Madombu Hiyamanishaña Kukalaku

Antu amavulu makonu atoñojokaña nawu atela kwila madombu neyi anakukeña kumanisha yikonkojola hela kukala kukwetiwu. Ilaña yitoñojoka yamuchidiwu yinambukiku chikupu nantañishilu yaYesu niyuma yelileñayi. Talenu yuma yimu yahosheliyi niyeliliyi.

Yuma yahosheliyi Yesu

MuMpanji yindi yahaMpidi yelukewa, Yesu watañishili nindi kuzuwa nimadombu, bayi neyi dijinateli kumanisha kukalaku. Talenu iyi yakutalilahu.

• “Yuma yejima yimunakukeña nenu antu ayilili, ninenu nawa mwatela kuyilila mwomumu.” (Matewu 7:12; Luka 6:31) Ilu lushimbi lwatenañawu kakavulu nawu Lushimbi Lwalema,a lwatukwashaña kuyilila akwetu yuma neyi chitwakeñaña kutwilila ninetu. Chineli kwosi muntu wakeñaña kumwila chatama, twatela kuzata nañovu kuyilemesha akwetu nikuyitiyila luwi hela chakwila hadi yikonkojola hakachi ketu.

• “Wejima wukuyeta kwibuta dachidiilu, mushetumwinenu nikudikwawu.” (Matewu 5:38, 39; Luka 6:29) Yesu hadiña nakudizisha nindi twatela kwiteja antu kutwila chatamaku. Ilaña, wadiña nakwolola yitoñojoka yatama yatañishileñawu anlomboli jansakililu yakwila nawu chidi hohu chiwahi kufuntisha katama nakatama. Wadiña nakuleja akakumulondela nindi hiyatela kufuntisha katamaku, ilaña atela kwikala amwovu neyi anayihilishi.b

• “Twalekenuhu kukeña ayilumbu jenu.” (Matewu 5:43, 44; Luka 6:27) Yesu watañishileña nindi twatela kuyitiyila luwi antu atuhela hela atwilaña chatama. Watalishili wanyi mukwila nawu twatela kwiteja yuma yatama yelañawu.c Hela chochu, neyi tuyitiyilaña luwi antu atuhela, hadaha akwikala awunda nawa akutachika kututiyila ninetu luwi.

Yuma Yeliliyi Yesu niYakelayi

Yesu watañishileña nindi madombu hiyanateli kumanisha kukalaku, nawa yuma yatañishileñayi diyelileñayi. Hawufuku wamukwatiliwu, wumu wahadi akakumulondela wazuñili ndombu hakwila amukiñi, ilaña Yesu wahosheli nindi: “Funtishaku mpoku yeyi yakabali muchindalu chayu, muloña antu ejima azatishaña mpoku yakabali akafwa kumpoku yakabali.” (Matewu 26:52) Yesu wayimwekesheleleña ayilumbu jindi kukeña kuhitila mukuyanakena antu amukabishileña nawa wadiña ninakuyilombelaku!—Luka 23:33, 34; 1 Petulu 2:23.

Bayibolu yakana nawu chineli Yesu diyi Kalamba waKuwunda, katataka amanishi madombu ejima. (Isaya 9:6, 7) Hakwila mwilukilihu yuma yayivulu haniyi mbidi yayiwahi, tañenu chibaaba chidi namutu nawu “Chakamana Majita Ejima.”