Mukaayi Kejima Mwakekala Kuwunda

Muntu wejima wakeñaña kushakama mwituña mudi kuwunda. Kufuma tuhu kunyima, anlomboli jamatuña aneseki kuleta kuwunda kunabuli mukaayi. Mpinji jikwawu, aletaña kuwunda hadi mpinji yantesha. Ilaña chawushona, madombu atachikaña cheñi. Komana mukaayi mwakekalahu kuwunda? Eña! Talenu yuma yitwatela kudizila kudi Yesu.

Yuma yakelayi Yesu

Bayibolu yamwekeshaña yuma yikwilayi Yesu katataka hakwila aleti kuwunda mukaayi.

• “[Yesu] akamutena nawu . . . Kalamba waKuwunda. Chiyuulu chindi chikatohelañaku nikuwunda kwindi kwakakuma wanyi.” (Isaya 9:6, 7) Chineli hiNyuuli yaWanta waNzambi, Yesu wakaleta kuwunda kwakabula kumana mukaayi kejima.

• “Yena wakapulwisha kazweñi wunakulomba wukwashu . . . niwejima wunabuli wakumukwasha.” (Isamu 72:12-14) Yesu wakazatisha wuswa windi hakuleta wuñanji walala, kumanisha majita ejima, madombu nimakabi.

• “Muza hiwukanyamwina muza wukwawu mpoku yakabaliku, nawa hiyakadiza cheñi njitaku.” (Isaya 2:4) Muchiyuulu chaYesu, antu ejima akadiza chakuleta kuwunda bayi njitaku.

Hakwila mwiluki chuma chakelayi Yesu hakuleta kuwunda nichimwatela kwila hakwila mwakashakami munaka kaayi, talenu vidiyo yayihi yinakwila nawu Wanta waNzambi hiChumanyi?

Yuma yatañishiliyi Yesu

Nimakonu, yuma yatañishileñayi Yesu yinakukwasha antu amavulu kushakama mukuwunda. MuMpanji yahaMpidi yaya mpuhu, Yesu wayidizishili antu yuma yinateli kuyikwasha kuleta kuwunda muchihandilu chawu. Talenu iyi yuma yantesha.

• “Adi namuzañalu wowu aletaña kuwunda.” (Matewu 5:9) Yesu wayilejeli atumbanji twindi nindi hiyatela hohu kutondolwela madombuku, ilaña atela nikuleta kuwunda.

• “Sambilaku kuleta kuwunda namanakweyi, kuhiñahu dinu wufunti nakulambula mulambu weyi.” (Matewu 5:23, 24) Yesu walejeli antu amutiyilileña nindi atela kuleta kuwunda mukunyakashana. Wahosheli nindi kuleta kuwunda nawantu kwalema nankashi muloña kunateli kutukwasha kwikala nawubwambu wawuwahi naNzambi.

• “Lekenu kusompesha kulonda abuli kuyisompesha.” (Matthew 7:1) Yesu wakaanishili kusompesha akwetu munjila yabula kutelela yinateli kuleta madombu. Chatela akeñeña hohu yiluwa, Yesu wayilejeli akakumulondela ‘kwanakena’ yiluwa yawakwawu.—Luka 6:37.

Antu mukaayi kejima anakulondela yuma yatañishileñayi Yesu. Nimumaluña mwavula madombu, anatachiki kudiza chakumanisha madombu chakadi kuzuwa, kutachika kudanakena nikumwekesha kukeña hela chakwila akwawu anakuyila chatama.

Talenu yuma yatañishileñayi Yesu chiyinakwashi amakwawu kwikala nakuwunda, tañenu chibaaba chinakuhosha nawu “Chimunateli Kwikala naKuwunda Mukaayi Mudi Majita.”