YUMA Yakamanisha Wubanji Wenzaña Hamuloña waKuhelañana—Indi Bayibolu Yahoshahu Nawudi?

Madombu enzaña muloña wakuhelañana anaswejeliku kuvula makonu. Antu ayilukukaña muloña wachaambu chekowa, nsakililu yawu, kwafumawu, chekalawu, hela yuma yikwawu. Yilwilu yamuchidiwu yaleteshaña antu kutachika kutiya woma mumaluña mwashakamañawu. Nawa ekalaña nachineñi chabulaña kumana, nawa amakwawu afwaña muloña wanichi chineñi.

Bayibolu yashimwineñahu dehi kutalisha hamafuku itunakushakamamu nawu antu amavulu akekala “asweja kuzuwa, abula kukeña yuma yayiwahi” nawa akekala “abula kukeña akwawu.” (2 Timotewu 3:1-5) Komana antu akaleka wubanji wenzaña muloña wakuhelañana? Indi Bayibolu yahoshahu nawudi?

Chakamana wubanji wenzaña muloña wakuhelañana

Bayibolu yatulejaña nawu Nzambi wakafumishahu yuma yatama, nawa dichakelayi.

• “Antu atama akayijilumuna. . . ilaña amwovu akaswana iseki, nawa akazañalala chikupu nakushakama mukuwunda kwakweni.” (Isamu 37:9-11) Nzambi haketeja akamadombu kutwalekahu kukatisha akwawuku.

• “[Nzambi] wakakombola madilu ejima kumesu awu, nikufwa hikwakekalaku cheñiku, hikwakekala cheñi kudishona, kudila hela kuyeñaku.” (Chimwekeshu 21:4) Nzambi wakafumishahu yuma yakatishaña antu kumujimba muyitoñojoka, nikuyeña kunakutiyawu antu.

• “Kwamba kekala kusañuka.” (Yilwilu 24:15) Nzambi wakasañula yihita yawantu afwa dehi, kushilahu niantu ajahiliwu nawubanji wenzaña hamuloña wakuhelañana.

Chitunateli kwila nakuhelañana kudiku makonu

Bayibolu hiyatushiika hohu nawu yuma kumbidi yakawahaku, ilaña yatukwashaña cheñi kwiluka chitunateli kwila nakuhelañana kudiku makonu. Mwani tañenu kulonda mwiluki Bayibolu chiyakula awa malwihu alema:

• Chumanyi chikutukwasha kushinda chilwilu chakuhelañana, chilwilu chinateli kutuletesha kwikala namadombu? Talenu chahosha Bayibolu mumagazini yaKaposhi Kakutalila kadi namutu wunakuhosha nawu “Chakuleka Kuhelañana.”

• Muloñadi Nzambi chetejelayi makabi amuchidiwu kutwalekahu? Mwani talenu chalumbululawu chiwahi ñakwilu yamuBayibolu yanilu lwihu muvidiyo yinakwila nawu Muloñadi Nzambi Chetejelayi Makabi?