Yuma Yinateli Kukwasha Antu Abulaña Kumona
Kusandujola kumu kwamwekeshaña nawu antu akushika ku 43 miliyoni kunyeñumuka kaayi kejima hiyamputamesu nawa antu akushika ku 295 miliyoni amweshaña wanyi.a Chawushona, amavulu hakachi kawu ayilaña chatama.
Nzambi watiyaña ñahi neyi yamona amputamesu? Bayibolu yahoshahu nawudi hadi amputamesu? Nawa aYinsahu jaYehova anakuyikwasha ñahi awa antu?
Chatiyañayi Nzambi neyi yamona amputamesu
Bayibolu yashimuna nawu Yehovab wakamenaña chikupu antu abulaña kumona. Wakeñaña ayileña chachiwahi nawa adizeña yuma yayivulu kuhitila munyikanda yaloñeshañayi. Wayileja cheñi yuma yayiwahi yakayililayi kumbidi.
Chahosha Bayibolu: “Washiñewa yowu muntu wukukojeja mputamesu kusenuka munjila.”—Kuhituluka 27:18.
Muyinatalishi: Mumpinji yakunyima, Nzambi wayinkeli antu jindi Nshimbi yakiñileña amputamesu kulonda abuleña kuyikabisha.
Chahosha Bayibolu: “Nzambi hakweti chaambuku.”—Yilwilu 10:34.
Muyinatalishi: Nzambi wayilemesha amputamesu neyi chochayilemeshayi antu amonaña.
Chahosha Bayibolu: Yesu “watonesheli amputamesu amavulu.”—Luka 7:21.
Muyinatalishi: Yesu chatonesheliyi amputamesu amakwawu hampinji yadiñayi hanu hamaseki, wamwekesheli chakela Wanta waNzambi kumbidi.
Chahosha Bayibolu: “Mesu amputamesu akatona.”—Isaya 35:5.
Muyinatalishi: Yehova washiika nindi neyi Wanta waNzambi wunatachiki dehi kuyuula hanu hamaseki kumbidi, amputamesu akatona.
AYinsahu jaYehova chakwashañawu amputamesu
Mwahita iseki dejima, etu aYinsahu jaYehova twashimwinaña mazu aNzambi kudi amputamesu, ahosha hayuma yayiwahi yakayililawu. Twatweshaña ñahi kwila mwenimu?
Twedishaña Bayibolu kushilahu ninyikanda yashindamena haBayibolu yakudizamu nimavidiyo ambokamboka awamputamesu niawantu abulaña kumona chiwahi, kushilahu ninsona jawamputamesu, nsona jamaneni nimazu akukwata.
Mpinji yejima twekalaña nakupompa kwawakaKristu kwenzaña antu ejima, kushilahu niamputamesu.
Twayidizishaña Bayibolu.c
Twayidizishaña hohu chawana. Muloñadi? Muloña Yesu wahosheli nindi: “Mwatambwilili chamukunkulu, hanenu chamukunkulu.”—Matewu 10:8.
AYinsahu jaYehova ayakamenaña chikupu amputamesu. Ana anakukeña kudifukula hamu nanetu akawana amabwambu amawahi nawa akayikwasha. Talenu mazu ahosheliwu aYinsahu jaYehova amakwawu abulaña kumona.
Talita Alnashi, wakuSweden, wamweshaña wanyi kufuma tuhu mpinji yavwalikiliyi. Talenu chamukwashiliwu kudi avwali jindi kwiluka nsañu yamuBayibolu nichamumwekesheleliwu kukeña yena hamu nichisaka chindi kudi amabwambu jawu.
James Ryan, wakuUnited States, wadiña njika matu kufuma tuhu mpinji yavwalikiliyi nawa mukuhita kwampinji wekalili mputamesu. Talenu yuma yamuleteshaña kwikala namuzañalu muchihandilu chindi.
Cynthia Pablo, wakuPhilippine, hinjika matu nawa himputamesu. Amukwashili ñahi kudi akwawu mwadifukwilañawu mumpinji yakala yachipupu chaCOVID-19? Talenu chibaaba chinakuhosha nawu “Congregation Supports Deaf and Blind Sister During Pandemic.”
Nyikandanyi yamuBayibolu yitwayidishilaña?
Nyikanda yawamputamesu. Twedishaña maBayibolu awamputamesu amukuma hela achibalu munyichidi yambokamboka. (Neyi munakukeña kwiluka madimi itwedisha, talenu chikasha chinakwila nawu “Bayibolu yaNsona jaKaayi Kakaha Mwidimi dawaMputamesu.”) Twedishaña cheñi nyikanda yayivulu yawamputamesu yahosha hansañu yamuBayibolu. Antu ejima anakukeña kwiluka kutaña nsona jawamputamesu, twedisha mukanda wahoshaña nawu Ilukenu Chakutaña Nsona jawaMputamesu. Awusoneka munjila yakwila muntu wabula kwikala mputamesu nateli kuyikwasha amputamesu kwiluka kutaña.
Tambulenu nyikanda yawamputamesu kudi Chinsahu chaYehova hela mulejenu kulonda akayendeli.
Ha jw.org, loñololenu nsañu yahachozelu chansona jakutaña namakasa.d
Nyikanda yansona jamaneni ninsona jamaneni. Tudi nanyikanda yansona jamaneni yawantu abulaña kumwesha. Webusayiti yetu ya jw.org ayituña munjila yakwila neyi muntu yatohesha nsañu, nsañu yikuhimpika wanyi ilaña yikwikala neyi chochiyatela kwikala. JW Library apu yetejaña cheñi muntu kutohesha mazu hela kuyikehesha.
Munateli kutambula nyikanda yansona jamaneni kudi Chinsahu chaYehova hela kumuleja nenu yakayendeli.
Ha jw.org, loñololenu nyikanda yansona jamaneni yahachozelu yinesekani nanyikanda yawu yakupulinta.
Nyikanda yidi mumazu akukwata. Twedishaña mazu akukwata aBayibolu yaKaayi Kakaha mumadimi akubadika ha 200. Kubombelahu, twedishaña nyikanda yayivulu yahoshaña hansañu yamuBayibolu mumazu akukwata. Kakavulu munawa mazu akukwata mwekalaña nimazu anakulumbulula nyevulu.
Tiyililenu hela kuloñolola mazu akukwata adi ha jw.org niha JW Library apu.
Ha jw.org, loñololenu nsañu yinateli kukwasha antu abulaña kumwesha hela kutaña, chidi neyi antu atañilaña hasikilini hela hayozelu yatañaña nyikanda nezu datiyakana.e
Mavidiyo adi namazu akukwata.f AYinsahu jaYehova edishaña mavidiyo ahoshaña nsañu yamuBayibolu mumadimi akubadika ha 100. Awa mavidiyo akwashaña antu kutiyishisha nikuzatisha nsañu yamuBayibolu.
Tiyililenu kumazu akukwata anawa mavidiyo analondelihu:
Kupompa niyuma yamwekanaña. Mukaayi kejima, tukweti yipompelu mutwadifukwilaña mulungu nimulungu. Twekalaña cheñi nakupompa kwamaneni hachaaka-hachaaka. Hanawa mavidiyo itwekalaña nawu haniku kupompa, twaloñeshaña cheñi mazu akukwata kulonda antu abulaña kumwesha atiyililiku. Amputamesu nianjika matu twayikeñelaña muntu wayilumbulwilaña yuma yitunakupompa niyuma yinakumwekana. Twayitambwilaña antu ejima nawa kwosi itwamwekeshelaña chaambu.
Wanenu iluña dakupompela didi kwakwihi.
Ilukenu chekalaña kupompa kwetu kwamaneni kwekalaña kamu hachaaka.
Mwakayi nakwanuka kufwa kwaYesu, kupompa kwalema nankashi kutwekalaña naku hachaaka.
José Luis Ayala washakamaña kuMexico. Wavwalikili njika matu nawa wekalili mputamesu chashikijiliyi yaaka 29. Talenu kupompa kwetu chikwalema kudi yena nichikwamukwashili kwikala ntañishi waBayibolu wamuwahi.
a Neyi muntu “wamweshaña wanyi” dikwila nawu wekala nakukala kwamesu amukañeshaña kwila yuma yimu muchihandilu chindi. Muchinu chibaaba, “wumputamesu” wunatalishi kudi muntu wabulaña kumona hela hanti niwabulaña kumwesha.
b Yehova didu ijina daNzambi. (Masamu 83:18) Talenu chibaaba chinakwila nawu “Nzambi Hinyi?”
c Ihulenu Chinsahu wudi wejima yayilumbulwili chitwadizaña Bayibolu chawaana.
d Nsona jawamputamesu jahayozelu, hiyozelu yatuñawu kulonda yikwasheña amputamesu niantu abulaña kumwesha kusoneka nikutaña namakasa. Ichi chozelu chekala natumapini twanyamukaña nikukuluka kulonda tutuñi nsona jawamputamesu. Muntu neyi wudi nansona jawamputamesu jahayozelu hakeñekaña nyikanda yayivulu yakupulintaku.
e Sofutiweya yatañaña mazu adi hasikilini niapu yatañaña mazu akukwata, yatañilaña hewulu kuzatisha mazu atuñilawu hakompyuta hela mazu akukwata dehi. Iyi yitwa yayikwashaña antu kuwana nsañu yinakukeñawu kutaña.
f Mazu akukwata dehi himazu abombelañawu kuvidiyo kulonda alumbululeña yuma yinakumwekana hasikilini.