Yikwashenu Atudizi Enu aBayibolu Amwiluki Yehova Chiwahi

1. Mwatiyaña ñahi neyi mumona kadizi nakupaminaku?

MWATIYAÑA ñahi neyi kadizi wenu yenza nakupompa katachi, yatachika kwakulahu nikulejaku antu yuma yakuhwelelayi nawa mukuhita kwampinji yadihana kudi Yehova Nzambi? Chakadi nikujina, muchima wenu wasumpokaña namuzañalu! Hela chochu, neyi tukwasha kadizi wetu kupama kuspiritu, Yehova diyi watela kutambwila kalemesha kejima. Twamushimekaña Yehova neyi tumona chinakukwashayi muntu kupama kuspiritu.—1 Kor. 3:​5-9; 3 Yow. 3, 4.

2. Yehova wakeñaña nindi atudizi elidi? (1 Timotewu 2:​3, 4)

² Nzambi wakeñaña nindi “antu ejima ayamwini nawa eluki chalala chikupu.” (Tañenu 1 Timotewu 2:​3, 4.) Yehova wakeñaña nindi antu amwiluki chiwahi nawa eluki yuma yejima yayiwahi yelayi dehi niyakelayi kumbidi. (Yere. 9:24) Hakwila muntu yeli mwenimu, watela kwiluka chalala chikupu. Mazu akwila nawu “kwiluka chalala” atalisha mudihi? Atalisha wanyi mukwila nawu muntu watela hohu kwiluka nsañu yahosha hadi Nzambi. Mutu wumu wadiza nankashi nsañu jamuBayibolu wahosheli nindi: “Awa mazu atalisha kudi muntu wadizaña yuma munjila yikuhimpa chikupu chihandilu chindi.” Neyi kadizi yamwiluka Yehova chiwahi, ichi chalala chahimpaña chihandilu chindi chikupu. Nawa chamukwashaña kwikala nakuchiñeja kwakwikala “nawumi wahaya nyaaka.”—Yow. 17:3.

3. Yumanyi yitukuhanjekahu muchinu chibaaba?

³ Yehova watwinka mudimu walema wakukwasha antu kulonda amwiluki. Muchinu chibaaba tukuhanjeka hanawa malwihu: Muloñadi atudizi aBayibolu chatela kumwilukilawu Yehova chiwahi? Tunateli kuyidizisha ñahi hakwila amwiluki Yehova chekalayi? Nawa tunateli kuyikwasha ñahi kuzatisha yuma yinelukiwu hadi Yehova muchihandilu chawu?

MUKWASHENU KADIZI YAMWILUKI YEHOVA CHIWAHI

4. Kwesekeja naMaku 12:​30, chumanyi chacheni chitwatela kufwilaña kwila hampinji yitunakulombola kadizi?

⁴ Yesu wahosheli nindi lushimbi lwabadika hanshimbi jejima hikumukeña Yehova namuchima wetu wejima, nawumi wetu wejima, nayitoñojoka yetu yejima ninañovu jetu jejima. (Tañenu Maku 12:30.) Kadizi watela kumwiluka Yehova hakwila nawu yamukeñi. Tunakukeña kadizi wetu yapapatishewi muloña wakumukeña Yehova, bayi neyi muloña nakukeña nindi yekali ibwambu detu hela ibwambu dawaYinsahu amakwawu indi kwiji muloña wansañu yamuBayibolu yinakudizayi yinakumutiyisha kuwahaku. Dichi chuma chacheni chitwatela kufwilaña kwila hampinji yitunakulombola kadizi hikumukwasha kulonda yamwiluki Yehova nikumukeña.

5. Kumukeña Yehova kunateli kumusañumuna kadizi wenu kwiladi?

⁵ Kukeña nakwovwahila jendelaña hamu. Neyi kadizi wenu yamwiluka Yehova chiwahi nikumukeña, wukumwovwahilaña. Yesu wahosheli nindi: “Hakwila nawu kaayi keluki nawu namukeña Tata, inakwila neyi chanlejeliyi Tata kwila.” (Yow. 14:31) Munjila yoyimu, neyi kadizi yamukeña Yehova kubadika chuma chidi chejima, chikumusañumuna kumwovwahila nikwikala washinshika kudi yena.—1 Yow. 5:3.

6. Kumwiluka Yehova chiwahi kukumukwasha ñahi kadizi wenu hampinji yinakufuukulayi? Shimunenu chakutalilahu.

⁶ Neyi atudizi aBayibolu amwiluka Yehova chiwahi, chikuyipelelaña kufuukula chachiwahi. Toñojokenu hanichi chakutalilahu, muntu wunakukeña kwiluka chakwendesha honda hakukumina hohu kutala chinakwendeshawu antu hela kutaña nshimbi yahosha hachakwendesha hondaku. Ilaña chuma chikwawu chikumukwasha hakwila yeluki chakwendesha chiwahi, watela kudiza hadi mpinji yayilehi. Kudiza mapampa amavulu kukumukwasha kukulukila mukwendesha nawa wukwiluka yuma yayivulu. Munjila yoyimu, kadizi wukumwiluka Yehova chiwahi kuhitila muyuma yinakudizayi nimuyuma yayiwahi yinakumonayi yinakufuma muyuma yinakufuukulayi kuzatisha yishina yamuBayibolu. Neyi yatwalekahu kumwiluka Yehova chiwahi nawa yamona chinakumukwashawu kudi Tata yindi wamwiwulu, wukufuukulaña yuma chachiwahi.

7. Kumwiluka Yehova kwamukwashili ñahi Yosefu kufuukula yuma chiwahi?

⁷ Kumwiluka Yehova chiwahi kwamukwashili Yosefu hamudimbekeleñawu kudi ñoda Potifwari nindi yakaami nindi. Kufuma tuhu kuwansi windi, chakadi nikujina Yosefu watiyileña nsañu yahosha hadi Adama naEva nihadi Abarahama naSara. (Kutach. 2:24; 20:​3, 6) Iyi nsañu yamukwashili Yosefu kwiluka Yehova chamonañayi wulu nichawaana chakubulakana kweyala namumbanda. Chineli Yosefu wamwilukili Yehova chiwahi nankashi, wakaanini kafuta kañoda Potifwari nawa wamulejeli nindi: “Nukukoñeladi chumichi chasweja kutama nakumuvulumuna Nzambi?” (Kutach. 39:​7-9) Yosefu welukili yuma yamweneñayi Yehova nindi yayiwahi niyamweneñayi nindi yatama. Welukili yuma yadi kumuneñesha Nzambi yindi. Chafuminimu, Yosefu wafuukwili chiwahi. Neyi tuyikwashaña atudizi etu kumwiluka Yehova chiwahi nikwiluka yuma yakeñañayi, niwena akufuukulaña yuma yikumuzañalesha.

MUDIZISHENU YAMWILUKI YEHOVA CHEKALAYI

8. Munateli kuzatisha ñahi mukanda waMunateli Kwikala naMuzañalu Haya Nyaaka! hakwila mumukwashi kadizi wenu kumwiluka Yehova chiwahi?

⁸ Hanu dinu munateli kumukwasha ñahi kadizi wenu hakwila yamwiluki Yehova chekalayi? Mwatela kwila mwenimu kuhitila mukuzatisha malwihu. Yehova niyena wazatishili malwihu kubadika ha 50 hakwila nawu yamukwashi Yoba kumwiluka chiwahi. (Yoba 38:1–41:34) Malwihu ekala mumukanda waMunateli Kwikala naMuzañalu Haya Nyaaka! ayisoneka munjila yakwila amukwasheña kadizi kumwiluka Yehova chiwahi nankashi. (Talenu chikasha chinakwila nawu “Malwihu Atukwashaña Kudizisha Chachiwahi.”) Dichi zatishenuña awa malwihu hakumukwasha kadizi wenu hakwila yamwiluki chiwahi.

9-10. (a) Yumanyi yatela kwilawu atudizi etu hakwila nawu nsañu yinakutañawu muBayibolu yiyikwashi? (Yakoba 5:11) (b) Malwihwinyi atela kudihulayi kadizi neyi nakutaña nsañu yahosha hadi Danyeli hakwila yeluki yuma yamuzañaleshaña Yehova niyamuneñeshaña?

⁹ Hampinji yitunatachiki hohu kudiza Bayibolu nawatudizi, twatela kuyikolesha kulonda atachiki kutaña Bayibolu hefuku-hefuku.a Hanu dinu tunateli kuyikwasha ñahi hakwila nawu elukilihu nsañu yayivulu hampinji yinakutañawu? Tunateli kuyileja netu mpinji yejima yinakutañawu nsañu yamuBayibolu, atela kutoñojoka hachaletesheli Yehova ashi oyu nsañu Mwizu dindi nichiyinakuyikwasha kwiluka yilwilu yindi. Talenu yuma yadizililiyi kambanji Yakoba kunsañu yaYoba. Yakoba welukili nindi Yoba womikili chikupu. Hela chochu, muniyi nsañu yaYoba wadizililiku cheñi nindi Yehova wukweti wushona chikupu niluwi.—Tañenu Yakoba 5:11.

¹⁰ Tunakukeña atudizi etu kwiluka nsañu yahosha hadi antu ashimunawu muBayibolu hakwila eluki yuma yamutiyishaña Yehova kuwaha niyamuneñeshaña. Chakutalilahu, hadaha kadizi wetu natali hachati yidi namutu nawu “Chakutachika Kutaña Bayibolu” mumukanda waMunateli Kwikala naMuzañalu Haya Nyaaka! nawa natuleji nindi natondihu kutaña nsañu yinakuhosha hadi Danyeli muwina wawanyitupa. Tunateli kumukolesha kutoñojoka chikupu hanawa malwihu adi neyi: ‘Muloñadi Yehova chamwamwininiyi Danyeli? Iyi nsañu yinakunkwasha kwiluka yumanyi yinatela kwila hakwila nimuzañalesheña Yehova?’ (Dan. 6:​10, 22) Nateli cheñi kudihula nindi: ‘Yumanyi yayimwekeneni ana amayala amutwikileña Danyeli nyiloña? Iyi nsañu yinakunkwasha kwiluka yumanyi yamuneñeshaña Yehova?’ (Dan. 6:​4, 5, 24) Nkumininaku, twatela kumuleja netu yatoñojoki hayilwilu yikwawu yaYehova yidi munoyu nsañu yinatañiyi.—Dan. 6:​26, 27.

11. Muloñadi chichalemena kumukwasha kadizi wetu kumona nindi Yehova diyi wunakumudizisha?

¹¹ Twatiyaña kuwaha neyi tumona kadizi wetu nakusakilila hachinakumukwasha yuma yamuBayibolu yinakudizayi. Hela chochu, chalema nankashi kumukwasha kulonda yamoneña nindi Nsulu yayuma yejima yinakudizayi hiYehova, Ntañishi Wabadika. (Isa. 30:​20, 21) Mpinji jikwawu kadizi wetu nateli kutusakilila hayuma yitunakumudizisha, nawa hadaha nateli nikutuhameka nindi twadizishaña chiwahi nankashi. Hela chakwila chatama wanyi kutusakilila muniyi njila, twatela kumuleja netu Yehova diyi watela kutambwila mpuhu nikalemesha.

MUKWASHENU YAZATISHEÑA YUMA YINELUKIYI HADI YEHOVA

12-13. Kumwiluka Yehova chiwahi kunateli kumukwasha ñahi kadizi neyi yawana nsañu yamuBayibolu yinamukalili kutiyishisha? (Talenu nimwevulu.)

¹² Kadizi wetu watela kuzatishaña yuma yinelukiyi hadi Yehova hakwila yimukwasheña muchihandilu chindi. Hanu dinu, munateli kumukwasha ñahi kadizi wenu hakwila nawu yazatisheña yuma yinelukiyi? Chatachi, mudizishenu chakwanuka yuma yelukayi dehi hadi Yehova neyi yataña nsañu yamuBayibolu yinamukalili kutiyishisha. Chakutalilahu, neyi nakutaña hawunsompeshi waNzambi, hadaha wukutachika kujinoka chaletesheli Yehova yajilumuni antu amakwawu ilaña amakwawu nehi. Munateli kumukwasha ñahi kadizi wenu kutoñojoka haniyi nsañu munjila yayiwahi?

¹³ Munateli kumukolesha kutoñojoka hayuma yinadiziyi hachekalayi Yehova. Chakutalilahu, munateli kumuleja kudihula awa malwihu, ‘Yehova walemesha ñahi wumi? (2 Pet. 3:9) Chumanyi chalema cheliliyi hakwila nawu yatwamwini hela chakwila tudi akanshidi? (Efwe. 2:​4, 5) Komana Yehova wababeshaña antu akadi muloña? Indi neyi muntu nakoñi muloña, komana hiyamubabeshañaku?’ (Kwid. 34:​6, 7) Mpinji jikwawu, Bayibolu yinateli kushimuna wanyi yuma yejima yikutukwasha kwiluka chinaleteshi Yehova eli yuma munjila yambukaku. Kafwampi, hitwatela kwiluka iyi yuma yejimaku. Twamwiluka Nzambi yetu, nawa twakuhwelela chikupu netu mpinji yejima welaña yuma yaloña.

14. Munateli kumukwasha ñahi kadizi neyi kudi muntu wunakubula kutiyañanayi nindi muchipompelu?

¹⁴ Talenu chuma chamuchiyedi chatela kwilayi kadizi hakwila yeluki chakuzatisha yuma yinadiziyi hachekalayi Yehova. Twili netu kadizi wenu watachika dehi kupompa, ilaña chinakumukalila kutiyañana namuntu wumu muchipompelu. Hadaha anamuneñeshi kudi owu mukakushimwina. Mukoleshenu yatoñojoki hachayimonañayi Yehova amanakwetu niahela. Chakutalilahu, nateli kudihula nindi, ‘Chumanyi chelayi Yehova hakwila yayimwekesheli awa amanakwetu niahela kukeña? (Yow. 3:16) Walemesha ñahi kunuñañana kutwekalaña naku nawamanakwetu niahela? (Mas. 133:1) Watiyaña ñahi neyi yamona tunakufwila kuhemba chiwahi iku kunuñañana?’ (2 Kor. 13:11) Mukwashenu yeluki nindi Yehova wukuzañalala chikupu neyi tusha muchima nankashi hayilwilu yayiwahi yidi nawakwetu chatela tushi maana hayiluwa yawu.

15-16. (a) Kadizi nateli kumwimbujola ñahi Yesu neyi kudi chuma chalema chinakukeña kufuukulayi? (Yowanu 8:29) (b) Muhela Marianne wamukwashili ñahi kadizi windi kufuukula chiwahi? (Talenu nimwevulu.)

¹⁵ Nkumininaku, munateli kumukwasha kadizi wenu kuzatisha yuma yinadiziyi hachekalayi Yehova hakwila nawu yafuukuleña chiwahi. Munateli ntahi kumuleja nsañu yekala mukudiza 35 mumukanda waMunateli Kwikala naMuzañalu Haya Nyaaka! kudi namutu nawu “Chitunateli Kufuukula Chiwahi.” Hanu dinu chikwikala ñahi neyi kadizi wenu nalombelihu nikusandujolahu hanoyu nsañu ilaña chinakumukalila kufuukula chiwahi? Hadaha nakañanyi kwiluka chishina chamuBayibolu chatela kuzatishayi hakwila yafuukuli chiwahi. Munateli kumuleja nenu yatoñojoki hadi Yesu. Indi Yesu wafuukwileña ñahi? Wahosheli nindi: “Mpinji yejima nelaña yuma yamutiyishaña [Tata yami] kuwaha.” (Tañenu Yowanu 8:29.) Mukoleshenu yadihuli nindi, ‘Kwesekeja nayuma yinnasandujoli niyinnadizi hachekalayi Yehova, nateli kufuukula ñahi munjila yikumuzañalesha Yehova? Mukwashenu yeluki nindi neyi chuma chikufuukulayi chikumuzañalesha Yehova, dikwila nawu nafuukuli chachiwahi.

¹⁶ Kudi chuma chalema chakeñeleña kufuukulayi mumbanda wumu wadizileña Bayibolu muChile. Amukanjikijileña kudi antaña jindi nawu yeteji mudimu wakutambula mali amavulu ilaña wukumukañeshaña kupompa. Muhela Marianne, wamudizishileña Bayibolu, wahosheli nindi: “Namukolesheli nami yatoñojoki hachuma chinakukeña kufuukulayi neyi chakwila chikumuzañalesha Yehova indi kwiji kumuneñesha. Namukolesheli cheñi nami yalombelihu kudi Yehova nawa yamoni chikumwakulayi. Chafuminimu, wakaanini kwiñila owu mudimu nawa hashimbwili wanyi wawanini mudimu wamushilileñaku mpinji yakupompa.” Marianne, wamulejeli wanyi kadizi chatela kufuukulayi, ilaña wamukwashili hohu nindi yatoñojoki hayuma yelukiliyi hachekalayi Yehova. Chafuminimu, chumichi chamukwashili iwu kadizi kwikala nawubwambu wakola naMarianne ninaYehova. Muhela Marianne wahosheli hadi kadizi windi nindi: “Welukili nindi Yehova watwakamenaña neyi tusambila kutwamijaku kudifukula kwindi muchihandilu chetu.”

NKISU YATAMBWILAÑAWU ANTU AMWILUKAÑA YEHOVA CHIWAHI

17. Kubombela hakwiluka yuma yalema, chumanyi chikwawu chitunakukeña netu atudizi etu eluki?

¹⁷ Atudizi etu elukaña ntañishilu yayivulu yalema hampinji yitunakuhanjeka nawu nsañu yamuBayibolu. Chakutalilahu, adizaña yuma yakutachikilahu yalema, chidi neyi chekalañawu afu, ifutu danyiloña niyuma yakela Wanta waNzambi. Nawa elukaña chitwazatilaña hamu etu aYinsahu jaYehova, chidi neyi yuma yamwekanaña hakupompa kwetu, nyidimu yazatañawu akulumpi niIzanvu Dalombolaña. Hela chochu, hitunakukeña eluki hohu yumiyiku, ilaña tunakukeña amwiluki Yehova chiwahi.

18. Nkiswinyi yatambwilañawu antu amwilukaña Yehova?

¹⁸ Kwenoku kukooleka kutukweti hakutwinka mudimu wakudizisha antu hakwila amwiluki Yehova! Nichayinu mpinji, antu amwilukaña Yehova nikudifukula kudi yena ekalaña namuzañalu chikupu. (Mas. 25:​12-15) Nawa kumbidi, ejima amwilukaña Yehova akekala nawumi wahaya nyaaka. (1 Yow. 5:20) Ilaña kudi nkisu yikwawu yitwatambwilaña chayinu mpinji. Bayibolu yatulejaña nawu antu azataña nañovu kumwiluka Yehova nikumukeña niwena “[ayilukaña] kudi yena.” (1 Kor. 8:3) Mwamweni, Nzambi yetu Wañovu Jejima, watumonaña nawa watwiluka nindi tudi amabwambu jindi. Kwenoku kukooleka kutukweti kwakumwiluka chiwahi Nzambi walala wumu hohu!