Nyakalenu Kumanisha Kukala Nebwambu Denu!
KUDIHU manakwetu hela muhela wunayineñeshi chakwila wubwambu wenu wunaluwankani? Hakwila mumanishi kukala kulonda mutwalekihu kwikala amabwambu, mwatela kuzatilahu swayi-swayi nikwila yuma yikuyikwasha kukolesha wubwambu wenu.a
Chakutalilahu, neyi muntu nakotoki, ndotolu watela kuzatilahu nawa nkumininaku wukuleka kutiya kukata. Ilaña neyi ndotolu kuzatilahu swayi nehi, kukata kukutwalekahu. Nawa chasweja kutama, ifwa dinateli kuheña chakwila hidakolokahuku.
Kufwana ifwaha dinakotoki, neyi wubwambu wetu nawakwetu akaKristu wunaluwankani, twatela kunyakala kumanisha kukala. Neyi nehi, wubwambu wetu wukutwalekahu kwikala waluwankana. Mukutachika kudihembela nkunyi, nawa nkumininaku, wubwambu wenu wukumana. Yesu wahosheli nindi: “Nyakalaku kumanisha kukala.” (Mat. 5:25) Dichi yenu muhanjeki nebwambu denu hanoyu nsañu munjila yayiwahi ilaña chakadi kuhita mumbadi. Hela chochu, chaswayi wanyi kwila mwenimu. Muloñadi? Talenu yuma yiyedi yinateli kuletesha.
Chatachi, hadaha munakukeña wanyi kwilahu chuma chidi chejima hakwila mumanishi kukala kunamwekani, muloña munakasunuki wanyi kuhosha hanoku kukala.b Toñojokenu hakukala kwamwekeni hakachi kaEyodiya naSintiki, ahela akaKristu akañenyi kumanisha kukala kwadiñawu naku. Iku kukala kwatwalekelihu chakwila nikapostolu Pawulu wadiña kwakulehi nankashi kuRoma, watiyili iyi nsañu. Wayikonkomweneni nindi azati nañovu kulonda ekali cheñi amabwambu. (Fwili. 4:2) Hakwila akoleshi cheñi wubwambu wawu, ateleli kwikala adizoza, kuhanjeka munjila yayiwahi nikudanakena chakufuma hamuchima.
Chamuchiyedi, hadaha mukukeña nenu mukwenu yeteji nindi diyi wunaluwañeshi. Ilaña chuma chacheni chimunakufwila hikwikala cheñi amabwambu, bayi kudiyiñisha hela kufwisha mukwenu nanyiloñaku. Neyi ndotolu nakuuka muntu wunakotoki ifwaha, wukusha nankashi muchima hakumuuka bayi hakukeña kwiluka nsañu yejima yaletesha yakotokiku. Neyi munakuhanjeka nebwambu denu, bayi musha muchima hakukeña kwiluka waletesha kukala kumwekaniku. Ilaña, toñojokenu hachimwalemesha wubwambu wenu nawa shenu muchima hayuma yimwatela kwila hakwila mwiikali cheñi amabwambu.
Neyi mudi nakukala namanakwenu hela muhela, yenu muhanjekihu dodalelu kulonda mwiikali cheñi amabwambu. “Bayi muhumisha itena saña mwahililaku.” (Efwe. 4:26) Neyi mwila yuma yikuyikwasha kumanisha kukala mukunyakashana, mukuhemba “kunuñañana [kwetu kutwekalaña] naku naspiritu.”—Efwe. 4:1-3.
a Neyi akaKristu ayedi anadineñeshi muloña wakukala kwanyanya kunamwekani, atela kuhanjekahu kwakankawawu nikudanakena chakufuma hamuchima. (Mat. 5:23, 24) Ilaña neyi kukala kweneni, atela kulomba wukwashu kudi akulumpi. (Mat. 18:17) Hela chochu, mukaKristu watela hohu kulomba iwu wukwashu hanyima yakulondela njila jashimunawu haMatewu 18:15, 16.
b Neyi anatuneñeshi kudi mukwetu mukakwitiya, ilaña wubwambu wetu wuchidi wakola, tunateli kudiwulaku hohu kunochu chuma chinamwekani.—Yish. 26:20.