Yehova Chinandizishiyi Kwikala naYilwilu Yayiwahi

Kudi yuma yayivulu yantiyishili kuwaha, ilaña chuma chantiyishili kuwaha nankashi hinzatilu yanawa antu inawanini kuniyi Dipatimenti. Nawanini amanakwetu niahela atwansi azatileña mudimu yowumu ifuku niifuku. Hiyayimweneña kudi antu amavulu chazatileñawuku. Hela chochu, azatileña namuzañalu. Nzatilu yawu yankwashili kwiluka mwatalisha kumuzatila Nzambi nakudizoza.

Hadi yaaka yayivulu, Yehova nandizishi kwikala kambuñindi wukweti yilwilu yayiwahi. Ilaña lekenu niyileji ntahi chinatachikili kukeñakeña chalala hampinji yinadiña mukudifukula kwawaBuddha.

CHINATACHIKILI KUMUKEÑAKEÑA NZAMBI HENOHU NICHIDI KANSI

Navwalikilili muChicago, Illinois, U.S.A., nawa dimunakulilili. Yami wedi nawa nikweti anyikijami asatu. Anvwali jetu abuukilili kuChicago kufuma kuJapan muloña akuhweleleli nawu akwikala nachihandilu chachiwahi nankashi kuUnited States. Akeñeleña nawu etu anyanawu twakatañi mashikola ahewulu chikupu nawa twakekali namaheta amavulu muchihandilu.

Anvwali jami adiña aBuddha chikupu. Amama akulilili mwitala mwadiña tembeli mwakudifukwila aBuddha. Atata yawamama niamana kwawamama ayedi afuukwilihu kwikala akulumpi atenañawu nawu mamonku mukudifukula kwawaBuddha. Dichi chisaka chetu chalemesheli nankashi kudifukula kwawaBuddha hampinji yinakulileña. Neyi nafunti hetala kufuma kushikola, chuma chatachi chinelileña hikwocha insensi nikumulambula losu nimenji nkishi wawaBuddha itwadifukwileñaku. Hamulungu, twayileña nakudifukula kutembeli yawaBuddha kutwembilileña nkishi wadifwana naniwu, ilaña yena wadiña weneni nawa wawuru.

Inakwanuka hinadiña nayaaka 7, ifuku dimu natalileña nkishi wadiña mwitala detu nawa nadihwili nami, ‘Chihandilu chami chakekala ñahi neyi nafwi dehi?’ Mukudifukula kwawaBuddha andizishili nawu chinafwa nakekala kwiluña dacheñi kunakatwalekahu kuhanda namujimba waspiritu. Dichi nelukili nami ifuku dimu nakafwa. Nakekala namujimba waspiritu, hinakatwalekahu kwikala namujimba wawuntuku. Chumichi channeñesheli nankashi! Hohenohu natachikili kutoñojoka nami nikufwa tuhu kuwaha.

Chinashikijili yaaka kwakwihi na 15, natachikili kumona nami yuma yelileñawu aBuddha yadiña yamukunkulwayi. Kudi chuma chinabulili kwiluka muchihandilu chami. (Mat. 5:3) Ilaña, mumuchima wami nakuhweleleli nami kudi Nzambi wamumi nawa wukweti ñovu chikupu. Nakeñeleña nami nimwiluki. Natoñojokeli nami muBayibolu dimunukuwana ñakwilu yamalwihu inikweti. Dichi nalandili Bayibolu yaKing James hachidika chawaBuddha, iluña dinabulili kukuhwelela nami nateli kuwanaku iyi Bayibolu.

Hinadiña nayaaka 17, nadibulakeni namanakwetu Wilson Bashou mumukwakwa iku nidi nakawa kami. Wañihwili nindi, “Weluka yuma yatushiikayi Nzambi nindi wakatwilila kumbidi?” Ilu lwihu lwaletesheli twiikali nampinji yeneni yakuhanjeka nsañu yamuBayibolu. Wilson watañili Chimwekeshu 17:1 nawa wañihwili nindi, “Wunakutoñojoka neyi ‘menji amavulu’ hashakama mumbanda chivumbi atalisha kudi anyi?” Nelukili wanyi ñakwilu. Wanlejeli mazu ekala havasi 15, ahosha nawu awa menji emenañaku antu. Natiyili kuwaha chinelukili nami aYinsahu jaYehova alekaña Bayibolu kulonda yidilumbulwili yayeni. Chitwamanishili kuhanjeka, Wilson wanyinkeli mukanda wekala namutu nawu The Truth That Leads to Eternal Life. Iwu mukanda wawulombu wabulu, wahimpili chihandilu chami.

Chimwahitili mafuku 10, nayili nakupompa katachi Kwitala daWanta. Nakavulamena wanyi chantambwililiwu namuzañalu chikupu. Natwalekihu kupompa kufuma tuhu hadina ifuku. Kuhiñahu, manakwetu Wilson watachikili kundizisha Bayibolu. Nakeñeli nankashi yuma yinadizileña muBayibolu chakwila mafuku amakwawu twadizileña hadi maora 8. Anvwali jami chatiyiliwu nawu natachiki kudiza Bayibolu, atiyili kutama nawa anlejeli chakubula kuhita mumbadi nawu nileki kudiza. Ilaña chinatwalekelihu kudiza, nelukili chikupu nami yuma yinadizileña yalala. Napapatisheweli mu 1983.

NAFUMINI HAYUNIVESITI KULONDA NIZATI WUPAYINIYA

Hampinji yinapapatisheweleña, nadiña hayunivesiti yaya mpuhu nakudiza mudimu wawundotolu. Anvwali jami ashiliku muchima muloña akeñeleña nawu nitañi. Nateleli kutwalekahu kutaña iyi shikola, ilaña nakeñeleña kumukalakela Yehova chikupu mumudimu wampinji yejima.

Atata anlejeli nawu, “Chiwafuma hayunivesiti, nakakuhaña hetala!” Iyi nsañu yanneñesheli chikupu. Nayikeñeli anvwali jami, dichi nakeñeleña wanyi kwila chuma chikuyineñesha. Chumichi chaletesheleña nifumeña hashikola nawufuku nawa nayileña nakulomba iku inakutala nyilalanji yatutumbwa mwiwulu. Nalombeleña nami, “Eyi Yehova, mwani nkwashi kulonda nifuukuli chachiwahi.” Chinafumini hayunivesiti, atata anhañili hetala. Namutemesheleli manakwetu Wilson nakumuleja yuma yamwekeni. Dichi wanlejeli nindi niyi nakushakama nindi. Naloñejekeli yuma yami yejima muchola chimu nawa nakandamini basi nakuya kwitala dindi. Hohenohu natiyili kumuchima kwakasunukili chikupu. Nelukili nami nafuukuli chachiwahi.

Natiyili neyi ananfumishi mumpompa! Haniyi mpinji nekalili wakasunuka kumukalakela chikupu Yehova. Chafuminimu, natachikili wupayiniya mu 1984.

Hinazatileña wupayiniya, Yehova wankwashili kwikala nayilwilu yayiwahi, chidi neyi nyikoyi. Ifuku dimu, natiyili wuudi wakuya nakushimwina. Chuma chaletesheli muloña hikwadiñahu wakuya nindi nakushimwina namwaanaku. Hela chochu, nayili. Chinashimwininiku maora antesha, nayili hetala dakukumishaku. Nazeyeli nikutiya wuudi, nawa kwamwekeneña neyi nvula yikunoka. Nadihwili nami, ‘Nikombokeli hohenahanu?’ Chinakandamineña hamankenka nakuya hetala damuchisatu, namweni kansi weyala wakuPhilipines nemani hambidi yami. Nadihoshesheli mumuchima nami, ‘Muntu wamuchidiwu kwila yeteja kudiza nehi.’ Natoñojokeli mwaluwa! Natachikili kudiza nindi Bayibolu, nawa wekalili Chinsahu chaYehova.

NADIZILI YUMA YAYIVULU HABETELI YAMUBROOKLYN

Hanyima yakushakama namanakwetu Wilson hadi yaaka yiyedi, antambikili kuya nakuzatila haBeteli yamuBrooklyn mu 1985. Neyi chinashimuna dehi, anlejeli kuzatila kuDipatimenti Yalamikaña Nyikanda. Ifuku dimu nazatishileña ikina dakubaza nachu nyitu hamakava anyikanda, nawa naluwañesheli. Chafuminimu, makava amavulu nankashi akisikili. Amanakwetu anlejeli nawu nimulejimu mukulumpi waDipatimenti chuma chamwekeni. Nalumbulwili yuma yaletesheli niluwañeshi, ilaña kudi chuma chimu chinabulili kwila. Mukulumpi waDipatimenti wanlejeli nezu dawunda nindi, “Chalema nankashi mpinji yejima kulomba kwanakena.” Haniyi mpinji nadizili chichalemena kwiteja nami naluwañeshi nikuhosha nami, “Añanakenuku mwani.”

Nadizili cheñi chakukalakela antu kuhitila mukushinshika chazatileñawu nakashinshi antu anakalakeli haBeteli hadi yaaka yayivulu. Ifuku dimu hachayili twashakamini kumesa yimu naManakwetu Milton Henschel, wadiña membala Mwizanvu Dalombolaña. Hadina ifuku, mukapeka kakudiila mwadiña antu amavulu nankashi chakwila amanakwetu ahanineña yakuda adiña namudimu weneni. Ami niamanakwetu amakwawu atwansi ashakamini kuniyi mesa twatachikili kudihoshesha namazu amwishina netu anakuhana swayi wanyi yakuda. Manakwetu Henschel wanyamukili wumweneni nawa watachikili kuzatila hamu nawamanakwetu ahanineña yakuda. Ichi chilwilu chakudizoza chamwekesheliyi manakwetu nakachivulamena wanyi. Chañanukishili chuma cheliliyi Yesu nawapostolu indi.—Yow. 13:​3-5.

“WATELA KUDIZA CHIJAPANESE!”

Mu 1987, nayili kuJapan nawa natiyili kuwaha nankashi hakumona iyena nikudizoza kwadiña nawakakushimwina. Nakeñeleña kuyikwasha, ilaña nelukili wanyi chiJapanese. Michiko Oda, muhela wakalakeleleña haBeteli, wantalili mumesu swi-i nakunleja nindi, “Watela kudiza chiJapanese!” Nawa dichinelili. Nelukili wanyi nami awa mazu anlejeliyi akuhimpa chihandilu chami chejima.

Chimwahitili tukweji twantesha, anlejeli kutachika kupompa nachipompelu chazatishileña idimi dachiJapanese muNew York. Kudiza chiJapanese kwankwashili kwikala nakukooleka kwakuzata nyidimu yayivulu mukuloñesha kwaYehova Nzambi. Mu 1989, nayili nakupompa katachi kukupompa kweneni kwedimi dachiJapanese muLos Angeles, California. Chinamumweni hohu muhela Miwako Onami, payiniya wahemeniku muchimwenu, muchima wami washikeneni dakweta.

Twadisumbwili mu 1992, nawa twatachikili kuzatila hamu haBeteli muBrooklyn. Miwako himumbanda watoñojokelañaku chikupu, nawa wakwashaña antu mpinji yejima. Yilwilu yindi yayiwahi yinankwashi ninami kwikala namuchima wakwakamena antu. Hichawaana chanyinkayi Yehova—wanzañaleshaña nankashi nikunkundeja.

KUZATILA HAKASANJI KAMUJAPAN NIWUPAYINIYA WADIMENA

Mukuhita kwampinji, anvwali jaMiwako ejima ayedi muJapan, akatili nankashi. Dichi twalombeli netu atutemeshi tuyi nakuzatila hakasanji kamuJapan hakwila nawu twiikali kukamwihi nawena kulonda tuyakameneña chiwahi. Twayili kuJapan mu 1999.

Chisaka chaBeteli muJapan chatutambwilili chiwahi nankashi, nawa twatachikili kwinjilila chihandilu chamunidi ituña. Kubombelahu, natachikili kwimbujola yilwilu yayiwahi yamwekesheleñawu amanakwetu niahela amuJapan, chidi neyi muchima wakuhana nichisambu chamwekesheleñawu. Neyi hadi mudimu wunakuzatawu, ashañaku nankashi muchima nawa azatilaña hamu mukunuñañana. Tuneluki ñahi chumichi? Kwesekeja nachisemwa chamuJapan, antu alemesha nankashi kuzatila hamu mudimu mukunuñañana chatela wukeñeña kuzata nkaweyi. Yilwilu yawu yayiwahi yankwashili kwikala wadizoza hampinji yinnakuzata nawakwetu nikwiluka nami mudimu innakuzata wanyanya ilaña wakwashaña mudimu waYehova kuya hambidi.

Hela chochu, muloña wakushiyashana kwayisemwa, mpinji jikwawu chankalilileña kwiluka chaletesheleña amanakwetu muJapan afuukuleña yuma munjila yaambuka. Nadizili kwikala nachilwilu chakudiwunjika nikubula kuhila swayi. Haniyi mpinji nahimpili yitoñojoka yami, nawa nelukili nami Yehova nateli kukiswila chuma chejima chitunafuukuli chakala hohu tulondela wunlomboli windi wahanañayi kuhitila mukuloñesha kwindi. Nkumininaku, Yehova diyi waleteshaña yuma yitunakwila yizatiki chiwahi.

Kakavulu nesekejaña yuma yinadizili haBeteli nayuma yadiziliyi kaprofwetu Mosi. Yehova wamukwashili Mosi kwikala nachilwilu chakudikehesha hadiñayi kabiña hadi yaaka 40. Neyi chamwekeni kudi Mosi, ninami natañili shikola yahewulu. Muloña waniyi shikola, nekalili nachilwilu chakudivwimba nikudishindamena. Kuzatila haBeteli kwankwashili kwikala wadizoza nikumushindamena Yehova. Neyi chadiwunjikiliyi Yehova hamukwashileñayi Mosi kwikala nayilwilu yayiwahi, dichinadiwunjikiyi ninanami hadi yaaka yayivulu yinahitihu.

Anvwali jañodami ejima ayedi twayihembeli hadi yaaka kwakwihi na 24 kushika nimpinji yafwiliwu. Kwadiña kutemesha mafoni kakavulu, kwakama nikuya kuchipatela. Yikatu yawakawuku awambanda, aMasako, yaswejeleleñaku chakwila atachikili nikukañanya kwenda. Chayikalilileña akawuku kuya nakupompa nikushimwina. Chikwashalili nyilungu yantesha nakufwa, atachikili kwendela mukakinga kawayifwayi. Hela chakwila amweni kukala kwejimiku, hiyalekeli kumukeña Yehovaku. Atumbileña chimwemweta mpinji yejima yinakuhoshawu hachalala. Chakutalilahu chawaMasaku chakumukalakela Nzambi nikwikala namuzañalu hichikweti muloña nakukala kuyahitileñamuku, hichuma chinakunkwasha kutwalekahu kumukalakela Nzambi.

Mu 2024, twatambwilili kuhimpa kweneni chikupu muchihandilu chetu. Hanyima yakuzatila haBeteli hadi yaaka kubadika ha 30, atwinkeli mudimu wakuya nakuzatila muchipompelu. Chayinu mpinji tunakuzatila wupayiniya wadimena hachituutu chaOkinawa nawa twashimwinaña yisaka yashakamaña kwakwihi nachilombu chawamashidika. Yuma yitwadizili haBeteli yatukwashili kushikena kwiteja mudimu wawuha watwinkeliwu. Twazataña nañovu kutwalekahu kwikala nandandanda yayiwahi nikuzatisha chiwahi mpinji yetu kuhitila mukutwamijaku chikupu mudimu wetu wakushimwina. Yehova natukwashi kwikala nawatudizi anekali neyi chisaka chetu. Tunadimweni yuma yayiwahi yafumaña mukumwekeshela antu kukeña. Ami nañodami Miwako twamusakililaña Yehova hefuku-hefuku haniwu mudimu wawuwahi.

NUKUTWALEKAHU KUMWITEJA YEHOVA KUNDIZISHA CHIKUPU

Chisaka chetu chaleka dehi kunkañesha, hela chochu, kanda adizi chalala. Hela chakwila yuma yidi muniyi njila, Yesu watushiika nindi ejima akushiyi yisaka yawu nakwikala atumbanji twindi, akatambwila mapampa 100 awakwawu akakudifukula kwikala neyi yisaka yawu. (Maku 10:​29, 30) Ichi dichuma chinammwekeni ninami. Nukutwesha wanyi nikuchinda yisaka mwahita kaayi yinammwekesheli kukeña nikuñakamena neyi muntu wamuchisaka chawu.

Nichidi nawowuna mukanda waTruth wanyinkeliwu kudi manakwetu Wilson. Neyi niwutala, wañanukishaña Yehova chankwashiliyi kumuwana. (1 Kushi. 28:9) Nukutwalekahu kumwiteja Yehova kundizisha nikukwasha amakwawu kwiluka chalala chatwalaña kuwumi wahaya nyaaka.