliyi antu jindi muCuba. Nawa watukiswilili chikupu chitwazatileña nañovu kukwasha anyanetu kulonda amukeñi chakufuma hamuchima. Lekenu niyilumbulwili chadiña chihandilu chetu nañodami Emilia hitwadiña mumudimu wakwenda.

NADIÑA NKOÑI WAÑINZA HAMPINJI YALEKESHELIWU MUDIMU WETU MUCUBA

Muyaaka yamuma 60 nimuma 70, yuma dihiyaswejeli kutaminaku hanyima yakulekesha mudimu wetu. Amishonali ayihañili mwituña. Amanakwetu atwansi amavulu ayikasili nakuyisha mutuleya. Matala etu aWanta ayishinkili nikasanji kamutayi kadiña muHavana.

Hampinji yalekesheliwu mudimu wetu, twendeleleña hohu yipompelu kunsa yanyilungu. Dichi twelileña neyi twendela chipompelu kunsa yanonu mulungu, dikwila nawu twakachendela cheñi nimulungu wunakwinza. Twasendeleña hohu yuma yantesha nawa kakavulu twazatishileña nkinga, kuchiina akapokola niantu amakwawu kwiluka. Chipompelu chabidikileña wanyi nawu tunakwinza. Muloña wachumichi antu amweneña hohu nawu tunakuya nakuhempula antaña. Chatukalilileña wanyi kwila mwenimu. Kafwampi, mpinji jikwawu twamweneña neyi kwiji tunayi hohu nakutala antaña, dichi twadanukishileña chuma chacheni chakuspiritu chitunendeli. (Maku 10:​29, 30) Hela chochu, twelileña yuma mukubabala. Kakavulu atulondeleleña kudi akapokola nikutwihujola. Amanakwetu atutambwilileña kumatala awu ashileña wumi wawu muwubanji, muloña neyi atuwanini adi kuyikasa.—Rom. 16:4.

Haniyi mpinji, amanakwetu amavulu niahela amwekesheleña chisambu chikupu hela chakwila adiña nayuma yantesha yakumujimba. Kumaluña amakwawu kwadiña ñweneni nankashi, ilaña amabwambu jetu atwinkeleña nyisheketela yawu hakwila tutweshi kukaama. Amakwawu atutambwilileña kumatala awu hela chakwila adiña nayakuda yantesha nankashi. Muloña wachumichi, mpinji jikwawu twayinkeleñahu yakuda yitwenjileña nayu.

Twasendeleña anyanetu ejima wanyi neyi tunakuya nakwendela yipompelu. Twasendeleña hohu mwana wumu nawa anyana amakwawu ashalileña kwitala iku anakuyakamena kudi amama nimuhelami. Kafwampi, kwenda namukeki kwatukiñileña nankashi. Mpinji yimu, atupokola atachikili kukeñakeña muyola yetu kulonda amoni neyi mudi nyikanda yetu, ilaña ayiwanini wanyi muloña twayiswekeli muchola mwadiña nyapi yamwana mwabulili kukeñakeñawu.

Namusakililaña nankashi ñodami Emilia hayuma yejima yeliliyi hakwakamena anyanetu nichinankwashiyi muyaaka yejima yitunazati mumudimu wampinji yejima. Ilaña ami natwesheleña kuzata mudimu wakumujimba nawa hampinji yoyimu nimudimu wakwenda. Yumanyi yankwashili? Mpinji jikwawu, nazatileña maora amavulu mumulungu kapampa kamu hela kayedi hakwila nawu nibuli kuzata kunsa yamulungu. Hela chochu, mukuhita kwampinji anyinkeli chifulu. Nekalili mukakutala akanyidimu nawa anlejeli nawu nizateña mafuku 7 mumulungu. Netejeli kuzata muniyi njila. Ilaña nelileña neyi niyinka nyidimu yayivulu yakuzata kunsa yamulungu, ashimwineña wanyi nawu nafumahu. Chakadi nikujina, akulumpi jami amudimu elukileña wanyi nawu hinazataña kunsa yanyilunguku!

NATWALEKELIHU KWIKALA NAMUZAÑALU NEYI KUDI KUHIMPIKA

Ifuku dimu mu 1994, amanakwetu alombweleña muCuba atutambikili etu ankoñi añinza ejima 80 kwinza kukubulakana kwadimena kwadiñaku muHavana. Wenowu muzañalu wutwatiyili hakudimona nawakwetu hanyima yakuhitahu yaaka yayivulu! Haniku kubulakana, atulejeli kuhimpika kwadiña mukuloñesha. Kuhiñahu atulejeli nsañu yatuhayamishili. Awa amanakwetu atulejeli nawu anakuhana majina etu kudi akawuswa. Hanu dinu muloñadi chahaninineñawu majina etu?

Atulumbulwilili nawu adiña nakuhanjeka nawayilolu janfulumendi kulonda hekali kutiyañana hakachi kanfulumendi nawaYinsahu jaYehova. Akawuswa ayilejeli amanakwetu alombweleña nawu ahani majina awankoñi añinza ejima. Dichi wejima wetu twetejeli netu ahani majina etu. Kufuma hayina mpinji, twatachikili kutiyañana chiwahi nawayilolu janfulumendi.

Nkumininaku, twatachikili kupompa nikushimwina hatooka, hela chakwila achidiña kanda atwinki lusesa lwakutwilukilaku nawu tudi akakudifukula. Mukuhita kwampinji, twelukili netu ana akawuswa adiña eluka dehi majina awankoñi añinza amakwawu ilaña akeñeleña hohu nawu tuyileji netu mwamweni himajina etu.

MuSeptember 1994, atwinkeli lusesa lwakutachika kuzatisha cheñi kasanji ketu kamutayi. Chafuminimu, twatwalekelihu kuzatila hakasanji kitwazatishileña kunyima nawa kashinkiliwu hadi yaaka 20.

Kuhiñahu, mu 1996, ami nañodami Emilia atutemesheleli foni nakutuleja nawu tuyi nakuzatila haBeteli. Hanyima yakutambwila iyi foni, nahayamini. Dichi nayilejeli amanakwetu nami tukweti anyana anyanya ayedi ituchidi kwakamena. Amanakwetu atoñojokelihu nawa mukuhita kwampinji atulejeli nawu chidi hohu chiwahi kuya nawanyanetu haBeteli. Twetejeli iwu mutambi nawa twatachikili kudiloñesha kubuukila kuHavana.

Kuhosha hohu chalala, hakusambila natiyileña wuudi kuzatila haBeteli, muloña nazatili yaaka yayivulu mumudimu wakwenda nawa nakeñeli nankashi iwu mudimu. Chankalilileña kushakama mukasanji nakuzata. Ilaña akwetu inazatileña nawu haBeteli nawa sweje-e ñodami Emilia, ankwashili kuhimpa yitoñojoka yami. Mukuhita kwampinji, natachikili kwikala namuzañalu nawa ichi inakutiya kuwaha kuzatila haBeteli.

Ami nañodami Emilia tunashinakaji dehi. Hela chochu, twazañalalaña nankashi neyi tutoñojoka hadi amanakwetu niahela ejima ituneluki nikuzatila hamu hadi yaaka yayivulu. Nawa chuma chaswejaña kutuzañalesha hikumona anyanetu niejikulu anakumukalakela Yehova. Twatiyaña neyi chatiliyi kapostolu Yowanu wadiña washinakaja dehi, wahosheli nindi: “Kwosi chuma chanzañaleshaña nankashi kubadika ichi: chakutiya nawu anyanami anatwalekihu kwenda muchalala.”—3 Yow. 4.

Dichi ami nañodami Emilia tunazatili haBeteli hadi yaaka kwakwihi na 30. Hela chakwila tunashinakaji dehi nawa tunakukatakata kunyijimba, tunakuzata hakumina ñovu jetu munyidimu yatwinkawu. Hadi yaaka yejima yitunazati mumudimu waYehova, mpinji jikwawu twamonaña kukala, ilaña twazañalalaña muloña tweluka netu tunakalakeli “Nzambi wamuzañalu” hadi yaaka 70 ahanu hachituutu chaCuba!—1 Tim. 1:11; Mas. 97:1.